Ungabalahli Abangane Bakho

1. Singabathola ngaphi abangane beqiniso?

“USAYIKHUMBULA yini ingoma ye-broadcast elesihloko esithi “Abangane Beqiniso”? Kanje iqalisa isithini? Ithi: “Kunzima ukuphila ungelamngane ezinsukwini lezi zokucina, loJehova uyakwazi ukuthi siyabadinga abangane.” Nxa ulabangane abathanda uJehova mbonge kakhulu ngoba yisibusiso leso. (Hubo. 119:63) Siyimuli kaJehova emanyaniswa luthando.

2. Kumele sibabone njani abafowethu labodadewethu?

² Nxa sisithi abafowethu labodadewethu ngabangane bethu sitsho ukuthi sizizwa siseduze kakhulu labo. Asiphongucabanga ngabo nxa siswele into yokwenza kodwa ngabantu abaqakathekileyo ezimpilweni zethu. Okwenza sibe ngabangane futhi sibathande abafowethu labodadewethu laba yikuthi labo bayamthanda uJehova loJesu. (Joh. 13:35) Kodwa akuzenzakaleli ukuthi uphonguvuka usungumngane womunye umuntu nje, kuyabe kumele usebenze nzima. Okunye okumele sikukhumbule yikuthi zikhona izinto ezingaphambanisa ubungane bethu labanye ngoba sonke silesono.

3. Kuyini okungenza kube nzima ukuthi sibe labangane?

³ Lanxa sibathanda bonke abafowethu labodadewethu, iqiniso elikhona yikuthi ayisibo bonke abazakuba ngabangane bethu. Singakuthola kulula ukuthi sizwanane lalabo abathanda izinto esizithandayo kumbe esibona ngani siyahambelana. Kodwa bakhona abanye ebandleni okungaba nzima ukuthi babe ngabangane bethu. Mhlawumbe lokhu kungabangelwa yikuthi siyabe sisenza izinto ngendlela ezitshiyeneyo kumbe vele siswele ukuthi sixoxe ngani nxa silabo. Okunye okungenza kube nzima ukuthi sibe ngabangane labanye yikuthi bangabe begula kumbe kulezinto ezinengi ezibakhathazayo. Esihlokweni lesi sizaxoxa ngalokho okwenziwa nguJesu okuzasinceda ukuthi singabalahli abangane bethu. Kodwa asiqaleni sixoxe ngokuthi kungani kuqakathekile ukulingisela uJehova nxa sifuna ukuba ngabangane abaqotho.

LINGISELA UJEHOVA

4. Singenzani ukuze siqinise ubungane bethu labanye?

⁴ Nxa singakhangela okuhle okwenziwa ngabangane bethu sizaqhubeka sibathanda. Yikho kuqakathekile ukuthi sizinike isikhathi sokuthi sibe ndawonye. Umphostoli uPhawuli wabhalela amaKhristu eThesalonika wathi: “Senza konke esasingakwenza ukuze sizolibona ngawethu ngoba sasifisa kakhulu ukulibona.” (1 Thes. 2:17) Abafowethu labodadewethu abanengi bakubona kungcono ukuxoxa labangane babo bekhangelene. Siyenelisa ukuxoxa labangane bethu nxa sisekutshumayeleni, emihlanganweni yebandla, emihlanganweni yesiqinti kumbe eyesabelo. Lanxa ungabe utshona labangane bakho futhi lixoxa, lokho akutsho ukuthi kuyabe kungaselazinto ezingaphambanisa ubungane benu.

5. Kuyini okuzasinceda ukuthi singabalahli abangane bethu? (UKholose 3:12)

⁵ Manje kuyini okungasinceda ukuthi singabalahli abangane bethu nxa sekulobunzima? UKholose 3:12 (bala) usikhuthaza ukuthi sithobeke, sibekezele, sibe lomusa kanye lozwelo. Nxa sifuna ukuba ngabangane beqiniso kumele silingisela uJesu. Asiboneni ukuthi singakwenza njani lokhu.

