Nanzelela Indlela Olalela Ngayo

1-2. (a) Kuyini uJehova akwenzela abantu bakhe lamuhla? (IHubo 23:​1, 2, 5) (b) Sizaxoxa ngani esihlokweni lesi?

AKULA abanye abantu abafundiswa njengathi. Sivumelana lamazwi akhulunywa nguDavida, athi: “UJehova unguMelusi wami. Angisoze ngiswele lutho.”—Bala iHubo 23:​1, 2, 5.

² Maviki wonke uJehova uyasifundisa emihlanganweni yebandla. Izikhathi ezinengi emihlanganweni le sikhunjuzwa izinto esivele sizazi. Lanxa sesileminyaka leminyaka singoFakazi kumele sikuqakathekise lokho esikufundiswa nguJehova. (2 Phet. 1:12) Kukuthwalisa nzima yini ukulalela into efananayo kanengi? Nxa kunjalo isihloko lesi sizakunceda kakhulu. Sizaxoxa ngokuthi kungani kumele silalelisise nxa sisemihlanganweni yethu. Sizaxoxa langokuthi labo abaphiwe umsebenzi wokufundisa abanye ebandleni bangenzani ukuze bancedise abanye ukuthi balalele. Sizathola lamacebo esingawasebenzisa ukuze silalele emihlanganweni yethu. Asiqaleni sixoxe ngokuthi kanti vele ngubani osifundisayo.

KANTI VELE NGUBANI OSIFUNDISAYO?

3. UJehova usebenzisani ukuze asifundise futhi nxa ulesibusiso sokufundisa abanye kumele wenzeni?

³ UJehova ukhuluma lathi esebenzisa iLizwi lakhe iBhayibhili. (2 Thim. 3:​16, 17) UJesu wayeyingcitshi ekufundiseni abantu esebenzisa iLizwi likaNkulunkulu. Abanye ababemlalele baze babuzana bathi: “Indoda le yaluthatha ngaphi ulwazi lweMibhalo olunengi kangaka yona ingafundanga ezikolo zaboRabi?” (Joh. 7:15) Abantu ababezimisele ukufunda ngoJehova bathinteka kakhulu ngendlela uJesu ayechasisa ngayo iMibhalo. Umphostoli uPhawuli kanye lo-Apholo, labo babebonisana labantu besebenzisa iMibhalo. (Imiseb. 17:​2, 3; 18:​24, 28) Lamanye amaKhristu akuqala ayefundisa esebenzisa iMibhalo. IBhayibhili lisetshenziswa kakhulu emabhukwini ethu, enhlelweni ze-broadcast, ezintshumayelweni zethu kanye lakumavidiyo. Ngitsho labantu abasivakatshela okokuqala ngqa emihlanganweni yethu bayamangala bebona indlela esisebenzisa ngayo iBhayibhili. Labo abafundisa emihlanganweni yethu balisebenzisa kuhle iBhayibhili. Bawabala kuhle amavesi, bawachasise okuzwayo besebencedisa abalaleleyo babone ukuthi bangakusebenzisa njani lokho abakufundileyo.—Luk. 24:32.

4. Kutshoni ukulalela uJehova?

⁴ Nxa uJehova esithi simlalele uyabe esitshela ukuthi senze lokho asitshela khona. Yikho nxa sisemihlanganweni yethu, uJehova uyabe ekhuluma lathi esebenzisa iLizwi lakhe iBhayibhili esitshela lokho okumele sikwenze. Asithandabuzi ukuthi uJehova uyathokoza kakhulu nxa simlalela.—Zaga. 27:11.

KUNGANI KUMELE SILALELISISE EMIHLANGANWENI YETHU?

5. Imihlangano yebandla isinceda njani? (Joh. 4:​23, 24; 1 Joh. 5:3)

⁵ Okwenza silalelisise emihlanganweni yethu yikuthi siyamthanda uJehova. (Mat. 22:37) Nxa sisemihlanganweni yethu, sifunda okunengi kakhulu ngoJehova futhi lokhu kwenza simthande kakhulu. Indlela esimthanda ngayo izasinceda ukuthi simlalele njalo simkhonze ngenhliziyo yonke.—Bala uJohane 4:​23, 24; 1 Johane 5:3.

