IMIBUZO EBUZWA NGABASAKHULAYO
Singabangane Yini Kumbe Siyathandana?—Ingxenye 1: Indlela Enza Ngayo Itshengisani?
Uyamthanda umfana lo loba intombi le futhi uyaqiniseka ukuthi laye uyakuthanda. Phela lihlala lithumelana amameseji, nxa lisemibuthanweni lizithola selibabili futhi amanye amameseji akuthumela wona ngawothando.
Yikho ubona kungcono ukumbuza ukuthi uyakuthanda yini ukuze ubone ukuthi lilonke yini. Ubusuphelelwa usizwa ekuphendula esithi: “Ngikubona njengomngane kuphela? Akukho okunye.”
Usala usizwa njani?
“Ngazonda kakhulu. Ngangimzondele njalo ngizisola. Sasithumelana amameseji nsuku zonke futhi wayetshengisa ukuthi uyangithanda sibili. Yikho lami ngacina sengimthanda.”—UJasmine.
“Mina lenye inkazana sasijayele ukuphelekezela elinye ijaha lentombi ababethandana. Kwezinye izikhathi kwakungathi lathi siyizithandani. Sasihlala sixoxa futhi saqalisa ukuthumelana amameseji buthumuthumu. Ngezwa ubuhlungu kakhulu ngesikhathi engitshela ukuthi wayengibona njengomngane kuphela futhi ngisizwa lokuthi wayevele ethandana lomunye umuntu.”—URichard.
“Kulomfana owayengithumela amameseji nsuku zonke futhi ngezinye izikhathi kwakungathi siyizithandani. Kodwa ngathi ngimtshela ukuthi ngiyamthanda wahleka wasesithi, ‘Angikafuni ukuthandana laloba ngubani.’ Ngakhala okwesikhathi eside.”—UTamara.
Iqiniso elikhona: Izikhathi ezinengi nxa umuntu obucabanga ukuthi selithandana angathi kakuthandi, uyazonda, ube lenhloni njalo uzwe angathi uqiliwe. Umfana okuthiwa nguSteven uthi, “Kuze kwenzakale kimi ngezwa angathi umhlaba ungihlanekele. Kwangithatha isikhathi ukuthi ngiphinde ngithembe omunye umuntu.”
Kungani kusenzakala?
Ukuthumelana amameseji emafonini lakwezokuxhumana kwenza kube lula ukuthi ucine usuthanda umuntu oyabe uxoxa laye lanxa yena engakuthandi. Nanku okutshiwo ngabanye abasakhulayo:
“Omunye umuntu angakuthumela amameseji ukuze aqede isizungu kodwa wena ubone angathi lokho kutsho ukuthi uyakuthanda. Besekusithi nxa ekuthumela amameseji nsuku zonke ungazibona uqakatheke kakhulu kuye, kanti ukhuthe ugatsha.”—UJennifer.
“Ungabe ufuna lithandane ikanti lowomuntu ofuna ukuthandana laye uzifunela umuntu wokuxoxa laye kuphela loba ongamenza azibone engumuntu oqakathekileyo.”—UJames.
“Kulula ukuthi imeseji ethi ‘ulale kuhle’ izwakale angathi itsho ukuthi oyithumeleyo uyakuthanda kanti umuntu wenkosi udlala ngawe nje.”—UHailey.
“Umuntu okuthumela okungudoli okubobothekayo angabe etshengisa ukuthi ngumngane nje kumbe ukuthi uyakufuna. Kwesinye isikhathi umuntu othunyelwe imeseji enjalo angacabanga ukuthi kutsho ukuthi omthumeleyo uyamthanda.”—U-Alicia.
Iqiniso elikhona: Ungacabangi ukuthi wonke umuntu otshengisa ukuthi ulendaba lawe uyakufuna.
Khona kulula nxa kukhulunywa kodwa ukukwenza kunzima. IBhayibhili lithi: “Inhliziyo iyakhohlisa ukwedlula loba yini njalo imbi kakhulu.” (UJeremiya 17:9) Ingakwenza ucwile ethandweni, ubusudana nxa usunanzelela ukuthi ubuthandana wedwa.
Ongakwenza
Cabangisisa. Mana kancane ukhangelisise ukuthi indlela elizwanana ngayo itshoni sibili. Zibuze, ‘Ngilezizathu ezizwakalayo yini ezenza ngicabange ukuthi umuntu lo ungiqakathekisa ukwedlula abanye?’ Ungavumeli indlela ozizwa ngayo ikwenze wehluleke ukusebenzisa ‘ingqondo yakho.’—KwabaseRoma 12:1.
Hlolisisa. Lanxa ubona angathi indlela umuntu lo enza ngayo itshengisa ukuthi uyakuthanda, wena khangela kakhulu lokho okwenza uthandabuze ukuthi uyakuthanda sibili. Ungacabangi ukuthi uyakuthanda ngenxa nje yokuthi wena uyamthanda.
Bekezela. Ungangeni ngenhliziyo nxa umuntu engakaphumeli egcekeni ukuthi ufisa ukukwazi ngcono elenhloso yokuthi lithandane ngoba ungalimala.
Ungaziqambeli amanga. IBhayibhili lithi ‘kulesikhathi sokukhuluma.’ (UmTshumayeli 3:7) Nxa ufuna ukwazi ukuthi umngane wakho angafisa lithandane yini, mphumele egcekeni, umbuze. Enye intombi okuthiwa nguValerie ithi, “Nxa yena engakuboni ngendlela wena ombona ngayo, ubuhlungu ozabuzwa ngalesosikhathi bungcono kulobuhlungu ozabuzwa nxa kungadlula izinyanga ucabanga ukuthi liyathandana.”
Iqiniso elikhona: IZaga 4:23 zithi: “Linda inhliziyo yakho.” Nxa ufisa ukuthandana lomunye umuntu, mbuze ukuthi laye engabe elesifiso leso yini. Ukuyekela imizwa yothando ikhula ungakambuzi kufanana lokuzama ukuhlanyela isihlahla elitsheni.
Nxa laye efisa lithandane sokukuwe ukuthi ukhethe ukuthi lizathandana yini nxa kuyikuthi usukhule okwaneleyo njalo usukulungele ukuthandana lomunye umuntu. Khumbula ukuthi indoda lomkayo abahlalisana kuhle ngabahlela ukwenza izinto ezifananayo ekukhonzeni, abatshelana iqiniso futhi abangafihlelani lutho. (1 KwabaseKhorinte 7:39) Akuthandabuzwa ukuthi bayabe beqale bengabangane njalo bazahlala bengamathe lolimi.—IZaga 5:18.