Thobeka NjengoJehova

1. UJehova utshiyene njani lababusi bomhlaba?

NXA ukhangele iziphathamandla kumbe ababusi bomhlaba lo, ungathi bathobekile yini? UJehova uNkulunkulu wethu utshiyene kakhulu lababusi abangabantu ngoba yena uthobekile. (Hubo. 113:​5-8) Kasoze loba nini aziphakamise kumbe azigqaje. Esihlokweni lesi sizaxoxa ngendlela ezitshiyeneyo ezitshengisa ukuthi uJehova uthobekile besesibona lokuthi uJesu wamlingisela njani uYise. Lokho kuzasinceda ukuthi sisondele kakhulu kuJehova futhi simlingisele.

UJEHOVA UYABALALELA ABANTU

2. Sifundani ngoJehova kuHubo 62:8? (Khangela lomfanekiso.)

² Abantu abazigqajayo bazibona bengcono kakhulu kulabanye. Lokho kwenza ukuthi abanye besabe ukuyakhuluma labo. Umuntu ozigqajayo kalasikhathi sokulalela imibono yabanye ngoba uzitshela ukuthi abakukhulumayo akulangqondo. Kodwa uJehova uthobekile, uze asincenge ukuthi sithandaze kuye simtshela okusezinhliziyweni zethu. (Bala iHubo 62:8.) Njengoba nje ubaba obathandayo abantwabakhe efuna bakhululeke ukumtshela loba yini, loJehova uNkulunkulu wethu ufuna simtshele loba yini esiyicabangayo. Lokhu kusegcekeni sibili ngoba uJehova waze wafaka lemithandazo yezinceku zakhe eBhayibhilini. (Josh. 10:​12-14; 1 Sam. 1:​10-18) Kodwa uyake uthikaze yini ukuthandaza kuJehova uzitshela ukuthi ngeke akulalele?

3. UJehova uzwa njani nxa ebona abantu bephenduka?

³ Kuqakathekile ukuthi uthandaze kuJehova lanxa ngezinye izikhathi ungazitshela ukuthi ngeke athande umuntu onjengawe. Usawukhumbula yini umzekeliso wendodana yolahleko? Emzekelisweni lo uJesu ufanisa uJehova lobaba olomusa owamukela indodana yakhe esivela tshaphaza lonke ilifa layo. Usakhumbula yini ukuthi ubaba lo wayamukela njani indodana yakhe? IBhayibhili lithi wathi eyibona wahle wayigijimela wafika wayigona njalo wayiqabuza. (Luk. 15:​17-20) Yikho kanye okwenziwa nguJehova, uyabamukela labo abaphendukayo njalo abalalele nxa bethandaza kuye. (Izili. 3:​19, 20) Wenza khona kanye okwenziwa ngubaba osemzekelisweni kaJesu, kuyabe kungathi uyasigijimela, afike asigone, asiduduze njalo asikhumbuze ukuthi uyasithanda kakhulu. (Isaya. 57:15) Manje uJehova ukwenza njani lokhu? Usebenzisa abadala bebandla, abanye ebandleni kanye lezihlobo zethu ezikhonzayo. (Jak. 5:​14, 15) Lokhu kutshengisa ukuthi uJehova uthobekile futhi uyafuna sibili ukusincedisa.

4. UJesu wamlingisela njani uYise?

⁴ UJesu ulingisela uYise. Abantu babekhululekile ukuyakhuluma laye futhi bengesabi ukumbuza imibuzo. (Mak. 4:​10, 11) Wayesithi engababuza imibuzo, bona bakhululeke ukumtshela abakucabangayo. (Mat. 16:​13-16) Ngitsho lalapho bephambanisile babengadleli evalweni ngoba babekwazi ukuthi uJesu ulomusa lokuthi uyababekezelela. (Mat. 17:​24-27) Indlela uJesu alingisela ngayo uYise yenza kwaba lula ukuthi abantu babekwazi ukuthi uJehova unjani. (Joh. 14:9) Bafunda ukuthi uJehova uthobekile, ulomusa njalo ufuna abantu babe ngabangane bakhe. Wayetshiyene labakhokheli benkolo ababezigqaja, belolaka futhi bekhangelela abantu phansi.

