Chíndeétáʼanndi̱ xíʼin na̱ hermano ni ndíkaa̱ guerra

Tiempo so̱ndíʼi ña̱ ndóoyó vitin, kǒo ndákanda̱-iniyó tá xíniso̱ʼoyó káʼa̱nna xa̱ʼa̱ guerra (Mateo 24:6). Ku̱a̱ʼání na̱ hermano xóʼvi̱ xa̱ʼa̱ ña̱ íyo ku̱a̱chi yóʼo, soo ndiʼi tiempo chíndeétáʼanndi̱ xíʼinna. Va̱ʼaní ku̱niyó tá xi̱niso̱ʼoyó Informe na̱ Cuerpo Gobernante 2022 (informe 3), chi nu̱ú ña̱yóʼo ni̱ka̱ʼa̱nna xíʼinyó ña̱ chí Europa del Este xa̱a̱ xítona ndáa ki̱ʼva chindeétáʼanna xíʼin na̱ hermanoyó na̱ xóʼvi̱ xa̱ʼa̱ ña̱ ndíkaa̱ guerra chí Ucrania. ¿Ndáaña kéʼé na̱ ñuu Jehová ña̱ va̱ʼa chindeétáʼanna xíʼin na̱ hermano ni ndíkaa̱ guerra ñuu yóʼo? ¿Ndáa ki̱ʼva kúni na̱ hermanoyó na̱ íyo ñuu Ucrania xa̱ʼa̱ ña̱ chíndeétáʼanna xíʼinna?

¿Ndáa ña̱ʼa kúú ña̱ xíniñúʼuna? ¿Ndáa ki̱ʼva xa̱a̱ ndákiʼinna ña̱yóʼo?

Tá 24 tí febrero ña̱ ku̱i̱ya̱ 2022, mií ki̱vi̱ tá ki̱xáʼa guerra yóʼo, na̱ Comité de Coordinadores ni̱ka̱ʼa̱nna ña̱ taxina xu̱ʼún ña̱ va̱ʼa chindeétáʼanna xíʼin na̱ hermano yóʼo. Na̱ sucursal ñuu Ucrania ndi̱ku̱n ki̱xáʼana sátána ña̱ʼa ña̱ va̱ʼa chindaʼánaña ndaʼa̱ na̱ hermano, ta 27 saá na̱ Comité ña̱ Socorro kúú na̱ nda̱taʼví ña̱yóʼo.

Ta saátu na̱ hermano na̱ káchíñu sede mundial na̱ testigo Jehová, ki̱xáʼana ndákanixi̱nína ndáa ki̱ʼva chindeétáʼanna xíʼin na̱ sucursal ña̱ ñuu Ucrania. Na̱ Comité de Coordinadores xíʼin na̱ Publicación na̱ chíndeétáʼan xíʼin na̱ Cuerpo Gobernante, ni̱ka̱ʼa̱nna xíʼin na̱ Departamento na̱ sátá ña̱ʼa ña̱ ná chindeétáʼanna xíʼin na̱ hermano na̱ sucursal ñuu Ucrania xíʼin Polonia ña̱ satána ña̱ʼa ña̱ kuniñúʼu na̱ hermano na̱ yáʼa nu̱ú tu̱ndóʼo. Ndiʼi ki̱vi̱, ku̱a̱ʼá na̱ hermano na̱ xi̱kachíñu Departamento nu̱ú xi̱satána ña̱ʼa, nu̱ú xi̱chindaʼána ña̱ʼa xíʼin ña̱ Asuntos Legales na̱ ñúʼu sucursal yóʼo ta saátu iin ta̱ hermano ta̱ ndíkaa̱ xíʼin na̱ Comité ña̱ Sucursal ña̱ ñuu Ucrania xíʼin inkaka na̱ hermano na̱ ñúʼu ti̱xin Departamento nu̱ú sátána ña̱ʼa ña̱ xíniñúʼuna iníísaá ñuyǐví, nda̱kutáʼanna ña̱ va̱ʼa kotona ndáa ki̱ʼva keʼéna chiñu yóʼo.

