Sa̱yáʼana asamblea regional ti̱xin radio ta saátu nu̱ú tele

Nda̱kanda̱ní-iniyó xíʼin ki̱ʼva ña̱ ni̱xi̱yo asamblea regional tá ku̱i̱ya̱ 2020, saáchi ña̱yóʼo kúú yichi̱ nu̱ú ña̱ i̱xaa grabar na̱ ñuu Jehová asamblea regional ta sa̱ndáanaña nu̱ú internet, ta ña̱yóʼo kúú ña̱ xi̱to na̱ hermano na̱ íyo iníísaá ñuyǐví. Ku̱a̱ʼání na̱ hermano na̱ íyo chí Malaui xíʼin Mozambique va̱ʼa xi̱tona asamblea yóʼo ni kǒo internet kúúmiína. ¿Ndáa ki̱ʼva ke̱ʼéna ña̱yóʼo?

Na̱ Comité de Coordinadores xíʼin ña̱ Enseñanza na̱ chíndeétáʼan xíʼin na̱ Cuerpo Gobernante ni̱ka̱ʼa̱nna ña̱ kivi ya̱ʼa asamblea regional ti̱xin radio ta saátu nu̱ú tele chí ñuu Malaui xíʼin Mozambique. ¿Nda̱chun kúú ña̱ ke̱ʼéna ña̱yóʼo? Saáchi yaʼviní internet chí ñuu Malaui ta loʼoní na̱ testigo Jehová kúúmií ña̱yóʼo. Ta̱ William Chumbi ta̱ káchíñu xíʼin na̱ Comité ña̱ Sucursal ña̱ ñuu Malaui ni̱ka̱ʼa̱nra ña̱yóʼo: “Iinlá ti̱xin radio xíʼin nu̱ú tele kúú nu̱ú kivi ya̱ʼa asamblea yóʼo ña̱ va̱ʼa koto ndiʼi na̱ hermanoña. Inka ta̱ chíndeétáʼan xíʼin na̱ Comité ña̱ Sucursal ña̱ ñuu Malaui ta̱ naní Luka Sibeko káchira: “Tá va̱ása níya̱ʼa asamblea ti̱xin radio á nu̱ú tele, loʼoníva na̱ hermano na̱ kíʼin sucursal yóʼo kuenta xíʼin koto asamblea yóʼo”. Ki̱ʼva saátu ndóʼo na̱ hermano na̱ íyo chí ñuu Mozambique, saáchi sava kuití na̱ hermano na̱ íyo ñuu yóʼo kúúmií celular ña̱ va̱ʼa kotona asamblea, soo kǒo ku̱a̱ʼá xu̱ʼún kúúmiína ña̱ chaʼvina internet.

¿Ndáa ki̱ʼva ke̱ʼéna ña̱yóʼo?

Tá ndíkaa̱ ña̱ kue̱ʼe̱ COVID-19, sava na̱ sáya̱ʼa ña̱ʼa nu̱ú tele xíʼin ti̱xin radio xa̱a̱ xi̱sayáʼavana reunión ña̱ xíkuumiíyó ma̱ʼñú semana nu̱ú ña̱yóʼo.a Na̱ hermano na̱ íyo ñuu kán, ni̱ka̱ʼa̱nna xíʼin na̱ káchíñu xíʼin radio ta saátu xíʼin tele, ña̱ ná taxina kuniñúʼuna ña̱yóʼo ku̱a̱ʼáka hora tasaá kivi sayáʼana asamblea regional ti̱xin radio ta saátu nu̱ú tele.