5. Kungani kumele sithobeke?

⁵ Singamlingisela njani uJehova? Nxa sithobekile, abazalwane bazakhululeka ukukhuluma lathi. Umuntu othobekileyo ulomusa, uyabekezela njalo uyabaxolela abanye. Khonokho kwenza abantu bamthande. (Kol. 3:​12-14) Nxa singathobekanga singacina sesilomhawu, sizibona singcono kulabanye njalo kungaba nzima ukuthi sixolele abanye. Nxa singaba njalo abantu bazakwesaba ukukhuluma lathi. Umdala ngamunye ebandleni kumele azibuze ukuthi abamemezeli bakhululekile yini ukumlanda bazoxoxa laye ngokubakhathazayo. Lokhu sekusitsho ukuthi nxa kuvuma, umdala webandla kumele azame ukuthi angene imihlangano ndawonye labamemezeli kulokuthi ayingene ngezempucuko. Okunye okumele bakwenze yikutshumayela labafowethu labodadewethu abatshiyeneyo. Lokhu kuzakwenza ukuthi abamemezeli babajayele besebekhululeka ukuxoxa labo.

UJEHOVA UYAZWISISA

6-7. Nika izibonelo ezitshengisa ukuthi uJehova uyabalalela abantu.

⁶ Abantu abazigqajayo bangontandokayiphikiswa kodwa uJehova kanjalo. Lanxa elenhlakanipho ejulileyo, uyazehlisa amukele imibono yabanye abantu. Ngelinye ilanga uMiriyamu lo-Aroni basola umnawabo uMosi owayekhethwe nguJehova ukuthi akhokhele ama-Israyeli. Okwakwenziwe nguMiriyamu kwakuyikudelela uJehova ngokwakhe futhi lokho kwenza uJehova wamzondela, waze wamtshaya ngobulephero. U-Aroni wancengela udadewabo kuMosi kwazothi uMosi wancenga uJehova ukuthi elaphe uMiriyamu. Ngenxa yokuthi uJehova uthobekile kazange athi engikukhulumileyo ngikukhulumile kodwa wamelapha.—Nani. 12:​1-15.

⁷ Khathesi asixoxeni ngendlela uJehova aphatha ngayo indaba kaHezekhiya ukuze sibone ukuthi unguNkulunkulu ozwisisayo. Uzakhumbula ukuthi uJehova wayethume umphrofethi wakhe u-Isaya ukuthi ayetshela uHezekhiya ukuthi wayezakufa. UHezekhiya wenzani esizwa lokho? IBhayibhili lithi ‘wakhala kabuhlungu’ wacela ukuthi uJehova amsilise. UJehova wamuzwa, wasemzwela wamelapha njalo wangezelela impilo yakhe ngeminyaka engu-15. (2 Amakho. 20:​1, 5, 6) Siyabona ukuthi ukuthobeka kukaJehova kumenza abe lesihawu futhi abalalele abantu.

8. Kuyini okutshengisa ukuthi uJesu uyazwisisa? (UMakho 3:​1-6)

⁸ UJesu uyazwisisa njengoYise. Ngesikhathi uJesu esemhlabeni wayencedisa abantu ngendlela ezitshiyeneyo. Ngokwesibonelo, welapha abantu ngitsho langeSabatha. Khonokho kwakubacaphula abakhokheli benkolo ababelolunya. (Bala uMakho 3:​1-6.) Lalamuhla uJesu utshengisa ukuthi uyazwisisa ngendlela akhokhela ngayo ibandla. Ngokwesibonelo, nxa kulomuntu owenze isono esikhulu ebandleni uyambekezelela, amnike isikhathi eseneleyo sokuthi aphenduke.—Isam. 2:​2-5.

9. Singatshengisa njani ukuthi siyazwisisa? (Khangela lemifanekiso.)

⁹ Singamlingisela njani uJehova? Nxa sithobekile lathi sizazama ukuzwisisa njengoJehova. (Jak. 3:17) Ngokwesibonelo, lanxa abazali bengasoze batotoze abantwababo, bangatshengisa ukuthi bayazwisisa ngokungakhangeleli ukuthi benze izinto ezingaphezu kwamandla abo. Lokho yikho kanye okwenziwa nguJakhobe njengoba sifunda ngakho kuGenesisi 33:​12-14. Abazali kumele batshengise ukuthi bayazwisisa ngokungaqathanisi abantwababo. Labadala bebandla kumele batshengise ukuthi bayazwisisa njengoJehova. Ngokwesibonelo, umdala ozwisisayo uyavumelana lesinqumo esenziwe ngabanye abadala nxa kuyikuthi lokho okukhethwe ngabanye abadala kuyavumelana lokuseBhayibhilini. (1 Thim. 3:​2, 3) Lathi sonke kumele siyamukele imibono yabanye abantu lanxa ingabe itshiyene leyethu. (Rom. 14:1) Kwangathi sonke singazimisela ukuthi sibe ngabantu abazwisisayo.—Flp. 4:5.

