37 UDANYELI
Kazange Ephule Imithetho KaNkulunkulu
UDANYELI labangakibo babehlala koJuda basebethunjwa bahanjiswa khatshana eBhabhiloni. Ukusuka koJuda usiya eBhabhiloni kwakungathatha phose inyanga ezine. Bathi sebefikile eBhabhiloni, uDanyeli labanye abasakhulayo okugoqela abangane bakhe uMishayeli, u-Azariya loHananiya bahlukaniswa labangakibo bayahlala esigodlweni. Sebekhonale bafundiswa ukuphila njengamaBhabhiloni.
UDanyeli waba lesibindi sokuba qotho kuJehova lanxa wayekhatshana labangakibo
UNebhukhadinezari inkosi yaseBhabhiloni wabeka u-Ashiphenazi umkhokheli weziphathamandla zesikhosini ukuthi akhangele ngokuqeqetshwa kwamajaha wonke ayethunjiwe. Wamtshela ukuthi awanike amabizo aseBhabhiloni. Wayekwenzelani lokhu? Phela amabizo amanengi esiHebheru ayedumisa uNkulunkulu weqiniso. Ngokwesibonelo ibizo elithi Danyeli litsho ukuthi “uNkulunkulu unguMahluleli wami.” Kodwa eBhabhiloni amabizo amanengi ayedumisa onkulunkulu babo bamanga. Yikho uDanyeli waphiwa ibizo elithi Bhelitheshazari elitsho ukuthi “Vikela impilo yenkosi.” Amazwi la babewakhuluma nxa bethandaza kuBheli. INkosi uNebhukhadinezari yayifuna ukubaguqula bafanane xathu labantu beBhabhiloni. Yikho yathi bafundiswe ukubala lokubhala ulimi lwamaKhaledi ukuze basebenze esigodlweni. Inkosi ayiphelelanga lapho, kukhona okunye eyakwenzayo.
UNebhukhadinezari wathi u-Ashiphenazi kwakumele abe leqiniso lokuthi amajaha la adla ukudla okudliwa yinkosi, aphinde anathe lewayini elinathwa yinkosi. Lanxa amanye amajaha ayezikholisa izibiliboco zesikhosini, uDanyeli labangane bakhe abathathu abazange bazithinte. Ngenxa yani?
UDanyeli wacabangisisa ngemithetho kaJehova. Ngokwesibonelo kwakungamelanga badle inyama yenyamazana engophiswanga kuhle kanye lezinyamazana ezingcolileyo. Yikho wananzelela ukuthi abantu beBhabhiloni babengathi badle ukudla lokhu befuna bephule imithetho kaJehova. Kanti njalo nxa babengadla kwakungakhanya angathi sebekhonza onkulunkulu bamanga. Okunye ayengabe ekucabanga yikuthi nxa banganatha iwayini elinengi kwakungaba nzima ukuthi benze izinqumo ezithokozisa uJehova.a
UDanyeli wathandaza esathandaza ngendaba le wasesiyaxoxisana labangane bakhe ukuthi bangenzani. Wazimisela enhliziyweni yakhe ukuthi angenzi loba yini ezadanisa uJehova. Yikho walanda u-Ashiphenazi wakhuluma laye ngenhlonipho enkulu, emcela ukuthi yena labangane bakhe bengaphiwa izibiliboco zenkosi. UJehova wawuphendula umthandazo wakhe, wenza ukuthi u-Ashiphenazi asamukele isicelo sakhe. Lanxa kunjalo u-Ashiphenazi wayekhathazeke ngokuthi inkosi yayizakuthini nxa yayingathola uDanyeli labangane bakhe becakile. Bakuzwisisa okwakukhulunywa ngu-Ashiphenazi, yikho bacabangisisa ukuthi kungenziwani. Kwathi ngemva kwesikhathi uDanyeli waba lesibindi wamlanda u-Ashiphenazi wasecela ukuthi babanike imibhida lamanzi okwensuku ezingu-10. Ngemva kwensuku lezo besebebaqathanisa labanye abasakhulayo ukuze babone ukuthi banjani. U-Ashiphenazi wavuma wathi kabaphiwe khona kanye lokhu ababekucela.
