¿Ndáaña keʼéyó ña̱ va̱ʼa vií kutáʼanyó xíʼin Jehová ta saátu xíʼin ta̱ Jesús?

1. ¿Nda̱chun va̱ʼa kúnda̱a̱-iniyó ña̱ kúni̱ Jehová ña̱ ná kunda̱a̱-iniyó xa̱ʼa̱ra ta kuʼvi̱-iniyó kuniyóra?

JEHOVÁ i̱xava̱ʼara miíyó ña̱ va̱ʼa xa̱a̱yó vií kutáʼanyó xíʼinra.a Kúni̱ra ña̱ ná kunda̱a̱-iniyó xa̱ʼa̱ra ta kuʼvi̱-iniyó kuniyóra, ta xíni̱ va̱ʼara na̱ kúni̱ koo migora ta kúʼvi̱-inira xínirana. Xíniso̱ʼora oración ña̱ kéʼéna nu̱úra, chíndeétáʼanra xíʼinna ta níʼira yichi̱ nu̱úna (Sal. 139:1-4). Kúsi̱íní-iniyó tá kúnda̱a̱-iniyó ña̱ kúni̱ Ndióxi̱ koora migoyó ta kivi xa̱a̱yó vií kutáʼanyó xíʼinra.

2. ¿Nda̱chun va̱ʼa kúnda̱a̱-iniyó ña̱ kivi kooyó migo Jehová ni kúúyó na̱ yiví ku̱a̱chi?

² Tá ni̱ki̱ʼvi ta̱ Adán xíʼin ñá Eva ku̱a̱chi, va̱ása níkivika kutáʼanna xíʼin Jehová. Xa̱ʼa̱ ña̱kán ndiʼi na̱ se̱ʼena, nda̱a̱ miíyó va̱ása níkivika kutáʼanyó xíʼin Ndióxi̱ (Rom. 5:10). Kivi ndakanixi̱níyó ña̱ va̱ása kívi xa̱a̱yó kooyó migo Ndióxi̱, soo ná ndakaʼányó ña̱ ni̱ka̱ʼa̱n ta̱ Jesús: “Ndióxi̱, [...] ndiʼiva ña̱ʼa va̱ʼa kéʼéra” (Mar. 10:27). Xa̱ʼa̱ ña̱ kúni̱ Jehová koora migoyó, ke̱ʼéra iin ña̱ʼa ña̱ ndáyáʼviní xa̱ʼa̱yó (1 Juan 4:9, 10). Xa̱ʼa̱ ña̱ ke̱ʼé Jehová xa̱ʼa̱yó xíʼin ña̱ ke̱ʼé ta̱ Jesús, kivi xa̱a̱yó kooyó migona (Juan 15:9, 10).

3. ¿Nda̱chun ndáyáʼviní ña̱ kitáʼanyó xíʼin Jehová nu̱úka ña̱ kitáʼanyó xíʼin inka na̱ yiví?

³ Jehová kúú Ndióxi̱ ta̱ íyoní ndee̱, ña̱kán ña̱ kítáʼanyó xíʼinra ndáyáʼviníkaña nu̱úka ña̱ kítáʼanyó xíʼin inka na̱ yiví. Ta̱yóʼo kúú ta̱ i̱xava̱ʼa ndiʼi ña̱ʼa ta káʼnuníkara nu̱ú miíyó, ña̱ kitáʼanyó xíʼinra ndáyáʼviníka ña̱yóʼo (Sal. 15:1). Nu̱ú artículo yóʼo siʼna ka̱ʼa̱nyó nda̱chun va̱ʼa kúnda̱a̱-iniyó ña̱ kúni̱ Jehová koora migoyó. Ta kotoyó nda̱chun iin ta̱yóʼo kúú ta̱ va̱ʼaní kutáʼanyó xíʼin. Ta saátu ka̱ʼa̱nyó ndáaña xíniñúʼu keʼéyó ña̱ viíka kutáʼanyó xíʼin Jehová ta saátu xíʼin ta̱ Jesús.

