Na̱ misionero sánáʼa̱na na̱ yiví “iníísaá nu̱ú ñuʼú”

Ta̱ Jesús ni̱ka̱ʼa̱nra xíʼin na̱ discípulora: “Natúʼunndó xa̱ʼíi̱ [...] nda̱a̱ iníísaá nu̱ú ñuʼú” (Hechos 1:8). Na̱ testigo Jehová kúsi̱í-inina kéʼéna chiñu yóʼo. Soo kúma̱níva natúʼunyó xíʼin ndiʼi na̱ yiví na̱ íyo iníísaá ñuyǐví yóʼo, tá kúú ñuu náʼnuní nu̱ú íyo ku̱a̱ʼání na̱ yiví. Ta sava ñuu loʼoní na̱ testigo Jehová íyo (Mateo 9:37, 38). ¿Ndáaña kéʼéndi̱ ña̱ va̱ʼa natúʼunndi̱ xíʼin ku̱a̱ʼáka na̱ yiví?

Ña̱ va̱ʼa keʼéndi̱ chiñu ña̱ xa̱ʼnda ta̱ Jesús, na̱ Comité ña̱ Servicio na̱ Cuerpo Gobernante na̱ testigo Jehová chíndaʼána na̱ misionero lugar nu̱ú kǒo ku̱a̱ʼá na̱ testigo íyo ña̱ natúʼunna xíʼin na̱ yiví xa̱ʼa̱ Ndióxi̱. Iníísaá ñuyǐví íyo 3,090 na̱ misionero na̱ nátúʼun xíʼin na̱ yiví xa̱ʼa̱ tu̱ʼun Ndióxi̱.a Ku̱a̱ʼá na̱yóʼo ni̱xa̱ʼa̱nna escuela nu̱ú sánáʼa̱na miína táki̱ʼva Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱. Na̱ misionero sa̱ndákoona veʼena ta ku̱a̱ʼa̱nna koona ñuu ña̱ xíkaní. Xa̱ʼa̱ ña̱ xu̱xa-inina xíʼin tu̱ʼun Ndióxi̱ ta xíni̱ va̱ʼana saáchi ni̱xa̱ʼa̱nna iin escuela nu̱ú sánáʼa̱na miína, va̱ʼaní nátúʼunna xa̱ʼa̱ tu̱ʼun Ndióxi̱ ta va̱ʼaní ejemplo chínúuna nu̱ú na̱ testigo.

Tá chíndeétáʼanyó xíʼin na̱ misionero saá chíndeétáʼanyó xíʼin inkana

Ti̱xin iin tá iin Betel íyo iin táʼví ña̱ naní Sección de Ministros en el Campo ña̱ ndíkaa̱ ti̱xin Departamento ña̱ Servicio ta na̱ hermano na̱ káchíñu yóʼo kúú na̱ kíʼin kuenta xíʼin ndiʼi ña̱ xíniñúʼu na̱ misionero. Chíndeéna miína ña̱ va̱ʼa ndani̱ʼína iin lugar nu̱ú koona, kíʼinna kuenta xíʼinna tá kúúmiína kue̱ʼe̱, ta táxina loʼo xu̱ʼún ndaʼa̱na ña̱ va̱ʼa satána ña̱ xíniñúʼuna. Tá ku̱i̱ya̱ 2020 na̱ testigo Jehová xi̱niñúʼuna ki̱ʼva 27 millón ña̱ dólar ña̱ va̱ʼa chi̱ndeétáʼanna xíʼin na̱ misionero. Ña̱yóʼo chíndeétáʼanña xíʼinna ña̱ ndakundeéna natúʼunna xíʼin na̱ yiví ta saátu ña̱ chindeétáʼanna xíʼin na̱ congregación na̱ ñuu kán.

¿Ndáa ki̱ʼva chíndeétáʼan na̱ misionero xíʼin na̱ yiví ña̱ va̱ʼa xa̱a̱na kunda̱a̱-inina xa̱ʼa̱ Ndióxi̱? Ta̱ Frank Madsen ta̱ ndíkaa̱ ti̱xin Comité ña̱ Sucursal chí Malaui káchira: “Xa̱ʼa̱ ña̱ ndakúní-ini na̱ misionero ta viíní nátúʼunna xíʼin na̱ yiví, chíndeétáʼanna xíʼin na̱ congregación ña̱ va̱ʼa natúʼunna xíʼin na̱ yiví ñuu ña̱ íxayo̱ʼvi̱ña xíʼinna natúʼunna xa̱ʼa̱ Ndióxi̱ ta saátu nu̱ú káʼa̱nna inka tu̱ʼun. Xa̱ʼa̱ ña̱ chíkaa̱na ndee̱ ña̱ ka̱a̱nna cultura ña̱ kúúmií na̱ yiví ta sakúaʼana tu̱ʼun ña̱ káʼa̱nna va̱ʼaní yichi̱ chínúuna nu̱ú inkana, ta saátu chíkaa̱na ndee̱ xíʼin na̱ va̱lí kúa̱an ña̱ kachíñuna ku̱a̱ʼáka tiempo nu̱ú Jehová. Táxiníyó tíxa̱ʼvi ndaʼa̱ Jehová xa̱ʼa̱ ña̱ táxira na̱ misionero na̱ chíndeétáʼan xíʼinyó”.

