साहसी हुनुहोस्‌

१. के साहसबारे हामीले सिक्नुपर्ने कुरा अझ बाँकी छ?

यो किताब पढ्‌नुभएपछि तपाईँलाई ‘मैले साहसबारे जति सिक्नुपर्ने थियो, त्यो सबै सिकिसकेँ’ जस्तो लाग्यो कि? तर बाइबलबाट साहसबारे हामी अझ धेरै कुरा सिक्न सक्छौँ। जस्तै, बाइबलमा अरू थुप्रै साहसी व्यक्‍तिहरूबारे बताइएको छ, जसबारे हामीले यस किताबमा छलफल गरेका छैनौँ। साथै तिनीहरूजस्तै साहसी हुन हामीले एउटा महत्त्वपूर्ण कदम चाल्नै पर्छ। आउनुहोस्‌, त्यसबारे बुझौँ।

२. साहस देखाएका अन्य वफादार व्यक्‍तिहरू को-को हुन्‌?

^२ यस किताबमा छलफल गरिएका व्यक्‍तिहरूबाहेक साहस देखाएका अन्य व्यक्‍तिहरूको नाम तपाईँ सम्झन सक्नुहुन्छ कि? सायद तपाईँको मनमा यसैया, यर्मिया, इजकिएल, योना र मलाकिजस्ता हिब्रू धर्मशास्त्रमा उल्लेख गरिएका भविष्यवक्‍ताहरूको नाम आयो होला। तिनीहरूले पनि प्रेषित पावलले हिब्रू अध्याय ११ मा वर्णन गरेका कुराहरू भोगे। पावलले यस्तो लेखे: “[तिनीहरूमध्ये] कति भने गिल्ला अनि कोर्राको सिकार भए। यति मात्र होइन, तिनीहरू साङ्‌लाले बाँधिए अनि झ्यालखानामा थुनिए।” अरू चाहिँ “सङ्‌कष्टमा परे अनि दुर्व्यवहारको सिकार भए।” अनि कोही-कोहीलाई भने मृत्युदण्ड समेत दिइयो। (हिब्रू ११:३६, ३७) तैपनि तिनीहरू साहसी भई यहोवा परमेश्‍वरको पक्षमा खडा भए।

३-४. राजा दाउदको ज्यान खतरामा परेको बेला बाइबलमा नाम उल्लेख नगरिएका दुई स्त्रीले तिनलाई कसरी मदत गरे?

^३ थुप्रै साहसी व्यक्‍तिहरूको नाम बाइबलमा उल्लेख गरिएको छैन। जस्तै: राजा दाउदको समयका दुई स्त्रीहरू। दाउदका आफ्नै छोरा अब्सालोमले तिनलाई मार्न खोज्दा ती दुई स्त्रीले तिनलाई मदत गरे। अब्सालोम घमन्डी अनि क्रूर व्यक्‍ति थिए र आफ्नो बुबाको सिंहासन हडप्न चाहन्थे। त्यसैले दाउद यरुसलेमबाट भाग्न बाध्य भए। अब्सालोमको षड्यन्त्रबारे थाह पाउन दाउदले साहसी पुजारी सादोकलाई यरुसलेम फर्कन भने। सादोकले जासुसी गरेर थाह पाएका कुराहरू दाउदसम्म पुऱ्‍याउनुपर्ने थियो। त्यो खबर पुऱ्‍याउन सादोकले ‘एउटी दासीलाई’ दाउदकहाँ पठाए। हामीलाई उनको नाम थाह छैन तर उनी साहसी थिइन्‌ भनेर हामी भन्‍न सक्छौँ। आफू मारिन सक्ने भए पनि उनले दाउदका दुई साथीलाई सादोकले भनेको सबै कुरा बताइन्‌। तर एक जना युवकले दाउदका ती दुई साथीलाई देखे अनि गएर अब्सालोमलाई बताइदिए। आफ्नो ज्यान जोगाउन तिनीहरू एउटा घरको इनारभित्र पसे। तिनीहरू लुकेको कुरा थाह नपाओस्‌ भनेर त्यस इनारको मालिककी पत्नीले इनारको मुख कपडाले छोपिदिइन्‌ र त्यसमाथि बिस्कुन फिँजाइदिइन्‌। उनको नाम पनि हामीलाई थाह छैन। अब्सालोमका मानिसहरू ती दुई सन्देशवाहकलाई खोज्न आउँदा उनले तिनीहरूलाई अर्कै बाटोतिर पठाइदिइन्‌। यी दुई साहसी स्त्रीले गर्दा यहोवाले रोज्नुभएको राजाको ज्यान जोगियो।—२ समु. १५:२३-३७; १७:८-२२.

