Chíndeétáʼanyó xíʼin na̱ hermano ku̱i̱ya̱ 2022: Náʼa̱yó ña̱ ndixa kúʼvi̱-iniyó xínitáʼanyó

Tiempo so̱ndíʼi ña̱ ndóoyó vitin, Biblia ni̱ka̱ʼa̱nña ña̱ koo guerra, ña̱ ta̱an, ta saátu koo kue̱ʼe̱ xíkun xíʼin inkaka ña̱ʼa ña̱ “ndeéní yi̱ʼvína xíʼin” (Lucas 21:10, 11). Ku̱i̱ya̱ ña̱ servicio 2022,a ki̱ʼinyó kuenta ndáa ki̱ʼva xínu profecía yóʼo saáchi ku̱a̱ʼání na̱ yiví ki̱xáʼa xóʼvi̱ xa̱ʼa̱ ña̱ ndíkaa̱ guerra ñuu Ucrania. Saátu iníísaá ñuyǐví ni̱xo̱ʼvi̱nína xa̱ʼa̱ ña̱ xi̱ndikaa̱ pandemia ña̱ COVID-19. Ku̱a̱ʼánítuna ni̱xo̱ʼvi̱ xa̱ʼa̱ ña̱ ku̱u ku̱a̱ʼání tu̱ndóʼo, tá kúú ndeéní ni̱ta̱an chí Haití, ndeéní ku̱un sa̱vi̱ chí Centroamérica, Filipinas xíʼin sureste ña̱ África. ¿Ndáa ki̱ʼva chi̱ndeétáʼan na̱ testigo Jehová xíʼin na̱ ni̱ya̱ʼa nu̱ú tu̱ndóʼo yóʼo?

Tá ku̱i̱ya̱ ña̱ servicio 2022, na̱ ñuu Ndióxi̱ chi̱ndeétáʼanna xíʼin na̱ ni̱ya̱ʼa nu̱ú yáʼaka 200 tu̱ndóʼo, ta ki̱ʼva 12 millón ña̱ dólarb xi̱niñúʼundi̱ ña̱ chi̱ndeétáʼanndi̱ xíʼinna. Ná kotoyó ndáa ki̱ʼva xi̱niñúʼundi̱ xu̱ʼún ña̱ táxindó ña̱ va̱ʼa chindeétáʼanndi̱ xíʼin na̱ ni̱ya̱ʼa nu̱ú u̱vi̱ tu̱ndóʼo.

Ndeéní ni̱ta̱an chí Haití

Tá 14 tí enero ña̱ 2021, ndeéní ni̱ta̱an chí sur ña̱ Haití, ta ña̱yóʼo xi̱kuuña 7,2. Kúsuchíní-iniyó saáchi u̱vi̱ ná hermana ta iin ta̱ hermano ni̱xi̱ʼi̱. Ku̱a̱ʼání na̱ yiví ni̱xo̱ʼvi̱ xa̱ʼa̱ ña̱ ndeéní ni̱ta̱an. Iin ta̱ hermano ta̱ naní Stephane káchira: “Xa̱ʼa̱ ña̱ ku̱a̱ʼání na̱ yiví ni̱xi̱ʼi̱, ndiʼi semana xi̱sandúxu̱nna na̱yóʼo ta ki̱ʼva u̱vi̱ yo̱o̱ ke̱ʼéna saá”. Inka ta̱ hermano ta̱ naní Éliézer káchira: “Ku̱a̱ʼání na̱ hermano ndi̱ʼi-xa̱ʼa̱ veʼena, ti̱ko̱to̱na, zapatona xíʼin ndiʼika ña̱ʼa ña̱ xi̱kuumiína. Xa̱ʼa̱ ña̱ tuku ta tuku xi̱taan xi̱yiʼvínína”.

