Ungatshengisa Njani Ukuthi Uyayiqakathekisa Inhlawulo?

1-2. Inhlawulo kaJesu isinceda njani futhi thina kumele senzeni? (U-2 Khorinte 5:​14, 15) (Khangela lomfanekiso.)

AKE SITHI nguwe obudilikelwe yindlu, kwasekufika omunye umuntu wakukhipha. Kufanele ukuthi ubuzambonga ungaqedi lowomuntu uze umtshele lokuthi awusoze wafa wakukhohlwa lokho akwenzele khona.

² Isihloko esidlulileyo sikwenze kwacaca ukuthi abantu babengeke benelise ukuzikhulula esonweni lasekufeni. Sibonile ukuthi inhlawulo yenza uJehova asithethelele njalo sibuyisane laye. Inhlawulo iphinda yenze sibe lethemba lokuthi sizaphila emhlabeni omutsha kuze kube nini lanini singaselasono. Inhlawulo itshengisa ukuthi uJesu uyasithanda kakhulu. Phela wavele wasithanda engakabuyi emhlabeni. (Zaga. 8:​30, 31) Umphostoli uPhawuli wathi: “Uthando lukaKhristu luyasifuqa.” (Bala u-2 Khorinte 5:​14, 15.) Ngakho-ke, akumelanga siphonguhlala sigoqe izandla kodwa kumele sitshengise ukuthi siyayiqakathekisa inhlawulo.

3. Kuyini okungenza ukuthi indlela abantu abatshengisa ngayo ukuthi bayayiqakathekisa inhlawulo itshiyane?

³ Wena uzakwenzani ukuze kukhanye ukuthi uyayiqakathekisa inhlawulo? Iqiniso elikhona yikuthi indlela wena ozakwenza ngayo lendlela omunye umuntu angenza ngayo itshiyene kakhulu. Mhlawumbe ukuze sikuzwisise kuhle asikubeke ngalindlela: Ake sithi kulabantu abathathu abasuka ezindaweni ezitshiyeneyo kodwa besiya endaweni efananayo. Abantu laba bazahamba ngezindlela ezitshiyeneyo kodwa bazacina befike endaweni efananayo. Lendlela esitshengisa ngazo ukuthi siyayiqakathekisa inhlawulo zizatshiyana. Phela abanye basafunda iBhayibhili, abanye sebelesikhathi eside bekhonza uJehova ikanti abanye babemkhonza kodwa basebetshelela. Esihlokweni lesi sizabona ukuthi abantu laba bangenzani ukuze batshengise ukuthi bayayiqakathekisa inhlawulo?

NXA USAFUNDA IBHAYIBHILI

4. UJehova ubabona njani labo abasafunda iBhayibhili?

⁴ Ukufunda kwakho iBhayibhili laboFakazi bakaJehova kutshengisa ukuthi uyafuna sibili ukuba ngumngane kaJehova. (Joh. 6:44; Imiseb. 13:48) IBhayibhili lithi: ‘UJehova uhlola inhliziyo.’ Lokhu kutsho ukuthi uyayibona yonke imizamo oyenzayo ukuze ufunde ngaye. (Zaga. 17:3; 27:11) Kumele uhlale ukhumbula ukuthi okwenza ube ngumngane kaJehova yikuthi uJesu wakufela.—Rom. 5:​10, 11.

5. UFiliphi 3:16 angakunceda njani nxa usafunda iBhayibhili?

⁵ Nxa usafunda iBhayibhili ungatshengisa njani ukuthi uyayiqakathekisa inhlawulo? Eyinye indlela ongatshengisa ngayo yikwenza lokho umphostoli uPhawuli akutshela amaKhristu aseFiliphi. Wathi: “Njengoba sesithuthukile safika kulelibanga, asiqhubekeni sihamba ngokuhleleka endleleni yonale.” (Flp. 3:16) Ungavumeli loba yini ikuphambanise kumbe ikukhiphe endleleni eya ekuphileni.—Mat. 7:14; Luk. 9:62.

6. Kuyini okungenziwa yilabo abasafunda iBhayibhili nxa kulenhlupho abahlangana lazo? (UDutheronomi 30:​11-14) (Khangela lomfanekiso.)

