‘UNkulunkulu Weqiniso’ Kehluleki Ukwenza Akuhlosileyo

1. Kuyini okwenza simthembe uJehova? (IHubo 31:2-5)

UMHLABA esiphila kuwo usezandleni zikaSathane. Ukuqambelana amanga lokuqilana lokukhohlisana sekuyizinto zansuku zonke. Yikho abanye baze bathi kungcono ukuthemba ilitshe kulokuthemba umuntu. Kwezamabhizimusi abantu bayaqilana. Abanye baze baqambe amanga besenzela ukuthi abantu bathenge lokho abakuthengisayo. Kuyadanisa ukuthi kwezinye izikhathi ngitsho labangane abathembani. Lanxa kunjalo, esingahlala simthemba nguJehova ‘uNkulunkulu weqiniso.’ (Bala iHubo 31:2-5.) Loba yini ayithembisayo siyakwazi ukuthi izakwenzakala ngoba yena lamanga akuhlangani.

2. Sizaxoxa ngani esihlokweni lesi?

² Esihlokweni lesi sizaxoxa ngezizatho ezenza simthembe ngenhliziyo yonke uJehova. Sizaxoxa langokuthi uNkulunkulu weqiniso uzawutshabalalisa njani umhlaba kaSathane besesibona lokuthi wenzani khathesi ukuze inhloso yakhe igcwaliseke. Esizaxoxa ngakho kuzasinceda ukuthi sibe lesibindi futhi singesabi ukutshela abantu iqiniso ngoJehova.

OKWENZA SIMTHEMBE UJEHOVA

3. Kuyini okwenza simthembe ngenhliziyo yonke uJehova?

³ UJehova nguMdali. Nguye owadala amazulu lomhlaba lakho konke okuphilayo. (Gen. 1:1; Hubo. 36:9; Isam. 4:11) Wenza umhlaba waba lezinto ezeneleyo ezenza ukuthi siqhubeke siphila. Usiphe amanzi, umoya wokuphefumula lokunye okunengi okwenza kube lula ukuthi siphile. Yikho-ke singayibeka ezandleni zakhe impilo yethu singesabi lutho ngoba ulenhlakanipho ejulileyo lamandla angapheliyo.

4. Sikwazi ngani ukuthi uJehova uyasithanda?

⁴ UJehova uyasithanda. Okwenza uJehova wadala abantu yikuthi wayefuna labo bayikholise impilo. Amazwi akhe akuGenesisi 1:26 akucacisa kuhle lokho ayekuhlosile edala abantu. Wathi: “Asenze umuntu ngomfanekiso wethu, afanane lathi.” Wasidala silenkululeko yokukhetha esifuna ukukwenza, wasipha lekhaya elihle. (Hubo. 115:16) Wapha okhokho bethu u-Adamu lo-Eva umsebenzi ababezawukholisa wokwenza umhlaba wonke ube lipharadayisi. (Gen. 1:28; 2:15) Babengasweli lutho, ngoba wayebaphe konke okwakuzabenza bathokoze. Konke lokhu kwenza kube sobala ukuthi “uJehova ulothando oluqotho kuze kube nini lanini.”—Hubo. 103:17.

5. (a) UJehova wenzani ukuze inhloso yakhe igcwaliseke? (b) Yikuphi okunye uNkulunkulu ayekuthembisile okwagcwalisekayo? (Khangela ibhokisi elithi “UNkulunkulu Uhlala Ekhuluma Iqiniso.”)

⁵ Ilizwi likaJehova aliweli phansi. UJehova wadala umhlaba elenjongo. Kawudalelanga nje ukuthi uphongubakhona kodwa wayefuna ukuthi abantu bahlale kuwo. (Isaya. 45:18, 19) Ukuhlamuka kuka-Adamu lo-Eva kwenza ukuthi babe lesono bafe. Lokhu kwakungenza kukhanye angathi inhloso kaJehova isitshabalele. Kodwa akulanto engavimba uJehova ukuthi enze lokho akufunayo. Uhlala ezigcwalisa zonke izithembiso zakhe. (Isaya. 46:10, 11) Inhloso kaJehova yokuthi emhlabeni kuhlale abantu abalungileyo kayizange itshintshe. Yikho wavumela u-Adamu lo-Eva ukuthi babe labantwana. Ngokuya kwesikhathi wathumela iNdodana yakhe ukuthi izofela izizukulwane zika-Adamu ukuze zibe lethemba lokuthola ukuphila okungapheliyo.—Joh. 3:16.

