Khuluma Iqiniso

1. Kuyini okumele sikwenze nxa sifuna ukuba semulini kaJehova?

IZIKHATHI ezinengi nxa oFakazi bakaJehova bebonana okokuqala, bajayele ukubuzana ukuthi balithola njani iqiniso. Abanye bajayele ukuphendula umbuzo lo besithi abazali babo yibo ababafundisa iqiniso ngoJehova. Ikanti abanye bajayele ukuthi basanda kulithola iqiniso. Okwenza sibuzane imibuzo le yikuthi siyaliqakathekisa iqiniso eliseLizwini likaNkulunkulu. Vele akwenzi ukuthi umuntu abesemulini kaJehova yena engalazi iqiniso futhi engalithandi. Iqiniso esesilifundile ngoJehova liyasinceda ukuthi sithembeke kukho konke esikwenzayo lesikukhulumayo.—Hubo. 15:​1-3.

2. (a) UJesu wayedume ngani? (b) Abantu babezalamukela njani iqiniso?

² UJesu wayehlala ekhuluma iqiniso ngaso sonke isikhathi. Ngitsho lezitha zakhe zaze zakuvuma ukuthi ubeka iqiniso njengoba nje linjalo, kakhekhelezi muntu. (Mat. 22:16) Iqiniso uJesu ayelifundisa lalizabaphatha njani abantu? UJesu wathi: “Ngilande ukuzodala ukwehlukana phakathi komuntu loyise, phakathi kwendodakazi lonina, laphakathi kukamalukazana loninazala.” (Mat. 10:35) UJesu wayekwazi mhlophe ukuthi iqiniso yena labafundi bakhe ababelifundisa lalingasoze lamukelwe nguye wonke umuntu. (Mat. 23:37) Abanye babezalithanda sibili lelo qiniso kodwa abanye babengasoze bazihluphe ngalo.—2 Thes. 2:​9-11.

3. Yiphi imibuzo esizayiphendula esihlokweni lesi?

³ Lathi siyazama ukukhuluma iqiniso ngaso sonke isikhathi silingisela uJesu futhi asesabi ukuthi abantu bazathini ngalokho esikukhulumayo. Sizimisele lokufundisa abantu iqiniso eliseBhayibhilini kungelani lokuthi bayalamukela loba hatshi. Kodwa lokhu sokusitsho ukuthi siphongukhuluma nje singacabanganga sizitshela ukuthi sikhuluma iqiniso? Nansi imibuzo esizayiphendula esihlokweni lesi: Singalithola ngaphi iqiniso ngoJehova? Kungani kumele sikhulume iqiniso? Silikhuluma njani iqiniso njalo silikhuluma sekutheni? Ukwazi izimpendulo zemibuzo le kuzasinceda ukuthi sikhulume iqiniso ngesikhathi esifaneleyo langendlela engasoze ikhube abanye.

SINGALITHOLA NGAPHI IQINISO?

4. Yiwaphi amavesi atshengisa ukuthi uJehova nguNkulunkulu weqiniso?

⁴ UJehova uhlala ekhuluma iqiniso. Yonke imithetho asinike yona eLizwini lakhe ihlala isinceda ngoba iliqiniso. (Hubo. 19:9; 119:​142, 151) Siyakwazi ukuthi konke asithembise khona kuzakwenzakala loba sekutheni. (Isaya. 55:​10, 11) Ilizwi lakhe alikaze loba nini liwele phansi. (Nani. 23:19) Vele kakwenzi ukuthi uJehova uNkulunkulu wethu akhulume amanga! (Heb. 6:18) IBhayibhili lize lithi: ‘UJehova nguNkulunkulu weqiniso.’—Hubo. 31:5.

5. Abantu bangenelisa yini ukumazi uNkulunkulu weqiniso? Chasisa. (ImiSebenzi 17:27)

⁵ Siyenelisa ukufunda ngoJehova uNkulunkulu weqiniso ngokukhangela izinto azidalileyo. (Rom. 1:20) Ngesikhathi umphostoli uPhawuli ese-Athene watshela izikhwicamfundo ezingamaGrikhi ukuthi ‘uNkulunkulu kakhatshana lathi lokuthi ufuna abantu bamdinge baze bamthole.’ (Bala imiSebenzi 17:27.) UJehova ufuna ukuthi abantu abathobekileyo babe ngabangane bakhe njalo bafunde iqiniso ngaye.—Joh. 6:44.