Ta̱ Jay Swinney, ta̱ ndíkaa̱ Departamento nu̱ú sátána ña̱ʼa káchira: “Siʼna xi̱xiniñúʼu kunda̱a̱-inindi̱ ndáa ña̱ʼa kúú ña̱ xíniñúʼu na̱ hermano. Xi̱kuni̱ndi̱ taxindi̱ ña̱ʼa ña̱ xa̱a̱ xi̱kunda̱a̱-inindi̱ ña̱ xi̱xiniñúʼuna, tá kúú ña̱ kuxuna xíʼin inkaka ña̱ʼa. Soo su̱ví iinlá kuití ña̱ ndukúndi̱ ña̱ xíniñúʼu na̱ hermano kúú ña̱ níxindi̱ʼi̱-inindi̱ xa̱ʼa̱, chi saátu xi̱xiniñúʼu kotondi̱ ndáaña keʼéndi̱ ña̱ va̱ʼa ki̱ʼvindi̱ ñuu Ucrania tasaá ndataxindi̱ña ndaʼa̱na”.

Tá 9 tí marzo ña̱ ku̱i̱ya̱ 2022, xa̱a̱ xi̱kunda̱a̱va-inindi̱ ndáa ña̱ʼa chindaʼándi̱ ndaʼa̱na. Ña̱kán ki̱xáʼandi̱ íxatu̱ʼvandi̱ caja nu̱ú kuñuʼu lata ku̱ñu, ti̱a̱ká, cereal, arroz, nduchí, na̱ma̱ xíʼin papel higiénico. Ta ki̱ʼva 65 dólar kuniñúʼundi̱ ña̱ satándi̱ ña̱ kuniñúʼu na̱ hermano ta ki̱ʼva iin yo̱o̱ kuniñúʼuna ña̱yóʼo. Xa̱a̱ ña̱ ku̱a̱ʼáníka kúú na̱ hermano na̱ kuniñúʼu ña̱ʼa yóʼo, na̱ Comité de Coordinadores ni̱ka̱ʼa̱nna ña̱ kivi kuniñúʼundi̱ ku̱a̱ʼáníka xu̱ʼún ña̱ satándi̱ ña̱ xíniñúʼuna. Soo, ¿ndáa ki̱ʼva ndaxaxána ndiʼi ña̱yóʼo ta kǒo nda̱a̱ ni iin ña̱ʼa kundoʼona?

Tá 13 tí marzo, u̱vi̱ na̱ hermano ñuu Polonia ke̱ʼéna iin prueba: ke̱ena sucursal ña̱ ñuu Polonia xíʼin ña̱ʼa ña̱ sa̱tána ña̱ va̱ʼa ku̱ʼu̱nna ndakanaña iin veʼe ña̱ íyo chí ñuu Ucrania, yatin nu̱ú ndíkaa̱ ñuu Leópolis (Lviv). Tá xi̱kuma̱níka sava ki̱vi̱ ña̱ ku̱ʼu̱nna ndakana ña̱ʼa yóʼo, na̱ hermano na̱ ñúʼu sucursal ñuu Ucrania xíʼin Polonia chi̱ndeétáʼanna xíʼinna ña̱ va̱ʼa ki̱ʼvina ñuu kán. Ta̱vána permiso ña̱ va̱ʼa ki̱ʼvina ñuu Ucrania. Ta ña̱ permiso yóʼo chi̱ndeétáʼanña xíʼinna ña̱ va̱ʼa kunda̱a̱-ini inkana ña̱ ku̱a̱ʼa̱nna chindeétáʼanna xíʼin na̱ yiví ta saátu xi̱kaʼa̱n sa̱tá carro tú ku̱a̱ʼa̱n xíʼinna. Saátu na̱ hermano ña̱ ñuu kán chi̱ndeétáʼanna xíʼinna ña̱ va̱ʼa kunda̱a̱-inina ndáa yichi̱ kúú ña̱ ku̱ʼu̱nna ña̱ va̱ʼa xa̱a̱na veʼe nu̱ú taánva̱ʼana ña̱ʼa chí ñuu Ucrania. Ni̱xa̱a̱na nda̱kana ndiʼi ña̱ʼa yóʼo chí Leópolis ta ti̱xin 24 kuití hora xa̱a̱ sa̱ndíʼina nda̱taʼvína ndiʼi ña̱ʼa yóʼo ndaʼa̱ na̱ Comité ña̱ Socorro, ta kǒo ña̱ níndoʼo na̱ hermano na̱ ni̱xa̱ʼa̱n yóʼo ta va̱ʼa ndi̱kóna chí ñuu Polonia. Va̱ʼa ka̱na ndiʼi ña̱yóʼo xa̱ʼa̱ ña̱ va̱ʼaní nda̱kanixi̱nína ndáaña keʼéna ta saátu xa̱ʼa̱ ña̱ chi̱ndeétáʼan Jehová xíʼinna.