Ta ki̱ʼva saátu ndóʼo na̱ hermanoyó na̱ íyo chí ñuu Malaui. Na̱ káchíñu xíʼin radio ta saátu xíʼin tele iin kuití hora táxina ña̱ ná sayáʼa na̱ yiví ña̱ kúni̱na ka̱ʼa̱nna xa̱ʼa̱, saáchi va̱ása kúni̱na ña̱ kuxúxán na̱ yiví ña̱ naʼání kuniso̱ʼona á kotona iin ña̱ʼa ku̱a̱ʼání tiempo. Soo na̱ hermano ni̱ka̱ʼa̱nna xíʼinna ña̱ ndiʼi ña̱ tává na̱ ñuu Ndióxi̱ kivi chindeétáʼanña xíʼin na̱ yiví. Tá kúú, ni ndíkaa̱ kue̱ʼe̱ ña̱ COVID-19 chíndeétáʼanvayó xíʼin na̱ yiví ña̱ kunda̱a̱-inina xa̱ʼa̱ ña̱ nda̱a̱ ña̱ káʼa̱n Biblia. Ña̱yóʼo kivi chindeétáʼanña xíʼin ndiʼi na̱ yiví ña̱ nasamana ki̱ʼva ña̱ íyona ta saátu ña̱ si̱í koona xíʼin na̱ veʼena. Tá xi̱niso̱ʼo na̱ káchíñu xíʼin radio ta saátu xíʼin tele ña̱yóʼo, ta̱xina ña̱ ku̱a̱ʼáka hora ná kuniñúʼu na̱ hermano ña̱yóʼo ña̱ va̱ʼa sáya̱ʼana asamblea.

Chí ñuu Malaui, na̱ káchíñu xíʼin tele ta saátu xíʼin radio sa̱yáʼana asamblea regional ta ku̱a̱ʼání na̱ yiví na̱ íyo ñuu kán va̱ʼa xi̱tona á xi̱niso̱ʼona ña̱yóʼo. Ta chí ñuu Mozambique ni̱ya̱ʼa asamblea regional ti̱xin 85 canal ña̱ radio ta saátu nu̱ú iin canal ña̱ tele.

Ña̱ va̱ʼa ya̱ʼa asamblea regional nu̱ú tele, xi̱niñúʼundi̱ 28,227 dólarb ta ña̱ va̱ʼa ya̱ʼaña ti̱xin radio, xi̱niñúʼundi̱ ki̱ʼva 20,000 dólar ta u̱vi̱ ñuu kuití kúú ña̱ sa̱yáʼana ña̱yóʼo. Ña̱ va̱ʼa kuniñúʼundi̱ radio yóʼo, xi̱niñúʼu chaʼvindi̱ 15 á 2,777 dólar, saáchi xa̱a̱ síín síín xi̱chaʼvindi̱ iin tá iin ñuu.

Viíní xi̱niñúʼu na̱ hermano xu̱ʼún ña̱ táxi na̱ hermanoyó na̱ íyo iníísaá ñuyǐví. Tá kúú chí ñuu Malaui, na̱ hermano ni̱ka̱ʼa̱nna xíʼin na̱ káchíñu xíʼin radio ta saátu xíʼin tele ña̱ ná sanúu loʼona ya̱ʼvi ña̱ kíʼinna xa̱ʼa̱ ña̱yóʼo. Ta iin yichi̱, loʼoníva cha̱ʼvi na̱ hermano ña̱ va̱ʼa kuniñúʼunaña. Ña̱kán 1,711 dólar ki̱ndoo ndaʼa̱na. Sava na̱ káchíñu xíʼin radio ta saátu xíʼin tele chí ñuu Mozambique, loʼova ki̱ʼinna ndaʼa̱ na̱ testigo Jehová chi kúnda̱a̱-inina ña̱ viíníva íyo ña̱ kéʼé na̱yóʼo ta cháʼvina.