JEHOVÁ KÚNI̱RA KOOYÓ MIGORA

4. ¿Ndáaña kivi ixayo̱ʼvi̱ xíʼinyó kandíxayó?

⁴ Xa̱ʼa̱ ña̱ kúúyó na̱ yiví ku̱a̱chi ta ku̱a̱ʼá yichi̱ kéʼéyó ña̱ va̱ása va̱ʼa, kivi ixayo̱ʼvi̱ña xíʼinyó kandíxayó ña̱ kúni̱ Jehová koora migoyó. Ta̱yóʼo kúni̱ra kutakuyó ndiʼi tiempo (Rom. 6:23). Soo sana kivi nda̱ka̱tu̱ʼunyó ña̱yóʼo miíyó: “¿Á ndixa kúni̱ Jehová koora migoi̱?”.

5. ¿Nda̱chun kivi kandíxayó ña̱ kúni̱ Jehová koora migoyó? (Koto na̱ʼná).

⁵ Kivi kandíxayó ña̱ kúni̱va Jehová koora migoyó, saáchi ta̱xira se̱ʼera ta̱ mitúʼun ni̱xi̱ʼi̱ xa̱ʼa̱yó (Juan 3:16). Ta ke̱ʼéra iin ña̱ʼa ña̱ va̱ʼa sa̱kákura na̱ yiví tá ni̱ki̱ʼvi ta̱ Adán xíʼin ñá Eva ku̱a̱chi nu̱úra (Gén. 3:15). Ni ndu̱uyó na̱ yiví ku̱a̱chi, ña̱yóʼo va̱ása nísasiña nu̱ú Jehová ña̱ kuʼvi̱-inira kunira miíyó (Jer. 31:3). Ndiʼi ña̱ xa̱a̱ ke̱ʼéra xa̱ʼa̱yó náʼa̱ña ña̱ kúni̱ra ná kooyó migora.

6. ¿Ndáaña kéʼé Jehová ña̱ va̱ʼa kuyatinyó nu̱úra? (Santiago 4:8).

⁶ Jehová káʼa̱nra xíʼinyó ña̱ kúni̱ra kooyó migora, saátu káʼa̱nra xíʼinyó ña̱ ná kuyatinyó nu̱úra ta miíra chindeétáʼan xíʼinyó (kaʼvi Santiago 4:8). Xíni̱ra ña̱ kúúyó na̱ yiví ku̱a̱chi ta viíní kéʼéra xíʼin iin tá iinyó ña̱ va̱ʼa kuyatinyó nu̱úra (Juan 6:44). Káʼa̱nra xíʼinyó ña̱ ná ka̱ʼa̱nyó xíʼinra xa̱ʼa̱ ndiʼi ña̱ ndóʼoyó ta saátu ña̱ sándi̱ʼi-iniyó (Lam. 2:19; Filip. 4:6, 7). Va̱ása xíniso̱ʼo kuitíra oración ña̱ kéʼéyó nu̱úra chi saátu ndákuiinraña (Mat. 7:7, 8). Íyo ku̱a̱ʼá ña̱ náʼa̱ nu̱úyó ña̱ kúni̱ Jehová kooyó migora. ¿Nda̱chun iinlá Jehová kúú ta̱ kivi kutáʼanyó xíʼin?

¿NDA̱CHUN IINLÁ JEHOVÁ KÚÚ TA̱ KIVI KUTÁʼANYÓ XÍʼIN?

7. ¿Ndáaña náʼa̱ Jehová nu̱ú na̱ migora ta ndáa ki̱ʼva chíndeétáʼanña xíʼinyó? (Éxodo 34:6).