Ngemva kwamalanga angu-10 abafana bonke babizwa bahlolwa, kwatholakala ukuthi uDanyeli labangane bakhe abathathu babekhangeleka bebahle lejwabu labo lihlambulukile ukwedlula bonke abasakhulayo ababesidla izibiliboco zenkosi. Kusegcekeni ukuthi uJehova wambusisa uDanyeli labangane bakhe ngenxa yokuthi babe lesibindi kanye lokholo. Kumele ukuthi abazange bayikhohlwe indlela uJehova ayebancedise ngayo.
UDanyeli waphila iminyaka engaba yi-100. Phakathi kweminyaka le kunengi okwenzakalayo empilweni yakhe okwatshengisa ukuthi ulesibindi. Ngokwesibonelo, kwakumele achasisele iNkosi uNebhukhadinezari iphupho elalivela kuJehova, elaliveza ukuthi inkosi le eziphakamisayo yayizehlelwa yizinto ezimbi. Ngokuhamba kwesikhathi sokubusa iNkosi uBhelishazari, uDanyeli wachasisa amazwi ayebhalwe emdulwini ayeveza ukuthi inkosi le yayizabulawa. Wathi esegugile kazange esabe ngesikhathi bemphosela emgodini owawugcwele izilwane ezilambileyo. Konke lokhu kwatshengisa ukuthi wayelesibindi. Yikho lengilosi kaJehova yaze yathi uyindoda eligugu kakhulu.
Bala indaba le eBhayibhilini:
Ingxoxo:
UDanyeli watshengisa njani ukuthi ulesibindi?
Julisa Ingqondo
1. UDanyeli 1:1 uyaphikisana yini loJeremiya 25:1? Chasisa. (dp 18-19 ¶14-15-wcgr)
2. UDanyeli 1:2 uthi uNebhukhadinezari ‘wayelendlu yenotho kankulunkulu wakhe,’ umbhalo wakudala wona uthini ngalokhu? (it “Inotho” ¶3-wcgr) A
© The Trustees of the British Museum. Licensed under CC BY-NC-SA 4.0. Source. Modifications: Box added.
Umfanekiso A: Umbhalo kaNebhukhadinezari owawukhuluma ngendlu yenotho eyayisethempelini likankulunkulu wakhe
3. Wawungowani umsebenzi ‘wabaphristi ababesenza amasalamusi’? (Dan. 1:20; it “Amasalamusi Lezinyanga” ¶2-6-wcgr) B
Umfanekiso B: Umbhalo weBhabhiloni owawuchasisa ukuthi umuntu owayehlaselwe yizipoko angelatshwa njani
4. Ukudla okwakudliwa nguDanyeli labangane bakhe abathathu kwakungabe kugoqelani? (Dan. 1:12; dp 40 ¶25-wcgr)
Cabangisisa Ngezifundo
Abasakhulayo bangamlingisela njani uDanyeli lanxa bebodwa abazali bengekho?
‘Ukuzimisela’ kukaDanyeli ukulalela uNkulunkulu kwamnceda njani ukuthi abe lesibindi? (Dan. 1:8) Thina singamlingisela njani? C
Umfanekiso C
Yiziphi ezinye izindlela ongamlingisela ngazo uDanyeli?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Ngizambuzani uDanyeli nxa esevusiwe?
Funda Okunengi
Bukela ividiyo le.
UDanyeli wayelesibindi njalo eqotho. Abasakhulayo bangamlingisela njani?
a Khangela u-Eksodusi 34:15; uLevi 7:26; 11:1-7; amaNani 25:2; iZaga 20:1.