NXA LINGAVUMELANI

6. Ukuba lemibono etshiyeneyo kungabaphambanisa njani abangane?

⁶ Kungaliphambanisa njani? Nxa abantu ababili bengavumelani kungaba lula ukuthi ngamunye wabo azitshele ukuthi owakhe umbono yiwo oqondileyo. Ake sithi kulabafowethu ababili abaseqenjini elilodwa lokutshumayela futhi abavumelani ngokuthi insimu kumele isetshenzwe njani. Ngamunye wabo uqina ngokuthi izinto kumele zenziwe ngendlela yakhe. Nxa abazalwane laba bobabili bengekela ukulungisa indaba le masinyane bangacina bexabana sibili. Nxa bezigqaja, akula ozavuma ukulandela okukhulunywa ngomunye, lobungane sobungahle buphele ngenxa yento encane nje.

7. UJesu wabafundisani abafundi bakhe?

⁷ Thobeka njengoJesu. UJesu wafundisa abafundi bakhe ukuthi kumele bathobeke ukuze benelise ukulungisa ukungazwanani okungaba khona. Abafundi bakhe babehlala bephikisana ngokuthi ngubani owayeqakathekile kulabanye phakathi kwabo. Yikho uJesu wabafundisa ukuthi bathobeke ngoba umuntu othobekileyo kaziboni engcono kulabanye kodwa ubona abanye bengcono kulaye. (Mat. 20:​25-28) Ngitsho lalapho esezabulawa uJesu wafundisa abaphostoli bakhe ukuthi kuqakathekile ukuba ngabantu abathobekileyo. Lokho wakwenza ngokubagezisa inyawo. Lo ngumsebenzi owawukhangelelwa phansi owawujayele ukwenziwa yizigqili. (Joh. 13:​3-5, 12-16) Ukuthobeka kwakuzabanceda ukuthi bahlale bengabangane lanxa babengabe bebona izinto ngendlela ezitshiyeneyo.

8. Ukuba ngumuntu othobekileyo kuzakunceda njani? (UKholose 3:13) (Khangela lemifanekiso.)

⁸ Ungenzani ukuze liqhubeke lingabangane? Nxa lawe uthobekile kuzabalula ukuthi uxolele umngane wakho futhi ungazihluphi ngezinto ezincane angabe eziphambanisile. (Bala uKholose 3:13.) Umuntu othobekileyo kavuki ngolaka nxa kuyikuthi yena lomngane wakhe kabazwanani. (Hubo. 4:4) Zama ukungawafaki enhliziyweni amazwi abuhlungu angakhulunywa ngumngane wakho. Phela uyazazela ukuthi lawe uyake ukhulume amazwi amzwisa ubuhlungu. (Umtshu. 7:​21, 22) Zibuze ukuthi: ‘Kambe sengingaze ngilahlekelwe ngumngane ngenxa yento encane kangaka?’ Kungaba njani ukuthi wamukele umbono wakhe liqhubeke nje ngempilo? Nxa umthanda umngane wakho uzayidlulisa indaba yakhona futhi awusoze uphinde uyivuse ngelinye ilanga.

9. Kumele wenzeni nxa lilokhe lixabana ngento eyodwa? (IZaga 17:9)

⁹ Ukuthobeka kuzakunceda nxa kuyikuthi wena lomngane wakho lokhe lixabana ngendaba eyodwa. Ungaphikisani lomngane wakho uzama ukumtshengisa ukuthi yena ulahlekile wena nguwe oqondileyo. (Bala iZaga 17:9; 1 Khor. 6:7) Umngane weqiniso kabalahleli khatshana abangane bakhe. Abafowethu labodadewethu abanengi bayazama ukuthi bahle balungise ukungazwanani masinya ukuze baqhubeke bengabangane. (Hubo. 34:14) Nxa kuyikuthi awuzwanani lomngane wakho kunganjani umlande ufike uthi: ‘Wena ungumngane wami, sivela khatshana. Kanti vele sibangani? Ngilungise ngaphi?’ Kumele ukuvume lokuthi kulalapho oyabe uphambanise khona ubusuxolisa nje kudlule. Nxa umngane wakho laye engaxolisa kumele umxolele. (Luk. 17:​3, 4) Indaba ayisiyokuthi ophambanisileyo ngubani kodwa okuqakathekileyo yikuthi liqhubeke lingabangane.—Zaga. 18:24.

