Yaa ña̱ sákuyatin miíyó nu̱ú Ndióxi̱

Yaa ña̱ xíniso̱ʼoyó iin regalo ña̱ táxi Jehová ndaʼa̱yó kúúña. Kivi chindeétáʼanña xíʼinyó ña̱ vií ndakanixi̱níyó, kivi chikaa̱ña ndee̱ xíʼinyó ta saátu kivi sakúsi̱íña-iniyó. Saá kúú ña̱ ndóʼoyó tá xíniso̱ʼoyó yaa ña̱ tává na̱ ñuu Ndióxi̱, tá kúú ña̱ kána nu̱ú JW Broadcasting^®. Ndiʼi yaa yóʼo sákuyatinña miíyó nu̱ú Jehová.

Nani tá ku̱i̱ya̱ 2014, xa̱a̱ yáʼaka 70 yaa kána ta iin ña̱yóʼo xa̱a̱ 500 nu̱ú tu̱ʼun sa̱ndáya̱ʼanaña. Sana ndáka̱tu̱ʼún miíún: “¿Ndáa ki̱ʼva kéʼéna yaa yóʼo? ¿Ta ndáana kéʼéña?”.

Chiñu ña̱ va̱ása xíto ndiʼina

Na̱ Comité ña̱ Enseñanza na̱ chíndeétáʼan xíʼin na̱ Cuerpo Gobernante kúú na̱ kíʼin kuenta xíʼin na̱ Equipo ña̱ Música, chi na̱yóʼo kúú na̱ tává yaa, tá kúú ña̱ kána nu̱ú JW Broadcasting xíʼin inkakaña. Ndiʼi na̱ hermano na̱ tává yaa yóʼo 13 kúúna, na̱yóʼo kúú na̱ kíʼin kuenta xíʼin ndiʼi chiñu ña̱ kéʼéna, tá kúú kíʼinna kuenta xíʼin na̱ káʼyi yaa ta saátu xíʼin inkaka ña̱ kéʼéna ña̱ va̱ʼa kana yaa yóʼo. Ta na̱ Comité ña̱ Enseñanza ni̱ka̱ʼa̱nna ña̱ kivi kuniñúʼuna na̱ voluntario na̱ ndóo xa̱a̱ síín síín ñuu ña̱ va̱ʼa chindeétáʼanna xíʼinna ña̱ keʼéna chiñu yóʼo. Ta sava na̱yóʼo káʼyina yaa, sákaʼana á xítana. Na̱ hermano yóʼo vitání-inina chi xíniñúʼuna ña̱ xíni̱na ta va̱ása ndátuna ña̱ ná ka̱ʼa̱n va̱ʼa inkana xa̱ʼa̱na.

¿Ndáa ki̱ʼva kéʼéna yaa yóʼo? Na̱ Comité ña̱ Enseñanza kúú na̱ ndáka̱xin ndáa texto ña̱ va̱xi nu̱ú Biblia kúú ña̱ kuniñúʼuna ña̱ va̱ʼa tavána yaa yóʼo ta saátu ndáa ki̱ʼva xíniñúʼu kooña. Na̱ Equipo ña̱ Música kúu na̱ ndáka̱xin ndáana tavá yaa yóʼo ta ndáana kaʼyiña. Na̱yóʼo siʼna kéʼéna iin grabación ña̱ yaa yóʼo ña̱ va̱ʼa koto na̱ Comité ña̱ Enseñanza ndáa ki̱ʼva íyoña, ta na̱yóʼo káʼa̱nna xíʼinna ndáaka ña̱ xíniñúʼu nasamana. Tándi̱ʼi, na̱ Equipo ña̱ Música násamana sava letra tasaá kéʼé tukuna grabación yaa yóʼo. Xa̱a̱ síín síín lugar kéʼéna grabación yóʼo, chi sava yichi̱ kéʼénaña Betel á veʼe na̱ hermano.

Ña̱ va̱ʼa tavá na̱ hermano yaa yóʼo, xíniñúʼuna ku̱a̱ʼá nu̱ú ña̱ʼa ña̱ íyo nu̱ú internet. Ta saátu xíniñúʼuna ku̱a̱ʼá nu̱ú instrumento ña̱ va̱ʼa sakáʼana, xíniñúʼutuna mezcladora de sonido, amplificador xíʼin micrófono. Iin tá iin ña̱ micrófono ya̱ʼviña ki̱ʼva 100 á nda̱a̱ 1,000 dólar á yaʼvikaña. Tá ku̱i̱ya̱ 2020 ki̱ʼva 116,000 dólar sa̱ndíʼina ña̱ sa̱tána ña̱ʼa ña̱ kuniñúʼuna ña̱ va̱ʼa tavána yaa.

