Ki̱ʼinndi̱ kuenta ña̱ va̱ʼa ndatakandi̱ ti̱xin salón tá xi̱ndikaa̱ COVID-19

Tá ki̱xáʼa xa̱ʼa̱ yo̱o̱ marzo ña̱ ku̱i̱ya̱ 2022 nu̱ú sitio ña̱ jw.org ka̱ʼyina ña̱yóʼo: “Kúsi̱íní-inindi̱ káʼa̱nndi̱ xíʼinndó na̱ Cuerpo Gobernante káʼa̱nna ña̱ ndiʼi na̱ congregación xa̱a̱ kivi ndatakana tá semana ña̱ 1 tí abril, soo tá va̱ása xíín na̱ chíñu ndatakandó va̱ása ndatakandó”. Ndiʼi miíyó na̱ testigo Jehová ku̱si̱íní-iniyó tá ku̱ndaa̱-iniyó xa̱ʼa̱ ña̱yóʼo. Soo tá ni̱ka̱ʼa̱nna ña̱yóʼo ni̱xi̱yokava pandemia.a Ña̱ va̱ʼa kǒo kiʼin COVID-19 na̱ xáʼa̱n reunión xi̱niñúʼu keʼéyó ku̱a̱ʼání ña̱ʼa. Xi̱niñúʼu ndasaviíyó salón nu̱ú ndákutáʼanyó ña̱ va̱ʼa koo tu̱ʼvaña chi u̱vi̱ví ku̱i̱ya̱ kǒo níkivi ndakutáʼanyó.

Na̱ ñaniyó xíʼin ná ku̱ʼvayó xa̱a̱ ku̱a̱ʼání tiempo xi̱ndatuna ña̱ va̱ʼa ndikó tukuna ndatakana ti̱xin salón.

Kíʼinndi̱ kuenta xíʼin ña̱ xíniñúʼuna iin tá iin lugar

Tá ni̱ya̱ʼa iin yo̱o̱ ña̱ ni̱ka̱ʼa̱nna xíʼinyó ña̱ va̱ása ndatakakayó ti̱xin salón ku̱i̱ya̱ 2020. Na̱ Departamento Mundial ña̱ Diseño xíʼin Construcción ña̱ ndíkaa̱ Warwick (Nueva York), kíxáʼa ndákanixi̱nína ndáaña kundoʼo salón nu̱ú nda̱takayó xa̱ʼa̱ ña̱ xi̱ndikaa̱ COVID-19 ta ndáaña xi̱niñúʼu keʼéyó ña̱ va̱ʼa ndataka tukuyó ti̱xin salón.

Iin tá iin ñuu, xa̱a̱ síín síín ña̱ʼa xi̱xiniñúʼuna. Ta̱ Matthew De Sanctis, ta̱ káchíñu xíʼin Departamento Mundial ña̱ Diseño xíʼin Construcción káchira: “Sava ñuu íxayo̱ʼvi̱níña xíʼin na̱ yiví ndani̱ʼína nu̱ú ndakatana ndaʼa̱na. Tá kǒo ti̱kui̱í íyo ti̱xin iin salón xíniñúʼu satánará á ku̱ʼu̱nna xa̱ʼa̱rá nu̱ú íyo iin yu̱ta á iin pozo. Sava ñuu na̱ chíñu ni̱ka̱ʼa̱nna ña̱ tá xi̱kuni̱na ndatakana ti̱xin salón xi̱niñúʼu kúúmiína ventilador á aire acondicionado. Ta saátu ni̱ka̱ʼa̱nna xíʼinna ña̱ xi̱niñúʼu kúúmiína letrero ña̱ ka̱ʼa̱n xíʼinna ña̱ xíniñúʼu ndakatana ndaʼa̱na ta limpio koona”.

¿Ndáaña ke̱ʼé na̱ hermanoyó ña̱ va̱ʼa ke̱ʼéna ña̱ ni̱ka̱ʼa̱n na̱ chíñu xíʼinna? Ta̱ Matthew káʼa̱nra ña̱ ti̱xin ku̱a̱ʼání salón ke̱ʼéna iin ña̱ʼa ña̱ va̱ʼaní ta loʼo kuití xu̱ʼún xi̱niñúʼuna. Tá kúú na̱ hermano na̱ íyo chí Papua Nueva Guinea, nda̱ni̱ʼina iin ki̱ʼva ña̱ va̱ʼa ndakatana ndaʼa̱na. Xi̱niñúʼuna ti̱aʼa ña̱ 20 litro, ka̱annaña tá chi̱kaa̱na iin llave ña̱ va̱ʼa kee ti̱kui̱í. Ña̱yóʼo kúú ña̱ ke̱ʼéna ti̱xin sava salón, ta 40 dólar kuití xi̱niñúʼuna. Ta saátu sa̱tándi̱ yáʼaka 6,000 ña̱ʼa nu̱ú ndakatana ndaʼa̱na, ña̱yóʼo sa̱tándi̱ña chí Asia ta chi̱ndaʼándi̱ña ku̱a̱ʼa̱nña salón ña̱ íyo chí África.