⁷ Jehová náʼa̱ra ña̱ ndixa kúʼvi̱-inira xínira miíyó. Kúʼvi̱-inira xínira ndiʼi na̱ yiví soo kúʼvi̱níka-inira xínira na̱ migora (Sal. 4:3). ¿Nda̱chun ndáyáʼviní ña̱yóʼo nu̱úyó? Saáchi Jehová ndiʼi tiempo kuʼvi̱-inira kunira na̱ kúú migora (koto Glosario ña̱ naní “ña̱ ndixaní kúʼvi̱-ini”). Biblia ku̱a̱ʼání yichi̱ káʼa̱nña ña̱ kúʼvi̱ní-ini Jehová xínira na̱ migora ta nda̱kú íyo inira xíʼinna (kaʼvi Éxodo 34:6). Tá xáa̱yó kúúyó migo Jehová, va̱ása sándakoondaʼa̱ra miíyó. Chíndeétáʼanra xíʼinyó ni sava yichi̱ kéʼéyó ña̱ va̱ása va̱ʼa. Xa̱ʼa̱ ña̱ kúʼvi̱-inira xínira miíyó íxakáʼnu-inira xa̱ʼa̱yó ta chíndeétáʼanra xíʼinyó (Sal. 103:11, 12).

8. ¿Ndáa ki̱ʼva ni̱na̱ʼa̱ Jehová ña̱ va̱ása nínandóso-inira xa̱ʼa̱ na̱ migora, tá kúú ta̱ Abrahán xíʼin ta̱ David? (Koto na̱ʼná).

⁸ Jehová va̱ása nándóso-inira xa̱ʼa̱ na̱ migora. Tá xa̱a̱ ni̱ya̱ʼa ku̱a̱ʼání ku̱i̱ya̱ ña̱ ni̱xi̱ʼi̱ ta̱ Abrahán, Jehová ni̱ka̱ʼa̱nra ña̱ kúúkara migora (Is. 41:8). Saátu ke̱ʼéra xíʼin ta̱ David, kǒo nínandóso-inira xa̱ʼa̱ ña̱ ni̱ka̱ʼa̱nra xíʼinra, ña̱ ti̱xin veʼe ta̱yóʼo kixi ta̱ koo rey ndiʼi tiempo (1 Crón. 17:11-17). Kúnda̱a̱-iniyó ña̱ ni̱xi̱nu ña̱yóʼo, saáchi tá ni̱ya̱ʼa ku̱a̱ʼání ku̱i̱ya̱ Jehová ni̱ka̱ʼa̱nra xíʼin ta̱ Jesús ña̱ “ndasarara rey nda̱a̱ táki̱ʼva ni̱xi̱yo yivára ta̱ David” (Luc. 1:32, 33). Ku̱i̱ya̱ 1914 sa̱xínu Jehová ña̱ ni̱ka̱ʼa̱nra, nda̱saara ta̱ Jesús Rey chí ndiví, ta̱ kúú Mesías.

9. ¿Ndáaña sákuaʼayó xíʼin ña̱ ndo̱ʼo ñá Ana? (Koto na̱ʼná).

