Ungamtshiyi UJehova Loba Sekutheni

1-2. Kwenzakalani ngesikhathi uJesu efundisa eKhaphenawume?

NGELINYE ilanga uJesu wayefundisa ixuku labantu eKhaphenawume. Wabatshela wathi: “Ngiqinisile sibili ngithi kini, nxa lingasayidlanga inyama yeNdodana yomuntu lanatha legazi layo, alilakho ukuphila phakathi kwenu. Loba ngubani odla inyama yami anathe legazi lami ulokuphila okungapheliyo futhi ngizamvusa ngelanga lokucina.” (Joh. 6:​53, 54) Abanengi abakuthandanga lokho okwakhulunywa nguJesu, yikho bathi: “Amazwi la ayethusa, ngubani ongawalalela?”—Joh. 6:60.

² Abanye babo bahle bakhalala ukulandela uJesu ngoba babecatshulwe ngamazwi akhe. Kambe ukuthi abantu laba babengelakholo ngitsho kuJesu? Babelalo, ngoba bake bathi bebona uJesu esenza isimangaliso bathi: “Lo nguye sibili uMphrofethi okwakuthiwa uzabuya emhlabeni.” (Joh. 6:14) Kuyakhanya sibili ukuthi abantu laba babelokholo kuJesu kodwa wathi esekhuluma izinto abangazizwisisiyo, bakhetha ukumtshiya.

3. Abaphostoli benzani sebezwe amazwi kaJesu futhi kungani? (Khangela lomfanekiso.)

³ Abaphostoli bona abazange bamtshiye uJesu baqhubeka bebambelele kuye yikho uJesu wababuza ukuthi bona babengafuni ukuhamba yini. UPhetro waphendula wathi: “Nkosi, singaya kubani? Nguwe olamazwi okuphila okungapheliyo. Sesikholiwe futhi sesikwazi ukuthi ungoNgcwele kaNkulunkulu.” (Joh. 6:​68, 69) Kungenzakala ukuthi uPhetro labanye abaphostoli abamzwisisanga uJesu ngesikhathi esithi kumele badle inyama yakhe banathe legazi lakhe. Lanxa kunjalo bakhetha ukuqhubeka beqotho kuJesu. Phela babengakuthandabuzi lakancane ukuthi uJesu ‘wayenguKhristu kaNkulunkulu.’—Luk. 9:​20, 35.

4. Kuyini okungaxegisa ukholo lwethu?

⁴ Zinengi izinto ezingaxegisa ukholo lwethu. Ngokwesibonelo, nxa kungaba lotshintsho endleleni ebesizwisisa ngayo ivesi ethile kumbe nxa sekumele sitshintshe indlela esitshumayela ngayo. Kwezinye izikhathi nxa singahlangana lobunzima singazibuza ukuthi kungani uJehova evumele into enjalo yenzakala kithi. Singadana size siphele amandla nxa umngane wethu engasizwisa ubuhlungu kumbe umuntu esimthembayo engasiphatha kubi.

5. Kungani kumele sibe lokholo oluqinileyo? Sebenzisa umzekeliso. (UKholose 1:23)

⁵ Nxa sifuna ukuhlala siqotho kuJehova kumele sibe lokholo oluqinileyo kuye. Nanku umzekeliso ongasinceda sikuzwisise lokhu. Isakhiwo kumele sibe lesisekelo esiqinileyo ukuze singadiliki nxa sekulesiphepho. Lathi, okungasincedisa ukuthi sihlale sithembekile kuJehova kungelani lenhlupho esihlangana lazo yikuba lokholo oluqinileyo.—1 Khor. 15:58; bala uKholose 1:23.

6. Kuyini okwenza abaphostoli baqhubeka beqotho kuJesu?

⁶ Kanti kuyini okwenza abaphostoli baqhubeka beqotho kuJesu? Babekwazi ukuthi uJehova nguMdali wezinto zonke lokuthi nguye kuphela okumele akhonzwe. Babengathandabuzi lokuthi uJesu yiNdodana kaNkulunkulu elamazwi okuphila okungapheliyo. Babekwazi ukuthi uJehova wayethokoza ngalokho okwakusenziwa nguJesu. Khathesi asixoxeni ngezinto ezintathu ezizasinceda ukuthi sihlale silokholo oluqinileyo: Okokuqala yikuthi uJehova nguMdali wazo zonke izinto. Okwesibili yikuthi uJehova nguMlobi weBhayibhili. Okwesithathu yikuthi uJehova ulenhlanganiso yakhe. Nxa singathandabuzi ukuthi izinto lezi ziliqiniso sizenelisa ukuqhubeka siqotho kuJehova.