UNKULUNKULU UYAKWENZA AKUHLOSILEYO

6. UJehova wathini ngoSathane?

⁶ USathane uDevelia obizwa langokuthi ‘yinyoka yokuqala’, nguye owayenga u-Adamu lo-Eva ukuthi bahlamukele uNkulunkulu. (Isam. 12:9; Gen. 3:4, 5; Joh. 8:44) UJehova wahle wamgwebela ukufa uSathane, watsho ukuthi ekucineni uzabhujiswa. (Gen. 3:15) Singakafiki lesosikhathi bakhona ababezabambana loSathane benze njengaye. Kodwa-ke abanye babezahlala beqotho kuJehova.

7. Ngobani abancedisa uSathane futhi kuzahamba njani ngabo?

⁷ Kulezingilosi ezahlamukayo zabambana loSathane futhi bakhona labantu abakhetha ukwenza njalo. Bonke laba sebezenze baba ngabantwana bakaSathane ngoba baphikisana lenhloso kaJehova. Kodwa uNkulunkulu usebeke isikhathi lapho azabhubhisa khona uSathane labo bonke abamlandelayo.—Dan. 2:44; Rom. 16:20.

8. UJesu wenzani ngo-1914? (Khangela lemifanekiso.)

⁸ Kuyini okwenza siqiniseke ukuthi uNkulunkulu uzamtshabalalisa uSathane labalandeli bakhe? Ngo-1914, uJesu walwa loSathane lamadimoni wabaphosela emhlabeni. (Isam. 12:7-9) Lanxa impi leyi yaba sezulwini, labantu emhlabeni babezakubona okukhulu ngoba iBhayibhili lithi: “Maye ngomhlaba langolwandle ngoba uDeveli wehlele kini ethukuthele kakhulu, esazi ukuthi usalelwe yisikhathi esifitshane.” (Isam. 12:12) USathane uzonde kazazi, kusukela ngo-1914 ubelokhu ezama ngazo zonke indlela ukuhuga abanengi ukuthi babambane laye. Yikho nje sibona izinto ziqhubeka zisiba zimbi kusa kwamalanga. Kodwa kungekudala nje uJesu uzambhubhisa uSathane labo bonke abamlandelayo, ‘aqedise ukunqoba kwakhe’. (Isam. 6:2) UJesu uzalingcwelisa sibili ibizo likaNkulunkulu. (Hubo. 45:4-6) Bonke abantu bazakwazi ukuthi uJehova uNkulunkulu kehlulwa lutho.—Hez. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

UNKULUNKULU UQOQA BONKE ABATHANDA IQINISO

9. Ngobani uJehova abaqoqayo lamuhla?

⁹ Sikhuluma nje uJehova useqalisile ukuqoqela “zonke izinto kuKhristu, izinto ezisemazulwini lezinto ezisemhlabeni.” (Efe. 1:10) “Izinto ezisemazulwini” ezitshiwo lapha ngamaKhristu agcotshiweyo akhethwe nguJehova ukuthi ayebusa loJesu ezulwini. “Izinto ezisemhlabeni” zona ngabantu abazaphila emhlabeni olipharadayisi kuze kube nini lanini. Zonke izinceku zikaJehova lezi zisebenza nzima zifundisa abantu iqiniso ngoJehova futhi zikuveza egcekeni ukuthi uSathane ngusomangase.

10. UJehova ubancedisa njani abafuna ukufunda iqiniso? (ISambulo 14:6, 7)

¹⁰ UJehova uqoqa bonke abathanda iqiniso ngomsebenzi wokutshumayela izindaba ezinhle owenziwa zinceku zakhe emhlabeni wonke. (Bala iSambulo 14:6, 7.) Lanxa umsebenzi wokutshumayela usenziwa yithi abantu, izingilosi yizo ezisiqondisa kulabo abafuna ukufunda iqiniso ngoJehova. Sokuleminyaka leminyaka uSathane edukisa abantu ngenkolo yamanga ebizwa langokuthi yiBhabhiloni Enkulu. Ubatshela amanga ngoJehova. Kodwa umsebenzi wokutshumayela esiwenzayo uvula abantu amehlo ngoba uwaveza egcekeni amanga kaSathane ubusubanceda ukuthi bafunde iqiniso ngoJehova. (Isam. 18:2, 4) Sokuseduze ukuthi zonke inkolo zamanga zitshabalaliswe besekusithi labo abathanda uNkulunkulu weqiniso bamuphe lonke udumo olufanele ibizo lakhe.—Isam. 17:16.

