Aplicación JW Library

“Tá ya̱chi̱ sana kǒo níndakanixi̱níyó ña̱ kivi sakúaʼakayó xa̱ʼa̱ Jehová nu̱ú celular á tableta”. ¿Á saá ndákanixi̱ní miíún? Tu̱ʼun yóʼo ni̱ka̱ʼa̱n ta̱ hermano Geoffrey Jackson nu̱ú informe 6 na̱ Cuerpo Gobernante ña̱ ku̱i̱ya̱ 2020. Ta ka̱chikara: “Soo vitin, sana nda̱a̱ ndáka̱tu̱ʼunyó miíyó ndáaña keʼéyó tiempo ña̱ ndíkaa̱ kue̱ʼe̱ vitin tá kǒo JW Library níxi̱kuumiíyó á inkakaña. Xa̱a̱ ku̱a̱ʼá ku̱i̱ya̱ kúú ña̱ sánáʼa̱ Jehová miíyó ña̱ va̱ʼa ya̱ʼayó nu̱ú tu̱ndóʼo táʼan ña̱ íyo vitin”.

¿Ndáa ki̱ʼva sánáʼa̱ Jehová miíyó tiempo vitin? ¿Ndáaña xi̱niñúʼu keʼéna ña̱ va̱ʼa ixava̱ʼana aplicación ña̱ JW Library? ¿Ndáaña xi̱niñúʼu keʼéna ña̱ va̱ʼa viíka koo aplicación yóʼo ki̱vi̱ tá ki̱vi̱?

Aplicación ña̱ siʼna ke̱ʼéna

Yo̱o̱ mayo ña̱ ku̱i̱ya̱ 2013, na̱ Cuerpo Gobernante ni̱ka̱ʼa̱nna xíʼin na̱ hermano na̱ kéʼé programa ña̱ naní MEPS na̱ íyo ti̱xin ña̱ sede mundial ña̱ ná ixava̱ʼana iin aplicación ta nu̱ú ña̱yóʼo ná kixi Biblia. Ta̱ Paul Willies ta̱ káchíñu ti̱xin departamento yóʼo káchira: “Nda̱a̱ ni iin yichi̱ ta̱ʼán ixava̱ʼandi̱ iin aplicación ña̱ kivi sánuu ndiʼi na̱ yiví. Ña̱ va̱ʼa ixava̱ʼandi̱ ña̱yóʼo, xi̱niñúʼu sandákoondi̱ keʼéndi̱ inka chiñu, ndaka̱xinndi̱ ndáa na̱ hermano kúú na̱ kachíñu xíʼin ña̱ aplicación yóʼo tasaá va̱ʼa kachíñuna xíʼin inka departamento ña̱ íyo Betel. Ke̱ʼéníndi̱ oración nu̱ú Jehová ta ki̱ʼinndi̱ kuenta ña̱ chi̱ndeétáʼanníra xíʼinndi̱. U̱ʼu̱n kuití yo̱o̱ ni̱ya̱ʼa ta ka̱na JW Library ti̱xin reunión anual”.

Inka ña̱ i̱xayo̱ʼvi̱ xíʼinndi̱ kúú, nu̱ú JW Library xi̱niñúʼu kixi ku̱a̱ʼáka tutu ña̱ tává na̱ ñuu Ndióxi̱ ta ku̱a̱ʼá tu̱ʼun xi̱niñúʼu kixiña. Tá yo̱o̱ enero ña̱ ku̱i̱ya̱ 2015 xa̱a̱ ku̱a̱ʼání tutu tu̱ʼun inglés ka̱na nu̱ú aplicación yóʼo. Ta tá ni̱ya̱ʼa i̱ñu̱ yo̱o̱, xa̱a̱ ku̱a̱ʼáka nu̱ú tu̱ʼun kivi sanúuna nu̱ú ña̱yóʼo.

Na̱ hermano ndeéní káchíñuna ña̱ va̱ʼa viíka koo aplicación yóʼo ki̱vi̱ tá ki̱vi̱. Tá kúú, xa̱a̱ táanna video ta íyo iin táʼví nu̱ú kivi kaʼvi kúeeyó ña̱ sakúaʼayó ti̱xin reunión. Saátu tá káʼviyó Biblia kivi kuniñúʼuyó referencia ña̱ va̱xi nu̱ú Guía de estudio.

