Punto válí ña̱ chíndeétáʼan xíʼinna

Ña̱ The Watch Tower (La Torre del Vigía) ña̱ ka̱na 1 tí junio ña̱ ku̱i̱ya̱ 1912 ni̱ka̱ʼa̱nña ña̱yóʼo: “Sana ku̱a̱ʼá na̱ káʼvi tutu yóʼo xíni̱na na̱ kǒo kívi koto”. Ta suvi revista yóʼo ni̱ka̱ʼa̱nña ña̱ íyo ku̱a̱ʼá tutu ña̱ kivi kaʼvi na̱ kǒo túvi nu̱ú ta kǒo xu̱ʼún kíʼinna ndaʼa̱na. Ta saátu ni̱ka̱ʼa̱nña: “Tutu yóʼo távánaña xíʼin punto válí ña̱ va̱ʼa kaʼvi na̱ kǒo túvi nu̱ú. Ku̱a̱ʼání na̱ kǒo túvi nu̱ú kúsi̱í-inina xa̱ʼa̱ ña̱ káʼvina ña̱yóʼo chi kúnda̱a̱-inina ña̱ kixaa̱ iin ki̱vi̱ ña̱ ku̱a̱ʼání bendición ndakiʼinna”.

Tá ka̱ʼyina tu̱ʼun yóʼo, na̱ testigo Jehová xa̱a̱ ya̱chi̱kaví ki̱xáʼana tavána tutu ña̱ káʼa̱n xa̱ʼa̱ Biblia ta kúúmiíña punto válí ña̱ va̱ʼa kaʼvi na̱ kǒo túvi nu̱ú. Ta tiempo saá ta̱ʼán tavána tutu ña̱ braille tu̱ʼun inglés ña̱ kunda̱a̱-ini ndiʼina xíʼin. Tiempo vitin távákayó tutu ña̱ káʼvi na̱ koo túvi nu̱ú ta yáʼaka 50 nu̱ú tu̱ʼun kánaña. ¿Ndáa ki̱ʼva távánaña?

Ndáa ki̱ʼva távána tutu braille

Ña̱ siʼna kéʼéna kúú ña̱ káʼyínaña letra, tándi̱ʼi sándaya̱ʼanaña tu̱ʼun braille. Ta̱ Michael Millen ta̱ káchíñu Servicios de Procesamiento de Texto chí Patterson (Nueva York) káchira: “Tá ya̱chi̱ xi̱xiniñúʼundi̱ programa ña̱ xi̱xiniñúʼu ku̱a̱ʼá na̱ yiví ña̱ va̱ʼa kaʼyindi̱ tu̱ʼun braille, soo kǒo níxi̱chindeétáʼanña xíʼinndi̱ ña̱ kaʼyindi̱ña nu̱ú ku̱a̱ʼá tu̱ʼun. Vitin xíniñúʼundi̱ programa Watchtower Translation System ña̱ va̱ʼa kaʼyindi̱ tu̱ʼun braille. Iin miíyó kúúmií programa yóʼo ta túvii̱ ña̱ kǒo inka programa ña̱ kítáʼan xíʼinña”.

Saátu va̱xi ña̱ káʼa̱n xa̱ʼa̱ na̱ʼná nu̱ú tutu ña̱ braille, tá kúú na̱ʼná ña̱ va̱xi sa̱tá libro ña̱ naní Kivi koo si̱íún vitin ta saátu chí nu̱únínu siaʼa káʼa̱nña nu̱ú tutu ña̱ braille: “Iin ta̱a xíkara ku̱a̱ʼa̱nra nu̱ú yichi̱ ña̱ káva̱, íyo ku̱a̱ʼá yita, xi̱kí xíʼin yukú náʼnu”. Ta̱ Jamshed iin siervo ministerial kúúra ta saátu kúúra precursor soo kǒo túvi nu̱úra, ta̱yóʼo káchira: “Ña̱ káʼa̱n xa̱ʼa̱ na̱ʼná yóʼo ndáyáʼviníña nu̱úi̱”.

