CILONGESA 14

Ku Kanieka ha Mezi a Ntsindo

VaHevelu 8:1

VITONDEKA: Kuasenu vakua ku mi halakana va kave vuino cimpande cenu, va na pande naua ku mona ku litombola ca mitue ya indende na mutue ua cimpande.

MUA KU VI PUISILAMO:

Kalenu na vutumbe. Tantekeyenu nga vutumbe vua cimpande cenu ku lekesa muzimbu, ku va tundisa vimpata, ni ku va sambeya kaha ci lingenu ngue mu ca pande. Kalenu na vusunga ngecize mitue ya indende yose i ka mi kuasa ku puisamo vutumbe vuenu.

Lihulenu nguenu: ‘Vihula vika ni vimpata vika va hasa ku kala navio vakua ku halakana ha cimpande eci? Vati va ka linga vihula viaco na vimpata vika va ka muesa?’ Kaha tumbikenu vinanga vienu mu njila yaco linga vakua ku mi halakana va ka hase ku mi ivuisisa, na ku tava muzimbu uenu.
Puenu na ku tsindika mutue ua cimpande. Puenu na ku tsindika mutue ua cimpande mu kati ka cimpande ni ku tumbula mezi a ku lifua na aze ali ha mutue ua cimpande.
Tsindikenu ha vintsina via seho kaha vi asiuisenu. Hangulenu lika vinanga via ntsindo vize via kuata ku mutue ua cimpande kaha vi mu ka hasa ku handeka mu ntsimbu i va na mi hakela. Kati mu kale na vinanga via kama via vingi, ntsindikenu vuino nkala cinanga na ku kavesa vuino cimo na cikuavo.

Mu hasa ku tumbula vinanga via ntsindo via katete ku vuputukilo, mu kuase vakua ku mi halakana ku mi kava ni mu vi hilukila naua ku ntsongo ya cimpande linga vantu va vi vuluke.