Va̱ʼaníva ka̱na prueba ña̱ nu̱ú ña̱ ke̱ʼéna, soo iin tonelada kuitíva ña̱ʼa nda̱taʼvína. Saáchi xi̱kuma̱ní ndataʼvína inkaka 200 tonelada. ¿Ndáa ki̱ʼva ku̱ʼu̱nna xíʼin ña̱yóʼo ta saátu ndáaña keʼéna ña̱ va̱ʼa kama sandíʼina ndataʼvínaña?

“Níma̱ mií na̱ ñuún kana ña̱ kuni̱na kachíñuna nu̱ún”

Ku̱a̱ʼání na̱ yiví na̱ ndóo iníísaá ñuyǐví ka̱ʼvina artículo ña̱ ka̱na nu̱ú jw.org ña̱ káʼa̱n xa̱ʼa̱ ndáa ki̱ʼva kúú ña̱ xóʼvi̱ na̱ hermanoyó xa̱ʼa̱ ña̱ ndíkaa̱ guerra ñuu Ucrania, ña̱kán xi̱kuni̱na chindeétáʼanna xíʼinna. Nda̱a̱ na̱ yiví na̱ ndóo xíkaní chi̱ndaʼána donación ña̱ ku̱ʼu̱nña obra mundial na̱ testigo Jehová, chi xi̱kunda̱a̱-inina ña̱ va̱ʼaní kuniñúʼu na̱yóʼo xu̱ʼún ña̱ satána ña̱ xíniñúʼu na̱ hermano. Saátu sava na̱ ndóo yatin ñuu Ucrania xi̱niñúʼuna tiempona, ndee̱na xíʼin ña̱ʼa ña̱ kúúmiína ña̱ va̱ʼa chindeétáʼanna xíʼin na̱ hermano. Ná kotoyó sava ejemplo.

Chí ñuu Polonia ku̱a̱ʼání na̱ hermano i̱xatu̱ʼvana ku̱a̱ʼání caja ña̱ ku̱ʼu̱n ndaʼa̱ na̱ xíniñúʼuña, ta saátu ku̱a̱ʼání na̱ va̱lí sa̱nánana dibujo nu̱ú tarjeta válí. Ta̱ Bartosz Kościelniak, ta̱ káchíñu xíʼin na̱ Departamento na̱ sátá ña̱ʼa ta̱ ndíkaa̱ sucursal ña̱ Polonia, káchira: “Salmo 110:3 káʼa̱nña, ña̱ na̱ ñuu Jehová xíʼin ndiʼi níma̱na kuni̱na chindeétáʼanna xíʼin inkana. Xa̱a̱ ku̱a̱ʼání yichi̱ xi̱kaʼvii̱ tu̱ʼun yóʼo, soo tá xi̱nii̱ ndiʼi na̱ ki̱xaa̱ ña̱ chindeétáʼanna xíʼinndi̱, ki̱ʼii̱n kuenta ña̱ ndixaní kúú ña̱ káʼa̱n texto yóʼo”.

Iin ta̱ hermano ta̱ kúúmií iin empresa, kúúmiíra ku̱a̱ʼání carro tú xíkó ña̱ʼa ta ta̱xira sava túyóʼo ña̱ kuniñúʼunanú ta saátu cha̱ʼvira gasolina ña̱ va̱ʼa ku̱ʼu̱nnú xíʼinna. Ta̱yóʼo káchira: “Xíʼin ña̱yóʼo kivi na̱ʼi̱ ña̱ kúʼvi̱ní-inii̱ xínii̱ na̱ hermano ta saátu Jehová. Kúsi̱íní-inii̱ xa̱ʼa̱ ña̱ chi̱ndeétáʼi̱n xíʼinna ña̱ va̱ʼa ndataʼvína ndiʼi ña̱ʼa ña̱ sa̱tána”. Xi̱niñúʼuna 7,000 litro gasolina, ta na̱ hermano ta̱vána tiempona ña̱ va̱ʼa ku̱ʼu̱nna ndakana ña̱ʼa yóʼo, ta ki̱ʼva 48,000 kilómetro ka̱vana tú carro yóʼo.