Tá xa̱a̱ ndíʼi káʼyindi̱ ña̱ braille, saá chíndaʼándiña ku̱a̱ʼa̱nña Betel ta na̱yóʼo íxaa imprimirnaña. Na̱yóʼo xíniñúʼuna tutu ña̱ va̱ása kama táʼnda̱ ni va̱ása ndíʼi-xa̱ʼa̱ña ta ku̱a̱ʼá yichi̱ xíniñúʼunaña, tándi̱ʼi sandákutáʼannaña tasaá ndúuña iin libro. Tá xa̱a̱ íyo tu̱ʼvaña chíndaʼánaña ku̱a̱ʼa̱nña ndaʼa̱ na̱ congregación. Sava correo kǒo xu̱ʼún kíʼinna ndaʼa̱ndi̱ tá chíndaʼándi̱ tutu yóʼo ku̱a̱ʼa̱n ndaʼa̱ na̱ kǒo túvi nu̱ú ña̱ va̱ʼa kaʼvinaña. Tá xa̱a̱ ku̱nu̱mí kaʼvina tutu yóʼo ti̱xin reunión, kama chíndaʼándi̱ña ku̱a̱ʼa̱nña ndaʼa̱ na̱ hermano ña̱ va̱ʼa kaʼvinaña.

Ku̱a̱ʼání xu̱ʼún xíʼin tiempo xíniñúʼundi̱ ña̱ va̱ʼa tavándiña. Máquina tú tává tutu tú íyo chí Wallkill (Nueva York), tiempo ña̱ tává túyóʼo 50,000 Biblia, kúú tiempo ña̱ xíniñúʼunu ña̱ távánú u̱vi̱ Biblia ña̱ braille. Iin kuití Biblia ña̱ braille grado 2 tu̱ʼun inglés kúúmiíñá 25 táʼví.a Ku̱a̱ʼáka xu̱ʼún kána Biblia ña̱ braille nu̱úka ña̱ kána Biblia ña̱ va̱xi letra nu̱ú. Tutu ña̱ va̱xi sa̱tá Biblia ña̱ braille ya̱ʼviña 150 dólar.

¿Ndáa ki̱ʼva kúni na̱ káchíñu xíʼin tutu yóʼo? Ñá Nadia ñá káchíñu Betel ña̱ Sudáfrica, káchiñá: “Íxayo̱ʼvi̱níña xíʼin na̱ hermanoyó na̱ kǒo túvi nu̱ú ta saátu xíʼin na̱ loʼo kuití túvi nu̱ú. Ña̱kán kúsi̱íní-inii̱ ña̱ káchíñui̱ yóʼo ña̱ va̱ʼa chindeétáʼan loʼi̱ xíʼinna. Kúnda̱a̱-inii̱ ña̱ kúʼvi̱ní-ini Jehová xínira na̱yóʼo”.

Sakúaʼa ka̱ʼvi ña̱ braille

Tá iin na̱ kǒo túvi nu̱ú kǒo xínina kaʼvina ña̱ braille, ¿ndáaña kivi keʼéna? Xa̱a̱ íyo loʼo ku̱i̱ya̱ ka̱na folleto ña̱ naní Aprenda a leer braille. Nu̱ú tutu yóʼo va̱xi letra xíʼin ña̱ braille. I̱xava̱ʼanaña ña̱ va̱ʼa chindeétáʼanña xíʼin na̱ kǒo túvi nu̱ú ta saátu xíʼin na̱ túvi nu̱ú. Folleto yóʼo va̱xi ña̱ʼa ña̱ kivi kuniñúʼuna ña̱ va̱ʼa kaʼyina ña̱ braille. Na̱ sa̱kán sákuaʼa ña̱ braille kivi kuniñúʼuna ña̱yóʼo ña̱ va̱ʼa kaʼyinaña. Ña̱yóʼo chindeétáʼan xíʼinna ña̱ va̱ʼa ndakaʼánna punto válí yóʼo ta saátu ña̱ ndakuninaña tá xa̱a̱ káʼvinaña xíʼin ndaʼa̱na.

“Kúsi̱íní-inii̱ ña̱ íyo tutu ña̱ braille”

¿Ndáa ki̱ʼva chíndeétáʼan tutu ña̱ braille xíʼin na̱ hermano na̱ kǒo túvi nu̱ú ta saátu xíʼin na̱ loʼo kuití túvi nu̱ú? Ná kotoyó ña̱ ndo̱ʼo ta̱ Ernst, ta̱ íyo ñuu Haití. Ta̱yóʼo xi̱xaʼa̱nra reunión, soo kǒo tutu ña̱ braille níxikuumiíra. Ña̱ xi̱keʼéra kúú ña̱ xi̱sakúaʼa xíʼin xi̱níra ña̱ ka̱ʼa̱nra ti̱xin reunión, ta̱yóʼo káchira: “Vitin xa̱a̱ kúúmiíi̱ tutu ña̱ braille, ta va̱ʼa táxii̱ comentario ña̱ kúni̱ miíi̱. Kúsi̱íní-inii̱ chi inkáchi íyo ña̱ sákuaʼa ndiʼiyó ti̱xin reunión”.

