38 AMAHEBHERU AMATHATHU
“Bacitsha Amandla Omlilo”
UHANANIYA loMishayeli lo-Azariya babephakathi kwamaHebheru athunjwa ngabeBhabhiloni. Sebekhonale baphiwa amabizo amatsha. UHananiya bamnika ibizo elithi Shadrekhi, uMishayeli bamnika elithi Mishekhi, u-Azariya bamnika elithi Abhedinikho. Ngelinye ilanga behlelwa yibunzima baze bafisa ukuthi ngabe umngane wabo uDanyeli ukhona ngoba wayehlala ebaqinisa. Asehle layo indaba sizwe ukuthi kwasekutheni.
UNebhukhadinezari wenza inkalakatha yesithombe esasingamamitha angaba ngu-27 ubude futhi singamamitha angaba ngu-2,7 ububanzi. Wasehlela ukuthi kube lomkhosi omkhulu wokuthi abantu babone isithombe lesi. Wayefuna wonke umuntu osebenza esigodlweni abekhona okuhlanganisa lamaHebheru amathathu.
Kwathula kwathi cwaka ngesikhathi isithunywa senkosi sitshela abantu lokho okwakumele bakwenze. Kwakuzaqala kudlale umculo mhlawumbe wawungowokuthi abantu balungele lokho okwakumele bakwenze. Ngemva komculo lo wonke umuntu kwakumele azilahle phansi akhonze isithombe. AmaHebheru amathathu ayesephakathi kwelitshe lembokodo ngoba ayekwazi mhlophe ukuthi uJehova wayengafuni akhonze izithombe. Pho enzani?—Eks. 20:4, 5.
Kwasekumele bakhethe ukuthi bazakhonza isithombe kumbe bazabulawa
Umculo waqalisa. Wonke umuntu owayekhona wathi mbo phansi ngobuso wakhonza isithombe. Kodwa amajaha la amathathu aqhubeka emile. Kumele ukuthi wonke umuntu owayelapho wawabona. Amanye amaKhaledi ahle ayawamangalela kuNebhukhadinezari athi: “Amadoda la ayakudelela nkosi, awabakhonzi onkulunkulu bakho njalo ayala ukukhonza isithombe segolide osimisileyo.” INkosi uNebhukhadinezari yathi ikuzwa lokho yazonda yabhubhudla amagwebu yabuza amajaha la ukuthi kwakuliqiniso yini lokho ayemangalelwa ngakho. Inkosi ayizange ilinde ukuthi aphendule, yathi izawanika elinye ithuba. Nxa engekela ukukhonza isithombe lesi, izawaphosela esithandweni somlilo ovuthayo. Yawatshela lokuthi akulankulunkulu ozawakhulula esandleni sayo.
UHananiya loMishayeli lo-Azariya abazange bacabange kabili ukuthi uNkulunkulu wabo wayezabakhulula. Batshela inkosi ukuthi lanxa kwakungenzakala angabakhululi, bona babengasoze bakhonze onkulunkulu bayo lesithombe segolide. UNebhukhadinezari wazonda wabila. Yikho wahle wathi umlilo kawubaselwe okuphindwe kasikhombisa ukwedlula ukubaselwa kwawo okujayelekileyo. Amajaha la abotshwa asephoselwa emlilweni lo. Umlilo wawusutshisa okokuthi amadoda ayephosela amaHebheru amathathu ahle abulawa lilangabi.
UNebhukhadinezari watsha amathe ngalokho akubonayo. Wabona sekulamadoda amane khona kuphoselwe amathathu. Ayezihambahambela phakathi komlilo engatshi. Wathi owesine kukhanya angathi yindodana yabonkulunkulu. Yikho wasondela wasewamemeza wathi aphume esithandweni somlilo.
Abantu baphelelwa bebona amadoda la ephuma engatshanga lempahla zawo zingatshanga, engela ngitsho lephunga lomlilo. Ayebotshwe ngakho yikho okwakutshe kwaloba. UNebhukhadinezari laye wayemangele. Yikho wancoma amadoda la ngokulalela uNkulunkulu wabo. Wathi: “Bathembele kuye, baphikisa umlayo wenkosi njalo bebezimisele ukufa kulokuthi bakhonze omunye unkulunkulu ngaphandle kukaNkulunkulu wabo.”
Yikho inkosi le yabeka umlayo wokuthi loba ngubani owayezakhuluma kubi ngoJehova kwakumele abulawe. Yasisipha amadoda la amathathu izikhundla eziphezulu esabelweni seBhabhiloni. UJehova wawabusisa amadoda la. Ngemva kweminyaka engaba ngu-700, uJehova waphefumulela uPhawuli ukuthi abhale ngabanye abacitsha amandla omlilo. Kungenzakala ukuthi ngesikhathi ebhala amazwi la wayecabanga ngamajaha la. Lokhu kutshengisa ukuthi uJehova kazange asikhohlwe isibindi esatshengiswa nguHananiya loMishayeli lo-Azariya.
Bala indaba le eBhayibhilini:
Ingxoxo:
UHananiya loMishayeli lo-Azariya batshengisa njani ukuthi balesibindi?
Julisa Ingqondo
1. Okwatholwa ngabezembali kutshengisa njani ukuthi okukuDanyeli isahluko 3 kuliqiniso? (w23.07 31) A
© The Trustees of the British Museum. Licensed under CC BY-NC-SA 4.0. Source. Modifications: Box added.
Umfanekiso A: Isitina esitshisiweyo esilebizo likaNebhukhadinezari
2. Ayesitshoni amabizo aphiwa amaHebheru amathathu? (dp 36 ¶14-wcgr)
3. Kuyini okutshengisa ukuthi uNebhukhadinezari wayekuthanda ukukhonza? (dp 69 ¶3-wcgr) B
Umfanekiso B: UNebhukhadinezari wakha futhi wavuselela amathempeli abonkulunkulu abanengi beBhabhiloni
4. Kuyini okwenza “abantu bezizwe ezitshiyeneyo lendimi ezitshiyeneyo” bavuma ukukhonza isithombe sikaNebhukhadinezari bona belabonkulunkulu babo? (Dan. 3:7; dp 73 ¶10-wcgr)
Cabangisisa Ngezifundo
AmaHebheru amathathu awazange ephule umthetho kaJehova ngokudla ukudla ayethe angakudli futhi ahlala eqotho lanxa ayesezulelwa ngamanqe. Lokhu kusifundisani? (Luk. 16:10) C
Umfanekiso C
Nxa sihlukuluzwa, singawalingisela njani amaHebheru amathathu? (Dan. 3:16-18)
Ngokuthobeka
Ngokuba mnene
Ngokuba qotho
Ungenzani ukuze ube lesibindi njengamaHebheru amathathu?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Ngizawabuzani amaHebheru amathathu nxa esevusiwe?
Funda Okunengi
UmKhristu angatshengisa njani ukuthi uyazihlonipha iziphathamandla lokuthi uqotho kuJehova?
Zibone ungomunye wamaHebheru amathathu ukuze ubone ukuthi kuyini ongakufunda endabeni le.
“Baphuma Bephila Phakathi Kwesithando Somlilo!” (Ingxenye ekuwebhusayithi ethi “Funda Ezindabeni EziseBhayibhilini”-wcgr)