Woba Yingcitshi Ekufundiseni

1. Sifundani ku-2 Thimothi 4:2? (Khangela lomfanekiso.)

UJESU watshela abafundi bakhe wathi, ‘Hambani liyekwenza abantu babe ngabafundi, libafundise ukulandela izinto zonke engilitshele zona.’ (Mat. 28:​19, 20) Ivesi le yenza kucace ukuthi wonke amaKhristu kumele afundise abanye. UJehova uyababona bonke ‘abazimisele ukuthola ukuphila okungapheliyo’ yikho esebenzisa izingilosi zakhe ukuze asiqondise ebantwini labo. Lanxa kunjalo yithi okumele sibafundise ngaye. (Imiseb. 13:48; Joh. 6:44; Isam. 14:6) IBhayibhili lisitshela ukuthi ngesikhathi uPhawuli loBhanabha bese-Ikhoniyami bangena esinagogeni “bakhuluma ngendlela eyenza ukuthi abantu abanengi abangamaJuda labangamaGrikhi babe ngamakholwa.” (Imiseb. 14:1) Kumele ukuthi uPhawuli loBhanabha basebezingcitshi ekufundiseni. (Bala u-2 Thimothi 4:2.) Wonke amaKhristu kumele asebenze nzima ukuze abe zingcitshi ekufundiseni.

2. Kuyini okwenza abanye bacabange ukuthi ngeke babe zingcitshi ekufundiseni?

² Abanye abantu bazitshela ukuthi ukufundisa abanye ngoJehova ayisikho kwabo. Bangabe bezikhangelela phansi ngenxa yokuthi abafundanga kangako kumbe bebona angani abalasiphiwo sokufundisa. Lokhu akumangalisi ngoba bakhona abanye okukhulunywa ngabo eBhayibhilini ababezikhangelela phansi. (Eks. 4:10; Jer. 1:6) Abanye bona badaniswa yikuthi akulamuntu abafunda laye iBhayibhili okhanya ethuthuka. Kodwa kumele sikhumbule ukuthi ayisibo bonke abazasilalela nxa sisekutshumayeleni lokuthi indlela esibatshumayeza ngayo ayisiyo yodwa ezakwenza basilalele. UJehova nguye odonsela abantu enhlanganisweni yakhe esebenzisa izingilosi. Lanxa kunjalo, kumele sizame ukubafundisa ngendlela ezabanceda ukuthi balamukele iqiniso. Esihlokweni lesi sizabona ukuthi singenzani ukuze sibe zingcitshi ekufundiseni.

BATHANDE ABANTU

3. Kuyini okwenza abantu balalela uJesu?

³ IBhayibhili lithi uJesu “wayekwazi okusenhliziyweni yomuntu.” (Joh. 2:25) Amazwi la atshengisa ukuthi uJesu wayekwazi okwakucatshangwa ngabantu lokuthi kuyini okwakubenza bacabange njalo. Wayekwazi mhlophe okwakukhathaza abantu yikho wenelisa ukubafundisa ngendlela eyayibathinta inhliziyo. Wayezibonela ukuthi abakhokheli benkolo babengabafundisi lutho ngoJehova kodwa babebathwalisa nzima ngemithetho engapheliyo. (Mat. 9:36; 23:4) Amazwi esiwathola entshumayelweni yasentabeni atshengisa ukuthi wayefuna sibili ukubancedisa abantu laba. Okwenza abantu bamlalela yikuthi wayekhuluma ngazo kanye izinto ezazibakhathaza.

4. Singatshengisa njani ukuthi siyabathanda abantu? (Khangela lemifanekiso.)

⁴ Okuzatshengisa ukuthi siyabathanda abantu yikuzama ukuzwisisa ukuthi bakhathazwa kuyini. Kumele sikhumbule ukuthi wonke umuntu esihlangana laye ekutshumayeleni uthwele nzima ngenxa yomhlaba lo obuswa nguSathane. Khonokho kumele kusifuqe ukuthi sibazwele abantu esibatshumayezayo. Nansi eminye imibuzo esingazibuza yona: Kulendaba esematheni yini esingaxoxa ngayo? Abazali bakhathazekile yini ngezingozi ezingehlela abantwababo nxa besesikolo? Abantu bakhathazwa yikuswelakala kwemisebenzi yini? Abantu abanengi bathwele nzima sibili ngoba kabalalo ithemba thina esilalo.—2 Thim. 3:1; Isaya. 65:​13, 14.

