Ndákiʼinndi̱ tu̱ʼun na̱ nda̱ʼví tá xa̱a̱ íxandi̱va̱ʼana xíʼinna xa̱ʼa̱ ña̱ ndásakáʼnuna Ndióxi̱

Ku̱a̱ʼání na̱ yiví íyo Latinoamérica, ta xa̱ʼa̱ ña̱ ku̱a̱ʼání na̱ yiví íyo xa̱a̱ síín síín tu̱ʼun káʼa̱nna, ta íyona ñuu válí. Saátu kúúmiína costumbrena, ta ku̱a̱ʼání na̱ hermano íyo ñuu válí kán. Ña̱ va̱ʼa kunda̱a̱-ini na̱ yiví na̱ káʼa̱n inka tu̱ʼun xa̱ʼa̱ Biblia, miíndi̱ na̱ testigo Jehová yáʼaka 130 nu̱ú tu̱ʼun ña̱ káʼa̱nna Latinoaméricaa sándaya̱ʼandi̱ tutu ña̱ távándi̱ ña̱ va̱ʼa kaʼvi na̱ yivíña. Soo, ku̱a̱ʼání na̱ hermano ni kútóovana koona ñuuna yáʼana nu̱ú ku̱a̱ʼá tu̱ndóʼo xa̱ʼa̱ ña̱ ndásakáʼnuna Jehová chi kǒo xíínna keʼéna vikó á ña̱ʼa ña̱ kúndasí Ndióxi̱ xínira. ¿Ndáa ki̱ʼva xíniñúʼundi̱ donación ña̱ va̱ʼa chindeétáʼanndi̱ xíʼinna?

Chíndeétáʼanndi̱ xíʼinna ña̱ va̱ʼa ndikóna ñuuna

Iin ñuu ña̱ Jalisco (México), nu̱ú íyo na̱ huichol. Na̱ hermano na̱ íyo ñuu kán ni̱ka̱ʼa̱nna xíʼin na̱ yiví ña̱ kǒo kívi keʼéna vikó veʼe-ñu̱ʼu chi kǒo kítáʼanña xíʼin ña̱ káʼa̱n Biblia.b Xa̱ʼa̱ ña̱yóʼo, sava na̱ yiví na̱ ñuu kán ni̱sa̱a̱nína xíʼin na̱ hermano. Ña̱kán 4 tí diciembre ña̱ ku̱i̱ya̱ 2017, iin tiʼvi na̱ yiví ni̱sa̱a̱nína ta ka̱nina sava na̱ testigo Jehová xíʼin inka na̱ yiví na̱ íyo yatin kán. Ta̱vánana ñuu kán ta sa̱ndíʼi-xa̱ʼa̱na veʼena xíʼin ña̱ʼa ña̱ xi̱kuumiína, ta ni̱ka̱ʼa̱nna xíʼinna tá ná ndikóna kaʼnínana.

Na̱ testigo Jehová na̱ íyo yatin nu̱ú ku̱u ña̱yóʼo, chi̱ndeétáʼanna xíʼin na̱ hermano ta ta̱xina ndiʼi ña̱ xi̱niñúʼuna. Iin ta̱ hermano ta̱ naní Agustín ni̱ka̱ʼa̱nra ña̱yóʼo: “Kǒo xu̱ʼúnndi̱ níxi̱yo ña̱ va̱ʼa chaʼvindi̱ iin abogado, ta kǒo níxi̱xini̱ndi̱ ndáa na̱ chíñu ku̱ʼu̱nndi̱ nu̱ú ña̱ va̱ʼa chindeétáʼanna xíʼinndi̱”.

Xa̱ʼa̱ ña̱ ni̱ya̱ʼandosó na̱ yiví derecho ña̱ kúúmií na̱ hermano, ndíku̱n kama chi̱ndeétáʼan sucursal ña̱ Centroamérica xíʼinna. Siʼna ni̱ka̱ʼa̱nna xíʼin na̱ chíñu na̱ íyo ñuu kán ña̱ ná nandukúna ndáa ki̱ʼva ki̱xáʼa xa̱ʼa̱ ku̱a̱chi yóʼo. Tándi̱ʼi, na̱ Comité na̱ Coordinadores na̱ Cuerpo Gobernante na̱ testigo Jehová, ni̱ka̱ʼa̱nna xíʼin na̱ sucursal ña̱ Centroamérica ña̱ inkáchi kitáʼanna kachíñuna xíʼin na̱ Departamento ña̱ Asuntos Legales ña̱ central mundial ña̱ va̱ʼa ndakiʼinna tu̱ʼun na̱ hermano huichol. Tá ni̱ya̱ʼa tiempo, ku̱a̱chi yóʼo ni̱xa̱a̱ña nda̱a̱ nu̱ú na̱ chíñu náʼnu na̱ ñuu México, ña̱ Suprema Corte de Justicia de la Nación.