Inka ta̱ hermano ta̱ ndíkaa̱ ti̱xin Comité ña̱ Sucursal káchira: “Na̱ misionero náʼa̱na ña̱ miíyó na̱ testigo Jehová va̱ʼaní kítáʼanyó ni xa̱a̱ síín síín ñuu íyoyó. Nda̱a̱ na̱ kǒo kúú testigo Jehová kíʼinna kuenta ni xa̱a̱ síín cultura kúúmiíyó va̱ʼaní kítáʼanyó saáchi ña̱ sákuaʼayó nu̱ú Biblia chíndeétáʼan xíʼinyó ña̱ keʼéyó ña̱yóʼo”.

¿Ndáa ki̱ʼva chíndeétáʼan na̱ misionero xíʼin na̱ publicador na̱ íyo ñuu nu̱ú xáa̱na? Ta̱ Paulo ta̱ íyo chí Timor Oriental táxiníra tíxa̱ʼvi ndaʼa̱ na̱ misionero xa̱ʼa̱ ña̱ chíndeétáʼanna xíʼin na̱ congregación nu̱ú ndíkaa̱ra. Ta̱yóʼo káchira: “Ñuu nu̱ú íyondi̱ ndeéní niʼní, sava na̱ misionero ke̱ena ñuu nu̱ú vi̱xinní soo nisaá nátúʼunkana xíʼin na̱ yiví xa̱ʼa̱ tu̱ʼun Ndióxi̱ ni niʼníní ñuu yóʼo. Ndiʼi ki̱vi̱ ndákutáʼanna ña̱ va̱ʼa ku̱ʼu̱nna natúʼunna xíʼin na̱ yiví tá xi̱ta̱a̱n, ta ku̱a̱ʼání yichi̱ xáʼa̱nna kéʼéna revisita tá ndeéní niʼní, ta ndákundeéna nátúʼunna xíʼin na̱ yiví tá xi̱kuaá. Ta xa̱a̱ ku̱a̱ʼání na̱ yiví chíndeétáʼanna xíʼin ña̱ xa̱a̱na kunda̱a̱-inina xa̱ʼa̱ Jehová, ta yi̱ʼi̱ kúú iin na̱kán. Kúsi̱í-inina káchíñuna nu̱ú Jehová ta xa̱ʼa̱ ña̱ kéʼéna ña̱yóʼo chíkaa̱na ndee̱ xíʼin na̱ congregación ña̱ ndakundeéna kachíñuna nu̱ú Jehová xíʼin ña̱ si̱í-ini”.

Ñá Ketti iin ñá precursora regular ña̱ íyo chí Malaui, nátúʼunñá ña̱ iin matrimonio na̱ misionero va̱ʼaní chi̱ndeétáʼanna xíʼin na̱ veʼeñá, ñáyóʼo káchiñá: “Tá ki̱xaa̱na congregación nu̱ú ndíka̱i̱ iinlá yi̱ʼi̱ xi̱kuu testigo Jehová veʼi̱. Na̱yóʼo va̱ʼaní chi̱ndeétáʼanna xíʼi̱n ta va̱ʼaní ki̱xáʼana kítáʼanna xíʼin na̱ veʼi̱. Va̱ʼaní yichi̱ chi̱núuna nu̱ú na̱ va̱lí se̱ʼi̱ saáchi ki̱ʼinna kuenta tá káchíñuyó nu̱ú Jehová sákusi̱íníña-iniyó. Xa̱ʼa̱ ña̱ va̱ʼaní chi̱ndeétáʼanna xíʼin ná válí se̱ʼi̱ u̱ni̱ saa náyóʼo ki̱xáʼaná kúúná precursora regular ta yiíi̱ ki̱xáʼara xáʼa̱nra reunión”.

Ta, ¿ndáa míí kée xu̱ʼún ña̱ xíniñúʼu na̱ misionero ña̱ va̱ʼa ku̱ʼu̱nna natúʼunna xíʼin na̱ yiví inka ñuu? Donación ña̱ táxiyó ku̱a̱ʼa̱n xa̱ʼa̱ ña̱ obra mundial kúú ña̱ xíniñúʼu na̱yóʼo ta ku̱a̱ʼání xu̱ʼún ña̱ táxiyó chíndaʼáyóña nu̱ú donate.jw.org. Táxiníndi̱ tíxa̱ʼvi ndaʼa̱ndó xa̱ʼa̱ ña̱ va̱ʼaní-inindó.