6. Kuyini okunye esikufunda emihlanganweni yethu?

⁶ Siyabathanda abantu. (Mat. 22:39) Emihlanganweni yethu siyafundiswa ukuthi singatshengisa njani ukuthi siyabathanda abafowethu labodadewethu kanye lalabo abangakamkhonzi uJehova. Ibhukwana elithi Thanda Abantu Ubenze Babe Ngabafundi lisincede kakhulu ukuthi sithuthukise indlela esitshumayela ngayo. Kukuthwalisa nzima yini ukuqalisa ingxoxo labantu ongabaziyo? Nxa kunjalo, zama ukulalelisisa ikakhulu engxenyeni ethi Zinikele Emsebenzini Wokutshumayela ukuze ubone ukuthi abafowethu labodadewethu baziqalisa njani izingxoxo, lawe ubusukopa uyekwenza ekutshumayeleni.

7. Kungani kuqakathekile ukuthi simlalele uJehova?

⁷ Sifuna ukuthokoza kuze kube nini lanini. UMosi watshela abako-Israyeli ukuthi nxa bengalalela uJehova bazathokoza kakhulu. (Dute. 32:​44-47) Imihlangano esiba layo iyasinceda ukuthi sibekezele futhi sithokoze. (Rom. 8:25) Kuqakatheke kakhulu ukuthi simlalele khathesi uJehova futhi sihlale siphapheme ngoba siphila ezinsukwini zokucina.—Mat. 24:​42-44; Isam. 1:3.

SINGABANCEDISA NJANI ABANYE UKUTHI BALALELISISE EMIHLANGANWENI YETHU?

8. Kungani kumele abazalwane baqhubeke bethuthukisa indlela abafundisa ngayo?

⁸ Abazalwane abalomthwalo wokufundisa ikakhulu labo abenza intshumayelo zikazulu wonke kumele bahlale bethuthukisa indlela abafundisa ngayo. Umzalwane oyilungiselela okuzwayo intshumayelo yakhe, uba leqiniso lokuthi usebenzisa iLizwi likaNkulunkulu ukuze athinte inhliziyo zabantu. Unceda labo abangakabi ngoFakazi balibone iqiniso eliseBhayibhilini, besekuthi labo abangoFakazi abancede ukuthi baqhubeke beligagadlele iqiniso. Yikho nxa ulomthwalo wokufundisa, khumbula ukuthi indlela ofundisa ngayo ingatshintsha impilo zabantu. Endimeni ezilandelayo sizaxoxa ngamacebo angakunceda uthuthukise indlela ofundisa ngayo. Amacebo la anceda ikakhulu labo abenza izintshumayelo zikazulu wonke kodwa ayasebenza lakwezinye izabelo zokufundisa.—2 Thim. 4:2; Tit. 1:9.

9. Ungenzani ukuze ufundise ngendlela elula?

⁹ Lungiselela kuhle. Nxa intshumayelo yakho ingaba lemicijo eminenginengi futhi kungazwakali ukuthi imicijo le ingenelana njani, kuzabanzima ukuthi abantu bakulalele. Manje ungayilungiselela njani intshumayelo yakho ukuze iphume kuhle? Okokuqala, esethulweni sakho wohle uqambe ukuthi yiphi imicijo eqakathekileyo. Okwesibili, zinike isikhathi eseneleyo sokuxoxa ngomcijo ngamunye. Kuqakathekile ukuthi abakulaleleyo bazwe ukuthi usuqedile ngomcijo othile njalo usudlulela kolandelayo. Okwesithathu, nxa usugoqa intshumayelo yakho phinda uyiqambe imicijo eqakathekileyo.

10. Kunceda ngani ukuthi intshumayelo yakho ibe segazini?

¹⁰ Intshumayelo yakho kayibe segazini. Kubalula ukuthi ukhulume okusuka enhliziyweni nxa indaba yakhona uyithanda futhi uyizwisisa. (Zaga. 2:​4, 5; Imiseb. 4:20) Zinike isikhathi sokucabangisisa ngamavesi ozawasebenzisa entshumayelweni yakho. Omunye umfowethu osekhulile ohlala e-United States lokhe esayikhumbula intshumayelo ayizwa esesengumfanyana, uthi: “Umzalwane owayesenza intshumayelo wasikhuthaza ukuthi sicabangisise ngalokho esikubala eLizwini likaNkulunkulu. Wasinika lamacebo okuthi singakwenza njani lokhu. Wawuzibonela ukuthi ukhuluma into ayaziyo. Intshumayelo yakhe yayitshintsha sibili impilo yami. Ngasengikukholisa sibili ukubala iBhayibhili futhi ngasondela kakhulu kuJehova.”