11. Abantu abakhonza uJehova bakhanya ngani?

¹¹ UJehova uqoqa abantu abanengi abathanda iqiniso kungelani lokuthi bavela ngaphi, bangumhlobo bani, banganani kumbe balani empilweni. (Isam. 7:9, 10) Bathi besizwa nje izindaba ezinhle bahle bazibonele ukuthi leli yilo kanye iqiniso besebekhetha ukumanyana labantu bakhe. (Makho 13:10) Lezinsuku kulula ukubona ukuthi ngobani abakhonza uJehova ngendlela eqondileyo. Umphrofethi uMalakhi wathi: “Lizaphinda liwubone umehluko phakathi komuntu olungileyo lomubi, laphakathi komuntu okhonza uNkulunkulu longamkhonziyo.” (Mal. 3:18) Indlela abantu bakaJehova abaziphatha ngayo labawukhuthalele ngayo umsebenzi wokutshumayela yenza kucace ukuthi bakhonza uNkulunkulu weqiniso.

12. Umsebenzi wokutshumayela unceda ngani?

¹² Nxa sitshumayela izindaba ezinhle zoMbuso siyabe silalela okwatshiwo nguJesu futhi sigcwalisa lesiphrofetho. (Mat. 24:14; 28:18-20) Umsebenzi lo unceda abantu abanengi emhlabeni wonke ukuthi babe ngabafundi bakaKhristu lokuthi bakhonze uNkulunkulu weqiniso. Uyabona phela ukuthi kuyisibusiso esinganani ukusebenza loJehova ekugcwaliseni inhloso yakhe!

UJEHOVA KASOZE ASILAHLISE

13. Ngobani abaqotshwe nguSathane futhi ubazondelani?

¹³ USathane uzonde kubi ngoba uyakwazi ukuthi akusasalanga sikhathi esinganani ukuthi abhujiswe. (Isam. 12:12, 13) Uqophe kakhulu amaKhristu agcotshiweyo azakuyabusa loJesu ezulwini. Okumcaphulayo yikuthi ‘alalela imilayo kaNkulunkulu lokuthi afakaza ngoJesu.’ (Isam. 12:17; 14:12) Abanye uSathane abafuna ngabomvu yilabo abancedisa amaKhristu agcotshiweyo emsebenzini wokutshumayela.

14. Kuzahamba njani nxa abantu bakaJehova sebehlaselwa? (Khangela lomfanekiso .)

¹⁴ Ngemva kokubhujiswa kweBhabhiloni Enkulu labo abasekela uSathane bazahlasela abantu bakaNkulunkulu. Lapho-ke bayabe sebethinte abangathintwayo. Kuzahle kuvuke impi ye-Amagedoni. (Isam. 16:13, 14, 16) UJesu lamabutho asezulwini bazabalwela abantu bakaJehova besebetshabalalisa bonke abalandela uSathane. (Isam. 19:19-21) Bonke abantu abenza okubi labaqamba amanga lamaqili bazabe bengasekho. (Isam. 21:8) Akucabange ukuthi uJehova uzakhazinyuliswa njani!

15. Kuyini okwenza singesabi? (Isaya 65:16, 17) (Khangela lomfanekiso.)

¹⁵ Lanxa abantu emhlabeni lo behlala beqambelana amanga futhi besilwa, uJehova uncedisa abantu bakhe ukuthi bahlale bemanyene. UJehova uyabaqoqa bonke abamthandayo futhi akulanto engamvimba ukuthi ababusise lokuthi abancedise emsebenzini abaphe wona. (Bala u-Isaya 65:16, 17.) Asesabi lutho ngoba uJehova kasoze asilahlise. Siyawakholwa amazwi akhulunywa ngumphostoli uPhawuli kuRoma 8:38, 39 athi: “Ngitsho lokufa, loba ukuphila, loba izingilosi, loba ohulumende, loba izinto ezikhona khathesi, loba ezizakuza, loba amandla, loba ukuphakama, loba ukutshona, loba yini edaliweyo, akusoze kusehlukanise lothando lukaNkulunkulu asitshengisa lona ngoKhristu uJesu iNkosi yethu.”

16. Kuyini okwenza umthembe ngenhliziyo yonke uJehova?

¹⁶ Sesibonile ukuthi zikhona sibili izizatho ezenza simthembe uJehova uNkulunkulu weqiniso. Phela nguye owasidalayo futhi uyasithanda kakhulu. Khathesi uqoqa bantu bazo zonke izizwe ukuthi bamkhonze. (Isaya. 60:22; Zak. 8:23) Siyakwazi ukuthi ilizwi likaJehova kaliweli phansi futhi uzakwenza konke akuhlosileyo. Sokusele kancane ukuthi amtshabalalise uSathane labo bonke abamsekelayo ekuqambeni amanga. Sivumelana lalokho okwatshiwo nguDavida ngesikhathi ethandaza. Wathi: “Kadunyiswe uJehova uNkulunkulu. Nguye yedwa owenza izinto ezimangalisayo. Kwangathi ibizo lakhe elikhazimulayo lingadunyiswa kuze kube phakade, inkazimulo yakhe igcwale umhlaba wonke.”—Hubo. 72:18, 19.