5. UJesu wayetshiyene njani labaFarisi? (UMathewu 11:​28-30)

⁵ Abantu babengathandabuzi ukuthi uJesu uyabathanda ngoba babebona indlela ayebaphatha ngayo. Wayetshiyene sibili labaFarisi ababekhangelela abantu phansi futhi bebahlukuluza. (Mat. 23:13; Joh. 7:49) Yena wayelomusa futhi ebahlonipha abantu. Okwenza uJesu wenelisa ukubafundisa kuhle abantu laba yikuthi wayemnene futhi ethobekile. (Bala uMathewu 11:​28-30.) Lathi kumele sibe lomusa futhi sibahloniphe abantu esibatshumayezayo.

6. Singatshengisa njani ukuthi silomusa lokuthi siyabahlonipha abanye?

⁶ Kumele senzeni nxa abanye besiphikisa kumbe bengafuni lakuzwa nxa sibatshumayeza? UJesu wathi singaphindiseli nxa abantu besihlukuluza. Waphinda wathi, ‘sibenzele okuhle abasizondayo, sibusise abasiqalekisayo futhi sithandazele abasihlukuluzayo.’ (Luk. 6:​27, 28) Nxa singazama ukuzwisisa ukuthi kungani abantu besiphatha kubi kuzabalula ukuthi sibabekezelele. Bakhona sibili abantu abasiphikisa ngabomo kodwa okwenza abanye bangafuni ukukhuluma lathi yikuthi bayabe belenhlupho zabo, kungayisikho ukuthi bayasizonda. Abanye bakhona siyabe sibathole bedanile kumbe bengezwa kuhle. Kungelani lokuthi umuntu simthole enjani, amazwi ethu kumele ehlale ‘elomusa efakwe isawudo.’ (Kol. 4:6) Sizenelisa ukubafundisa kuhle abantu nxa silozwelo njalo sizama ukubazwisisa.

SEBENZISA ILIZWI LIKANKULUNKULU

7. UJesu wayekuthatha ngaphi lokho ayekufundisa? (UJohane 7:​14-16)

⁷ UJesu wayefundisa abantu izinto ayezithatha kuNkulunkulu hatshi lokho ayekucabanga. Wayefundisa ngendlela elula eyayisenza abantu basale bekubambile lokho ayekufundisa. Abantu basala ‘bemangaliswe yindlela uJesu ayefundisa ngayo’ ngoba wayengafundisi njengababhali. (Mak. 1:22) Ababhali babefundisa abantu besebenzisa amazwi abafundisi ababedumile ngalezonsuku kodwa uJesu wayesebenzisa iMibhalo. Lanxa uJesu wayephile loYise okweminyaka eminengi ezulwini kazange abagqibe ngolwazi efuna bambuke kumbe abafundise ngendlela eyayizabatshiya bengelasithunzi. Okwenza wasebenzisa iLizwi likaNkulunkulu yikuthi wayefuna abantu bayazi intando kaYise njalo bayenze. (Bala uJohane 7:​14-16.) Sonke kumele sizame ukumlingisela.

8. UPhetro wamlingisela njani uJesu?

⁸ Abafundi bakaJesu labo babesebenzisa iLizwi likaNkulunkulu nxa befundisa. Usayikhumbula yini indlela uPhetro atshumayela ngayo ngelanga lePhentekhosti? UPhetro wayengafundanga okuyangaphi kodwa indlela achasisa ngayo iziphrofetho ezagcwaliseka kuJesu yathinta inhliziyo zabantu abanengi. (Imiseb. 2:​14-37) Kwahamba njani ngemva kwentshumayelo yakhe? ‘Ngalelolanga kwabhabhathizwa abantu abangaba ngu-3000.’—Imiseb. 2:41.