⁶ Kungenzeka ukuthi kulokunye osanda kukufunda eBhayibhilini okunzima ukuthi ukuzwisise. Manje kumele wenzeni? Kumele uzinike isikhathi sokuchwayisisa ngendaba leyo njalo ucele uJehova akuncedise ukuthi uyizwisise. (Hubo. 86:11) Nxa kuyikuthi lokhe ungayizwisisi, yibeke isikhupha uqhubeke ufunda iBhayibhili uzaphinda uyibuyelele. Abanye abantu abafunda iBhayibhili kubathwalisa nzima ukutshiya imkhuba engamthokozisiyo uJehova. Nxa kuyikuthi lawe unjalo kuyini okungakunceda? Yikukhumbula ukuthi uJehova kakhangelelanga ukuthi wenze okungaphezu kwamandla akho. (Bala uDutheronomi 30:​11-14.) Ngakho ungakhalali ngoba uJehova uthembisa ukuthi uzakuncedisa ukuthi uphile ngendlela ayifunayo. (Isaya. 41:​10, 13; 1 Khor. 10:13) Ungazikhathazi kakhulu ngalokho okukuthwalise nzima kodwa zama ukucabangisisa ngezinto ezinhle uJehova akwenzele zona. Okunye ongacabangisisa ngakho yikuthi uJehova wathuma uJesu ukuthi azokufela. Ukwenza njalo kuzakunceda ukuthi umthande kakhulu uJehova njalo ubone ukuthi imilayo yakhe kayinzima.—1 Joh. 5:3.a

7. Kuyini okumele kwenziwe ngabantwana abalabazali abangoFakazi?

⁷ Kuthiwani ngani elisakhulayo elilabazali abangoFakazi? Lani abazali benu kumele balincedise ukufunda iBhayibhili. IBhayibhili lithi: “Sondelani kaNkulunkulu laye uzasondela kini.” (Jak. 4:8; 1 Imilan. 28:9) Akumelanga uzitshele ukuthi ukukhuliswa ngabazali abangoFakazi yikho okuzakwenza uthole ukuphila okungapheliyo kodwa kumele ufunde ngoJehova ube ngumngane wakhe, uzwisise lokuthi wathuma uJesu ukuthi azokufela. (Rom. 5:​1, 2) Ngesikhathi lesi seSikhumbuzo cabangisisa ngokuthi uJehova loJesu bakuthanda kangakanani. Zama ukudinga lezinye izindlela ongatshengisa ngazo ukuthi uyayiqakathekisa inhlawulo.b

NXA USULESIKHATHI UKHONZA UJEHOVA

8. Labo abakhonza uJehova batshengisa njani ukuthi bayayiqakathekisa inhlawulo?

⁸ Kunengi kakhulu osukwenzile okutshengisa ukuthi uyayiqakathekisa inhlawulo. Phela watshintsha indlela owawuphila ngayo ukuze uthokozise uJehova wasuzinikela kuye wabhabhathizwa njalo ukhuthele ekutshumayeleni. Kufanele ukuthi bunengi ubunzima osuhlangane labo ngenxa yokuthi ukhonza uJehova. (2 Thim. 3:12) Kodwa okukwenze wangakhalali yikuthi uyamthanda futhi uyayiqakathekisa inhlawulo.—Heb. 12:​2, 3.

9. Yiphi ingozi amaKhristu okumele ayinanzelele?

⁹ Nxa singekela ukunanzelela singacina singasayiqakathekisi kangako inhlawulo. Kanti kuyabe sekutheni? Akucabange ngalokho uJesu akutshela amaKhristu ayesebandleni le-Efesu. Waqala wawancoma ngokuthi ayeqinisela ebunzimeni, wasewasola ngokuthi ayeseludelile uthando ayelalo kuqala. (Isam. 2:​3, 4) Okwakhulunywa nguJesu kutshengisa ukuthi umKhristu angabe engena imihlangano futhi etshumayela kodwa inhliziyo ingekho lapho, esekwenzela ukuthi kanti kuyathiwani. Manje ungenzani nxa ungananzelela ukuthi kawusamthandi ngendlela owawumthanda ngayo kuqala uJehova?