Xa̱ʼa̱ ña̱ va̱ʼaní ka̱chíñu na̱ hermano na̱ ni̱xa̱ʼa̱n chi̱ndeétáʼan xíʼinndi̱ ta saátu xa̱ʼa̱ ña̱ kúʼvi̱ní-inina xínina na̱ yáʼa nu̱ú tu̱ndóʼo, tá 28 tí marzo (tá ni̱ya̱ʼa 15 kuití ki̱vi̱ ña̱ ke̱ʼéna prueba ña̱ nu̱ú) xa̱a̱ 100 tonelada ña̱ʼa chi̱ndaʼána ku̱a̱ʼa̱n ñuu Ucrania, tá kúú ña̱ kuxuna, ta̱tán ña̱ kuniñúʼuna xíʼin inkaka ña̱ʼa. Ta xa̱ʼa̱ ña̱ ku̱a̱ʼání na̱ hermano xíʼin inkaka na̱ yiví ta̱xina ku̱a̱ʼání ña̱ʼa ndaʼa̱ndi̱, loʼova xu̱ʼún xi̱niñúʼundi̱ ña̱ sa̱tándi̱ ña̱ʼa ña̱ chindaʼándi̱ ndaʼa̱ na̱ hermano. Nda̱a̱ vitin xa̱a̱ chíndaʼándi̱ yáʼaka 190 tonelada ña̱ʼa ndaʼa̱ na̱ hermano na̱ ndóo ñuu Ucrania. ¿Ndáa ki̱ʼva kúni na̱ hermano na̱ ndákiʼin ña̱ʼa yóʼo?

“Ki̱ʼinndi̱ kuenta ña̱ ndixaní kúʼvi̱-inindó xínindó ndi̱ʼi̱”

Tá ni̱xa̱a̱ caja yóʼo chí ñuu Leópolis, na̱ Comité ña̱ Socorro na̱ íyo iníí ñuu Ucrania nda̱taxinaña ndaʼa̱ na̱ xíniñúʼuña. Chi̱ndaʼána ku̱a̱ʼání caja yóʼo ku̱a̱ʼa̱nña ñuu ña̱ kíndo̱o yáʼaka 1,300 kilómetro nu̱ú ndíkaa̱ ñuu Leópolis. Ni viíníva ke̱ʼéna ndiʼi chiñu yóʼo, soo ni saá ku̱a̱ʼáníva tiempo xi̱niñúʼuna ña̱ va̱ʼa xa̱a̱ ña̱yóʼo ñuu kán.a

Ta̱ Markus Reinhardt, ta̱ ndíka̱a̱ xíʼin na̱ Comité ña̱ Sucursal ña̱ ñuu Ucrania káchira: “Xíʼin ndiʼi ña̱ kúú yóʼo ku̱a̱ʼání na̱ hermano kíʼinna kuenta ña̱ kúʼvi̱ní-ini Jehová xínirana ta saátu kíʼinna kuenta ndáaña va̱ʼa ndákiʼinyó tá ndíku̱nyó ña̱ káʼa̱n na̱ ñuu Ndióxi̱ xíʼinyó tá kúma̱níka kuu iin tu̱ndóʼo. Tá kúú, ndiʼi tiempo káʼa̱nna xíʼinyó ña̱ ná taánva̱ʼayó ña̱ kuxuyó xíʼin ti̱kui̱í koʼoyó ku̱a̱ʼá semana. Iin ta̱ anciano ta̱ naní Anton ta̱ ndíkaa̱ iin congregación ña̱ Kiev káchira: ‘Táxiníndi̱ tíxa̱ʼvi ndaʼa̱ na̱ ñuu Ndióxi̱ xa̱ʼa̱ ña̱ káʼa̱nna xíʼinyó ndáaña keʼéyó tá kúma̱níka kuu iin tu̱ndóʼo. Xa̱ʼa̱ ña̱ xa̱a̱ nda̱taánva̱ʼandi̱ ti̱kui̱í koʼondi̱, ña̱ kuxundi̱ xíʼin radio, ña̱yóʼo chi̱ndeétáʼanníña xíʼinndi̱ ña̱ va̱ʼa ka̱kundi̱’. Va̱ʼaní ke̱ʼé na̱ hermano yóʼo ña̱ xi̱ndiku̱nna ña̱ ni̱ka̱ʼa̱n na̱ ñuu Ndióxi̱ xíʼinna, saáchi ña̱yóʼo chi̱ndeétáʼan xíʼin na̱ sucursal ña̱ va̱ʼa kuumiíkana tiempo ña̱ chindaʼána ña̱ʼa ku̱ʼu̱n ndaʼa̱na”.