UJEHOVA NGUMDALI

7. USambulo 4:11 usitshelani ngoJehova njalo ukukhumbula lokhu kuzasinceda njani?

⁷ Bala iSambulo 4:11. Ivesi le isitshela ukuthi uJehova nguye owadala zonke izinto futhi lokhu kwenza afanele sibili ukukhonzwa. Ukucabangisisa ngokuthi uJehova ulamandla anganani kwenza singathandabuzi ukuthi uzasincedisa kuloba yibuphi ubunzima. Kodwa uSathane ufafaza amanga ngoba ufuna abantu bacabange ukuthi uNkulunkulu kakho. Abanye abezesayensi baze bathi izinto azidalwanga. Yikho kuqakathekile sibili ukuthi sikholwe ukuthi uJehova nguMdali lokuthi uyasithanda. Phela singakuthandabuza lokhu kuzabanzima ukukholwa ukuthi uJehova uzasincedisa nxa sesiphakathi kobunzima.—Heb. 11:6.

8-9. Kumele wenzeni nxa usuthandabuza ukuthi uJehova nguMdali? (Khangela lomfanekiso.)

⁸ Manje kumele wenzeni nxa usuthandabuza ukuthi uJehova nguMdali? Zinike isikhathi sokuhlolisisa ubufakazi bokuthi uJehova wadala zonke izinto. Ungabala ibhukwana elithi Was Life Created? lelithi The Origin of Life—Five Questions Worth Asking. Okunye okungakunceda yikubukela amavidiyo aku-jw.org ngaphansi kwengxenye ethi “Kwazenzakalela Yini?” Udadewethu osakhulayo okuthiwa nguJessica ohlala e-United States, uthi: “Ibhukwana elithi The Origin of Life, langinceda kakhulu. Ngasala ngingathandabuzi ukuthi uJehova nguye owadala izinto zonke. Langitshiya ngilobufakazi obubambekayo.” Abanye bancedwe yisifundo 6 lo-7 ebhukwini elithi Ungathokoza Kuze Kube Nini Lanini! Kungenzakala ukuthi sewake wawabala amabhuku la kodwa kungaba kuhle ukuthi uwabale futhi.

⁹ Zinike isikhathi sokuchwayisisa ukuze ubone ukuthi uNkulunkulu ukhona sibili. Lokhu kuzakunceda ukuthi ubemazi ngcono futhi usondele kuye. (Rom. 1:20) Nxa usulobufakazi kuzakuba lula ukuthi uncede abanye abangabe bethandabuza ukuthi uNkulunkulu ukhona. Ubufakazi bokuthi uNkulunkulu ukhona lokuthi wadala zonke izinto buzicacele.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

UJEHOVA NGUMLOBI WEBHAYIBHILI

10. Kungani siliqakathekisa iBhayibhili? (U-2 Thimothi 3:​16, 17)

¹⁰ Bala u-2 Thimothi 3:​16, 17. UJehova ukhuluma labantu esebenzisa iBhayibhili. IBhayibhili lilempendulo zemibuzo esikhathaze abantu abanengi futhi liyasitshela lokuthi uNkulunkulu ufuna siphile njani. Siyaliqakathekisa iBhayibhili ngoba siyakwazi ukuthi uMlobi walo nguJehova. Kumele silibale futhi silizwisise ukuze senze lokho elisitshela khona.

11. Kuyini okwenza ungathandabuzi ukuthi uJehova nguye uMlobi weBhayibhili?

¹¹ Kuyini okwenza sikholwe ukuthi uJehova nguye uMlobi weBhayibhili? Izizatho zakhona zinengi kodwa nanzi ezimbalwa: IBhayibhili likhuluma iqiniso ngezinto ezenzakala kudala. (Luk. 3:​1, 2) Liphinda likhulume iqiniso ngendlela izinto ezadalwa ngayo. (Jobe. 26:7) Lanxa uSathane ezama ngamandla wonke ukuthi abantu bangabi leBhayibhili, wehlulekile ukulitshabalalisa. Sikhuluma nje akula elinye ibhuku elisakazwe njengeBhayibhili, phose wonke umuntu ulalo kungelani lokuthi ukhuluma luphi ulimi. Kuyamangalisa ukuthi lanxa uNkulunkulu wasebenzisa amadoda angaba ngu-40 aphila ngezikhathi ezitshiyeneyo phakathi kweminyaka engaba ngu-1 600, abakubhalayo akuphikisani ngitsho. Amacebo aseBhayibhilini alokhe esebenza lalamuhla lanxa sekuleminyaka eminengi labhalwa. (Zaga. 13:20; 15:21; Mat. 7:12) Okunye okwenza sikholwe ukuthi uJehova nguMlobi weBhayibhili yikuthi zinengi iziphrofetho ezikulo ezagcwalisekayo.—Josh. 23:14

12. Kumele wenzeni nxa usuthandabuza ukuthi uJehova nguMlobi weBhayibhili?

¹² Kumele wenzeni nxa usuthandabuza ukuthi uJehova nguMlobi weBhayibhili? Thandaza kuJehova umtshele indlela ozizwa ngayo ubusumcela lokuthi akuncedise. Ngemva kwalokho chwayisisa ukuze uthole ubufakazi bokuthi iBhayibhili liLizwi likaNkulunkulu. Zwana ukuthi elinye ijaha okuthiwa nguJordan elakhulela emulini yaboFakazi lithini. UJordan uthi: “Mina angiphongukholwa nje yonke into engiyitshelwayo, ngiqala ngicabangisise. Kwezinye izikhathi ngiyake ngithandabuze izinto engizikholwayo. Nxa kungaba njalo ngihle ngichwayisise emabhukwini ethu ukuze ngithole ubufakazi.” Nxa singahlala sizikhumbuza ukuthi uJehova nguye uMlobi weBhayibhili sizaba lokholo oluqinileyo.—1 Khor. 3:​12, 13.