Táxiní na̱ hermano tíxa̱ʼvi xa̱ʼa̱ ña̱yóʼo

Ni̱kusi̱íní-ini na̱ hermano, saáchi va̱ʼa xi̱tona asamblea nu̱ú tele ta saátu va̱ʼa xi̱niso̱ʼonaña ti̱xin radio. Ta̱ Patrick kúúra anciano ti̱xin congregación chí ñuu Malaui, ta̱yóʼo káchira: “Táxiníndi̱ tíxa̱ʼvi ndaʼa̱ na̱ Cuerpo Gobernante xa̱ʼa̱ ña̱ ke̱ʼéna ña̱yóʼo ni ndíkaa̱ ña̱ COVID-19”. Inka ta̱ hermano ta̱ naní Isaac ta̱ íyo chí Malaui káchira: “Kǒo tele ni celular kúúmiíndi̱. Xa̱ʼa̱ ña̱kán kúsi̱íní-inindi̱ ña̱ xi̱niso̱ʼondi̱ asamblea regional ti̱xin radio. Nda̱a̱ táki̱ʼva íyo iin regalo ña̱ ta̱xi na̱ ñuu Jehová ndaʼa̱ndi̱ saá ni̱xi̱yo ña̱yóʼo. Xa̱ʼa̱ ña̱yóʼo, ndiʼi na̱ veʼi̱ va̱ʼa xi̱niso̱ʼona asamblea. Ki̱ʼinndi̱ kuenta ña̱ ndixaní kúʼvi̱-ini Jehová xínira na̱ ñuura”.

Iin ta̱ publicador ta̱ íyo chí ñuu Mozambique, ña̱ nu̱ú yichi̱ kúú ña̱ xi̱tora asamblea regional ña̱ ku̱i̱ya̱ 2020, ta ni̱ka̱ʼa̱nra: “Tá xi̱toi̱ asamblea nu̱ú tele, nda̱kaʼíi̱n ña̱ mií Jehová kúú Ndióxi̱ ta̱ kúúmií ndiʼi ndee̱. Ña̱ COVID-19 va̱ása nísasivíña nu̱ú Jehová ña̱ taxira ña̱ xíniñúʼundi̱ ña̱ sakúaʼandi̱ xa̱ʼa̱ra ta nda̱a̱ veʼendi̱ va̱ʼa xi̱niso̱ʼondi̱ asamblea yóʼo. Ki̱ʼii̱n kuenta ña̱ kúʼvi̱ní-ini na̱ ndásakáʼnu Jehová xínitáʼanna ta kǒo xíka-inii̱ ña̱ kúúña religión ña̱ nda̱a̱”.

Iin ta̱ anciano ta̱ naní Wyson ni̱ka̱ʼa̱nra: “Táxiníi̱ tíxa̱ʼvi ndaʼa̱ na̱ esclavo fiel xa̱ʼa̱ ña̱ ndíʼi̱ní-inina xa̱ʼa̱ndi̱ ni ndíkaa̱ COVID-19. Loʼoní xu̱ʼún kúúmiíndi̱ ta ndóondi̱ iin ñuu ña̱ ndáʼviníka. Soo xa̱ʼa̱ ña̱ va̱ʼa sa̱yáʼana asamblea ti̱xin radio xíʼin nu̱ú tele, va̱ʼa sa̱kúaʼakandi̱ xa̱ʼa̱ Jehová”.

Na̱ Comité de Coordinadores xíʼin ña̱ Enseñanza, ni̱ka̱ʼa̱nna ña̱ sayáʼa tukuna asamblea regional ña̱ ku̱i̱ya̱ 2021 ti̱xin radio ta saátu nu̱ú tele sava ñuu. ¿Ndáa míí kíʼinna xu̱ʼún ña̱ cháʼvina ña̱ va̱ʼa ya̱ʼa ña̱yóʼo? Xu̱ʼún yóʼo kúú ña̱ táxi na̱ hermano na̱ íyo iníísaá ñuyǐví, tá kúú ña̱ táxina nu̱ú donate.jw.org. Táxiníndi̱ tíxa̱ʼvi ndaʼa̱ndó xa̱ʼa̱ ña̱ va̱ʼaní-inindó.