Xa̱a̱ síín síín país ke̱e iin tiʼvi na̱ abogado na̱ ka̱ʼyi iin tutu ña̱ káʼa̱n káxi ña̱ xíniñúʼu íxato̱ʼó inka na̱ yiví derecho ña̱ kúúmií na̱ yiví na̱ íyo ñuu válí. Ta ndiʼiva na̱ yiví xíniñúʼu íxato̱ʼó-táʼan chi ndiʼivana kúúmií derecho ña̱ ndasakáʼnuna ña̱ kúni̱ miína. Ni kúúña ñuu náʼnu á ñuu válí, ndiʼi na̱ yiví kúúmiína derecho ña̱ ndasakáʼnuna ña̱ kúni̱na.

Tá 8 tí julio ku̱i̱ya̱ 2020, na̱ Suprema Corte de Justicia nda̱kiʼinna tu̱ʼun na̱ testigo Jehová. Ta xa̱ʼndana chiñu nu̱ú na̱ ñuu kán ña̱ ná taxina ndikó tuku na̱ testigo Jehová ñuuna. Ta̱ Agustín, ta̱ xa̱a̱ ni̱ka̱ʼa̱nyó xa̱ʼa̱ ni̱ka̱ʼa̱nra ndáaña ni̱ka̱ʼa̱n ndiʼi na̱ hermano tá ndi̱kóna ñuuna: “Kúsi̱íní-inindi̱ ta táxiníndi̱ tíxa̱ʼvi ndaʼa̱ ndiʼi na̱ hermano na̱ chi̱ndeétáʼan xíʼinndi̱, kǒo xíni̱víndi̱ ndáaña kundoʼondi̱ tá kǒona níchindeétáʼan xíʼinndi̱”.

“Ku̱a̱ʼání ña̱ʼa ke̱ʼéna xa̱ʼa̱ loʼo kuitína”

Chí Ecuador, ki̱ʼva saátu ndo̱ʼo na̱ hermano na̱ íyo San Juan de Ilumán, iin ñuu ña̱ ndíkaa̱ valle ña̱ Otavalo nu̱ú íyo ku̱a̱ʼání ñuu válí ta káʼa̱nna inka tu̱ʼun. Ku̱i̱ya̱ 2014, ña̱ chíñu ta̱xina permiso ndaʼa̱ na̱ hermano ña̱ va̱ʼa ixava̱ʼana iin salón nu̱ú kivi ndakutáʼan na̱ hermano ña̱ ndasakáʼnuna Ndióxi̱, soo iin ta̱ su̱tu̱ chi̱kaa̱yuʼu̱ra ki̱ʼva 100 na̱ yiví ña̱ ná ku̱ʼu̱nna kasina nu̱ú na̱ testigo Jehová chi kǒo níxíkuni̱ra ña̱ ná ixava̱ʼana veʼe nu̱ú ndasakáʼnuna Ndióxi̱. Ta na̱ ñuu kán ni̱ka̱ʼa̱nna xíʼin na̱ testigo Jehová ña̱ ná kǒo ndakutáʼankana ndasakáʼnuna Ndióxi̱.

Na̱ Departamento ña̱ Asuntos Legales ña̱ sucursal ña̱ ñuu Ecuador xíʼin ña̱ central mundial inkáchi ki̱táʼanna ka̱chíñuna ña̱ va̱ʼa ndakiʼinna tu̱ʼun na̱ congregación, saáchi kǒo ní íxato̱ʼóna derecho ña̱ kúúmiína ña̱ ndasakáʼnuna Ndióxi̱. Ku̱a̱chi yóʼo ni̱xa̱a̱ña nda̱a̱ nu̱ú na̱ chíñu náʼnu ta xa̱ʼa̱ ña̱yóʼo na̱ ñuu kán ta̱xina ña̱ ná ndakutáʼan tuku na̱ hermano ta saátu ña̱ sandíʼina ixava̱ʼana salón. Soo ña̱ va̱ʼa ixato̱ʼó na̱ yiví derecho ña̱ kúúmií na̱ hermano, na̱ abogado ni̱ka̱ʼa̱nna xíʼin na̱ chíñu náʼnu ña̱ ná kiʼinna kuenta xíʼin iin ña̱ʼa ña̱ ndáyáʼviní: ¿á xíniñúʼu ixato̱ʼó na̱ íyo ñuu válí ndiʼi derecho ña̱ kúúmií na̱ yiví na̱ íyo iníísaá ñuyǐví?