UJEHOVA ULENHLANGANISO YAKHE

13. Ungenzani nxa usuthandabuza ukuthi usenkolweni yeqiniso?

¹³ Nxa unguFakazi uyake uthandabuze yini ukuthi usenkolweni yeqiniso? Nxa kunjalo ungagoqi izandla kodwa wohle uchwayisise udinge ubufakazi. Nansi imibuzo ongazibuza yona: ‘Ngobani abazama ukulandela lokho okutshiwo liBhayibhili? Yiphi inhlanganiso efundisa lokho okuseBhayibhilini?’ (2 Thim. 4:​3, 4) ‘Ngobani abenza intando kaJehova lamuhla?’—Mat. 7:​20, 21.

14. Ngobani abenza lokho okukhulunywa kuMathewu 24:14?

¹⁴ Njengoba uJehova efuna ukuthi abantu emhlabeni wonke bezwe izindaba ezinhle, nanku umbuzo ongazibuza wona. ‘Ngobani abatshumayela izindaba ezinhle lamuhla?’ (Mat. 24:14) Umsebenzi lo wenziwa ngoFakazi bakaJehova kuphela. Yithi sodwa esitshumayela ngoMbuso kaNkulunkulu emazweni adlula 240 futhi sesileminyaka edlula 100 sisenza njalo. OFakazi bakaJehova bayawuqakathekisa kakhulu umsebenzi wokutshumayela lokufundisa abantu.—Mat. 28:​19, 20.

15. Inhlanganiso kaJehova yenzeni ukuze ibizo lakhe laziwe? (UMathewu 6:9; Isaya 43:10)

¹⁵ Bala uMathewu 6:9 lo-Isaya 43:10. Abantu basazi ngokuthi singoFakazi bakaJehova futhi lesi yisibusiso esikhulu kakhulu. UJehova ufuna ukuthi abantu abanengi balazi ibizo lakhe. Manje kuyadanisa ukuthi ibizo lakhe likhitshiwe emaBhayibhilini amanengi. Lanxa kunjalo, inhlanganiso kaJehova isebenze nzima ukuze ibizo lelo libiselwe lapho elalivele litholakala khona emibhalweni yakudala. Khathesi ibizo elithi “Jehova” litholakala izikhathi ezedlula 7 000 ku-Nguqulo Yomhlaba Omutsha.

16. OFakazi bakaJehova bayakwenza yini lokho okukhulunywa kuJohane 13:​34, 35? (Khangela lomfanekiso.)

¹⁶ Bala uJohane 13:​34, 35. Abantu abanengi namuhla bayazondana futhi bahlala bexabana kodwa abantu bakaJehova bona bayathandana okumangalisayo njalo bamanyene. Lokhu kuyamangalisa ngoba bavela endaweni ezitshiyeneyo futhi balamasiko atshiyeneyo. Sokwake kwenzakala yini kuwe ukuthi ngesikhathi uvakatshele kweyinye indawo ubone oFakazi? Intokozo oba layo lanxa abantu labo ungabazi itshengisa ukuthi uyabathanda kakhulu. Nxa singahlala sikhumbula ukuthi uJehova nguye osenza simanyane sizazimisela ukuhlala siqotho kuye.

HLALA UQOTHO KUJEHOVA

17-18. Yibuphi ubunzima esingahlangana labo kodwa kuyini esizimisele ukukwenza?

¹⁷ Impilo kayilula njengoba siphila ezinsukwini zokucina. (2 Thim. 3:​1, 13) Kungenzakala lezinye izinto ezingasikhathaza. Ngokwesibonelo, inhlanganiso kaJehova isingenza izinqumo esingazizwisisiyo. Ngesinye isikhathi abanye abafowethu labodadewethu sebengasizwisa ubuhlungu. Kwesinye isikhathi nxa sihlangana lenhlupho siyaswela lokuthi sibambe ngaphi kumbe sisale singela zimpendulo esiyabe sizidinga.

¹⁸ Manje kuyini okuzasinceda ukuthi siqhubeke siqotho kuJehova lanxa singahlangana lobunzima bonke lobu? Yikukhumbula ukuthi uJehova nguMdali, nguye uMlobi weBhayibhili lokuthi oFakazi bakaJehova bamkhonza ngendlela ayamukelayo. Nxa lathi silokholo oluqinileyo kasisoze loba nini simtshiye uJehova. Kodwa sizathi: “[Jehova] singaya kubani? Nguwe olamazwi okuphila okungapheliyo.”