Chiñu ña̱ kéʼéna xa̱ʼa̱ ña̱ ndíkaa̱ kue̱ʼe̱ ña̱ COVID-19

Tá marzo ña̱ ku̱i̱ya̱ 2020, na̱ Organización Mundial de la Salud ni̱ka̱ʼa̱nna ña̱ xa̱a̱ iin pandemia ndu̱u kue̱ʼe̱ ña̱ COVID-19, ta ku̱a̱ʼánína kǒo níndakanixi̱nína ña̱ ni xa̱a̱ ni̱ya̱ʼa yáʼaka iin ku̱i̱ya̱ ndákundeé kue̱ʼe̱ yóʼo sáxo̱ʼvi̱ña na̱ yiví iníísaá ñuyǐví. Xa̱ʼa̱ ña̱ ndíkaa̱ kue̱ʼe̱ yóʼo, ku̱a̱ʼání na̱ yiví xóʼvi̱na ta saátu na̱ testigo Jehová, tá kúú savana kíʼinna kue̱ʼe̱, ndákava-inina ta kǒo xu̱ʼún ndaʼa̱na. ¿Ndáaña kéʼé miíyó na̱ testigo Jehová ña̱ va̱ʼa chindeétáʼanyó xíʼin na̱ hermano tá kúu tu̱ndóʼo?

Chíndeétáʼanna xíʼin na̱ kúma̱ní ña̱ʼa nu̱ú

Na̱ Comité de Coordinadores na̱ chíndeétáʼan xíʼin na̱ Cuerpo Gobernante ni̱ka̱ʼa̱nna ña̱ ná koo yáʼaka 950 Comité ña̱ Socorro iníísaá ñuyǐví ña̱ va̱ʼa chindeétáʼanna xíʼin na̱ hermano xa̱ʼa̱ ña̱ ndíkaa̱ kue̱ʼe̱ ña̱ COVID-19. Sava ñuu, na̱ Comité ña̱ Socorro chíndeétáʼanna xíʼin na̱ hermano na̱ ndóo ñuu nu̱ú ndóona, ta savatu ñuu na̱ chíñu kúú na̱ chíndeétáʼan xíʼin na̱ hermano. Soo ku̱a̱ʼáníka na̱ hermano chíndeétáʼan na̱ Comité ña̱ Socorro xíʼin.

Tá kúú, ná ka̱ʼa̱nyó xa̱ʼa̱ ña̱ kúu chí Paraguay. Iin periódico káʼa̱nña, ña̱ xa̱ʼa̱ ña̱ kǒoka chiñu kachíñu na̱ yiví xa̱ʼa̱ ña̱ ndíkaa̱ kue̱ʼe̱ ña̱ COVID-19, ku̱a̱ʼání na̱ ndóo ñuu yóʼo kǒo ku̱a̱ʼá ña̱ʼa kuxuna. Soo na̱ Comité ña̱ Socorro na̱ íyo ñuu Paraguay xa̱a̱ ki̱xáʼavana ndátaʼvína ña̱ʼa ña̱ kuxu na̱ hermano ki̱ʼva u̱vi̱ semana. Iin tá iin caja válí yóʼo ya̱ʼviña ki̱ʼva 30 dólar, ta ini ña̱yóʼo ñúʼu ña̱ʼa ña̱ kuxuna xíʼin inkaka ña̱ʼa ña̱ kuniñúʼuna ta ku̱mína kivi kuniñúʼu ña̱ʼa yóʼo.

¿Ndáaña kéʼé na̱ hermano na̱ chíndeétáʼan xíʼin na̱yóʼo ña̱ va̱ʼa kǒo kiʼinna kue̱ʼe̱ ña̱ COVID-19 ta saátu ña̱ va̱ʼa kundaana inkana? Xíniñúʼuna cubreboca ta saátu va̱ása kúyatinnína nu̱ú na̱ hermano. Ta kíʼintuna kuenta ña̱ limpio ná koo lugar nu̱ú káchíñu na̱ íxi̱íko ña̱ʼa ña̱ sátána ta saátu ná kundiku̱nna ña̱ káʼa̱n na̱ chíñu ña̱ va̱ʼa kundaana miína. Saátu kíʼinna kuenta ña̱ ndiʼi na̱ tíin ña̱ʼa yóʼo ná kuniñúʼuna guante xíʼin cubreboca, ná ndaya̱kúnna ini carrona ta ná chindoona ña̱ʼa yóʼo nu̱ú xa̱a̱ nda̱yakúnna. Ta na̱ ndátaʼví ña̱ʼa yóʼo va̱ása xíniñúʼu kuyatinnína nu̱ú na̱ hermano tá xa̱a̱ ndátaxinaña ndaʼa̱na.