Ku̱a̱ʼání ña̱ xa̱á kána nu̱ú aplicación yóʼo

Yáʼaka 15 millón na̱ yiví xíniñúʼu aplicación JW Library yo̱o̱ tá yo̱o̱. Ta 8 millón na̱ yiví xíniñúʼu ña̱yóʼo ndiʼi ki̱vi̱. ¿Ndáaña kéʼéna ña̱ va̱ʼa viíní kachíñu aplicación yóʼo ni ku̱a̱ʼání na̱ yiví xíniñúʼuña? Ta̱ Paul Willies káchira: “Ndiʼi ki̱vi̱ káchíñundi̱ xíʼin aplicación yóʼo. Ki̱vi̱ tá ki̱vi̱ ku̱a̱ʼání ña̱ xa̱á táanndi̱ nu̱úña tasaá kǒo íxayo̱ʼvi̱ña xíʼinna ña̱ kuniñúʼunaña. Xa̱ʼa̱ ña̱ ndúxa̱á ndiʼi ña̱ kána nu̱ú celular á nu̱ú tableta, xíniñúʼu kachíñuníndi̱ ña̱ va̱ʼa vií kachíñu aplicación yóʼo. Xa̱ʼa̱ ña̱ ku̱a̱ʼání audio, video xíʼin tutu kána nu̱ú JW Library, xíniñúʼu ndasaxa̱ándi̱ ña̱ chíndeétáʼan xíʼin aplicación yóʼo ña̱ va̱ʼa vií kachíñuña”. Tiempo vitin nu̱ú JW Library xa̱a̱ ka̱na ki̱ʼva 200,000 tutu ta yáʼaka 600,000 grabación ña̱ audio xíʼin video íyo ta xa̱a̱ síín síín nu̱ú tu̱ʼun kána ña̱yóʼo.

Ña̱ va̱ʼa vií kachíñu aplicación yóʼo, su̱ví computadora kuití xíniñúʼuna chi saátu xíniñúʼu satána sava permiso. Ña̱ va̱ʼa satána iin kuití permiso xíniñúʼu chaʼvina 1,500 dólar nu̱ú iin ku̱i̱ya̱. Ndiʼi ku̱i̱ya̱ na̱ hermano na̱ káchíñu xíʼin ña̱ naní MEPS, ki̱ʼva 10,000 dólar sándiʼina ña̱ va̱ʼa vií kachíñu aplicación yóʼo nu̱ú xa̱a̱ síín síín tableta, computadora xíʼin teléfono.

Chíndeétáʼanña xíʼinyó ña̱ loʼo xu̱ʼún kuniñúʼuyó

Xa̱ʼa̱ ña̱ ku̱a̱ʼánína xíniñúʼu JW Library, si̱lóʼo xu̱ʼún xíniñúʼundi̱ ña̱ tavándi̱ tutu ta chindaʼándi̱ña. Tá kúú ná ka̱ʼa̱nyó xa̱ʼa̱ tutu ña̱ naní Ndiʼi ki̱vi̱ ná kaʼviyó tu̱ʼun Ndióxi̱ ña̱ ka̱na ku̱i̱ya̱ 2013, 12 millón tutu yóʼo ta̱vána ku̱i̱ya̱ saá. Soo tá ku̱i̱ya̱ 2020, 5 millón kuitíña ta̱vána. Ni ndu̱ku̱a̱ʼáníka na̱ testigo Jehová ku̱i̱ya̱ saá, saáchi 700,000 xi̱kuu na̱ publicador xa̱á. ¿Nda̱chun loʼoka tutu ta̱vána? Saáchi ku̱a̱ʼání na̱ hermano káʼvina texto diario nu̱ú JW Library.a

“Ndáyáʼviní aplicación yóʼo”

Íyo ku̱a̱ʼání ki̱ʼva ña̱ kivi kuniñúʼuyó JW Library. Tá kúú, ñá Geneviève ñá íyo chí ñuu Canadá, káʼa̱nñá ña̱ va̱ʼaní chíndeétáʼan aplicación yóʼo xíʼinñá ña̱ kaʼviñá tu̱ʼun Ndióxi̱ ndiʼi ki̱vi̱. Káchiñá: “Tá ná ka̱ʼa̱nna xíʼin ña̱ tavái̱ ku̱a̱ʼání libro ña̱ va̱ʼa kaʼvii̱ xi̱ta̱a̱n, sana kǒo keʼévíi̱ ña̱yóʼo. Soo xíʼin aplicación yóʼo, iinlá ña̱ kéʼíi̱ kúú ña̱ ndátui̱n tabletai̱ ta nu̱ú túyóʼo va̱xi ndiʼi ña̱ xíniñúʼi̱ ña̱ va̱ʼa sakúaʼi̱. Xa̱ʼa̱ ña̱ káʼvii̱ ndiʼi ki̱vi̱, ña̱yóʼo chíndeéña miíi̱ ña̱ kandíxaníi̱ Jehová ta kuyatinkai̱ nu̱úra”.

Aplicación yóʼo va̱ʼaní chi̱ndeétáʼanña xíʼin na̱ hermano tá xi̱ndikaa̱ ña̱ COVID-19. Tá kúú ñá Charlyn, ñá íyo chí Estados Unidos káchiñá: “Xa̱ʼa̱ ña̱ ndíkaa̱ COVID-19 iníí ñuyǐví, xa̱a̱ yáʼaka iin ku̱i̱ya̱ ta̱ʼán ndakiʼi̱n tutu ña̱ tává na̱ ñuu Ndióxi̱. Soo nu̱ú JW Library ndáni̱ʼíi̱ ndiʼi ña̱ xíniñúʼi̱ ña̱ va̱ʼa sakúaʼi̱ xa̱ʼa̱ Jehová. Táxiníi̱ tíxa̱ʼvi ndaʼa̱ra xa̱ʼa̱ regalo ña̱ liviní yóʼo”.