11. Ungamlingisela njani uPhawuli nxa ufundisa? (U-1 Thimothi 4:​13-16)

¹¹ Nceda abakulaleleyo babone khona kanye okumele bakwenze. Nceda abalaleleyo babone ukuthi bangawasebenzisa njani amacebo aseBhayibhilini. Umphostoli uPhawuli wanika uThimothi amacebo ayezamnceda ukuthi aqhubeke elokholo oluqinileyo ngesikhathi encedisa abazalwane base-Efesu. (Bala u-1 Thimothi 4:​13-16.) Zibuze ukuthi intshumayelo yakho izabanceda njani abalaleleyo lokuthi yiwaphi amacebo abangasuka lapho bayewasebenzisa.

12. Kunceda ngani ukukhuluma ngamazwi akho nxa ufundisa?

¹² Phrakthiza intshumayelo yakho ngokuzwakalayo. Lokhu kuzakunceda ukuthi ukhulume ngamazwi akho kulokubalela abantu lokho okubhalwe phansi. Nxa ungafundisa njalo, kuzabalula ukuthi abantu bakulalele futhi bazwisise ukuthi ukhuluma ngani. Ibhukwana elithi Khuthalela Ukubala Lokufundisa lithi: “Ungatshintshi indlela okhuluma ngayo nsuku zonke kodwa akukhanye ukuthi okutshoyo kusuka enhliziyweni lokuthi uyabathanda abantu abakulaleleyo.” Nxa ungakhuluma okusuka enhliziyweni, abantu bazakulalela, bakhululeke futhi bazimisele ukwenza lokho obafundisa khona.

13. Umzalwane oyingcitshi ekufundiseni angakuncedisa njani? (Khangela lomfanekiso.)

¹³ Cela ukuncediswa ngumzalwane oyingcitshi ekufundiseni. Nxa usuqedile ukulungiselela intshumayelo yakho, cela umzalwane lo akulalele ngesikhathi usuyiphrakthiza futhi. Ungaqala ngokumtshela ukuthi yiphi imicijo eqakathekileyo ozakhuluma ngayo futhi nxa kuvuma ungamnika amanotsi akho. Nxa usuqedile ukuphrakthiza intshumayelo yakho sebenzisa amacebo azakunika wona. (Zaga. 1:5) Sokungabalula ukuzitshela ukuthi sifundisa ngendlela elula lezwakalayo kanti thina siyabe sibalahla abalaleleyo. Yikho kukuhle ukucela omunye akulalele ngesikhathi uphrakthiza intshumayelo yakho. Nxa singahlala sithuthukisa indlela esifundisa ngayo, sizanceda abanye ukuthi balizwisise iqiniso eliseBhayibhilini futhi bakusebenzise lokho abakufundayo.a

OKUNGAKUNCEDA ULALELISISE EMIHLANGANWENI YETHU

14. Singamlingisela njani umlobi weHubo 119? (IHubo. 119:​24, 111, 167)

¹⁴ Kumele sikuqakathekise konke esikukhunjuzwa nguJehova. Izikhathi esiphila kuzo zinzima kakhulu, yikho uJehova ehlala esifundisa ukuze senelise ukubekezela. (2 Thim. 3:1) Kwesinye isikhathi sesingazitshela ukuthi indaba efananayo sesiyizwe kanenginengi emihlanganweni yethu. Lanxa kunjalo, kumele silingisele umlobi weHubo 119 ngokuqakathekisa konke esikufundiswa nguJehova.—Bala iHubo 119:​24, 111, 167.

15. Kumele senzeni ukuze siqhubeke siqakathekisa lokho esikufundiswa nguJehova?

¹⁵ Kumele sikuqakathekise konke esikufundiswa nguJehova. Ngesikhathi ama-Israyeli esenkangala uJehova wawanika imana. (Eks. 16:​15, 31) Ama-Israyeli aqala eyiqakathekisa imana. Phela yayimnandi futhi yikho ukudla okwawancedayo ngesikhathi esenkangala. Ayekwazi mhlophe ukuthi ayiphiwe nguJehova. Kodwa ngokuhamba kwesikhathi amanye ama-Israyeli acina esekhuluma kubi ngemana ngoba ayeseyijayele kakhulu (Nani. 21:5) Sokungabalula ukuthi lathi singakuqakathekisi kangako lokho esikufundiswa nguJehova, sesibona angani sihlala sifundiswa izinto ezifananayo. Manje kuyini okungasinceda nxa sesicabanga njalo? Yikuzikhumbuza ukuthi esikufundiswayo kuvela kuJehova esebenzisa inhlanganiso yakhe. Kumele sikhumbule lokuthi lokho esikufundiswayo kuyasinceda nxa sisenza izinqumo njalo kungasenza sithole ukuphila okungapheliyo.—Zaga. 3:​13, 16-18; Joh. 17:3.