UJEHOVA UYABEKEZELA

10. Qamba izibonelo ezitshengisa ukuthi uJehova uyabekezela.

¹⁰ Sowake wakunanzelela yini ukuthi abantu abazigqajayo abakuthandi ukulinda kumbe ukumelela omunye umuntu? Kodwa uJehova uNkulunkulu wethu uyabekezela, kafanani labo ngitsho! Ngokwesibonelo, ngensuku zikaNowa uJehova wathembisa ukuthi uzalinda okweminyaka engu-120 engakatshabalalisi abantu ababi. (Gen. 6:3) Lokhu kwanika uNowa ithuba eleneleyo lokukhulisa abantwabakhe lelokwakha umkhumbi encediswa yimuli yakhe. Ngelinye ilanga uJehova wathuma ingilosi yakhe ukuthi iyetshela u-Abrahama ngokutshabalaliswa kweSodoma leGomora. U-Abrahama wabuza ingilosi le imibuzo eminengi kodwa yona yambekezelela. Aluba ingilosi le yayizigqaja mhlawumbe yayizakuthi, ‘Kanti wena ungubani ukuthi ungangibuza imibuzo le?’ Kodwa ayenzanga njalo, layo yatshengisa ukuthi iyabekezela njengoJehova.—Gen. 18:​20-33.

11. Kungani uJehova ebekezelela abantu kulezinsuku zokucina? (U-2 Phetro 3:9)

¹¹ UJehova katshintshanga, lalamuhla lokhe ebabekezelela abantu. Kungani ebekezela? “Kafisi ukuthi loba ngubani abhujiswe kodwa ufisa ukuthi abantu bonke baphenduke.” (Bala u-2 Phetro 3:9.) Ukubekezela kukaJehova kubanceda njani abantu? Kunike abantu abanengi ithuba lokuthi bafunde ngaye futhi babe ngabangane bakhe. Kanti njalo basesebanengi abalesifiso sokufunda ngaye. Lanxa uJehova enguNkulunkulu obekezelayo kasoze avumele abantu abenza okubi bezenzela umathanda. Sokuseduze ukuthi atshabalalise labo abenza okubi.—Hab. 2:3.

12. Kuyini okutshengisa ukuthi uJesu uyabekezela?

¹² UJesu uyabekezela njengoYise. Sekuleminyaka leminyaka uSathane ekhuluma amanga ngoJehova langabantu bakhe. (Gen. 3:​4, 5; Jobe. 1:11; Isam. 12:10) UJesu uyakubona konke ukuhlupheka kwabantu futhi sokumphuzele ‘ukuthi abhidlize imisebenzi kaDeveli’! (1 Joh. 3:8) Manje kuyini okunceda uJesu ukuthi abekezele? Yikuthobeka. Ulindele ukuphiwa imvumo yokuthi atshabalise uSathane. Phela uyakwazi ukuthi nguJehova ozakwahlulela uSathane ngesikhathi esifaneleyo.—Imiseb. 1:7.

13. Kungani uJesu engazange akhalale ukuncedisa abaphostoli bakhe?

¹³ UJesu wayebabekezelela abaphostoli bakhe nxa bengaphambanisa. Izikhathi ezinengi babephikisana ngokuthi ngubani omkhulu phakathi kwabo kodwa uJesu kazange abakhalale. (Luk. 9:46; 22:​24-27) Wayekwazi ukuthi ngokuhamba kwesikhathi babezafunda ukuba ngabantu abathobekileyo. Nxa lawe uyake wenze iphutha elifananayo kanengi kumele ukuthi kuyakududuza ukwazi ukuthi uJesu uyakubekezelela.