⁹ Sana kivi kixáʼún ndakanixi̱níún: “Jehová xi̱kuʼvi̱níva-inira xi̱xinira ta̱ Abrahán xíʼin ta̱ David, saáchi xi̱keʼéna chiñu ña̱ ndáyáʼviní nu̱úra”. Ta kivi kixáʼún ndakanixi̱níún ña̱ va̱ása ndíʼi̱-ini Jehová xa̱ʼún, saáchi kǒo ña̱ʼa ña̱ ndáyáʼvi kéʼún nu̱úra. Ndakanixi̱ní ña̱ ke̱ʼé Jehová xa̱ʼa̱ ñá Ana. Ñáyóʼo ni̱xi̱yoñá ñá síʼi ta̱ Elcaná ta ta̱yóʼo ni̱xi̱yo inka ñá síʼira ñá xi̱naní Peniná. Ñá Ana va̱ása níkivi koo se̱ʼeñá, soo ñá Peniná ni̱xi̱yova se̱ʼeñá xa̱ʼa̱ ña̱kán xi̱kusi̱kindaañá ñá Ana (1 Sam. 1:4-7). Sana nda̱kanixi̱ní ñá Ana ña̱ na̱ndósova-ini Jehová xa̱ʼa̱ñá, soo ni̱ka̱ʼa̱nñá xíʼin Jehová xa̱ʼa̱ ndiʼi ña̱ xi̱ndoʼoñá (1 Sam. 1:11, 15). Jehová ni̱na̱ʼa̱ra ña̱ kúúra migoñá chi xi̱niso̱ʼora ña̱ ni̱ka̱ʼa̱nñá xíʼinra ta nda̱kuiinra oración ña̱ ke̱ʼéñá ta ta̱xira ña̱ koo se̱ʼeñá.b Ta̱ Samuel xi̱kuu se̱ʼeñá ta̱ nu̱ú, tasaá ni̱xi̱yoka u̱ni̱ ta̱a xíʼin inka u̱vi̱ ná ñaʼá se̱ʼeñá (1 Sam. 1:20; 2:21). Xíʼin ña̱yóʼo kúnda̱a̱-iniyó ña̱ ndixa kúʼvi̱-ini Jehová xínira na̱ migora, nda̱a̱ na̱ ndákanixi̱ní ña̱ va̱ása ndáyáʼvina (Jer. 31:3).

10. ¿Nda̱chun va̱ʼaníka consejo ña̱ táxi Jehová nu̱úka ña̱ táxi na̱ yiví? (Salmo 119:98-100).

¹⁰ Va̱ʼaní consejo táxi Jehová. Va̱ása níʼi kuitíra yichi̱ nu̱úyó chi saátu táxira ña̱ ndíchi ndaʼa̱yó. Iin ta̱yóʼo kúú ta̱ va̱ʼaníka táxi consejo (kaʼvi Salmo 119:98-100).c Kúnda̱a̱-inira xíʼin ndiʼi ña̱ ndóʼoyó ta kúni̱ra ña̱ viíní ná kundooyó (Is. 48:17, 18). Sava ñuu íyo na̱ yiví na̱ cháʼvi ku̱a̱ʼání xu̱ʼún ndaʼa̱ inkana ña̱ va̱ʼa taxina consejo ndaʼa̱na ña̱ va̱ʼa ndukúikána. Soo miíyó va̱ʼaníkava ña̱ kúúmiíyó, chi kivi ka̱ʼa̱nyó xíʼin Ndióxi̱ ta̱ kúúmií ndiʼi ndee̱ ña̱ ná taxira consejo ndaʼa̱yó ta kǒo cháʼviyó xa̱ʼa̱ ña̱yóʼo. Jehová ndiʼi tiempo íyo tu̱ʼvara ña̱ xíniso̱ʼora ña̱ káʼa̱nyó xíʼinra (Sal. 121:1-4). Ku̱a̱ʼání ña̱ va̱ʼa ndákiʼinyó tá xíniso̱ʼoyó consejo ña̱ táxira (Sal. 1:2, 3).

11. ¿Ndáa ki̱ʼva náʼa̱ Jehová ña̱ kúúra iin migo ta̱ va̱ʼaní-ini?

¹¹ Va̱ʼaní-ini Jehová. Ndiʼi tiempo náʼa̱ra ña̱yóʼo nu̱úyó. Táxira ña̱ tákuyó xíʼin ndiʼi ña̱ xíniñúʼuyó ña̱ va̱ʼa kusi̱í-iniyó (Sal. 145:16; Hech. 14:17). Táxira ña̱ ndíchi ndaʼa̱yó ña̱ va̱ʼa ya̱ʼayó nu̱ú tu̱ndóʼo (Sant. 1:5). Ta íxakáʼnu-inira xa̱ʼa̱yó tá kíʼviyó ku̱a̱chi. Ni kúúyó na̱ yiví ku̱a̱chi, viíva kéʼéra xíʼinyó tasaá náʼa̱ra ña̱ kúni̱ra xínira miíyó. Ta ña̱ ta̱xira se̱ʼera ni̱xi̱ʼi̱ra xa̱ʼa̱yó kivi kutakuyó ndiʼi tiempo, xíʼin ña̱yóʼo náʼa̱ra ña̱ va̱ʼaní-inira. Vitin ná kotoyó ndáa ki̱ʼva xa̱a̱yó viíka kutáʼanyó xíʼin Jehová.