9. Kungani kumele sisebenzise iLizwi likaNkulunkulu nxa sifundisa abanye?

⁹ Nxa umuntu engavumela ukuthi iLizwi likaNkulunkulu lingene lithophele enhliziyweni yakhe angenelisa ukutshintsha aphile ngendlela ethokozisa uNkulunkulu. (Heb. 4:12) Yikho kumele sifundise abantu izinto eziseBhayibhilini hatshi lokho esizicabangela khona. (2 Thim. 4:2) UZaga 2:6 uthi: “UJehova nguye onika ukuhlakanipha, emlonyeni wakhe kuphuma ulwazi lokuqedisisa.” Yikho nxa sifundisa abantu sisebenzisa iBhayibhili kuyabe kungani sicela uJehova ukuthi akhulume labo. (Mal. 2:7) Esifuna abantu basale bekwazi yikuthi amacebo aseBhayibhilini angcono kakhulu kulamacebo abantu. Lokho esikufunda eBhayibhilini kuvela kuMdali wethu futhi kuyasinceda ukuthi sithokoze empilweni.—2 Thim. 3:​16, 17.

10. Singamncedisa njani umuntu esifunda laye ukuthi azwisise lokho okukhulunywa liBhayibhili?

¹⁰ Ngesikhathi ulungiselela ukuyafunda lomuntu iBhayibhili, zama ukucabanga ngokuthi yiwaphi amavesi angamnceda. Lanxa sisebenzisa amapikitsha lamavidiyo ukuze sigcizelele eminye imicijo eqakathekileyo, esikusebenzisa kakhulu liBhayibhili. Yikho kuqakathekile ukuthi liwabale amavesi asesifundweni ngasinye ubusuncedisa umfundi wakho ukuthi awazwisise. Amapikitsha lamavidiyo eliwasebenzisayo kumele ancedise umfundi ukuthi abone ukuthi yiziphi izimiso eziseBhayibhilini angazisebenzisa. Kodwa lokho akutsho ukuthi sekumele ulandise kumbe libale wonke amavesi asendimeni. Nxa lingabala ivesi, kuhle ukubuza umuntu ofunda laye ukuthi uyizwisisile yini ivesi leyo. Nxa engayizwisisanga lingaphinda futhi ukuyibala. Esikufunayo yikuthi umuntu esifunda laye asale ebabaza lokho akufunde eBhayibhilini hatshi lokho akubone epikitsheni, kuvidiyo loba ebhukwini.—1 Khor. 2:13.

11-12. (a) Kungani kumele sibabekezelele abantu esifunda labo? (ImiSebenzi 17:​1-4) (Khangela lomfanekiso) (b) Singabancedisa njani abantu abangalijayelanga kangako iBhayibhili?

¹¹ Kumele sibabekezelele abantu esifunda labo iBhayibhili ngoba kwezinye izikhathi bayabe bengakuzwisisi lokho abakufundayo. Okunye okungamelanga sikukhohlwe yikuthi abantu bayatshiyana. Ezinye izinto esizifunda eBhayibhilini siyabe sibona angani zilula kodwa abanye zingabathwalisa nzima. Uzakhumbula ukuthi ngesikhathi uPhawuli etshumayeza amaJuda ayeseThesalonika awazange ahle akuzwisise lokho ayekufundisa. Yikho wawachasisela kanengana lokho okuseMibhalweni futhi amanye acina ekuzwisisile.—Bala imiSebenzi 17:​1-4.

¹² Kungakhanya njani ukuthi siyabekezela? Nxa singabuza umfundi umbuzo kumele simnike isikhathi sokuphendula, akumelanga simbambe umlomo. Lokhu kuzakwenza uzwisise ukuthi yena ucabangani ngalokho elixoxa ngakho lokuthi kungani ecabanga njalo. Lokho kuzakunceda ukuthi ukhethe amavesi azamnceda abone ukuthi uJehova uthini ngendaba leyo. Okunye okumele uzibuze khona yikuthi umuntu okhuluma laye uyalazi yini iBhayibhili. Nxa kuvuma mtshengise ivesi eseBhayibhilini eliphrintiweyo. Ungamtshengisa lengxenye ethi Sifundani ELizwini LikaNkulunkulu? etholakala KuNguqulo Yomhlaba Omutsha, ukuze abone eminye imibuzo ephendulwa liBhayibhili. Mhlawumbe lingaxoxa ngombuzo 15 beselibala lamavesi akhonapho ukuze umuntu oxoxa laye abone ukuthi iBhayibhili lingamnceda njani. Umcijo yilowu: Nxa ufuna ukuthinta inhliziyo yomuntu ofunda laye sebenzisa iBhayibhili.