10. Kuyini okungakunceda ukuthi uqhubeke ukhonza uJehova ngenhliziyo yonke? (U-1 Thimothi 4:​13, 15)

¹⁰ Umphostoli uPhawuli wakhuthaza umngane wakhe uThimothi ukuthi akhonze uJehova ngenhliziyo yakhe yonke njalo awukhuthalele umsebenzi wakhe. (Bala u-1 Thimothi 4:​13, 15.) Lawe kukhona ongakwenza ukuze uqhubeke ukukholisa ukukhonza uJehova njalo uvutha emoyeni. (Rom. 12:11) Ngokwesibonelo, ungazinika isikhathi eseneleyo sokulungiselela imihlangano uzakukholisa ozakufunda emihlanganweni. Okunye ongakwenza yikuzinika isikhathi sokucabangisisa ngalokho oyabe ukubalile eLizwini likaNkulunkulu. Phela nxa ufuna ukuthi umlilo uqhubeke ubhebha kumele uwukhwezele njalo ungezelele inkuni. Lawe nxa ufuna ukuthi uthando olalo ngoJehova luqhubeke luvutha yenza zonke izinto ongazenza ukuze uyiqakathekise inhlawulo njalo ukhonze uJehova ngenhliziyo yonke. Njengoba lesi kuyisikhathi seSikhumbuzo kungaba kuhle ukuthi ucabangisise ngazo zonke izinto ozikholisayo ngenxa yokuthi unguFakazi kaJehova. Lokhu kuzakwenza uyiqakathekise kakhulu inhlawulo.

11-12. Kuyini okumele ukwenze nxa ungananzelela ukuthi awusatshiseki njengakuqala? (Khangela lomfanekiso.)

¹¹ Nxa kuyikuthi khathesi kawusatshiseki ngendlela owawutshiseka ngayo kudala, ungadani ube usuzitshela ukuthi uJehova kasakuthandi kumbe kasakuniki umoya wakhe ongcwele. Lomphostoli uPhawuli wayeke adane azizwe angathi kaselamandla kodwa wayeqhubeka etshumayela. Yikho waze watshela amaKhristu eKhorinte wathi: “Lanxa ngikwenza ngingafuni, ngiyabe ngilokhu ngilawo umsebenzi engiwunikiweyo.” (1 Khor. 9:17) Wayesitshoni lapha?

¹² Wayezimisele ukuqhubeka etshumayela kungelani lokuthi wayesizwa njani? Lawe ungamlingisela uPhawuli ngokwenza lokho uJehova afuna ukwenze lanxa kwesinye isikhathi uyabe usizwa kungatsho. Thandaza ucele uJehova akunike isifiso lamandla. (Flp. 2:13) Ungagoqi izandla kumbe uhle uthwale imikhono ekhanda. Kodwa zama ukwenza zonke izinto ezizakwenza ukuthi ubungane bakho loJehova buhlale buqinile. Ungenza njalo uzaphinda utshiseke njengakuqala ngoba ulokhe umthanda uJehova.

13. Yiphi imibuzo esingazihlola ngayo?

¹³ Kuqakathekile ukuthi singahlalahlala sizikhumbuze amazwi atholakala ku-2 Khorinte 13:5 athi: “Qhubekani lizihlola ukuthi lisekukholweni yini, qhubekani lizihlolisisa ukuthi lingabantu abanjani.” Nansi imibuzo ngamunye wethu okumele azibuze yona. Indlela engiphila ngayo iyatshengisa yini ukuthi ngiyawuqakathekisa uMbuso kaNkulunkulu? (Mat. 6:33) Engizilibazisa ngakho kuyatshengisa yini ukuthi ngiyazizonda izinto ezimbi? (Hubo. 97:10) Engikwenzayo lengikukhulumayo kuyatshengisa yini ukuthi ngizimisele ukwenza ukuthi kube lokuthula ebandleni? (Efe. 4:​2, 3) Kuhle ukuthi sizibuze imibuzo le njengoba khathesi kuyisikhathi seSikhumbuzo. Ukwenza njalo kuzasinceda sitshengise ukuthi siyakuqakathekisa kakhulu lokho esakwenzelwa nguJehova loJesu.c

NXA WAKE WAKHONZA UJEHOVA WASUTSHELELA

14. Kuyini okungenza amanye amaKhristu atshiye ukukhonza uJehova?

¹⁴ Abanye abafowethu labodadewethu sebama ukukhonza uJehova. Abanye batshelela besanda nje ukubhabhathizwa, ikanti abanye basebemkhonze okwesikhathi eside kakhulu. Kunengi okungenza umuntu acine etshiya ukukhonza uJehova. Abanye batshiya ukukhonza ngenxa yenhlupho ezazibehlela. (Luk. 21:34) Abanye bakhutshwa ngabanye abantu ebandleni. (Jak. 3:2) Ikanti abanye benza izono ezinkulu kodwa bangavumi ukuncediswa ngabadala. Kungelani lokuthi kuyini okwenza watshiya uJehova, ukucabangisisa ngenhlawulo kuzakwenza ukuthi ubuyele emulini yakhe.