UKUTSHIYANA KWABANTU

10. Kuyini okungenza kube nzima ukuthi abantu babe ngabangane?

¹⁰ Kungaliphambanisa njani? Kwesinye isikhathi sokungabanzima ukuthi abantu baqhubeke bengabangane ngenxa nje yokuthi batshiyene. Omunye umuntu engenza izinto ezikucaphulayo kumbe vele uyabe ungamzwisisi ukuthi unjani. Abanye abantu mdabuko wabo balenhloni ikanti abanye akubathwalisi nzima ukuba phakathi kwabantu. Abanye bona ngomazithulela besekusiba labanye abathanda ukuzikhulumela. Nxa sikhangele abangane bethu singababona beyimpumalanga thina siyintshonalanga.

11. Kungani uJesu engazange abaninele khatshana abangane bakhe?

¹¹ Thobeka njengoJesu. UJesu wayelabangane ababengafanani laye ngitsho. Ngokwesibonelo, umphostoli uJakhobe loJohane babethanda izikhundla baze bacela uJesu ukuthi abanike izikhundla eziphezulu eMbusweni wakhe. (Mak. 10:​35-37) Kodwa uJesu yena wayetshiye isikhundla esikhulu khonale ezulwini wazophila labantu abalesono lapha emhlabeni. (Flp. 2:​5-8) Kwakungabalula ukuthi uJesu azitshele ukuthi ngeke abe labangane abathanda izikhundla ahle abaninele khatshana. Kodwa yena kenzanga njalo. Wababekezelela abaphostoli bakhe bonke ngoba wayethobekile.

12. Kuyini okwanceda uJesu ukuthi abekezelele abafundi bakhe?

¹² UJesu wayezwisisa ukuthi kungani abafundi bakhe babesenza ezinye izinto. Wayekwazi mhlophe ukuthi kwakungasoJakhobe loJohane kuphela ababethanda izikhundla. Banengi abafundi bakhe ababenjalo. (Mak. 9:34) UJesu wayekwazi ukuthi abakhokheli benkolo yibo ababefundisa abantu ukuthi izikhundla ziqakathekile. Yikho kazange amangale ukubona abafundi bakhe labo beqakathekisa izikhundla lezi. UJesu wababekezelela sibili, wayengakhangelelanga ukuthi bavuke betshintshile ngoba wayekwazi ukuthi bafundiswa ukuthanda izikhundla besesebancane.—Mak. 10:​42-45.

13. Ukubekezela kuzakunceda njani? (U-Efesu 4:2)

¹³ Ungenzani ukuze liqhubeke lingabangane? Babekezelele abangane bakho lanxa ngesinye isikhathi bengenza izinto ezikucaphulayo. (Zaga. 14:29) Akulanto embi ngokuthi abantu batshiyene. Nxa sibathanda abangane bethu sizababekezelela njengoba nje labo besibekezelela (Bala u-Efesu 4:2.) Ungazami ukufosa abangane bakho ukuthi bafanane lawe ngoba vele litshiyene. Nxa kuyikuthi wena ungumalandisa, mbekezelele umngane wakho ongumazithulela. Lawe mazithulela mbekezelele phela umngane wakho lowana okwaziyo ukuthi umlomo wakhe kawuhlalwa mpukane. Iqiniso elikhona yikuthi ayisuye wonke umuntu ozakuba ngumngane wakho. Lanxa kunjalo abantu sebengaba ngabangane lanxa beyimpumalanga lentshonalanga. Okubenza babe ngabangane yikuthi bonke bathanda uJehova.

14. Singamlingisela njani uJesu?

¹⁴ Nxa ungumuntu obekezelayo kuzabalula ukuthi ukhangele okuhle okwenziwa ngabangane bakho kulokukhangela abakuphambanisayo. Kanti kunceda ngani ukukhangela okuhle okwenziwa ngabangane bethu? Asibuyeleni endabeni kaJakhobe loJohane ngesikhathi becela ukuphiwa izikhundla eMbusweni. Lanxa babefuna izikhundla eziphezulu sibili, uJesu wananzelela ukuthi amadoda la ayekholwa ukuthi ngelinye ilanga uJesu wayezabusa sibili. Nxa lathi singakhangela okuhle okwenziwa ngabangane bethu siyabe silingisela uBaba wethu uJehova leNdodana yakhe uJesu.