Tá 16 tí julio ku̱i̱ya̱ 2020, na̱ chíñu náʼnu ñuu Ecuador kúú na̱ ki̱ʼin kuenta xíʼin ku̱a̱chi yóʼo. Na̱ nda̱kiʼin tu̱ʼun na̱ congregación xi̱kuu na̱ hermano na̱ kúú abogado ñuu Ecuador, ta saátu chi̱ndeétáʼan inka ku̱mí na̱ hermano xíʼinna na̱ kúú abogado na̱ xíni̱ ndatiinva̱ʼa ku̱a̱chi iníí ñuyǐví. Xa̱ʼa̱ ña̱ xi̱ndikaa̱ pandemia ña̱ COVID-19, nda̱kutáʼanna nu̱ú ña̱ videoconferencia xíʼin na̱ chíñu ña̱ va̱ʼa natúʼunna xa̱ʼa̱ ku̱a̱chi yóʼo. Ña̱ nu̱ú yichi̱ kúú ña̱ ta̱xi na̱ chíñu ña̱ ndakutáʼan na̱ ndákiʼin tu̱ʼun na̱ testigo Jehová xíʼinna nu̱ú ña̱ videoconferencia.c Na̱ abogado ni̱ka̱ʼa̱nna xíʼinna xa̱ʼa̱ ña̱ káʼa̱n ña̱ chíñu na̱ íyo iníísaá ñuyǐví, ña̱ ndiʼiva na̱ yiví kúúmiína derecho ni íyona ñuu válí á káʼa̱nna inka tu̱ʼun.

Na̱ hermanoyó na̱ íyo ñuu valle ña̱ Otavalo ndátuna ña̱ ka̱ʼa̱n na̱ chíñu, ta táxinína tíxa̱ʼvi xa̱ʼa̱ ña̱ chíndeétáʼanna xíʼinna. Iin ta̱ anciano ta̱ ndíkaa̱ congregación Ilumán Quichua ta̱ naní César káchira: “Iinlá Jehová xíʼin na̱ ñuura kúú na̱ chíndeétáʼan xíʼin na̱ hermano ni loʼo kúúna”.

Ndiʼi na̱ abogado na̱ nda̱kiʼin tu̱ʼun na̱ hermano yóʼo ta chi̱ndeétáʼanna xíʼinna ndáa ki̱ʼva ndakuiinna yuʼú na̱ chíñu, kúúna testigo Jehová ta kǒo xu̱ʼún níkiʼinna nu̱úna. Soo na̱ abogado yóʼo ña̱ va̱ʼa ixatu̱ʼvana miína ña̱ ndakiʼinna tu̱ʼun na̱ hermano nu̱ú na̱ chíñu xi̱niñúʼuna tiempona xíʼin xu̱ʼún. Na̱ abogado xíʼin inkaka na̱ hermano xi̱niñúʼuna yáʼaka 380 hora ña̱ ixatu̱ʼvana miína ña̱ va̱ʼa ndakiʼinna tu̱ʼun na̱ hermano na̱ ni̱ya̱ʼa nu̱ú tu̱ndóʼo ñuu México ta xi̱niñúʼuna 240 hora ña̱ va̱ʼa sandáya̱ʼana tutu nu̱ú inka tu̱ʼun. Ta saátu iníí ñuyǐví ke̱e ki̱ʼva 40 na̱ abogado na̱ chi̱ndeétáʼan xíʼin na̱ hermano na̱ ni̱ya̱ʼa nu̱ú tu̱ndóʼo ñuu Ecuador ta ku̱a̱ʼání tiempona xi̱niñúʼuna. ¿Mií ki̱ʼinndi̱ xu̱ʼún ña̱ xi̱niñúʼundi̱ ña̱ va̱ʼa ndakiʼinyó tu̱ʼun na̱ hermano? Xi̱niñúʼundi̱ xu̱ʼún ña̱ táxindó nu̱ú donate.jw.org. Tíxa̱ʼviníndó xa̱ʼa̱ ña̱ va̱ʼaní-inindó.