Sava salón chi̱kaa̱na aire acondicionado á xi̱xiniñúʼuna ventilador. Ku̱a̱ʼání na̱ congregación sa̱tána yitu̱n káni nu̱ú kundikaa̱ micrófono ña̱ va̱ʼa kǒo tiinnaña. Ta saátu chi̱to̱ní xi̱ndakatana ta xi̱ndaya̱kúnna nu̱ú xi̱tiinna, tá kúú yéʼé á nu̱ú xi̱ndakatana ndaʼa̱na ña̱ va̱ʼa kǒo kiʼin kue̱ʼe̱ miína. Ta ti̱xin sava salón chi̱kaa̱na llave ña̱ tává mií ti̱kui̱í tá xa̱a̱ kúyatin ndaʼa̱na. Ñuu Chile, ki̱ʼva 1,400 dólar xi̱niñúʼuna ña̱ va̱ʼa ke̱ʼéna ña̱yóʼo ti̱xin iin tá iin salón.

Ña̱ xi̱kuni̱na kúú ña̱ kundaana na̱ hermano ña̱ va̱ʼa kǒo kani kue̱ʼe̱ miína ti̱xin salón, ña̱kán na̱ hermanoyó viíní xi̱niñúʼuna donación. Sava ñuu na̱ hermanoyó xi̱niñúʼuna donación ña̱ ta̱xi na̱ gobierno ndaʼa̱na ña̱ va̱ʼa chaʼvina ña̱ʼa nu̱ú xi̱ndaʼána xíʼin yitu̱n tú ndíkaa̱ xa̱ʼa̱ micrófono. Saátu ku̱a̱ʼání na̱ sucursal inkáchi xi̱satána ku̱a̱ʼání ña̱ʼa ña̱ va̱ʼa loʼoka xu̱ʼún kuniñúʼuna. Na̱ sucursal xíʼin na̱ Departamento Mundial ña̱ Compras xi̱kaʼa̱n nda̱kúna xíʼin na̱ xi̱xi̱kó ña̱ʼa kán ña̱ va̱ʼa loʼoka kanaña nu̱úna ta kamaka ndataxinaña ndaʼa̱na.

“Ndiʼi ña̱ ke̱ʼé na̱ hermano chi̱ndeéníña yi̱ʼi̱”

Ndiʼi ña̱ xa̱a̱ kéʼéyó ti̱xin salón nu̱ú ndátakayó va̱ʼaní chíndeétáʼanña xíʼin na̱ hermano. Iin ñá hermana ñá íyo chí Perú ñá naní Dulcine ni̱ka̱ʼa̱nñá tá ku̱ndaa̱-iniñá ña̱ ndikó tukuyó ti̱xin salón ni̱yi̱ʼví loʼoñá, ñáyóʼo káchiñá: “Tá sa̱kán ki̱xáʼa kue̱ʼe̱ yóʼo ki̱ʼin COVID-19 yi̱ʼi̱, xa̱ʼa̱ ña̱kán tá nda̱kanixi̱níi̱ ña̱ ndikó tukui̱ salón ni̱yi̱ʼví loʼi̱ saáchi xi̱ndakanixi̱níi̱ ña̱ kivi kiʼin tuku kue̱ʼe̱ yóʼo yi̱ʼi̱. Soo tá ni̱xa̱i̱ salón ki̱ʼii̱n kuenta na̱ anciano ki̱ʼinnína kuenta ña̱ va̱ʼa kǒo kiʼin kue̱ʼe̱ yóʼo ndi̱ʼi̱. Ni̱xi̱yo desinfectante ta saátu kǒo níxi̱tinndi̱ micrófono xíʼin ndaʼa̱ndi̱. Saátu xi̱ndaya̱kunndi̱ salón tá kúma̱níka kixáʼa reunión ta saátu tá xa̱a̱ ndi̱ʼiña. Ndiʼi ña̱ ke̱ʼé ná hermano chi̱ndeéníña yi̱ʼi̱”.b

Xa̱a̱ síín kúú ña̱ ndo̱ʼo ñá ku̱ʼvayó Sara ñá ñuu Zambia, ñáyóʼo káchiñá: “Sa̱kán íyo loʼo tiempo ni̱xi̱ʼi̱ yiíi̱ xíʼin COVID-19. Ni̱ndi̱ʼi̱ní-inii̱ xa̱ʼa̱ ndáaña kivi kundoʼi̱ tá ná xa̱i̱ salón saáchi kǒoka yiíi̱ ku̱ʼu̱n xíʼi̱n”. ¿Ndáa ki̱ʼva ku̱niñá tá ni̱xa̱ʼa̱nñá ti̱xin salón nu̱ú ndátakayó? Ñáyóʼo káchiñá: “Tá xáʼi̱n salón kíʼii̱n kuenta ña̱ ndíʼi̱ní-ini Jehová xa̱ʼa̱yó ki̱vi̱ nu̱ú ndíʼi vitin, saáchi na̱ hermano xíʼin na̱ anciano chíkaa̱nína ndee̱ xíʼi̱n ta náʼa̱na ña̱ kúni̱nína xínina yi̱ʼi̱ ta saátu va̱ʼaní chíndeétáʼanna xíʼi̱n”.

Na̱ hermano na̱ íyo iníísaá ñuyǐví kúsi̱íní-inina xa̱ʼa̱ ña̱ ndi̱kó tukuyó ndákutáʼanyó ti̱xin salón. Táxiníndi̱ tíxa̱ʼvi ndaʼa̱ndó xa̱ʼa̱ donación ña̱ táxindó ta ku̱a̱ʼání donación yóʼo táxindóña nu̱ú donate.jw.org. Ña̱yóʼo va̱ʼaní chíndeétáʼanña xíʼinndi̱ ña̱ va̱ʼa kundaandi̱ na̱ hermano vitin ña̱ ndi̱kó tukuyó ndátakayó ti̱xin salón.