Na̱ ñuu Ndióxi̱ ki̱xáʼana xítona ndáa ki̱ʼva chindeétáʼanna xíʼin na̱yóʼo. Na̱ sucursal ña̱ Haití ta̱xina veʼe válí nu̱ú ku̱su̱n na̱ hermano, lona, colchón, cargador ña̱ ndakuiso celularna xíʼin yáʼaka 53 tonelada ña̱ʼa ña̱ kuxuna. Saátu sa̱ndáʼana ta nda̱saviína yáʼaka 100 veʼe. Yáʼaka iin millón ña̱ dólar xi̱niñúʼuna ña̱ va̱ʼa chi̱ndeétáʼanna xíʼinna.

Táxiní na̱ hermano yóʼo tíxa̱ʼvi ndaʼa̱ na̱ ñuu Ndióxi̱. Ñá Lorette káchiñá: “Xa̱ʼa̱ ña̱ ndeéní ni̱ta̱an ndi̱ʼi-xa̱ʼa̱ ndiʼi veʼendi̱ xíʼin negocio ña̱ xi̱kuumiíndi̱. Ni ña̱ kuxundi̱ kǒo níxi̱yo, soo na̱ ñuu Jehová chi̱ndeétáʼan xíʼinndi̱ ta ta̱xina ndiʼi ña̱ xíniñúʼundi̱”. Ñá Micheline ndákaʼánñá: “Miíi̱ xíʼin u̱vi̱ na̱ va̱lí se̱ʼi̱ xi̱ndoondi̱ iin veʼe loʼo ña̱ xa̱a̱ kúni̱ ndiʼi-xa̱ʼa̱, ta tá ndeéní ni̱ta̱an ndi̱ʼi-xa̱ʼa̱ ndiʼiña. Ña̱ xi̱keʼé kuitíi̱ xi̱kuu oración, ta Jehová xi̱niñúʼura na̱ ñuura ña̱ nda̱kuiinra yuʼíi̱. Na̱ hermano nda̱saviína veʼi̱ ta vitin va̱ʼaní ndu̱uña. Xa̱a̱ ku̱a̱ʼání ña̱ kéʼé Jehová xa̱ʼíi̱, xa̱ʼa̱ ña̱kán ndiʼi ki̱vi̱ kúni̱i̱ na̱ʼi̱ ña̱ táxii̱ tíxa̱ʼvi ndaʼa̱ra”.

Nda̱a̱ na̱ chíñu na̱ íyo ñuu yóʼo ki̱ʼinna kuenta xíʼin ndiʼi ña̱ ke̱ʼé na̱ hermano ñuu kán. Ta̱ chíñu ñuu L’Asil káchira: “Kúni̱i̱ taxii̱ tíxa̱ʼvi ndaʼa̱ndó xa̱ʼa̱ ña̱ kamaní ki̱xindó chi̱ndeétáʼanndó xíʼin na̱ yiví, ta saátu xa̱ʼa̱ ña̱ ndiʼi tiempo íxato̱ʼóndó na̱ chíñu. Kíʼii̱n kuenta ña̱ su̱ví xu̱ʼún kúú ña̱ ndíʼi̱ka-inindó xa̱ʼa̱, chi na̱ yiví kúú na̱ ndixa ndíʼi̱-inindó xa̱ʼa̱. Xítoi̱ ña̱ kéʼéndó ndiʼi ña̱yóʼo xa̱ʼa̱ ña̱ kúʼvi̱-inindó xínindó na̱ yiví”.

Ndeéní ku̱un sa̱vi̱ tá naní Ana chí ñuu Malaui xíʼin Mozambique

Tá 24 tí enero ña̱ ku̱i̱ya̱ 2022, ndeéní ku̱un sa̱vi̱ tá naní Ana chí Mozambique xíʼin Malaui. Xa̱ʼa̱ ña̱ ndeéní ku̱un sa̱vi̱, ndeéní ni̱xi̱ka ta̱chí. Sa̱ndíʼi-xa̱ʼa̱rá cable luz xíʼin puente, ta nda̱kutú ti̱kui̱í iníí ñuu yóʼo.