16. Kuyini okunceda abanye abafowethu labodadewethu ukuthi balalelisise emihlanganweni yethu? (Khangela lebhokisi elithi “Amacebo Angakunceda Ukuthi Ulalelisise.”)

¹⁶ Zama ukusebenzisa amacebo alandelayo. Nanku okunye okuncede abafowethu labodadewethu asebelesikhathi eside bekhonza uJehova ukuthi balalelisise nxa besemihlanganweni yethu. Udadewethu okuthiwa ngu-Ashley usekhonze uJehova okweminyaka edlula 30, uthi: “Nxa ngingahamba emihlanganweni yethu ngingalungiselelanga kuba nzima ukuthi ngilalele njalo ngiyaziphendukela endlini ngingaphendulanga. Yikho ngiyalwisa ukuthi ngiyilungiselele imihlangano ukuze ngiyikholise.” Umfowethu okuthiwa nguJózsef osekhonze uJehova okweminyaka engu-52, uthi: “Mina ukuzwa indaba efananayo kanenginengi akungidaki. Iqiniso yikuthi abazalwane bafundisa ngendlela ezitshiyeneyo. Usungafunda into entsha endabeni obuzitshela ukuthi uyayazi. Angizihluphi kangako ngokuthi umzalwane owenza intshumayelo uyingcitshi yokufundisa loba hatshi. Mina engiyabe ngifuna ukukuzwa yikuthi uJehova ungifundisani mhlalokho.”

17. Yiwaphi amacebo angakunceda ukuthi ulalelisise emihlanganweni yethu? (Khangela lomfanekiso.)

¹⁷ Nanku okunye ongakwenza ukuze ulalelisise emihlanganweni yethu. (1) Ungadli kakhulu ungakayi emhlanganweni ngoba uzacina usulala. (2) Fika kuseselesikhathi uzidingele kuhle indawo yokuhlala. (3) Ungavumi ukuthi ifoni kumbe i-tablet iphambanise indlela olalela ngayo. (4) Zibuze ukuthi kuzafundwani. (5) Khangela okwenzakala eplathifomu kulokuthatheka ngezinto ezenzakala emaceleni. (6) Bhala amanotsi kumbe udwebe izinto ezizakukhumbuza okuxoxwe ngakho. (7) Cabangisisa ngamavesi alemicijo eqakathekileyo ubusuzibuza ukuthi angena njani endabeni okuxoxwa ngayo. (8) Zibuze ukuthi ungakusebenzisa njani lokhu okuzwayo ukuze uncedise omunye ebandleni kumbe ekutshumayeleni. (9) Zinike isikhathi sokuhlola uhlelo lomhlangano, ukuthi isihloko samhlalokho sithini lokuthi izintshumayelo zakhona zisekelwe kuwaphi amavesi. (10) Hlala phansi ulalele umculo ubukele lamavidiyo omculo. Lokhu kuzakunceda uyivule ngokupheleleyo inhliziyo yakho ukuze uJehova akufundise.

QHUBEKA ULALELA UJEHOVA

18. Kungani kumele siqhubeke silalelisisa emihlanganweni yethu?

¹⁸ Nxa siqhubeka silalelisisa emihlanganweni yethu siyabe sivumela uJehova ukuthi asikhokhele “ezindleleni zokulunga.” (Hubo. 23:3; 31:3) UJehova uyaseluleka futhi asikhuze ngoba ufuna siqhubeke sisendleleni eyiyo. Yikho ‘asinanzeleleni indlela esilalela ngayo’ ukuze sikusebenzise lokho esikufunda emihlanganweni yethu. (Luk. 8:18) Bonke abamlalelayo uJehova bazathokoza khathesi futhi bazakholisa impilo kuze kube nini lanini.—Hubo. 119:​2, 14.