^४ बाइबलमा साहस देखाएका थुप्रै पुरुष तथा स्त्रीहरूको उदाहरण पाइन्छ। तिनीहरूमध्ये कसैको नाम उल्लेख गरिएको छ भने कसैको छैन, कोही धनी थिए भने कोही गरिब अनि कोही गण्यमान्य व्यक्‍ति थिए भने कोहीचाहिँ साधारण व्यक्‍ति। तर तिनीहरू सबै साहसी भई यहोवाको पक्षमा खडा भए। तिनीहरूको कथाले आज हामीलाई पनि साहसी हुन उत्प्रेरित गर्न सक्छ।

प्रार्थना गर्नु किन महत्त्वपूर्ण छ?

५-७. घोर विरोधको सामना गर्न पावलले कसरी साहस बटुले?

^५ हामी बाइबलमा उल्लेख गरिएका साहसी पुरुष तथा स्त्रीहरूको कसरी अनुकरण गर्न सक्छौँ? ती सबै पुरुष तथा स्त्रीहरू जन्मजातै निडर स्वभावका थिएनन्‌। के तिनीहरूले आफ्नै क्षमता र बलबर्कतमा यहोवाको सेवा गर्न सकेका थिए? अहँ, थिएनन्‌! साहसी हुन तिनीहरूले गर्नै पर्ने एउटा कुरा थियो। त्यो के थियो?

^६ प्रेषित पावलबारे एकछिन विचार गरौँ। फिलिप्पीमा पावल र सिलासमाथि भीड जाइलाग्यो। त्यसपछि नगर अधिकारीहरूले तिनीहरूको लुगा च्यातिदिए र तिनीहरूलाई छडी लगाउने हुकुम गरे। अनि तिनीहरूलाई झ्यालखानाको अँध्यारो खोरमा थुनिदिए र तिनीहरूको खुट्टा ठिँगुरोमा हालिदिए। (प्रेषि. १६:१२, १९-२४) झ्यालखानाबाट मुक्‍त भएपछि के पावल डरको कारण प्रचार गर्नदेखि पछि हटे? यस्तो अवस्थामा डर लाग्नु स्वाभाविकै हो। तर पावलले प्रचारकार्यलाई निरन्तरता दिएको यहोवा चाहनुहुन्छ भनेर तिनलाई थाह थियो। त्यसैले तिनी प्रचार गर्न अर्को गन्तव्य थिस्सलोनिका सहर गए। त्यहाँ जान तिनले कसरी साहस र बल पाए?

^७ पछि तिनले यस्तो लेखे: “फिलिप्पीमा दुःख अनि बेइज्जती भोगे तापनि परमेश्‍वरको मदत पाएर हामीले कसरी साहस बटुल्यौँ र घोर विरोधको बाबजुद तिमीहरूलाई परमेश्‍वरको सुसमाचार सुनायौँ, त्यो तिमीहरूलाई थाह छ।” (१ थिस्स. २:२) परमेश्‍वरले अह्राउनुभएको काम पूरा गर्न साहस चाहिन्छ भनेर तिनलाई थाह थियो। तर तिनले त्यो साहस कसरी जुटाउन सके? आफ्नै क्षमताले गर्दा हो कि? होइन। तिनी “परमेश्‍वरको मदत पाएर” साहसी हुन सकेका थिए। आफूलाई चाहिएको साहस बटुल्न तिनले नम्र भई यहोवासित मदत मागे। अनि यहोवाले तिनको बिन्ती सुन्‍नुभयो।

८. साहसी हुने सन्दर्भमा हामी कसरी पावलको अनुकरण गर्न सक्छौँ?