Yáʼaka 30,000 na̱ testigo Jehová na̱ ñuu Malaui xíʼin Mozambique ni̱xo̱ʼvi̱ xa̱ʼa̱ ña̱ ndeéní ku̱un sa̱vi̱. Iin ta̱ hermano ta̱ naní Charles, ta̱ chi̱ndeétáʼan xíʼin na̱ ni̱ya̱ʼa nu̱ú tu̱ndóʼo yóʼo, káchira: “Ni̱kusuchíní-inii̱ tá xi̱nii̱ ña̱ xóʼvi̱ní na̱ hermano ta ndi̱ʼi-xa̱ʼa̱ ndiʼi ña̱ xi̱kuumiína. Saátu ndi̱ʼi-xa̱ʼa̱ ndiʼi ña̱ xa̱a̱ nda̱taánva̱ʼana kuxuna, ndi̱ʼi-xa̱ʼa̱ ndiʼitu ña̱ chi̱ʼina xa̱ʼa̱ ña̱ ndeéní ku̱un sa̱vi̱. Ku̱a̱ʼánítuna ndi̱ʼi-xa̱ʼa̱ veʼena, ta kúsuchíní-inindi̱ saáchi ni̱xi̱ʼi̱ ñá síʼi iin ta̱ hermano xíʼin u̱vi̱ ná válí se̱ʼera saáchi lancha tú ku̱a̱ʼa̱nná ni̱ki̱ʼvinú ini ti̱kui̱í, kán ni̱ka̱ʼa̱ná ta ni̱xi̱ʼi̱ná”.

Ndeéní ku̱un sa̱vi̱ yóʼo chí Nchalo, Malaui. Tá ka̱a iin xi̱ta̱a̱n, na̱ familia Sengeredo xi̱niso̱ʼona ña̱ ndeéní níʼi, saáchi u̱vi̱ yu̱ta ke̱erá nu̱ú ñúʼurá ta ni̱ki̱ʼvirá ñuu nu̱ú ndóona. Ta̱ hermano Sengeredo ndi̱ku̱n ki̱ʼinra kuenta ña̱ xi̱niñúʼu keena veʼe nu̱ú xi̱ndoona. Ta va̱ʼaní ke̱ʼéra saáchi tá ni̱ya̱ʼa loʼo, ndu̱va veʼena i̱xaa ti̱kui̱í ta sava ña̱ʼa ña̱ xi̱kuumiína ndi̱ʼi-xa̱ʼa̱ña ta savatuña ku̱a̱ʼa̱n xíʼin ti̱kui̱í. Na̱ familia yóʼo nda̱kiʼinna ku̱a̱ʼa̱nna chí nu̱ú níndichi salón ta ki̱ʼva 30 minuto xi̱kindo̱o ña̱yóʼo nu̱ú xi̱ndoona, soo xa̱ʼa̱ ña̱ ndeéní ku̱un sa̱vi̱, u̱vi̱ horaví ni̱xi̱ka xáʼána ta saáví ni̱xa̱a̱na kán. Ni ku̱naanína soo ni̱ka̱kuvana.

Na̱ sucursal ña̱ ñuu Malaui xíʼin Mozambique ndi̱ku̱n xi̱tona ndáaña kivi keʼéna ña̱ va̱ʼa chindeétáʼanna xíʼin na̱ hermano na̱ ni̱ya̱ʼa nu̱ú tu̱ndóʼo yóʼo. Ni̱ka̱ʼa̱nna xíʼin na̱ superintendente ña̱ circuito ta saátu xíʼin na̱ anciano ña̱ ná kotona ndáa na̱ hermano kúú na̱ kamaka xíniñúʼu chindeétáʼanna xíʼin. Ni̱ka̱ʼa̱nna ña̱ ná koo ku̱a̱ʼá na̱ Comité ña̱ Socorro ña̱ va̱ʼa chindeétáʼanna xíʼin na̱ hermano na̱ ni̱ya̱ʼa nu̱ú tu̱ndóʼo. Ndi̱ku̱n kama ta̱xina ña̱ kuxuna ta saátu inkaka ña̱ʼa ña̱ xíniñúʼuna. Yáʼaka 33,000 dólar xi̱niñúʼuna ña̱ va̱ʼa chindeétáʼanna xíʼinna, ta yáʼaka 300,000 dólar xi̱niñúʼuna ña̱ va̱ʼa sandáʼana veʼe ña̱ ndi̱ʼi-xa̱ʼa̱.