14. Kuyini okungasinceda ukuthi sibekezele?

¹⁴ Singamlingisela njani uJehova? Okuzasinceda kakhulu yikuba lengqondo kaKhristu. (1 Khor. 2:16) Manje singenzani ukuze sizwisise indlela uJesu acabanga ngayo? Kumele sibale amavangeli, sicabangisise ngokwakusenziwa nguJesu besesimlingisela. Okunye okumele sikwenze yikucela uJehova ukuthi asincedise sithobeke njengoJesu. Nxa singazwisisa indlela uJesu ayecabanga ngayo kuzaba lula ukuthi sibekezele njengoJehova. Khonokho kuzasinceda ukuthi singakhalali nxa sisenza amaphutha njalo senelise lokubekezelela abanye.—Mat. 18:​26-30, 35.

UJEHOVA UYABATHANDA ABATHOBEKILEYO

15. Kuyini okutshengisa ukuthi uJehova uyabananzelela abathobekileyo? (IHubo 138:6)

¹⁵ Bala iHubo 138:6. UJehova kabathontisi abantu abathobekileyo. Ake sixoxe ngabantu ababekhangelelwa phansi ngabanye kodwa uJehova ebaqakathekisa. Kungenzakala ukuthi abanye babo babengadumanga kodwa uJehova uyasitshela ngabo eLizwini lakhe iBhayibhili. Ngokwesibonelo sitshelwa ngoDibhora owayengumlizane kaRabhekha. Wasebenza emzini ka-Isaka loJakhobe okweminyaka engaba ngu-125! Lanxa kukulutshwane esikwaziyo ngowesifazana lo, uJehova waba leqiniso lokuthi indaba yakhe iyabhalwa eBhayibhilini. (Gen. 24:59; 35:8) Kwathi sekudlule iminyaka, uJehova wakhetha umfana omncane owayengumelusi ukuthi abe yinkosi yako-Israyeli, ibizo lakhe kwakunguDavida. (2 Sam. 22:​1, 36) Usakhumbula ukuthi ngobani abaqala ukuzwa ukuthi uJesu wayesezelwe eBhethilehema? UJehova wathuma ingilosi ukuthi iyetshela abelusi izindaba lezi ezinhle. (Luk. 2:​8-11) Ngelanga uJosefa loMariya abahamba ngalo ethempelini, uJehova wavezela uSimiyoni lo-Ana ukuthi uJesu wayeyiNdodana yakhe. (Luk. 2:​25-30, 36-38) Kuyazicacela sibili ukuthi “lanxa uJehova ephakeme uyabananzelela abathobekileyo.”

16. UJesu wamlingisela njani uYise?

¹⁶ UJesu wayelingisela uYise. Kazange abakhangelele phansi abantukazana kodwa wabafundisa ngoMbuso kaNkulunkulu. (Imiseb. 4:13; Mat. 11:25) Ngitsho lendlela ayeselapha ngayo abantu abagulayo yayitshengisa ukuthi uyabathanda lokuthi uyabahlonipha. (Luk. 5:13) UJesu wayethobeke okokuthi waze wagezisa abaphostoli bakhe inyawo futhi lo kwakungumsebenzi owawukhangelelwa phansi kakhulu. (Joh. 13:5) Engakabuyeli ezulwini, wanika abalandeli bakhe umsebenzi wokufundisa abanye iqiniso elizabenza bathole ukuphila okungapheliyo.—Mat. 28:​19, 20.

17. Singatshengisa njani ukuthi siyabahlonipha abanye? (Khangela umfanekiso.)

¹⁷ Kumele sithande wonke umuntu njengoJehova. Siyazama ukutshumayeza wonke umuntu kungelani lokuthi uhlala ngaphi, ungumhlobo bani lokuthi ufunde okunganani. Siyabahlonipha kakhulu abafowethu labodadewethu futhi asiziboni siqakatheke kakhulu kulabo kungelani lemisebenzi yenkonzo esilayo. (Flp. 2:3) UJehova uzathokoza kakhulu nxa singahlonipha abanye futhi sibaphathe kuhle.—Rom. 12:10; Zef. 3:12.

18. Kungani kumele sizame ngamandla wonke ukuba ngabantu abathobekileyo?

¹⁸ Nxa singazimisela ukuthobeka njengoJehova kuzaba lula ukuthi silalele abanye, sibazwisise, sibabekezelele njalo sibahloniphe. Nxa singakwenza konke lokhu sizakuba ligugu kuJehova uNkulunkulu wethu othobekileyo!—Isaya. 43:4.