¿Ndáa ki̱ʼva ku̱ni na̱ hermano tá nda̱kiʼinna ña̱ʼa ña̱ chi̱ndaʼána ndaʼa̱na? Ta̱ Míkola xíʼin ñá Zinaida, na̱ ndóo chí ñuu Járkov káchina: “Nda̱kanda̱ní-inindi̱ tá ki̱ʼinndi̱ kuenta ña̱ ndíʼi̱ní-inina xa̱ʼa̱ndi̱. Tíxa̱ʼviníndó ña̱ chi̱ndaʼándó ña̱ʼa ña̱ kuxundi̱ xíʼin ta̱tán ña̱ kuniñúʼundi̱, xíʼin ña̱yóʼo kíʼinndi̱ kuenta ña̱ mií Jehová kúú ta̱ chíndeétáʼan xíʼinndi̱”. Saátu ñá Valentina íyoñá ñuu yóʼo, ñáyóʼo káchiñá: “Tá ki̱xáʼa íyo guerra, káni̱ní ni̱xi̱yo fila nu̱ú xi̱xaʼa̱nndi̱ xi̱satándi̱ ña̱ʼa ña̱ kuxundi̱. Ta ku̱a̱ʼání yichi̱ kǒo ña̱ xíniñúʼundi̱ níxi̱ndani̱ʼíndi̱, soo xi̱kiʼinva Jehová kuenta ndáa tu̱ndóʼo kúú ña̱ xi̱yaʼandi̱ nu̱ú. Xa̱ʼa̱ ña̱kán xi̱niñúʼura na̱ hermano ña̱ va̱ʼa taxina ña̱ kuxundi̱, ta mií ña̱ xi̱xiniñúʼundi̱ kúú ña̱ ta̱xina ndaʼa̱ndi̱. Tá ndákanixi̱níyó ña̱ kǒo nda̱a̱ ni iinka ña̱ʼa kivi keʼéyó saá kúú ña̱ kíʼinyó kuenta ndáa ki̱ʼva kúú ña̱ viíní ndáa Jehová xíʼin na̱ ñuura miíyó. Va̱ʼaní kúniyó tá táxina ña̱ʼa ña̱ xíniñúʼuyó mií tiempo ña̱ xíniñúʼuyóña”.

Ta̱ Evguen xíʼin ñá Irina ke̱ena ñuu Mariúpol ta nda̱kiʼinna ku̱a̱ʼa̱nna inka ñuu, na̱yóʼo káchina: “Xíʼin ndiʼi níma̱ndi̱ kúni̱ndi̱ ka̱ʼa̱nndi̱ xíʼinndó ña̱ tíxa̱ʼviníndó xa̱ʼa̱ ña̱ va̱ʼaní ndáandó ndi̱ʼi̱. Mií tiempo ña̱ xíniñúʼundi̱ ña̱ʼa yóʼo ta̱xindóña ndaʼa̱ndi̱. ¿Á xíni̱ndó? Tá xa̱ʼa̱, nda̱kanixi̱níndi̱ ña̱ ña̱ʼa ña̱ kuniñúʼu kuitíndi̱ va̱xi ini caja yóʼo, soo tá xu̱nándi̱ña ki̱ʼinndi̱ kuenta ña̱ ndixaní kúʼvi̱-inindó xínindó ndi̱ʼi̱”.

Ndiʼi ña̱yóʼo náʼa̱ña ña̱ espíritu santo Jehová kúú ña̱ chi̱ndeétáʼan xíʼin na̱ hermano ña̱ va̱ʼa ku̱ʼu̱nna ndakana ña̱ʼa ña̱ kuniñúʼu na̱ hermano na̱ ndóo ñuu Ucrania. Ta saátu táxiníndi̱ tíxa̱ʼvi ndaʼa̱ndó xa̱ʼa̱ ndiʼi donación ña̱ chi̱ndaʼándó ku̱a̱ʼa̱n obra mundial, ta ku̱a̱ʼání ña̱yóʼo ta̱xindóña chí nu̱ú donate.jw.org. Tíxa̱ʼviníndó xa̱ʼa̱ ña̱ va̱ʼaní inindó.

Kama chi̱ndeétáʼanndi̱ xíʼin na̱ hermano ta ki̱ʼinníndi̱ kuenta tá ke̱ʼéndi̱ ña̱yóʼo

1. 