^८ पावलले जस्तै तपाईँले पनि साहसको लागि यहोवासित मदत माग्न सक्नुहुन्छ। आफूसित कुनै विशेष योग्यता नभएकाले म साहसी हुन सक्दिनँ भन्‍ने सोचाइ नराख्नुहोस्‌। बरु साहसको लागि यहोवालाई प्रार्थना गर्नुहोस्‌। अनि उहाँले जस्तोसुकै अवस्थामा पनि तपाईँलाई साहसी हुन मदत गर्नुहुनेछ भन्‍ने कुरामा ढुक्क हुन सक्नुहुन्छ।—प्रेषि. ४:२९.

९. आफ्नो विश्‍वास बढाउन हामीले किन यहोवासित मदत माग्नुपर्छ?

^९ तपाईँ साहससित एकदमै नजिकको सम्बन्ध भएको अर्को गुण विश्‍वासको लागि पनि स्वर्गमा बस्नुहुने बुबासित बिन्ती गर्न सक्नुहुन्छ। विश्‍वास पवित्र शक्‍तिको फलको एउटा पक्ष हो। (गला. ५:२२, २३) प्रत्येक ख्रिष्टियनले धारण गर्नुपर्ने आध्यात्मिक हातहतियारमध्ये विश्‍वास पनि एउटा हो। (एफि. ६:१६) विश्‍वास यति शक्‍तिशाली हुन्छ कि यसले ‘संसारमाथि विजय हासिल गर्न’ सक्छ भनेर बाइबलमा बताइएको छ। (१ युह. ५:४) यहोवामाथिको विश्‍वासले नै तपाईँलाई साहसी बनाउँछ। जस्तोसुकै कठिन परीक्षाको सामना गर्नुपरे पनि यहोवाले तपाईँलाई मदत गर्नुहुनेछ भन्‍ने कुरामा पूर्णतया विश्‍वस्त हुनुहुन्छ भने तपाईँ अझ धेरै साहसी हुन सक्नुहुन्छ। त्यसैले प्रेषितहरूले जस्तै हामी पनि यहोवासित यस्तो बिन्ती गरिरहौँ: “हाम्रो विश्‍वास बढाइदिनुहोस्‌।”—लुका १७:५.

“साहसी होओ!”

१०-११. पावलले यरुसलेम र त्यसवरपरका ख्रिष्टियनहरूलाई किन साहसी भइरहन प्रोत्साहन दिए?

^१० येसुले यरुसलेमको विनाशबारे भविष्यवाणी गर्नुभएको थियो। (लुका १९:४१-४४; २१:२०-२४) त्यस विनाशको बेला यरुसलेममा र त्यसवरपर रहने ख्रिष्टियनहरूको लागि धेरै गाह्रो हुनेछ भनेर पावललाई थाह थियो। त्यसैले पावल तिनीहरूलाई मदत दिन चाहन्थे। पावलले तिनीहरूलाई साहसी हुनुको महत्त्वबारे कसरी जोड दिए? यस किताबको परिचयमा उद्धरण गरिएका तिनका शब्दहरू हामी फेरि विचार गरौँ। यहोवाले गर्नुभएको मायालु प्रतिज्ञाबारे सम्झाउँदै तिनले यसो भने: “म तिमीलाई कुनै हालतमा छोड्‌नेछैनँ र कहिल्यै त्याग्नेछैनँ।” यस प्रतिज्ञाले तिनीहरूलाई कसरी मदत गर्ने थियो? तिनले अझै यसो भने: “त्यसैले हामी असाध्यै साहसी भएर यसो भन्‍न सकौँ: ‘यहोवा मेरो मदतगार हुनुहुन्छ; म डराउनेछैनँ। मानिसले मलाई के गर्न सक्छ र?’”—हिब्रू १३:५, ६.

^११ इस्वी संवत्‌ ७० मा रोमीहरूले यरुसलेम विनाश गरेपछि के-कस्तो कुरा भयो भनेर बाइबलमा बताइएको छैन। तर यो कुरामा भने हामी पक्का हुन सक्छौँ: त्यहाँका वफादार ख्रिष्टियनहरूले पावलको सल्लाह सुने। तिनीहरूले साहसी हुँदै येसुको आज्ञा पालन गरे र समय आएपछि तिनीहरू ‘डाँडाहरूतिर भागे।’—लुका २१:२०, २१.

