Ku lihana kuli Yehova na kupua mutamba ua vusoko vuendi, cikeco capua cihangula ca kama ku muntu uose. Yehova a tonda vantu vose va likuate vusamba nendi. Omo lia vika? Muomu ua lema vantu kaha a tonda va yoye vuino ku miaka yose. (Ndeu. 30:​19, 20; Ngal. 6:​7, 8) Yehova ke ku kakateya na umo uahi ku mu pangela. Ua hana vantu vose mpoko ya ku lihanguila viuma. Vatico nga Mukua Kilistu na vulumuna? Nga ka liveye na kualuluka, ke kupua naua Mukaleho ua Yehova. (1 Kol. 5:13) Vutuhu ngoco, Yehova ue ku lavelela muntu uaco a hiluke kuli Ikeye. Vukevuo vusunga vua kama vua mu lingisile ku tuma Muanendi mu kupua nkombelo, linga ecele vaze ve ku liveya. Njambi yetu ua cilemo ua lania vaze va linga vupi va aluluke.—Zak. 1:3; Loma 2:4; Tia. 4:8. w24.08 14 ¶1-2

Kapostolo Yoano mua sonekele mukanda ua citatu, vamo va kele na ku sanduola vilongesa via makuli na ku koka matepeso mu cikungulukilo. Vunoni vakuavo va tualeleleho ‘kuendela mu vusunga.’ Vononokele Yehova mu “ku enda ngue ku mezi a lisiko eni.” (2 Yoa. 4, 6) Vakua Kilistu vaco ka va vuisile lika Yoano ndzolela, vunoni na Yehova. (Visi. 27:11) Vika tu lilongesaho? Kuononoka ce ku vuisa ndzolela. (1 Yoa. 5:3) Ca ku muenako, tue kuivua ndzolela ku tantekeya nguetu tue ku vuisa Yehova ndzolela. Kaha ceku mu vuisa ndzolela mue ku tu mona tuononoka masiko endi na ku hona ku linga via vipi. Na tungelo navo ve kuivua ndzolela. (Luka 15:10) Netu naua cekutu vuisa ndzolela, mu tue ku mona vamuanetu na vandumbuetu vali na ku kolesa. (2 Tes. 1:4) Kaha mavu a Satana mu a ka nonga, tu kevua ndzolela ya kama mu ku tantekeya nguetu tua tualeleleho ku pangela Yehova. w24.11 12 ¶17-18

Mu ntsimbu ingahi mua pande ku talesesa muntu ntsimbu kanda mu ka mu handekeye? Nga mu handekeya muntu vuasi-vuasi, halumo a ka singanieka nguendi, ka mue ku hilula vuino viuma ntsimbu kanda mu linge vihangula. (Visi. 29:20) Vunoni, nga muntu na nongonona ngueni muli na ku mu lema, kaha mu hitisamo ntsimbu ya kama ca ku hona ku mu handekeya, a hasa ku singanieka nguendi, mue ku likanuuela cikuma ntsimbu kanda mu linge vihangula. (Ekel. 11:4) Vulukenu nguenu, ntsimbu kanda mu ka handekeye muntu, ka ci tondeka mu kale na vusunga nguenu mu ka liambata nendi. Vunoni mua pande ku kala na vusunga nguenu, mua liviukisila kuambata, kaha muntu u mu ka handekeya a hasa kupua muntu ua cili ua ku liambata nendi. Vika mua pande ku linga nga mu mona nguenu kuli umo ali na ku mi lema? Nga ka mua mu lemene, vilinga vienu via pande ku muesa ha toma nguenu ka mua mu lemene vene. Ka ca puile ca cili ku lingisa muntu a singanieke ngueni mua mu lema, nga kati mukemuo.—Efe. 4:25. w24.05 22-23 ¶9-10