Ta̱ Jan kúúra iin anciano ti̱xin congregación ta íyora ñuu Austria, ta̱yóʼo kǒo túvi va̱ʼa nu̱úra ta miíra sáya̱ʼa ña̱ La Atalaya ti̱xin reunión xíʼin ña̱ Estudio ña̱ congregación. Ta̱yóʼo káʼa̱nra: “Tutu ña̱ braille kúú ña̱ káxiníka kúnda̱a̱-inii̱ xíʼin. Tá kúú, viíní va̱xi ña̱ página, kamaní ndániʼíi̱ ña̱ nota ta va̱ʼaní ndákanina xa̱ʼa̱ na̱ʼná”.

Ñuu Corea del Sur, íyo iin ñá precursora ñá naní Seon-ok. Ñáyóʼo kǒo túvi nu̱úñá ta ni kǒo xíniso̱ʼoñá, tá ya̱chi̱ xi̱xiniñúʼu tiinna ndaʼa̱ñá ta ka̱ʼa̱nna xíʼinñá ña̱ seña xa̱ʼa̱ ña̱ káʼa̱nna ti̱xin reunión. Vitin va̱ʼa káʼviñá tutu ña̱ braille ña̱ tává na̱ ñuu Ndióxi̱. Ñáyóʼo káchiñá: “Íxayo̱ʼvi̱níña xíʼi̱n ña̱ kaʼvii̱ tutu ña̱ braille ña̱ tává inka na̱ yiví, saáchi kúma̱ní punto nu̱úña, yakúaní va̱xi punto nu̱úña ta yásínní tutu ña̱ xíniñúʼuna. Soo, tutu ña̱ tává na̱ ñuu Ndióxi̱ va̱ʼaní káʼvii̱ña, saáchi va̱ʼaní tutu xíniñúʼuna ta viíní va̱xi punto válí nu̱úña, tá ya̱chi̱ xi̱chindeétáʼanna xíʼi̱n ña̱ kaʼvii̱ tutu ña̱ tává na̱ ñuu Ndióxi̱ ta vitin va̱ʼa káʼvi miíi̱ ña̱yóʼo. Kúsi̱íní-inii̱ chi xa̱a̱ ya̱chi̱ka káʼvii̱ ña̱ sákuaʼayó ti̱xin reunión tasaá táxii̱ comentario ña̱ kúni̱ miíi̱. Káʼvii̱ ndiʼi tutu ña̱ braille ña̱ táxina ndaʼíi̱, kúsi̱íní-inii̱ ña̱ íyo tutu ña̱ braille”.

Ndiʼi tutu ña̱ tává na̱ ñuu Ndióxi̱, nda̱a̱ tutu ña̱ braille, va̱xi tu̱ʼun yóʼo nu̱úña: “Tutu yóʼo va̱ása íxi̱kóndi̱ña. Ku̱a̱ʼa̱nña iníísaá ñuyǐví, ña̱kán kunda̱a̱-ini na̱ yiví xa̱ʼa̱ ña̱ sánáʼa̱ tu̱ʼun Ndióxi̱, ta kúva̱ʼaña xíʼin xu̱ʼún ña̱ táxi na̱ yiví xíʼin ndiʼi níma̱na”. Ndiʼi xu̱ʼún ña̱ táxindó, ta saátu ña̱ táxindó nu̱ú internet tá kúú nu̱ú donate.jw.org, xu̱ʼún yóʼo xíniñúʼundi̱ña ña̱ va̱ʼa tavándi̱ tutu ña̱ káʼa̱n xa̱ʼa̱ Ndióxi̱, ña̱ ku̱a̱ʼa̱n ndaʼa̱ ndiʼina, nda̱a̱ na̱ yiví na̱ kǒo túvi nu̱ú xíʼin na̱ loʼo túvi nu̱ú. Tíxa̱ʼviníndó xa̱ʼa̱ ña̱ va̱ʼa-inindó.