IMIBUZO EBUZWA NGABASAKHULAYO
Singabangane Yini Kumbe Siyathandana?—Ingxenye 2: Indlela Engenza Ngayo Itshengisani?
Ulomngane wakho ongumfana kumbe oyinkazana. Nxa umngane lo ekuthumela imeseji uhle uphendule masinyane nje njalo lezinsuku lixoxa kakhulu. Wena uzitshela ukuthi lingabangane futhi ucabanga ukuthi laye ukubona ngaleyondlela. Kambe ukuthi kungaba lohlupho?
Okungenzakala
Akukubi ukuba lomngane ongumfana kumbe oyinkazana. Kodwa kungenzakalani nxa ungaqakathekisa umngane lo ukwedlula abanye abangane olabo? Angacina ecabanga ukuthi ufuna lithandane.
Yikho yini okufunayo? Nanku okunye ongakwenza ungananzeleli okungabangela ukuthi omunye umuntu acabange ukuthi ufuna lithandane:
Uhlala uxoxa laye.
“Lanxa kuyabe kungasicala lakho ukuthi omunye umuntu akuthande, akumelanga ukhwezele ngokumtshela ukuthi lingabangane kuphela ngapha uhlala umfonela ukhuluma laye.”—USierra.
Uhlala uvuma ukuxoxa laye.
“Kulomunye unkazana owayehlala engithumela amameseji amanenginengi lami ngiwaphendula. Kwacina kusiba nzima ukuthi ngimchasisele ukuthi ngangimbona njengomngane kuphela.”—URichard.
Uyamkhuthaza ukuthi aqhubeke exoxa lawe.
“Abanye abantu bacabanga ukuthi ukudlala ngothando yinto encane nje. Badlala ngabanye besenza angathi bayabathanda bona bengabathandi. Sengikubone kusenzakala kanengi lokhu futhi omunye usala esizwa ubuhlungu.”—UTamara.
Iqiniso elikhona: Nxa ungahlala ukhuluma lomunye umuntu futhi umenzela ezinye izinto, angacina ecabanga ukuthi uyamthanda.
Kungani kumele unanzelele?
Kuyamlimaza omunye.
Okutshiwo liBhayibhili: “Nxa okukhangelelwe ngumuntu kuphuza, inhliziyo iyagula.” (IZaga 13:12) Kuyini ongakulindela nxa umuntu angahlala esenza izinto ezitshengisa ukuthi ufuna ukuthandana lawe?
“Abanye bathanda ukugcina umuntu eseduze kodwa kungacaci ukuthi bafuna ukuthandana laye yini loba hatshi. Lokhu kungafanana lomuntu obamba inhlanzi kodwa angayikhiphi ewukeni. Nxa ungenza njalo wena ukwazi ukuthi awulaso isifiso sokuthandana lalowomuntu uyabe uzamzwisa ubuhlungu kakhulu.”—UJessica.
Ungacina ukhanya angathi ungumuntu omubi.
Okutshiwo liBhayibhili: “Lingaqakathekisi lokho okufunwa yini kuphela kodwa liqakathekise lalokho okufunwa ngabanye.” (KwabaseFiliphi 2:4) Ungathi ngumuntu onjani oqakathekisa okufunwa nguye kuphela? Abantu bangacina bembona njani?
“Mina angimthandi umfana odlala ngamankazana. Ukudlala ngothando kungatshengisa ukuthi lowo okwenzayo kasoze athembeke lanxa engatshada. Kutshengisa ukuthi uyabe efuna ukuziqakathekisa ngezinto ezingayisizo futhi engelandaba labanye.”—UJulia.
Iqiniso elikhona: Umuntu oyenza angathi ufuna ukuthandana lomunye umuntu yena ekwazi ukuthi udlala ngaye uyazilimaza aphinde alimaze labanye.
Ongakwenza
IBhayibhili lithi kumele uphathe ‘amajaha njengabafowenu’ njalo uphathe “abesifazana abasesebatsha njengabodadewenu, ube msulwa kukho konke.” (1 KuThimothi 5:1, 2) Nxa ungakulandela lokhu lizahlala lizwanana labangane bakho, kungelani lokuthi ngabafana kumbe ngamankazana.
“Aluba bengitshadile bengingeke ngidlale kubi lomuntu engingatshadanga laye. Yikho angifuni ukukwenza lakhathesi ngingakatshadi ukuze ngingakwenzi nxa sengitshadile.”—ULeah.
IBhayibhili lithi: “Nxa amazwi angaba manengi, ukuphambanisa akuswelakali.” (IZaga 10:19) Amazwi la ayasebenza lalapho abantu bethumelana amameseji futhi kugoqela lokuthi lithumelana amameseji kanengi kangakanani lokuthi lixoxa ngani.
“Angiboni ukuthi kumele uthumelane amameseji lenkazana nsuku zonke nxa ungelasifiso sokuthandana laye.”—UBrian.
IBhayibhili lithi: “Ukuhlakanipha okuvela phezulu, okokuqala kumsulwa.” (UJakhobe 3:17) Omunye angagona umuntu ngenxa yokuthi ungumngane nje kodwa omunye akwenze ngenxa yokuthi uyamfuna.
“Ngiyazama ukuzixoxela labantu ngikhululekile kodwa kulalapho engicina khona, futhi angivumeli ukuthi umuntu aphongungisondelela nje.”—UMaria.
Iqiniso elikhona: Hlolisisa ukuthi ubaphatha njani abangane bakho abangamankazana kumbe abangabafana. Osakhulayo okuthiwa nguJennifer uthi, “Akulula ukuthola abangane abaqotho, ngakho ayisikho kuhlakanipha ukuqeda ubungane ngokwenza umuntu angazwisisi ukuthi lilokhu lingabangane yini kumbe usufuna lithandane.”
Okunye okungakunceda
Lalela okutshiwo ngabanye. Nxa othile angakubuza athi, “Wena lozibani liyathandana yini?” kungabe kusitsho ukuthi sekumele linanzelele, selijayelene kakhulu lomngane wakho.
Phatha abangane bakho abangamankazana kumbe abangabafana ngendlela efananayo. Ungaqakathekisi oyedwa ubusukhuluma laye kakhulu ukwedlula abanye.
Nanzelela ukuthi umthumela amameseji kanengi kangakanani, ukuthi lixoxa ngani lokuthi uwathumela ngasiphi isikhathi. Inkazana okuthiwa ngu-Alyssa ithi, “Akudingeki ukuthi uthumele inkazana kumbe umfana amameseji phakathi kobusuku.”