¿Ndáaña kéʼéna ña̱ va̱ʼa loʼo xu̱ʼún kuniñúʼuna? Nu̱úka ña̱ kuñuʼu ku̱a̱ʼá na̱ hermano Betel ña̱ kachíñuna xíʼin na̱ Equipo ña̱ Música, káʼa̱nna xíʼin na̱ voluntario ña̱ ná chindeétáʼanna xíʼinna. Ta saátu nu̱úka ña̱ kuniñúʼuna ku̱a̱ʼá na̱ hermano ña̱ va̱ʼa katana, ña̱ kéʼéna kúú ña̱ xíniñúʼuna iin programa ña̱ va̱xi nu̱ú internet ña̱ va̱ʼa ndasaku̱a̱ʼána ta̱chí na̱ hermano tasaá kunaʼa̱ ña̱ ku̱a̱ʼána xíta.

“Va̱ʼaní chíndeétáʼanña xíʼi̱n”

Na̱ hermano kútóonína kuniso̱ʼona yaa ña̱ tává na̱ ñuu Jehová. Tá kúú ñá Tara ñá íyo chí Alemania káchiñá: “Tá ndíʼi̱ní-inii̱, yaa yóʼo chíndeétáʼanña xíʼi̱n ña̱ kǒo kundi̱ʼiní-inii̱. Tá xíniso̱ʼi̱ yaa ña̱ íyo tu̱ʼun miíi̱, túvii̱ ña̱ númi Jehová yi̱ʼi̱”. Ta̱ Dimitri ta̱ íyo chí Kazajistán káchira: “Kútóoníi̱ kuniso̱ʼi̱ yaa yóʼo, saáchi ndiʼi ña̱ káʼa̱nña kitáʼanña xíʼin ña̱ va̱xi nu̱ú Biblia ta saátu chíndeétáʼanña xíʼi̱n ña̱ keʼíi̱ ku̱a̱ʼáka chiñu nu̱ú Jehová”.

Ñá Delia ñá íyo chí Sudáfrica káʼa̱nñá ndáa ki̱ʼva ndóʼoñá xíʼin yaa yóʼo: “Tá yáʼi̱ nu̱ú tu̱ndóʼo á tá kúsuchí-inii̱, yaa yóʼo va̱ʼaní chíndeétáʼanña xíʼi̱n saáchi va̱ʼaní sándi̱koña-inii̱”.

Savana kútóonína yaa yóʼo. Tá kúú ta̱ Lerato ta̱ íyo chí Sudáfrica káʼa̱nra ña̱yóʼo: “Yaa ña̱ naní Ñuyǐví xa̱á ku̱yatinníña xíʼin ña̱ naní Ñuyǐví ña̱ ndátuyó, chíndeétáʼanña xíʼi̱n ña̱ ndakanixi̱níi̱ ña̱ kixaa̱va ki̱vi̱ ña̱ ndataku siʼíi̱. Ndiʼi yichi̱ tá xíniso̱ʼi̱ yaa yóʼo, ndákanixi̱níi̱ ña̱ xínuñá va̱xiñá numiñá yi̱ʼi̱”.

Íyo iin yaa ña̱ va̱ʼaní chi̱ndeétáʼan xíʼin iin ñá loʼo ñá íyo chí Sri Lanka. Ñáyóʼo káchiñá: “Ñá maestrai̱ ku̱a̱ʼání ña̱ va̱ása va̱ʼa ni̱ka̱ʼa̱nñá xíʼi̱n nu̱ú ndiʼi na̱ va̱lí na̱ káʼvi xíʼi̱n xa̱ʼa̱ ña̱ kúi̱ testigo Jehová. Ni̱yi̱ʼvíníi̱ ta ni kǒo níkunda̱a̱ka-inii̱ ndáaña ka̱ʼi̱n xíʼinñá. Tá ndi̱kói̱ veʼi̱, siʼíi̱ ni̱ka̱ʼa̱nñá xíʼi̱n ña̱ ná kuniso̱ʼi̱ yaa ña̱ naní Fuerte tú serás. Yaa yóʼo chi̱ndeétáʼanña xíʼi̱n ña̱ kunda̱a̱-inii̱ ña̱ ndáyáʼviní nandukúi̱ xa̱ʼa̱ iin ña̱ʼa tasaá ka̱ʼi̱n xa̱ʼa̱ña. Tá inka ki̱vi̱, ni̱ka̱ʼi̱n xíʼin ñá maestrai̱ xa̱ʼa̱ ña̱yóʼo. Va̱ʼaní xi̱niso̱ʼoñá yi̱ʼi̱ ta ni̱ka̱ʼa̱nñá xíʼi̱n ña̱ va̱ʼaní ku̱ndaa̱-iniñá ña̱ ni̱ka̱ʼi̱n xíʼinñá xa̱ʼa̱ ña̱ kándíxai̱. Táxiníi̱ tíxa̱ʼvi ndaʼa̱ na̱ ñuu Jehová xa̱ʼa̱ ña̱ távána yaa ña̱ va̱ʼaní chíkaa̱ ndee̱ xíʼinyó”.

¿Míí kíʼinna xu̱ʼún ña̱ va̱ʼa tavána ndiʼi yaa yóʼo? Xíʼin donación ña̱ táxindó va̱ʼa kéʼéna ndiʼi ña̱yóʼo, ta ku̱a̱ʼáníndó táxindó ña̱yóʼo chí nu̱ú donate.jw.org. Tíxa̱ʼviníndó xa̱ʼa̱ ña̱ va̱ʼaní-inindó.