6. Yiliphi iqiniso osulifunde eBhayibhilini futhi kungani uliqakathekisa lelo qiniso?

⁶ Nxa sifuna ukufunda okunengi ngoJehova kumele sibale iBhayibhili. Phela labo ababhala iBhayibhili babekhokhelwa ngumoya ongcwele. (2 Phet. 1:​20, 21) Konke okuseBhayibhilini kuliqiniso futhi kumele sikuthembe. IBhayibhili lisitshela iqiniso ngokuthi umhlaba lakho konke okukuwo kwaqalisa njani. (Gen. 1:​1, 26) Lifundisa iqiniso ngokuthi isono savela ngaphi lokuthi kungani abantu behlupheka njalo besifa. (Rom. 5:12; 6:23) Asithandabuzi lokuthi uJehova uzasebenzisa iNdodana yakhe uJesu ukuthi atshabalalise yonke imisebenzi kaSathane, uyise wamanga. (Joh. 8:44; Rom. 16:20) Kuliqiniso sibili ukuthi uJesu uzaqeda bonke ububi obusemhlabeni, avuse abantu abafileyo, enze ukuthi umhlaba uphinde ube lipharadayisi njalo thina sikholise impilo singaselasono. (Joh. 11:​25, 26; 1 Joh. 3:8) Siyambonga kakhulu uJehova ngokusifundisa iqiniso langokusinika isibusiso sokuthi silifundise abanye.—Mat. 28:​19, 20.

KUNGANI KUMELE SIKHULUME IQINISO?

7-8. Kuyini okumele kusifuqe ukuthi sikhulume iqiniso? Nika isibonelo. (UMakho 3:​11, 12) (Khangela lemifanekiso.)

⁷ Sesibonile ukuthi nxa sifuna ukuba semulini kaJehova kumele sihlale sikhuluma iqiniso. Lanxa kunjalo, kumele sizibuze ukuthi iqiniso lakhona silikhuluma sihloseni. Akucabange ngalokho okwenzakala ngesikhathi uJesu etshumayela eGalile. (Bala uMakho 3:​11, 12.) Abantu babuya bazokuthi gwaqa besuka ezindaweni ezitshiyeneyo. Phakathi kwalabobantu kwakulabanye ababelamadimoni futhi amadimoni lawo aqalisa ukumemeza esithi: “Wena uyiNdodana kaNkulunkulu.” Ayeqamba amanga yini amadimoni? Hatshi, ayeqinisile. Kodwa inhloso yawo yiyo eyayingaqondanga. Kukhanya amadimoni la ayefuna ukuthi abantu balalele wona kulokuthi balalele uJesu besebekhonza uJehova. UJesu wakubona ukuthi amadimoni la ayelobuqili, yikho wahle wawakhuza wawatshela ukuthi angaqali ukutshumayela ngaye.

⁸ Kambe ukuthi kukhona thina esingakufunda endabeni le? Ye kukhona. Kumele sibe lenhloso eziqondileyo nxa sikhuluma iqiniso. Inhloso yethu yokufundisa abantu iqiniso ngoJehova yikuthi siyamthanda. Asikwenzeli ukubukwa ngabantu kodwa sifuna lonke udumo luqhubeke lusiya kuNkulunkulu wethu.—Mat. 5:16; khangela lemiSebenzi.14:​12-15.

9. Kuyini okumele sikunanzelele futhi kungani?

⁹ Kumele sinanzelele ngoba kulula ukuthi sicine sizidingela udumo. Ake sithi kulomdala webandla okutshele eyinye indaba okumele ihlale iyimfihlo okwesikhathi esithile kodwa wena ube ubusuhamba uyifafaza. Ngokuhamba kwesikhathi abantu obatshele indaba leyo bazabona ukuthi owawukukhuluma kuliqiniso besebecabanga ukuthi kulezinto ezinengi ezaziwa nguwe bona abangazaziyo. Abantu bangasala bekubuka sibili kodwa uJehova uyabe esithini? (Zaga. 11:13) Uyabe ukhulume iqiniso njengoba linjalo sibili kodwa nguwe yini obekumele ukukhulume? Vele isizatho sokubatshela besingesani?

SILIKHULUMA NJANI IQINISO?

10. Kuyini umKhristu ngamunye okumele acabange ngakho? (UKholose 4:6)

¹⁰ Bala uKholose 4:6. Umphostoli uPhawuli wakhumbuza amaKhristu ayehlala eKholose ukuthi ananzelele indlela akhuluma ngayo. Lokhu kutsho ukuthi lanxa sikhuluma iqiniso kuyabe kumele sinanzelele ukuthi amazwi ethu siwabeka njani.

11-12. Kungani kumele sinanzelele indlela esifundisa ngayo abantu? Sebenzisa umzekeliso. (Khangela lemifanekiso.)

¹¹ Kumele sibe lomusa nxa sifundisa abanye iqiniso eliseBhayibhilini. ILizwi likaNkulunkulu lilamandla okutshintsha impilo zabantu ngoba liyenelisa ukuveza egcekeni ukuthi umuntu ucabangani lokuthi ufisani. (Heb. 4:12) Kodwa nxa singehluleka ukulisebenzisa kuhle singacina silimaza abantu kulokuthi sibancedise. Kungenzakala njani lokho?