Nda̱kaxinna ndáa ki̱ʼva kuniñúʼuna donación

Tá enero ña̱ ku̱i̱ya̱ 2021, na̱ Comité de Coordinadores ni̱ka̱ʼa̱nna ña̱ kivi kuniñúʼuna yáʼaka 25 millón ña̱ dólar ña̱ va̱ʼa chindeétáʼanna xíʼin na̱ hermano xa̱ʼa̱ ña̱ ndíkaa̱ kue̱ʼe̱ ña̱ COVID-19. Na̱ káchíñu Betel xíʼin na̱ hermano na̱ Comité ña̱ Socorro kíʼinnína kuenta ña̱ va̱ʼa vií kuniñúʼuna xu̱ʼún ña̱ táxi na̱ hermano na̱ íyo iníísaá ñuyǐví ta xa̱ʼa̱ ña̱kán ndúkúna ña̱ʼa ña̱ núuka ya̱ʼvi. Tá kúú, na̱ hermano na̱ chíndeétáʼan xíʼin na̱ yáʼa nu̱ú tu̱ndóʼo na̱ íyo chí Chile xi̱kuni̱na satána 750 kilo ña̱ lenteja, soo ti̱xin iin yo̱o̱ kuití nda̱aní ya̱ʼviña. Na̱ hermano yóʼo ni̱ka̱ʼa̱nna ña̱ satávana lenteja yóʼo ni nda̱a ya̱ʼviña. Soo tá ni̱ya̱ʼa u̱vi̱ hora, ta̱ ta̱a ta̱ ni̱xi̱íko lenteja ki̱ʼin na̱ hermano yóʼo ni̱ka̱ʼa̱nra xíʼinna ña̱ iin na̱ yiví sa̱ndándikóna lenteja ña̱ sa̱tána. Xa̱ʼa̱ ña̱kán, ta̱ ta̱a ta̱ ni̱xi̱íko lenteja yóʼo ni̱ka̱ʼa̱nra ña̱ kivi xi̱íkoraña kiʼin na̱ hermano soo va̱ása yaʼvika taxiraña ndaʼa̱na, chi xi̱íkoraña nda̱a̱ táki̱ʼva xi̱xi̱íkoraña tá kúma̱níka ndaa ya̱ʼviña.

Soo tá ku̱a̱ʼa̱n na̱ hermano ndakiʼinna lenteja yóʼo, ta̱ ta̱a ta̱ ni̱xi̱íkoña va̱ása níxiinkara xi̱íkoraña kiʼinna. Ta ni̱ka̱ʼa̱nra xíʼin na̱ hermano ña̱ va̱ása vií ndátaʼvína comida yóʼo, nda̱a̱ táki̱ʼva kéʼé inkaka na̱ yiví. Tasaá, iin ta̱ hermano ndi̱ku̱n ke̱ʼé ya̱ára iin oración ta tándi̱ʼi ni̱ka̱ʼa̱nra xíʼin ta̱ ta̱a ta̱ íxi̱íko lenteja yóʼo ña̱ ni̱nda̱ka̱tu̱ʼunvana iin tá iin na̱ hermano ña̱ va̱ʼa kunda̱a̱-inina ndáana kúú na̱ xíniñúʼuníka ña̱ʼa ña̱ kuxuna. Saátu ni̱ka̱ʼa̱n na̱ hermano xíʼin ta̱ ta̱a kán ña̱ tá táanna despensa ña̱ ku̱ʼu̱n ndaʼa̱ na̱ hermano kíʼinna kuenta xíʼin ki̱ʼva ña̱ íyona, xa̱ʼa̱ ña̱kán táanna ña̱ʼa ña̱ ndixa xíniñúʼu iin tá iin na̱ familia. Tándi̱ʼi, ni̱ka̱ʼa̱nna xíʼin ta̱ ta̱a ta̱ íxi̱íko lenteja ña̱ ndiʼi donación ña̱ táxi na̱ hermano xíʼin ndiʼi níma̱vana táxinaña ta saátu xíʼin ndiʼi níma̱na chíndeétáʼanna xíʼin na̱ yáʼa nu̱ú tu̱ndóʼo. Nda̱kanda̱ní-ini ta̱ ta̱a kán xíʼin ña̱ ni̱ka̱ʼa̱n na̱ hermano xíʼinra. Ña̱kán ni̱xi̱íkovara lenteja ki̱ʼinna ta saátu sa̱níʼi̱ra 400 kilo ña̱ lenteja na̱ hermano yóʼo tá ndi̱kó tukuna sa̱tánaña.

