39 U-ESTA
“Nxa Ngingafa Ngiyabe Ngifile”
KULEYINYE intombi eyaqunga isibindi yalanda inkosi esihlalweni sayo sobukhosi ingabizwanga. Yayisesaba ngoba yayikwazi mhlophe ukuthi lokhu kwakungayibulalisa. Lanxa kunjalo yazimisela ukuyakhuluma lenkosi. Yayingubani intombi leyo futhi kwasekutheni?
Ibizo lentombi le kwakungu-Esta. Wayelitshatshazi futhi elomzimba omuhle. Wakhulela ezandleni zikaModekhayi umntakamfowabo kayise ngoba wafelwa ngabazali esesemncane. Babehlala eShushani esigodlweni sePhesiya futhi uModekhayi wayeyisisebenzi senkosi.
Ngelinye ilanga iNkosi u-Ahasuweru yathuma izinceku zayo ezabelweni zombuso wayo ukuthi zidinge intombi ezinhle ezigcweleyo ngoba yayisifuna indlovukazi entsha. Izinceku zakhangwa yibuhle buka-Esta yikho zamthatha zahamba laye esigodlweni. Wathi engakasuki uModekhayi wamtshela ukuthi akugcine kuyimfihlo ukuthi wayengumJuda.
Abantu bonke esigodlweni babemthanda kakhulu u-Esta. Wahlala izinyanga ezingu-12 ezicomba ngamafutha atshiyeneyo ukuze abemuhle kakhulu. Ngemva kwalokhu wahanjiswa enkosini. Inkosi yamthanda u-Esta ukwedlula zonke intombi yikho waba yindlovukazi yasePhesiya. Lanxa kunjalo u-Esta waqhubeka emhlonipha uModekhayi, kazange ayithi vu eyokuthi wayengumJuda.
Ngalezonsuku iNkosi u-Ahasuweru yanika uHamani isikhundla esiphezulu ukwedlula zonke ezinye iziphathimandla. Kukhanya uHamani wayedabuka esizweni sabantu ababeyizitha zikaJehova. Ezinye izinceku zenkosi zazimkhothamela uHamani kodwa uModekhayi wayengaqali ngoba wayeyinceku kaJehova ethembekileyo. Lokhu kwenza uHamani wamzonda kakhulu. Waze wabumba lecebo lokuthi kubulawe wonke amaJuda ayesembusweni wePhesiya. UModekhayi wakhathazeka kakhulu esizwa lokhu, yikho wathumela umbiko ku-Esta emtshela ukuthi akhulume lenkosi ukuze avikele amaJuda. Kwakudinga isibindi ukuthi u-Esta akwenze lokhu.
U-Esta wazama ukuchasisela uModekhayi ukuthi nxa wayengaphonguthutsha inkosi ingambizanga wayengabulawa ngoba yayilolaka olwesabekayo. Lanxa kunjalo uModekhayi wamkhuthaza u-Esta wasemtshela lokuthi kungenzeka ubeyindlovukazi ukuze kukhululwe abantu bakoJuda. U-Esta esezwile okwakukhulunywe nguModekhayi wathi: “Nxa ngingafa ngiyabe ngifile.” Wacela ukuthi abantu bonke bamzilele okwamalanga amathathu. Kumele ukuthi u-Esta labantu bonke bakoJuda bathandaza besathandaza becela uJehova ukuthi amvikele. U-Esta wacina equnga isibindi wayilanda inkosi.
INkosi u-Ahasuweru yathi ibona u-Esta ayizange ivuke ngolaka kumbe ithi abulawe. Yabobotheka yasimbuza ukuthi ingamnceda ngani. U-Esta wacela ukuthi nxa kusenza ibuye loHamani endlini yakhe bezokudla. Sebefikile u-Esta wazibamba kazange ahle akhulume ngecebo likaHamani kodwa waphinda wabacela ukuthi bazokudla ngelanga elilandelayo. UHamani wathi esebuyela okwesibili endlini ka-Esta wayetshiye esemise isigodo lapho ayefuna ukuphanyeka khona uModekhayi. UHamani wayengakwazi ukuthi uzithezela olulenkume ngokwenza njalo.
Kwakumele ancenge inkosi elamandla ukuthi ivikele abantu bakaJehova
Ngelanga lesibili u-Ahasuweru waphinda wabuza u-Esta ukuthi ufuna amenzeleni. Mhlalokho u-Esta wahle walibhoboza ithumba, wamtshela konke kazange amfihlele lutho. Wayitshela inkosi ukuthi impilo yakhe leyabantu bakibo yayisisengozini ngoba kulomuntu owayebumbe icebo lokubabulala. Wathi okwenza wakhuluma yikuthi uhlupho lolu lwaluzaphambanisa inkosi. INkosi u-Ahasuweru yethuka yabuza ukuthi ngubani owayelesibindi sokwenza into yokuganga okungaka. U-Esta wahle wayitshela ukuthi nguHamani. Yezwa lokuthi uHamani wayeyenze isigodo sokulengisa uModekhayi. Inkosi yazonda yabila yathi kathathwe alengiswe kiso.
UHamani wayefuna ukubulala uModekhayi lamaJuda kodwa izinto zamphendukela kwacina kufe yena lezitha zikaJehova. UJehova wavikela abantu bakhe esebenzisa owesifazana owayelesibindi lokholo.
Bala indaba le eBhayibhilini:
Ingxoxo:
U-Esta watshengisa njani ukuthi ulesibindi?
Julisa Ingqondo
1. Yibuphi obunye ubufakazi obutshengisa ukuthi indaba le iliqiniso? (ia 138, ibhokisi) A
Archiv für Orientforschung, Vol. 19, p. 79; Institut für Orientalistik
Umfanekiso A: Umbhalo wakudala wePhesiya okhuluma ngoMaduka loba uModekhayi
2. Kuyini okwakusenza ukuthi uModekhayi ale ukukhothamela uHamani? (ia 131 ¶18)
3. Sikwazi njani ukuthi uSathane lamadimoni yibo ababezama ukutshabalalisa amaJuda? (g02 9/8 7 ¶3–8 ¶2-wcgr) B
Cube. Lot of Yahali, puru. Neo-Assyrian Clay. (YPM BC 021122). Courtesy of the Peabody Museum, Division of Anthropology, Babylonian Collection, Yale University; peabody.yale.edu.
Umfanekiso B: Idayiza yakudala yokwenza inkatho
4. U-Esta loModekhayi bagcwalisa siphi isiphrofetho? (ia 142, ibhokisi)
Cabangisisa Ngezifundo
Lanxa u-Esta wayehlala labantu ababengakhonzi uJehova, wayengowesifazana owayelalela futhi ehlakaniphile. Abasakhulayo bafundani esibonelweni sika-Esta?
U-Esta wayehlonipha, ebekezela njalo ethembekile yikho umkakhe u-Ahasuweru wamlalela. Amakhosikazi afundani esibonelweni sika-Esta? C
Umfanekiso C
Yiziphi ezinye indlela ongatshengisela ngazo ukuthi ulesibindi njengo-Esta?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Ngizambuzani u-Esta nxa esevusiwe?
Funda Okunengi
Bukela ividiyo le ubone ukuthi abantwana bangafundani esibonelweni sika-Esta.
Kuyini okwenziwe ngabafowethu labodadewethu ukuze bavikele abanye?
Lingisela Labo Ababekezelayo Babona Izithembiso Zigcwaliseka—UModekhayi Lo-Esta (3:05)