¹² Ake sithi usekutshumayeleni, ubusuhlangana lomuntu okhonza izithombe futhi yena lemuli yakhe kabayikhuthi iKhisimusi le-Easter. Kungabalula ukuthi uhle umvulele amavesi akhuluma ngokuthi izithombe kazincedi ngalutho, uze umchasisele lokuthi imikhosi le yaqaliswa ngabantu abangakhonzi uNkulunkulu. (Isaya. 44:​14-20; 2 Khor. 6:​14-17) Nxa lokho ungakwenza usanda kumbona nje, uyabe umfundise iqiniso sibili kodwa uyabe ungalisebenzisanga kuhle iBhayibhili.

13. Kutshoni ukuthi amazwi ethu kumele afakwe isawudo?

¹³ Umphostoli uPhawuli wathi amazwi ethu kumele afakwe isawudo. Lapha uPhawuli wayengatsho ukuthi kumele sisenge lezimithiyo. Manje wayesitshoni? Wayesitsho ukuthi amaKhristu kumele ananzelele indlela akhuluma ngayo ukuze angakhubi abanye. Amazwi ethu kumele akhwabitheke njengokudla okulesawudo. (Jobe. 12:11) Kodwa lapha lakho kumele sinanzelele ngoba abantu bayatshiyana. Asibuyele emzekelisweni wokudla. Ake sithi wena uthanda ukudla okulesawudo elinengi. Nxa kuyikuthi upheka ukudla kwakho wedwa ungafaka isawudo santando kodwa nxa usuphekela abanye kuyabe kumele ubacabangele, ngoba ayisibo bonke abantu abathanda ukudla okulesawudo elinengi. Yikho kanye okumele sikwenze nxa sesikhuluma. Kumele sikhangele ukuthi sikhuluma lobani. Kwezinye indawo abantu bakhululekile ukukhuluma laloba ngubani cala celeni. Kodwa kwezinye indawo akuqalwa ukuthi umuntu akhulume lomuntu omdala angani ukhuluma losowabo. Lokhu kwenza sizwisise ukuthi kungani umphostoli uPhawuli wathi sibekwazi ukuthi simphendule njani umuntu ngamunye. Yikho kumele uzibuze ukuthi lokho ofuna ukukukhuluma kuzamphatha njani umuntu okhuluma laye.

KUMELE SILIKHULUME SEKUTHENI IQINISO?

14. Kuyini okutshengisa ukuthi uJesu wayebazwisisa abafundi bakhe?

¹⁴ UJesu wayekhuluma kuhle labafundi bakhe njalo wabafundisa izinto ezinengi. (Mak. 6:34) Lanxa kwakukunengi ayengabafundisa khona, kazange abagqibe ngoba wayekwazi ukuthi ayisikho konke ababezakuzwisisa. (Joh. 16:12) Manje thina sifundani?

15. Kuyini okungamelanga sikwenze? Chasisa. (IZaga 25:11) (Khangela lomfanekiso.)

¹⁵ Lanxa kungabe kukunengi esikwaziyo ngendaba ethile eseBhayibhilini kumele sicabange ngabantu esixoxa labo. Ake sixoxe futhi ngomuntu lowana othanda ukuzikholisela lemuli yakhe ngesikhathi seKhisimusi lange-Easter. Wena uyakwazi mhlophe ukuthi imikhuba le yaqaliswa ngabantu ababengakhonzi uJehova futhi amasiko akhona kawamthokozisi ngitsho. Kodwa ake sithi uqalise ukufunda lomuntu lo iBhayibhili sokusele amalanga amalutshwane ukuthi kube yiKhisimusi. Kambe leso kuyabe kuyisikhathi esiqondileyo yini sokumtshengisa ukuthi iBhayibhili lifundisani ngendaba le ubusukhangelela kuthi ahle akhohlwe ngeKhisimusi? Khona kuliqiniso sibili ukuthi abanye abantu esifunda labo iBhayibhili bahle bakusebenzise lokho abakufundayo. Kodwa kwabanye kuthatha isikhathi ukuthi batshiye izinto akade bezenza. Inhloso yethu ngeyokuncedisa abantu esifunda labo ukuthi bamukele iqiniso nxa sebelizwisisa, akumelanga sibabambe ngamandla.—Bala iZaga 25:11.

16. Singabanceda njani esifunda labo iBhayibhili ukuthi baqhubeke ‘behamba eqinisweni’?

¹⁶ Kuyasithokozisa kakhulu ukufundisa abantu ngoJehova lokubabona ‘behamba eqinisweni.’ (3 Joh. 3, 4) Manje ungenzani ukuze ubancedise baqhubeke bekhonza uNkulunkulu weqiniso? Phila ngendlela etshengisa ukuthi ufuna ukuthokozisa uNkulunkulu. Akukhanye lokuthi uyakukholwa konke asithembise khona. Inhloso yakho yokukhuluma iqiniso kayingabi ngeyokufuna ukubukwa ngabantu kodwa kwenzele ukudumisa uJehova. Qala ucabange ungakakhulumi futhi ungakhohlwa lokuthi ukhuluma lobani. Ncedisa abantu abafuna ukufunda ngoJehova ngokukhuluma labo kuhlekuhle. Nxa ungenza njalo uzatshengisa sibili ukuthi ukhonza uJehova uNkulunkulu weqiniso.