   Tá 24 tí febrero ña̱ ku̱i̱ya̱ 2022: Na̱ Comité de Coordinadores ni̱ka̱ʼa̱nna ña̱ taxina xu̱ʼún ña̱ va̱ʼa kuniñúʼu na̱ sucursal ña̱ ñuu Ucrania ña̱yóʼo ña̱ va̱ʼa satána ña̱ʼa ña̱ xíniñúʼu na̱ hermano.

2. 

   Tá 24 tí febrero nda̱a̱ 8 tí marzo ña̱ ku̱i̱ya̱ 2022: Na̱ sucursal ña̱ ñuu Ucrania sátána ña̱ʼa ta kíxáʼana ndátaʼvínaña ndaʼa̱ na̱ Comité ña̱ Socorro. Saátu na̱ sucursal yóʼo xa̱a̱ ni̱xi̱yo tu̱ʼvana ña̱ ndakiʼinna ña̱ʼa ña̱ chi̱ndaʼá na̱ sucursal ña̱ ñuu Polonia ta ndataʼvínaña.

3. 

   Tá 9 tí marzo ña̱ ku̱i̱ya̱ 2022: Na̱ Comité de Coordinadores ni̱ka̱ʼa̱nna ña̱ chindaʼána ña̱ʼa ña̱ ku̱ʼu̱n ndaʼa̱ na̱ hermano ña̱ ñuu Ucrania.

4. 

   Tá 10 nda̱a̱ 12 tí marzo ña̱ ku̱i̱ya̱ 2022: Ndákutáʼanna ña̱ va̱ʼa keʼéna iin prueba ta chindaʼána ña̱ʼa ña̱ kuxu na̱ hermano xíʼin inkaka ña̱ʼa ña̱ xíniñúʼuna. Na̱yóʼo ke̱ena ñuu Polonia ta ni̱xa̱ʼa̱nna nda̱kana ña̱yóʼo nda̱a̱ Leópolis (Ucrania).

5. 

   Tá 13 tí marzo ña̱ ku̱i̱ya̱ 2022: Ki̱vi̱ yóʼo kúú ña̱ ke̱ena ñuu Polonia ña̱ va̱ʼa ku̱ʼu̱nna ndakana ña̱ʼa kuxu na̱ hermano nda̱a̱ ñuu Leópolis.

6. 

   Tá 14 nda̱a̱ 16 tí marzo ña̱ ku̱i̱ya̱ 2022: Chí ñuu Polonia, ku̱a̱ʼání na̱ káchíñu Departamento Local ña̱ Diseño xíʼin Construcción, nda̱kutáʼanna iin salón ña̱ kíndo̱o ñuu Poznań ña̱ va̱ʼa ndataánna ña̱ kuxu na̱ hermano xíʼin inkaka ña̱ʼa ña̱ xíniñúʼuna ini caja.

7. 

   Tá 17 tí marzo ña̱ ku̱i̱ya̱ 2022: Tá xa̱a̱ ni̱ya̱ʼa ku̱mí ki̱vi̱ ña̱ ni̱xa̱ʼa̱nna nda̱kana ña̱ʼa yóʼo yichi̱ nu̱ú, chi̱ndaʼátuna 13 tonelada ña̱yóʼo ku̱a̱ʼa̱nña chí ñuu Ucrania.

8. 

   Tá 21 nda̱a̱ 27 tí marzo ña̱ ku̱i̱ya̱ 2022: Íxatu̱ʼvana ku̱a̱ʼáníka caja chí ñuu Polonia ta chíndaʼánaña ñuu Ucrania, tá kúma̱níka ya̱ʼa 24 hora xa̱a̱ nda̱taxina ña̱yóʼo ndaʼa̱ na̱ hermano na̱ xíniñúʼuña.

9. 

   Tá 28 tí marzo ña̱ ku̱i̱ya̱ 2022: Tá xa̱a̱ ni̱ya̱ʼa 20 ki̱vi̱ ña̱ ni̱ka̱ʼa̱nna ña̱ chindaʼána ña̱ʼa ña̱ xíniñúʼu na̱ hermano na̱ ñuu Ucrania, xa̱a̱ 100 tonelada ña̱ʼa ña̱ kuxu na̱ hermano, ta̱tán ña̱ kuniñúʼuna xíʼin inkaka ña̱ʼa nda̱taʼvína.

Nda̱a̱ vitin xa̱a̱ yáʼaka 190 tonelada ña̱ʼa chi̱ndaʼándi̱ ku̱a̱ʼa̱n ndaʼa̱ na̱ hermano na̱ ndóo ñuu Ucrania.