¿NDÁA KI̱ʼVA VIÍKA KUTÁʼANYÓ XÍʼIN JEHOVÁ?

12. Nda̱a̱ táki̱ʼva káʼa̱n Hebreos 11:6, ¿ndáaña xíniñúʼu keʼéyó ña̱ va̱ʼa viíka kutáʼanyó xíʼin Jehová?

¹² Jehová kúni̱ra ña̱ ná chikaa̱yó ndee̱ ña̱ va̱ʼa viíka xa̱a̱yó kitáʼanyó xíʼinra (kaʼvi Hebreos 11:6). Xíniñúʼu kandíxayó ña̱ kúni̱ra taxira ña̱ va̱ʼa ndaʼa̱yó ta íyo u̱ni̱ ña̱ xíniñúʼu keʼéyó.

13. ¿Ndáa ki̱ʼva na̱ʼa̱yó ña̱ íxato̱ʼóyó Jehová?

¹³ Ná kǒo keʼéyó ña̱ kǒo kútóo Jehová. Salmo 25:14 káchiña: “Na̱ íxato̱ʼó Jehová kúú na̱ va̱ʼaní kítáʼan xíʼinra”. ¿Ndáaña kúni̱ kachi ña̱yóʼo? Ña̱ kuʼvi̱-iniyó kuniyóra ta kǒo keʼéyó ña̱ va̱ása va̱ʼa nu̱úra. Tá ndáka̱xinyó keʼéyó iin ña̱ʼa, ná kotoyó ndáaña káʼa̱n Biblia xa̱ʼa̱ ña̱yóʼo (Prov. 3:5, 6). Tá ndíku̱nyó ña̱ káʼa̱nra, vií koo ña̱ ndaka̱xinyó keʼéyó ta vií kanaña. Ña̱yóʼo kúú ña̱ káʼa̱n Proverbios 9:10, “ña̱ siʼna xíniñúʼu keʼún ña̱ va̱ʼa kuumiíún ña̱ ndíchi kúú ña̱ ixato̱ʼún Jehová”.

14. ¿Ndáaña keʼéyó ña̱ va̱ʼa na̱ʼa̱yó ña̱ nda̱kú íyo iniyó xíʼin Jehová?

¹⁴ Nda̱kú ná koo iniyó xíʼin Jehová. Ta̱yóʼo nda̱kú íyo inira xíʼin na̱ migora tasaá kúni̱ra ná keʼé miíyó xíʼinra (2 Sam. 22:26; Prov. 3:32). ¿Ndáa ki̱ʼva náʼa̱yó ña̱ nda̱kú íyo iniyó xíʼinra? Siʼnaka chiñura ndíʼi̱-iniyó xa̱ʼa̱, káʼa̱nyó xíʼin inkana xa̱ʼa̱ra ta saátu xa̱ʼa̱ ña̱ va̱ʼa ña̱ kúúmiíra nda̱a̱ táki̱ʼva ke̱ʼé ta̱ Jesús (Mat. 28:19, 20). Saátu nda̱kú íyo iniyó xíʼinra ni sási na̱ sáa̱-ini xíni miíyó nu̱úyó, va̱ása taxiyó nda̱a̱ ni iin ña̱ʼa kasi nu̱úyó ña̱ nda̱kú koo iniyó xíʼinra.