15. UJehova utshengisa njani ukuthi usabathanda labo abangasamkhonziyo? (UHezekheli 34:​11, 12, 16)

¹⁵ UJehova kazikhohlwanga zonke izimvu ezaphambukayo zaphuma emhlambini. Sikhuluma nje uyazidinga ufuna zibuyele ebandleni. (Bala uHezekheli 34:​11, 12, 16.) Lawe uJehova usekudinge waze wakuthola futhi ufuna ubuyele ebandleni. Khonokho nje ukuthi ubala iNqabayokulinda le lamuhla kutshengisa ukuthi uyafuna sibili ukubuyela kuJehova. Ungakhohlwa ukuthi uJehova wakufundisa iqiniso wasekudonsela kuye. Lakhathesi uyakuncenga uthi phenduka ekhaya.

16. Kuyini okunganceda labo abangasakhonziyo ukuthi babuyele kuJehova? (Khangela lomfanekiso.)

¹⁶ Ibhukwana elithi Buyela KuJehova lilamazwi athi: “Qiniseka ukuthi uJehova uzakuncedisa ukuthi ubuyele kuye. Uzakuncedisa ukuthi ulwisane lokukhathazeka, uthobe inhliziyo yakho nxa wakhutshwa ngabanye njalo ube lomzwangedwa ohlanzekileyo ozakwenza uhlaliseke engqondweni lasenhliziyweni. Nxa sekunjalo uzakuzwa sekukufuqa ukuthi uphinde ukhonze uJehova ndawonye lezinceku zakhe. Ungakhohlwa lokuthi abadala bazimisele ukukuncedisa. Phela iBhayibhili lithi abadala, ‘banjengendawo yokucatshela umoya lesiphephelo sokucatshela izulu elina ngamandla.’ (Isaya. 32:2) Ukuze utshengise ukuthi uyayiqakathekisa inhlawulo zibuze ukuthi, ‘Kuyini okumele ngikwenze ukuze ngibuyele kuJehova?’ (Isaya. 1:18; 1 Phet. 2:25) Zama ukuyahlangana labanye eWolu yoMbuso. Okunye ongakwenza yikuxoxa lomdala webandla umtshele ukuthi usufuna ukubuyela kuJehova. Mhlawumbe angahle ahlele ukuthi kube lomuntu ozabuya azofunda lawe iBhayibhili. Nxa ungakwenza konke lokho futhi utshengise ukuthi uyayiqakathekisa inhlawulo, uJehova uzakubusisa.

UZAKWENZANI?

17-18. Kuyini okunye esingakwenza ngesikhathi seSikhumbuzo salonyaka?

¹⁷ UJehova wasihlawulela ukuze wonke umuntu otshengisa ukuthi uyakholwa kuJesu angabhujiswa kodwa abe lokuphila okungapheliyo. (Joh. 3:16) Kumele siyiqakathekise sibili inhlawulo ngoba yiyo eyenza sikhululwe esonweni lasekufeni. (Rom. 3:​23, 24; 2 Khor. 6:1) Ukucabangisisa ngendlela uJehova loJesu abakuthanda ngayo ngesikhathi lesi eseSikhumbuzo kuzakunceda ukuthi uyiqakathekise kakhulu inhlawulo.

¹⁸ Isihloko lesi sisincede sabona ukuthi indlela esitshengisa ngayo ukuthi siyayiqakathekisa inhlawulo iyatshiyana. Lanxa kunjalo uJehova uyakuqakathekisa konke okwenziwa ngabantu bakhe ukuze batshengise ukuthi abasaziphileli bona kodwa sebephilela lowo owabafelayo.—2 Khor. 5:15.