‘သူတို့အဘယ်သို့ကြားနိုင်မည်နည်း’

^၁ ယေရှုက “ဧဝံဂေလိတရားကို ရှေးဦးစွာ လူမျိုးအပေါင်းတို့အားဟောရလိမ့်မည်” ဟုအလေးအနက်ဖော်ပြခဲ့သည်။ (မာ. ၁၃:၁၀) ကျွန်ုပ်တို့ဝီရိယရှိရှိ ကြိုးစားကြသော်လည်း သက်သေခံချက်ကို မရရှိသူသန်းပေါင်းများစွာရှိနေသေးသည်။ နိုင်ငံများစွာတွင် လူဦးရေအလျင်အမြန်တိုးများလာသည်။ ထို့ကြောင့် ‘သူတို့အဘယ်သို့ကြားနိုင်မည်နည်း။’—ရော. ၁၀:၁၄။

^၂ ယေဟောဝါအား ယုံကြည်စိတ်ချပါ– လူခပ်သိမ်းတို့၏နှလုံးအခြေအနေကို ယေဟောဝါသိတော်မူကြောင်း ကျွန်ုပ်တို့သတိရကြရမည်။ လူတစ်ဦး၏အခြေအနေ မည်သို့ပင်ရှိစေကာမူ သူသည် ဘုရားသခင်နှင့်ပတ်သက်သည့် သမ္မာတရားကို စိတ်ရင်းမှန်ဖြင့်ရှာမည်ဆိုလျှင် ယင်းကိုတွေ့ရှိမည်ဖြစ်သည်။—၅ ရာ. ၂၈:၉။

^၃ အာဗြဟံသည် သောဒုံနှင့်ဂေါမောရမြို့သားများအတွက် စိုးရိမ်ပူပန်ခဲ့သည်။ သို့သော် ဘုရားသခင်က သောဒုံမြို့တွင် ဖြောင့်မတ်သူဆယ်ယောက်တွေ့လျှင်ပင် ယင်းကိုဖျက်ဆီးမည်မဟုတ်ကြောင်း သူ့အားစိတ်ချစေခဲ့သည်။ (က. ၁၈:၂၀၊ ၂၃၊ ၂၅၊ ၃၂) ယေဟောဝါသည် ဖြောင့်မတ်သူများကို ဆိုးသွမ်းသူများနှင့်အတူ မည်သည့်အခါမျှ မဖျက်ဆီးပစ်ခဲ့ကြောင်း လောတနှင့် သူ၏သမီးများကယ်တင်ခံခဲ့ရခြင်းက ဖော်ပြသည်။—၂ ပေ. ၂:၆-၉။

^၄ တစ်ခါက ဧလိယသည် စစ်မှန်သောဘုရားသခင်ကိုဝတ်ပြုရာ၌ မိမိတစ်ဦးတည်း ထီးတည်းဖြစ်နေသည်ဟု ယူမှတ်ခဲ့သည်။ သို့သော် ယေဟောဝါက သူသည် တစ်ဦးတည်းဖြစ်မနေသည့်အပြင် သူစတင်ခဲ့သည့်လုပ်ငန်းသည် ပြီးမြောက်မည်ဖြစ်ကြောင်း စိတ်ချစေခဲ့သည်။ (၃ ရာ. ၁၉:၁၄-၁၈) ကျွန်ုပ်တို့ခေတ်ရှိအခြေအနေကော အသို့နည်း။

^၅ ဘုရားသခင့်လုပ်ငန်းတွင်အလုပ်များနေပါ– သက်သေခံခြင်းလုပ်ငန်းကို နောက်ထပ်မည်မျှအထိ လုပ်ဆောင်ရဦးမည်ကို ကျွန်ုပ်တို့မသိကြပါ။ ဤလုပ်ငန်းအတွက်တာဝန်ခံမှာ ယေဟောဝါဖြစ်ကာ ကိုယ်တော်သည် ယင်းကိုကြီးကြပ်ရန် မိမိ၏ကောင်းကင်တမန်များကို အသုံးပြုနေသည်။ (ဗျာ. ၁၄:၆၊ ၇) ကိုယ်တော်သည် လူမျိုးအပေါင်းတို့အား မည်သည့်အတိုင်းအတာအထိ သက်သေခံရမည်ကို ဆုံးဖြတ်သောအရှင်ဖြစ်တော်မူ၏။ ယေဟောဝါသည် အလိုရှိမည်ဆိုလျှင် နောက်ထပ်များစွာသောသူတို့ “ဧဝံဂေလိတရားကိုကြားနာ၍ယုံကြည်” လာရန် ကျွန်ုပ်တို့စဉ်းစား၍မရနိုင်သေးသည့်နည်းများဖြင့် နိုင်ငံတော်သတင်းကို ပျံ့နှံ့စေနိုင်သည်။ (တ. ၁၅:၇) ယေဟောဝါ၏လုပ်ဆောင်မှုသည် မေတ္တာ၊ ဉာဏ်ပညာနှင့် တရားမျှတမှုရှိသောဘုရားသခင်ဖြစ်သည်ဟူသောအချက်နှင့် လုံးဝညီညွတ်မည်ဖြစ်သည်။

^၆ ယေဟောဝါ၏အလိုတော်နှင့်အညီလုပ်ဆောင်ရခြင်း၊ သတင်းကောင်းကို လူတိုင်းကြားရန် အတတ်နိုင်ဆုံးလုပ်ဆောင်ရခြင်းသည် ကျွန်ုပ်တို့အတွက်အခွင့်ထူးပင်တည်း။—၁ ကော. ၉:၁၆။