BAFUNDISE NGOJEHOVA

13. Singabancedisa njani abantu ukuthi bamazi uJehova? Sebenzisa umzekeliso.

¹³ Sifuna ukunceda abantu esifunda labo iBhayibhili ukuthi bamazi uJehova njalo basondele kuye. (Jak. 4:8) Umsebenzi wethu wokutshumayela singawufanisa lalokho ongakwenza nxa ukhanyisela umuntu ohamba emnyameni. Kambe ukuthi isibane osithweleyo usungasikhangelisa kuwe yini? Hatshi, isibane kumele sikhanyise indlela ahamba kuyo ukuze abone kuhle. Lawe nxa ufundisa umuntu iBhayibhili, mncedise ambone kuhle uJehova asale ebabaza yena kulokuthi ababaze wena.

14. Singamncedisa njani umuntu esifunda laye iBhayibhili ukuthi azimisele ukuthokozisa uJehova?

¹⁴ Ncedisa umuntu ofunda laye iBhayibhili ukuthi amthande ngenhliziyo yonke uJehova njalo azimisele ukumthokozisa. (Zaga. 27:11) Nxa esemthanda uJehova kuzakubalula ukuthi atshiye izinto ezimbi akade ezenza. Ake sithi umuntu ofunda laye iBhayibhili uleyinye into ayenzayo engamthokozisiyo uJehova, ubungamncedisa njani? Mhlawumbe ubungambuza imibuzo elandelayo: “Kungani uJehova engiyithandi into oyenzayo? Kungani efuna utshiyane layo lanxa wena ungabe ukholisa ukuyenza? Okutshiwo nguJehova kutshengisa njani ukuthi uyakuthanda?” Nxa ungancedisa umuntu ofunda laye iBhayibhili ukuthi ahlale ecabanga ngoJehova, kuzakubalula ukuthi akholwe ukuthi uJehova nguBaba omthandayo. Khonokho kuzamnceda ukuthi azimisele ukumthokozisa.

THUTHUKISA INDLELA OFUNDISA NGAYO

15. Ungenzani ukuze uthuthukise indlela ofundisa ngayo?

¹⁵ Thandaza kuJehova umcele akuncedise ubone ukuthi ungathuthukisa njani indlela ofundisa ngayo. (1 Joh. 5:14) Kuqakathekile lokuthi silalelisise nxa sisemhlanganweni yebandla ngoba yikho lapho esiqeqetshwa khona. Okunye ongakwenza yikucela umuntu oyingcitshi ekufundiseni ukuthi akuphelekezele esifundweni sakho. Mcele akunike amacebo azakunceda uthuthuke. Ungakayibonana lomuntu ofunda laye, ungaqala uzibuze ukuthi kuyini akwaziyo langakwaziyo ngendaba elizaxoxa ngayo. Ncedisa umfundi wakho ahlale ecabanga ngezinto ezinhle esizithenjiswe nguJehova. Lokho kuzamnceda ukuthi abe ngumgane kaJehova njalo athokoze empilweni.—Hubo. 1:​1-3.

16. Singenzani ukuze sithuthukise indlela esifundisa ngayo?

¹⁶ Ukufundisa abanye ngoJehova ngumsebenzi othokozisayo esizawenza ngitsho lasemhlabeni omutsha. Usakhumbula yini singenzani ukuze sibe zingcitshi ekufundiseni? Kumele sibathande abantu, sibafundise sisebenzisa iLizwi likaNkulunkulu, sibancedise lokuthi bamthande uJehova.