IMIBUZO EBUZWA NGABASAKHULAYO
Ubutabane Bubi Yini?
“Ngisakhula ngangithwaliswe nzima yimizwa yokukhangwa ngabanye abafana lanxa lami ngingumfana. Ngangicabanga ukuthi kuzadlula ngokuhamba kwesikhathi kodwa lakhathesi imizwa leyo lokhe ikhona.”—UDavid, 23.
UDavid ngumKhristu ofuna ukuthokozisa uNkulunkulu. Manje angenelisa yini ukukwenza khonokho yena ekhangwa ngabanye abafana? UNkulunkulu uthini ngobutabane?
Okutshiwo liBhayibhili
Indlela abantu ababona ngayo ubutabane iyatshiyana kusiya ngamasiko abo kanye langokuthi baphila kusiphi isikhathi. Kodwa indlela amaKhristu abona ngayo ubutabane ayiyi ngokuthi abanye babubona njani futhi ‘abaphetshulelwa le lale yimimoya yonke yemfundiso.’ (Kwabase-Efesu 4:14) AmaKhristu alandela lokho okutshiwo liBhayibhili kukho konke akwenzayo kugoqela ngitsho lendaba yobutabane.
IBhayibhili licacile endabeni yobutabane. Lithi:
“Akumelanga uye emacansini lomuntu wesilisa, ulale laye angathi ulele lomuntu wesifazana.”—ULevi 18:22.
‘UNkulunkulu wabayekela balandela inkanuko zezinhliziyo zabo, wabatshiya belandela inkanuko zabo zemacansini besedlulisa amalawulo ngoba abesifazana babo babezitshintsha baziphathe ngendlela engasiyemvelo, betshiya okwemvelo.’—KwabaseRoma 1:24, 26.
“Lingadukiswa. Abafebayo, labakhonza izithombe, labatshadileyo abalala labantu abangasibomkabo, lamadoda avuma ukuya emacansini lamanye amadoda, lamadoda ayizitabane, lamasela, labayizihwaba, lezidakwa, labathethisayo, kanye labangamaqili abasoze balithole ilifa loMbuso kaNkulunkulu.”—1 KwabaseKhorinte 6:9, 10.
Lokho uNkulunkulu asifundisa khona okuseBhayibhilini kusebenza kuwo wonke umuntu kungelani lokuthi uyisitabane kumbe hatshi. Iqiniso yikuthi wonke umuntu kumele azibambe nxa esizwa elesifiso sokwenza loba yini uNkulunkulu angayithandiyo.—KwabaseKholose 3:5.
Lokhu kutshoni?
Lokhu kutsho ukuthi iBhayibhili lithi abantu bazizonde yini izitabane?
Hatshi. IBhayibhili alisikhuthazi ukuthi sizonde loba ngubani, kungelani lokuthi yisitabane loba hatshi. Kodwa lithi ‘sizame ngamandla wonke ukuba lokuthula labantu bonke’ kungelani lokuthi baphila njani. (KumaHebheru 12:14) Yikho akuqondanga ukuphatha kubi izitabane kumbe ukuzibulala.
Lokhu kutsho ukuthi amaKhristu kumele aphikisane lemithetho evumela izitabane ukuthi zitshade?
IBhayibhili litshengisa ukuthi uNkulunkulu ufuna umtshado ube phakathi kwendoda eyodwa lomfazi oyedwa. (UMathewu 19:4-6) Imithetho evumela ukutshadiswa kwezitabane ihambisana lezombusazwe hatshi imithetho yokuziphatha. IBhayibhili litshela amaKhristu ukuthi angangeneli kwezombusazwe. (UJohane 18:36) Yikho amaKhristu awasekeli futhi awaphikisani lemithetho kahulumende evumela ukutshadiswa kwezitabane kumbe inkululeko yazo.
Eminye imibuzo
Kodwa nxa umuntu eyisitabane ke? Angatshintsha yini?
Ye. Ngesikhathi samaKhristu okuqala, abanye batshintsha. Ngemva kokukhuluma ngokuthi izitabane azisoze zilithole ilifa loMbuso kaNkulunkulu, iBhayibhili lithi: “Abanye benu babenjalo.”—1 KwabaseKhorinte 6:11.
Njengoba labo ababeyizitabane basebetshintshile, kutsho yini ukuthi babengaselazo ngitsho izifiso zempilo yabo yakudala? Hatshi. IBhayibhili lithi: “Ligqoke ubuntu obutsha obenziwa bube butsha ngolwazi oluqondileyo.” (KwabaseKholose 3:10) Umuntu kuyabe kumele aqhubeke etshintsha.
Manje kuthiwani nxa umuntu ofuna ukulandela izimiso zikaNkulunkulu elokhu elemizwa yobutabane?
Umuntu lowo uyazikhethela ukuthi alandele imizwa leyo kumbe hatshi, njengoba nje engakhetha kuloba yiziphi ezinye izifiso ezimbi angaba lazo. Njani? IBhayibhili lithi: “Qhubekani lihamba ngomoya, lingenza njalo alisoze lilandele isifiso senyama loba sekutheni.”—KwabaseGalathiya 5:16.
Ivesi le ayithi umuntu kasoze abe lesifiso senyama. Kodwa itshengisa ukuthi nxa angabala iBhayibhili nsuku zonke futhi athandaze, uzaba lamandla okulwisana lezifiso lezo.
UDavid esikhulume ngaye ekuqaliseni, wabona ukuthi lokho kuliqiniso. Wancedwa layikutshela abazali bakhe ngohlupho lwakhe. Uthi: “Kwakungathi ngethulwe umthwalo osindayo, ngiyabona lokuthi ngabe ngangikhulume labo ngisasephakathi kweminyaka yabo 13-19, ngangizasikholisa kakhulu isikhathi leso.”
Okuzasinceda ukuthi sithokoze yikulandela lokho esikutshelwa nguJehova. Sileqiniso lokuthi lokho asitshela khona ‘kulungile, kwenza inhliziyo ithokoze’ lokuthi ‘nxa singakugcina sizathola umvuzo omkhulu.’—IHubo 19:8, 11.