15. ¿Ndáa ki̱ʼva náʼa̱yó ña̱ nda̱kú íyo iniyó xíʼin inkana?

¹⁵ Ná na̱ʼa̱yó ña̱ nda̱kú íyo iniyó xíʼin inka. Jehová kúni̱ra ña̱ ná kundiku̱nyó yichi̱ra, xa̱ʼa̱ ña̱kán náʼa̱yó ña̱ nda̱kú íyo iniyó xíʼin na̱ migoyó chi saátu migo Jehová kúú na̱yóʼo. ¿Ndáa ki̱ʼva náʼa̱yó ña̱yóʼo? Kǒo nándóso-iniyó xa̱ʼa̱ ña̱ va̱ʼa ña̱ kéʼéna xa̱ʼa̱yó ta ndúkúyó ki̱ʼva ña̱ va̱ʼa koo iniyó xíʼinna. Ña̱ nda̱kú koo iniyó ndáyáʼviní ña̱yóʼo nu̱ú Jehová ta káʼa̱nra xíʼinyó ña̱ ná kuumiíyó ña̱yóʼo (Miq. 6:8, nota). Nu̱ú inka artículo kotoyó ndáa ki̱ʼva na̱ʼa̱yó ña̱ kúni̱yó xíniyó inka. Soo siʼna ná kotoyó ndáaña kivi keʼéyó ña̱ va̱ʼa vií kutáʼanyó xíʼin ta̱ Jesús.

¿NDÁA KI̱ʼVA VIÍ KUTÁʼANYÓ XÍʼIN TA̱ JESÚS?

16, 17. a) ¿Nda̱chun va̱ʼa kúnda̱a̱-iniyó ña̱ kúni̱ ta̱ Jesús koora migoyó? b) ¿Nda̱chun síín íyo ña̱ kítáʼanyó xíʼin ta̱ Jesús xíʼin ña̱ kítáʼanyó xíʼin Jehová?

¹⁶ ¿Nda̱chun va̱ʼa kúnda̱a̱-iniyó ña̱ kúni̱ ta̱ Jesús koora migoyó? Saáchi ni̱xi̱ʼi̱ra xa̱ʼa̱yó ni tá kúma̱níka kakuyó. Ta̱ yóʼo ni̱ka̱ʼa̱nra: “Na̱ ndátaxi mií ña̱ kuvina xa̱ʼa̱ na̱ migona na̱yóʼo kúú na̱ ndixa náʼa̱ ña̱ kúʼvi̱-inina xíninana” (Juan 15:13). Va̱ʼaní ña̱ ke̱ʼéra xa̱ʼa̱yó.

¹⁷ Ta̱ Jesús káʼa̱nra xíʼin iin tá iin miíyó ña̱ ná kooyó migora (Mat. 11:28-30; Juan 15:15). Ña̱ vií kítáʼanyó xíʼin ta̱ Jesús síínva íyoña nu̱ú ña̱ kítáʼanyó xíʼin Jehová. Tá kúú, va̱ása kéʼéyó oración nu̱ú ta̱ Jesús ni va̱ása káñúʼúyóra (Mat. 4:10; 6:9). Ta ña̱ ke̱ʼéra xa̱ʼa̱yó ndáyáʼviní ña̱yóʼo nu̱úyó ta kúni̱yó xa̱a̱yó viíní kitáʼanyó xíʼinra.

18. ¿Ndáaña kéʼé ta̱ Jesús xa̱ʼa̱yó?