Ku̱a̱ʼánína ndákanixi̱ní táki̱ʼva ndákanixi̱ní ñá Faye ñá íyo chí ñuu Filipinas. Ñáyóʼo káchiñá: “Kútóoníi̱ aplicación yóʼo chi kúúmiíña tutu ña̱ chíndeétáʼan xíʼi̱n ña̱ va̱ʼa kuyatii̱n nu̱ú Jehová. Xíniñúʼi̱ña tá xa̱a̱ káʼvii̱ xi̱ta̱a̱n, xíniso̱ʼi̱ audio nani kéʼíi̱ chiñu ti̱xin veʼi̱, káʼvi kúei̱ ña̱ sakúaʼi̱ ti̱xin reunión ta saátu xíniñúʼi̱ña ña̱ va̱ʼa kaʼvii̱ Biblia. Tá ndákindei̱ xíniñúʼi̱ña ña̱ va̱ʼa kotoi̱ video ta tá xíniñúʼu kundatui̱, xíniñúʼi̱ña ña̱ va̱ʼa kaʼvii̱ Biblia xíʼin inkaka tutu. Ndáyáʼviní aplicación yóʼo nu̱úi̱”.

Va̱ʼaní chíndeétáʼan aplicación yóʼo xíʼinyó tá ku̱a̱ʼa̱nyó nátúʼunyó xíʼin na̱ yiví. Tá kúú, iin ñá hermana ñá ñuu Camerún, ku̱tóoníñá iin texto ña̱ ka̱ʼvi inka ñá hermana tá na̱túʼunñá xíʼin na̱ yiví. Tá ni̱ya̱ʼa sava semana xi̱kuni̱ñá kuniñúʼuñá texto yóʼo soo kǒo níndakaʼánñá ndáaña xi̱kuuña. Ñáyóʼo káchiñá: “Nda̱kaʼíi̱n xa̱ʼa̱ loʼo tu̱ʼun ña̱ káʼa̱n texto yóʼo. Ña̱kán xu̱nái̱ JW Library ta ni̱xa̱ʼi̱n nu̱ú ndíkaa̱ Biblia ta nu̱ú lupa loʼo ka̱ʼyii̱ tu̱ʼun ña̱ nda̱kaʼíi̱n xa̱ʼa̱. Xa̱ʼa̱ ña̱ kúúmiíi̱ aplicación yóʼo kivi nandukúi̱ iin texto ña̱ nándóso-inii̱ xa̱ʼa̱”.

Donación ña̱ táxindó nu̱ú donate.jw.org chíndeétáʼanña xíʼinndi̱ ña̱ va̱ʼa viíka koo aplicación JW Library tasaá ndiʼi na̱ hermano na̱ íyo iníísaá ñuyǐví kivi kuniñúʼunaña. Tíxa̱ʼviníndó xa̱ʼa̱ ndiʼi donación ña̱ táxindó.

Ndiʼi ña̱ xa̱a̱ kéʼéna xíʼin aplicación JW Library

1. 

   Tá yo̱o̱ octubre ña̱ ku̱i̱ya̱ 2013 ka̱na aplicación JW Library xíʼin Biblia Traducción del Nuevo Mundo tu̱ʼun inglés.

2. 

   Tá yo̱o̱ enero ña̱ ku̱i̱ya̱ 2015 ka̱na ku̱a̱ʼáka tutu ña̱ tu̱ʼun inglés, tándi̱ʼi ka̱naña inkaka tu̱ʼun.

3. 

   Tá yo̱o̱ noviembre ña̱ ku̱i̱ya̱ 2015 xa̱a̱ xi̱kivi kaʼyiyó sa̱tá letra xíʼin color.

4. 

   Tá yo̱o̱ mayo ña̱ ku̱i̱ya̱ 2016 ka̱na táʼví ña̱ naní “Reuniones”.

5. 

   Tá yo̱o̱ mayo ña̱ ku̱i̱ya̱ 2017 xa̱a̱ xi̱kivi kaʼyiyó nota.

6. 

   Tá yo̱o̱ diciembre ña̱ ku̱i̱ya̱ 2017 chi̱kaa̱na Biblia de estudio ña̱ tu̱ʼun inglés.

7. 

   Tá yo̱o̱ marzo ña̱ ku̱i̱ya̱ 2019 xa̱a̱ xi̱kivi sanúuyó audio, kotoyó video nu̱ú internet ta saátu kaʼviyó referencia ña̱ Guía de estudio.

8. 

   Tá yo̱o̱ enero ña̱ ku̱i̱ya̱ 2021 ka̱na tutu ña̱ naní Kivi koo si̱íún vitin ta saátu chí nu̱únínu ña̱ kuniñúʼuyó kaʼviyó xíʼin na̱ yiví.