“Ndixaní kúʼvi̱-inina xínitáʼanna”

Chí Liberia íyo iin ñá hermana ñá xa̱a̱ chée ñá ni̱xi̱ʼi̱ yii̱ ta ñáyóʼo naníñá Lusu ta íyoñá xíʼin u̱ʼu̱n na̱ veʼeñá. Iin xi̱ta̱a̱n tá ndóona xíxina ta káʼvina texto diario, iin ta̱ loʼo ta̱ kúú se̱ʼeñáni ñá Lusu ta̱ kúúmií u̱xa̱ ku̱i̱ya̱ ki̱ʼinra kuenta ña̱ xa̱a̱ ndi̱ʼiva ña̱ʼa ña̱ kuxuna. Ta̱yóʼo ni̱nda̱ka̱tu̱ʼunrañá: “¿Ndáa míí kee ña̱ kuxuyó?”. Tasaá ni̱ka̱ʼa̱n xi̱tánra xíʼinra ña̱ xa̱a̱ ni̱ka̱ʼa̱nvañá xíʼin Jehová ña̱ ná chindeétáʼanra xíʼinna ta va̱ása xíka-iniñá ña̱ taxiva Jehová ña̱ xíniñúʼuna. Mií xi̱kuaá saá ni̱ka̱ʼa̱n na̱ anciano xíʼin ñá Lusu ña̱ ná ku̱ʼu̱nñá ndakiʼinñá ña̱ʼa ña̱ kuxuna. Ñá hermana yóʼo káchiñá: “Ta̱ loʼo se̱ʼeñáníi̱ káʼa̱nra ña̱ va̱ása xíka-inira ña̱ ndákuiinva Jehová oración ña̱ kéʼéyó nu̱úra saáchi nda̱kuiinvara ña̱ ni̱ka̱ʼi̱n xíʼinra”.

Iin ñá ñaʼá ñá íyo chí República Democrática del Congo íyoñá yatin nu̱ú ndóo iin na̱ familia na̱ kúú testigo Jehová. Tá xi̱niñá ña̱ táxi na̱ hermano ña̱ʼa ña̱ kuxu na̱ familia yóʼo, ka̱chiñá: “Tá ná ndiʼi ña̱ pandemia, nduuyó testigo Jehová saáchi na̱yóʼo náʼa̱na ña̱ ndíʼi̱-inina xa̱ʼa̱ na̱ hermanona tá yáʼana nu̱ú tu̱ndóʼo”. Yii̱ñá ni̱nda̱ka̱tu̱ʼunrañá: “¿Á xa̱ʼa̱ iinlá kuití bolsa ña̱ arroz kúni̱ún nduún testigo Jehová?”. Ñáyóʼo nda̱kuiinñá: “Va̱ása, su̱ví xa̱ʼa̱ ña̱yóʼoví kúúña. Soo ni iin bolsa ña̱ arroz kúú ña̱ táxina, náʼa̱na ña̱ ndixaní kúʼvi̱-inina xínitáʼanna”.

Xíʼin ndiʼi donación ña̱ táxindó va̱ʼa chíndeétáʼanyó xíʼin na̱ hermano xa̱ʼa̱ ña̱ ndíkaa̱ ña̱ pandemia yóʼo. Tíxa̱ʼviníndó xa̱ʼa̱ ndiʼi donación ña̱ táxindó, ta sava yichi̱ táxindó ña̱yóʼo chí nu̱ú donate.jw.org.