¹⁸ Xa̱ʼa̱ ña̱ kúú ta̱ Jesús migoyó, ku̱a̱ʼání ki̱ʼva chíndeétáʼanra xíʼinyó. Ta̱ profeta Isaías ni̱ka̱ʼa̱nra ña̱yóʼo xa̱ʼa̱ ta̱ Jesús, ña̱ kúúra “Ta̱ va̱ʼaní táxi consejo”, “Yiváyó ta̱ íyo ndiʼi tiempo” xíʼin “Ta̱ chíñu ta̱ táxi ku̱a̱ʼání ña̱ va̱ʼa” (Is. 9:6). Va̱ʼaní táxira consejo ndaʼa̱yó ña̱ kivi chindeétáʼan xíʼinyó ña̱ va̱ʼa ka̱kuyó. Kúúra yiváyó ta̱ íyo ndiʼi tiempo, saáchi nda̱kiʼinra chiñu ña̱ ta̱xi Jehová ndaʼa̱ra ña̱ taxira kutaku na̱ yiví ndiʼi tiempo nu̱ú ñuʼú yóʼo (Juan 11:25, 26). Ta saátu kúúra ta̱ chíñu ta̱ táxi ku̱a̱ʼání ña̱ va̱ʼa chi chíndeétáʼanra xíʼinyó ña̱ va̱ʼaní kutáʼanyó xíʼin Jehová. Saáchi ni̱ya̱ʼara nu̱ú tu̱ndóʼo táʼan ña̱ yáʼa miíyó nu̱ú, xa̱ʼa̱ ña̱kán kúndáʼvi-inira xínira miíyó (Heb. 4:15). Iin migo va̱ʼaní kúúra.

19. ¿Ndáaña xíniñúʼu keʼéyó ña̱ va̱ʼa kooyó migo ta̱ Jesús? (Juan 15:14; koto na̱ʼná).

¹⁹ ¿Ndáaña xíniñúʼu keʼéyó ña̱ va̱ʼa kooyó migo ta̱ Jesús? (1 Ped. 1:8). Kaʼviyó ña̱ Evangelio ña̱ va̱ʼa kunda̱a̱-iniyó ndáaña ke̱ʼéra xíʼin ña̱ ni̱ka̱ʼa̱nra. Tá ndáka̱xinyó keʼéyó iin ña̱ʼa, ná keʼéyó nda̱a̱ táki̱ʼva ke̱ʼéra ta ná kuniso̱ʼoyó consejo ña̱ ta̱xira. Íxato̱ʼóyó chiñu ña̱ kúúmiíra ta xíniso̱ʼoyó ña̱ káʼa̱nra xíʼinyó (kaʼvi Juan 15:14). Ña̱yóʼo kúni̱ kachiña ña̱ chindeétáʼanyó xíʼin congregación, kuniso̱ʼoyó na̱ nda̱kaxinra kundaa miíyó ta keʼéyó ndiʼi chiñu ña̱ táxina ndaʼa̱yó, chi miíra kúni̱ ña̱ keʼéyó ña̱yóʼo (Efes. 4:8; Heb. 13:17). Ña̱ chíkaa̱yó ndee̱ ña̱ vií kutáʼanyó xíʼin ta̱ Jesús, ndáyáʼviní ña̱yóʼo nu̱úra.

20. ¿Ndáaña ndákanixi̱níún xa̱ʼa̱ ña̱ kúún migo Jehová xíʼin ta̱ Jesús?

²⁰ Ña̱ kúúyó migo Ndióxi̱ ta̱ kúúmií ndiʼi ndee̱ xíʼin se̱ʼera ta̱ Jesucristo, iin ña̱ ndáyáʼviní kúú ña̱yóʼo. Iinlá Jehová kúú migoyó ta̱ va̱ʼaní, xa̱ʼa̱ ña̱kán kúni̱ra xínira miíyó, xíniso̱ʼora ña̱ káʼa̱nyó xíʼinra ta ndákuiinra oración ña̱ kéʼéyó nu̱úra. Miíra xíʼin se̱ʼera táxina ña̱ xíniñúʼuyó ña̱ va̱ʼa kooyó migona (Mat. 5:3). Ndiʼi tiempo kúni̱yó kitáʼanyó xíʼinna ta ndáyáʼviní ña̱yóʼo nu̱úyó.