१२. (क) परीक्षाहरू आइपर्दा तपाईँ कसरी साहसी हुन सक्नुहुन्छ? (ख) यस अन्तको दिनमा केही ख्रिष्टियनहरूले कसरी उल्लेखनीय साहस देखाएका छन्‌ र तपाईँ के गर्न कटिबद्ध हुनुहुन्छ? (“तिनीहरूको साहस अनुकरण गर्नुहोस्‌” भन्‍ने पेटी हेर्नुहोस्‌।)

^१२ यहोवाले तपाईँलाई पनि अहिले र भविष्यमा परीक्षाहरू आइपर्दा साहसी हुन मदत गर्नुहुनेछ। (इज. ३८:१, २, १०-१२; मत्ति २४:२१) यहोवाले हामीलाई जोगाउने प्रतिज्ञा गर्नुभएको छ भन्‍ने कुरा सधैँ मनमा राख्नुहोस्‌। (इज. ३८:१९-२३; २ थिस्स. ३:३) उहाँलाई प्रेम गर्नेहरूलाई र उहाँमाथि विश्‍वास गर्नेहरूलाई उहाँले कहिल्यै त्याग्नु हुनेछैन। यहोवाले यहोसुलाई भन्‍नुभएको यो कुरा आज तपाईँलाई पनि भन्दै हुनुहुन्छ: “साहसी र खूब बलियो होऊ!” (यहो. १:७, ९, १८) साथै येसुले आफ्ना चेलाहरूलाई भन्‍नुभएको यो कुरा पनि मनमा राख्नुहोस्‌: “साहसी होओ!” येसुले हाम्रो मदतको लागि आफ्नो बुबाकहाँबाट पवित्र शक्‍ति पठाउने प्रतिज्ञा गर्नुभएको छ र उहाँ आफ्नो हरेक प्रतिज्ञा पूरा गर्नुहुन्छ। पवित्र शक्‍तिले तपाईँलाई यहोवाप्रति वफादार रहन चाहिएकै साहस दिनेछ। (युह. १४:२६; १५:२६, २७; १६:३३) हो, तपाईँ साँच्चै साहसी हुन सक्नुहुनेछ!

१३. यस अन्तको दिनमा साहसी हुन तपाईँलाई कुन कुराले उत्प्रेरित गर्छ?

^१३ चाँडै पृथ्वीभरि शान्ति छाउनेछ र हामीले यहोवाको सम्झनामा भएकाहरूलाई फेरि स्वागत गर्ने मौका पाउनेछौँ। कल्पना गर्नुहोस्‌, त्यो कत्ति खुसीको क्षण हुनेछ! त्यतिबेला हामीले यस किताबमा छलफल गरिएका पुरुष तथा स्त्रीलगायत अरू थुप्रै साहसी व्यक्‍तिहरूलाई पनि भेट्‌नेछौँ। तिनीहरूले सैतानको संसारमा यहोवाको सेवा गरे, कतिपयले त आफ्नो ज्यान समेत गुमाए। तपाईँको विचारमा तिनीहरूले यहोवाको सेवा गर्ने छनौट गरेकोमा के पछुतो मान्‍नेछन्‌ होला? कदापि मान्‍ने छैनन्‌! अनि तपाईँलाई कस्तो लाग्नेछ? यस पृथ्वीलाई फेरि सुन्दर बनाउन तपाईँले तिनीहरूसँगै काँधमा काँध मिलाएर काम गर्ने मौका पाउनुहुनेछ। त्यतिबेला के तपाईँले अन्तको समयमा यहोवाको सेवा गर्ने छनौट गरेकोमा पछुतो मान्‍नुहुनेछ? पक्कै मान्‍नु हुनेछैन। त्यसैले अन्तसम्म साहसी भई यहोवाको सेवा गरिरहने सङ्‌कल्प गर्नुहोस्‌। हो, साहसी भइरह्‍यौँ भने अहिले मात्र होइन सदासर्वदा आनन्दित हुन सक्नेछौँ!