Na̱ Comité ña̱ Socorro va̱ʼaní xi̱niñúʼuna xu̱ʼún, saáchi mií tiempo ña̱ ku̱u tu̱ndóʼo kán nda̱aní ya̱ʼvi ña̱ʼa. Nani tá ki̱xáʼa tu̱ndóʼo yóʼo iinsaá nda̱a̱ tá ni̱ya̱ʼa u̱xa̱ yo̱o̱, nda̱aní ya̱ʼvi harina ña̱ nu̱ní, ña̱yóʼo kúú ña̱ xíxiníka na̱ yiví na̱ ndóo chí Malaui, ta saátu nda̱aní ya̱ʼvi gasolina. Mií ñuu yóʼo sa̱tá na̱ hermano ku̱a̱ʼání ña̱ kuxu na̱ ni̱ya̱ʼa nu̱ú tu̱ndóʼo ta ku̱a̱ʼáníña sa̱tána ña̱ va̱ʼa va̱ása yaʼviní chaʼvina xa̱ʼa̱ña chi tá nísatánaña inka ñuu ku̱a̱ʼání xu̱ʼún kiʼinna ndaʼa̱na.

Ndákanda̱ní-ini na̱ hermano xíʼin ña̱ ku̱u yóʼo. Iin ta̱ hermano ta̱ naní Felisberto ta̱ ñuu Mozambique, káchira: “Iinlá na̱ ñuu Ndióxi̱ kúú na̱ va̱ʼaní-ini saáchi ta̱xina ña̱ʼa ña̱ i̱xava̱ʼandi̱ veʼendi̱, carro tú ku̱ʼu̱nndi̱, ni̱xi̱yo na̱ chi̱ndeétáʼan xíʼinndi̱ ña̱ ndu̱va̱ʼa veʼendi̱, ta̱xina ña̱ xi̱xindi̱ ta viíní xi̱kaʼa̱nna xíʼinndi̱ ndáaña keʼéndi̱. Na̱yóʼo ndixaní ni̱na̱ʼa̱na ña̱ kúʼvi̱-inina xínina ndi̱ʼi̱ nda̱a̱ táki̱ʼva ni̱ka̱ʼa̱n ta̱ Jesús nu̱ú Juan 12:34, 35”. Iin ñá hermana ñá ni̱xi̱ʼi̱ yii̱ ñá naní Ester ñá íyo ñuu Malaui ndi̱ʼi-xa̱ʼa̱ ndiʼi veʼeñá. Ñáyóʼo káchiñá: “Ni̱ndi̱ʼiní-inii̱ saáchi kǒo xu̱ʼún kúúmiíi̱ ña̱ keʼíi̱ inka veʼi̱, xa̱ʼa̱ ña̱kán tá ki̱xaa̱ na̱ hermano ta ke̱ʼéna iin veʼi̱ nda̱kanixi̱níi̱ ña̱ xa̱a̱ íyoi̱ nu̱ú ñuyǐví xa̱á”.

Nani kíxaa̱ ñuyǐví xa̱á ya̱ʼakavayó nu̱ú tu̱ndóʼo (Mateo 24:7, 8). Xu̱ʼún ña̱ táxindó kúú ña̱ xíniñúʼu na̱ ñuu Jehová ña̱ chíndeétáʼanna xíʼin na̱ yáʼa nu̱ú tu̱ndóʼo. Kivi ki̱ʼvindó nu̱ú donate.jw.org ña̱ va̱ʼa kotondó ndáa ki̱ʼva kivi taxindó xu̱ʼún yóʼo. Tíxa̱ʼviníndó xa̱ʼa̱ ña̱ va̱ʼaní-inindó.