15. Ukuthandaza kuzasinceda njani?

¹⁵ Okunye okuzakunceda ukuthi uqhubeke ubathanda abangane bakho yikuthandaza kuJehova umcela ukuthi akuncedise. Zama ukucabanga ngezimo ezitshiyeneyo ezingabakhona ezingenza wena lomngane wakho lingazwanani ubusuthandaza ucela uJehova akuncedise ukuthi ubekezele. Njengoba uJehova kunguye owasidalayo uyakwazi ukuthi sitshiyene yikho nxa uthandaza kuye uyabe ekwazi ukuthi uzakuphendula njani ukuze uqhubeke ubekezela. Nxa umngane wakho engakucaphula, kumele uhle uthandaze ucele uJehova akunike umoya ongcwele ngoba lokho kuzakunceda ukuthi ungavuki ngolaka.—Luk. 11:13; Gal. 5:​22, 23.

NXA ABANGANE BETHU BESEBUNZIMENI

16. Kuyini okungenzakala nxa abangane bethu besebunzimeni?

¹⁶ Kungaliphambanisa njani? Nxa abangane bethu begula kumbe kulento ebakhathazayo sebengakhuluma kumbe benze izinto ezisizwisa ubuhlungu. Ungamangala umngane wakho engasafuni ukukhuluma lawe kumbe esephongucatshulwa yizinto ezincane lawe uze usale uzibuza ukuthi kanti sokutheni. (Jobe. 6:​2, 3) Kwesinye isikhathi siyabe singabazi ubunzima abangane bethu abaphakathi kwabo besesicina sizitshela ukuthi abasafuni ukuba ngabangane bethu.

17. UJesu wamphatha njani uBhathimewu?

¹⁷ Woba lomusa lozwelo njengoJesu. UJesu wayebazwela kakhulu abantu, ngitsho lalabo ayengabazi. Usakhumbula yini ukuthi wamphatha njani uBhathimewu, indoda eyayiyisiphofu? Indoda le yathi isizwa ukuthi uJesu wayedlula lapho yamemeza kodwa abanye abantu bayikhuza besithi ithule. Yona yathi okungaqalwayo ngoba yayifuna ukusiliswa. Yaqhubeka imemeza kakhulu. Kumele ukuthi abanye bacaphuka kakhulu besizwa indoda le inqolonga uJesu. Kodwa uJesu wayizwela usizi indoda le ngoba wayefuna ukuyinceda. (Mat. 20:34; Mak. 10:​46-52) UJesu wakhuluma kuhle loBhathimewu wamncoma ngenxa yokholo lwakhe wasemelapha.

18. Kuyini ongakwenzela abangane bakho nxa besebunzimeni? (U-1 Thesalonika 5:14)

¹⁸ Ungenzani ukuze liqhubeke lingabangane? Nxa silomusa njalo sibazwela abangane bethu sizabaduduza nxa besebunzimeni kumbe bedanile. (Bala u-1 Thesalonika 5:14.) Khumbula ukuthi abangane beqiniso bayancedisana ikakhulu “ngezikhathi zobunzima.” (Zaga. 17:17) Zibuze ukuthi ungamenzelani umngane wakho ukuze umkhuthaze umtshiye laye nje esesizwa ngcono.

19. Kuyini okunye ongakwenza ukuze uncedise umngane wakho osebunzimeni? (Khangela lemifanekiso.)

¹⁹ Lanxa ungeke ubuqede ubuhlungu umngane wakho angabe ephakathi kwabo, kukhona ongakwenza ukuze umncede. Zama ukumzwisisa njalo uzibuze ukuthi ukhathazwa kuyini. (Mat. 7:12; 1 Pet. 3:8) Mlalelisise nxa ekhuluma futhi nxa kuvuma njalo kuyisikhathi esiqondileyo, usungakhuluma amazwi angamduduza. (Zaga. 12:25) Ungamcabangeli okubi umngane wakho. (Zaga. 18:13) Nxa umthanda uzambekezelela futhi ukhumbule ukuthi laye ngumuntu njengawe. —Efe. 4:32.

20. Ufuna ukuba ngumngane onjani?

²⁰ Asibathontisi abangane bethu esibathole enhlanganisweni kaJehova. Kodwa ngeke sikubalekele ukuthi sonke silesono lokuthi ngobunengi bethu sake sehlelwa yizinto ezibuhlungu empilweni. Lokho kungenza ukuthi senze kumbe sikhulume izinto ezingazwisa abangane bethu ubuhlungu. Yikho kuqakathekile ukuthi ngamunye wethu abe ngumuntu othobekileyo, obekezelayo, olomusa lolozwelo. Kambe ngubani ongamfuniyo umngane onjalo?