Ekiriro
א [Aleph]*
1 Iyooo! Omuyi owabya iniaswiremo abandu, lino abiribyamo embwera!*
Omuyi owabyamo bandu banene omo kati-kati k’ebihanda abiribya ng’omukwa-kali!
Omuyi owabya ng’omughole omo kati-kati k’esyongabiro* abirikaswa erikola omubiiri w’erikaswa!
ב [Beth]
2 Akalira kutsibu omo kiro, n’amatema wiwe aswireko emisonia.
Omo bosi abamwanza simuli n’omughuma oyukamukiranaya.
Abalikyabo bosi babirimuhotera. Babiribya nzighu siwe.
ג [Gimel]
3 Yuda abiriya omo bunyewa, inianemwaghalwa, kandi akendibya omo bukobe obukalire.
Abirikaswa erikala omo kati-kati k’ebihanda. Syawite omwanya w’eriluhukiramo.
Abosi abakamwaghalaya mubakamuhikira iniane omo maligho.
ד [Daleth]
4 Esyonzira esikaya e Sioni siri omo kiriro, kundi sihali n’omundu n’omughuma oyukasa oko kiro kikulu.
Emilango yako yosi yabiritsandibwa. Abahereri bamo banemusimba.
Ababikira* bamo bali omo bulighe bunene. Naye anemuhangya-hangya kutsibu.
ה [He]
5 Esyonzighu siwe syo syabiribya mukama* wiwe. Esyonzighu siwe sisitsomene!
Yehova abirimuletera obuhanya busana n’amakosa wiwe mangyi.
Abana biwe babiriya omo bunyewa ibane embere sy’enzighu.
ו [Waw]
6 Omwali we Sioni syakiriko olukengerwa.
Abakulu bomo Sioni bali ng’esyongabi esyabiribula ebiti.
Bakaghenda ibanaluhire embere sy’abakakwamirirabo.
ז [Zayin]
7 Omo biro ebyo Yerusalema akaghalawamo n’eribula obwikalo, anemwibuka
Ebindu byosi by’obughuli ebyo abya nabyo kera.
Omughulu abandu biwe bawa omo byala by’enzighu kandi omughulu sihabya oyo wangamuwatikya,
Esyonzighu siwe musyamulangira, kandi musyamusekererya* akayikunungukako.
ח [Heth]
8 Yerusalema abirikola erilolo erikalire.
Kyo kyabirileka iniabya kindu ekikita esyonye.
Abosi ababya ibamusikirye balimumupokya, kundi babirilangira obusoni bwiwe.
Anemuyisimbira n’eriyibindukako busana n’esisoni.
ט [Teth]
9 Omutsafu wiwe abirihira ekitingu ky’omo syoropo siwe.
Syalilengekanaya engebe yiwe nga ikendisyabya yiti omo biro ebikasa.
Abandu mubasweka bakalangira akatera. Syawite omundu oyo wangamukirania.
Yehova, langira ngoko ngaghalawa, kundi enzighu yabiriyihalamba.
י [Yod]
10 Enzighu yabiripura ebindu biwe byosi by’obughuli.
Mwakalangira ebihanda bikingira omo mwanya wiwe owabuyirire,
Ebihanda ebyo wabugha uti sibitolere erihindana haghuma n’abandu baghu.
כ [Kaph]
11 Abandu bamo bosi banemusimba. Banemurondya omukati.
Babirihingania ebindu byabo by’obughuli batoke eribana eky’erirya, banamatabyaho.
Yehova, ulangire ngoko nabiribya mukali* oyutawite mughaso.
ל [Lamed]
12 Ekyo sikiribayira kindu, inywe mukalaba omo ndaki?
Mulebaye!
Omundu ane atowa obulumi obuli ng’obo balyanihiramo,
Obulumi obo Yehova alyanihiramo omo kiro kiwe ky’erihitana kutsibu?
מ [Mem]
13 Iniane endata, mwakatuma omuliro omo makuha waghe. Mwakasinga obuli rikuha ryaghe.
Mwakasanzira ebisando byaghe by’obutimba. Mwakanikasa erisuba enyuma.
Mwakaniyira mo mukali oyuli omo mbwera.
Ngasiba ininalwere.
נ [Nun]
14 Mwakakuma-kuma amakosa waghe, amakokotyamo muketo omo byala biwe.
Neryo amahiragho oko ngoto yaghe, n’akaghala kaghe kamahwa.
Yehova abirinihira omo byala by’abandu abo nitenangatoka erilwa nabo.
ס [Samekh]
15 Yehova abiritwala abasuda bosi b’amaka abo nabya nabo bo hali okw’ingye.
Abirihindania abasuba batoke erilwa naghe n’eriponda-ponda abalwana baghe.
Yehova abirilyatangira omubikira we Yuda omo kikamiro ky’edivai.
ע [Ayin]
16 Emyatsi eyo yo yinemuleka inalira. Emisonia inemutsururuka omo meso waghe.
Kundi oyo wanganikirania n’erinitulerya* ali hali okw’ingye.
Abana baghe babirisighanibwa, kundi enzighu yabirisinga.
פ [Pe]
17 Sioni abirisanzira ebyala by’endata, aliwe syawite oyo wangamukirania.
Yehova abiribwira esyonzighu syosi sya Yakobo esimutimbireko ati silwe naye.
Esyonzighu esyo syabirilangira Yerusalema mo kindu ekikita esyonye.
צ [Tsade]
18 Yehova ni mutunganene, kundi mungaghana erikwama emighambo* yiwe.
Muhulikirire, inywe bandu bosi, kandi mulangire ngoko ngaghalawa.
Ababikira* baghe n’abalwana baghe babiriya omo bunyewa.
ק [Qoph]
19 Mungabirikira abanyanzire, aliwe mubakanihotera.
Abahereri n’abasyakulu baghe mubakaholera omo muyi
Bakarondya akalyo akangabawatikya eribyaho.
ר [Resh]
20 Yehova, lebaya ngoko ngaghalawa kutsibu.
Enda* yaghe yinemuluma kutsibu.
Omutima waghe abiribya butuli, kundi munaghana kotse-kotse erikwama obusondoli bwaghu.
Omuyali anemwitira abana baghe b’eyihya, n’omo nyumba mwabiribya oluholo.
ש [Shin]
21 Abandu babiryowa ngasimba. Sihali oyo wanganikirania.
Esyonzighu syaghe syosi syabiryowa ngoko nabirihikirwa n’obuhanya.
Syabiritsema, kundi iwe ulyanileterabo.
Aliwe ukendisyaleta ekiro ekyo wabugha uti ukendisyaleta. Ekiro ekyo, nabo bakendisyabya nga ngye.
ת [Taw]
22 Obubi bwabo bosi buhike embere syaghu, nabo ubalolaye oko kikalire.
Ngoko wanilolaya oko kikalire busana n’amakosa waghe wosi.
Kundi nabirisimba kutsibu, n’omutima waghe alwere.