Ná kǒo keʼéyó táʼan ña̱ kéʼé na̱ ñuyǐví

1. ¿Ndáaña chíkaa̱ ta̱ Ndi̱va̱ʼa ini na̱ ñuyǐví keʼéna? (1 Juan 2:15, 16).

NU̱Ú ñuyǐví ña̱ ndóoyó yóʼo ta̱ Ndi̱va̱ʼa kúú ta̱ xáʼndachíñu nu̱úña (Juan 14:30; 1 Juan 5:19). Ta̱yóʼo sáa̱níra xíʼin na̱ cristiano ta kánitáʼanra xíʼinna (Apoc. 12:12, 13, 17). Ña̱yóʼo kǒo kúni̱ kachiña ña̱ íyora iníísaá nu̱ú ñuyǐví. Biblia kǒo káʼa̱nña xa̱ʼa̱ na̱ ángel ni kúúna na̱ va̱ʼa á na̱ va̱ása va̱ʼa ña̱ íyona iníísaá nu̱ú ñuyǐví. Ta̱ Ndi̱va̱ʼa kúúmiíra ku̱a̱ʼání na̱ ta̱chí ndi̱va̱ʼa na̱ xíniso̱ʼo ña̱ káʼa̱nra (Apoc. 12:9). Soo íyo iin ña̱ kéʼé ta̱ Ndi̱va̱ʼa ta iníísaá ñuyǐví íyo ña̱yóʼo chi chíkaa̱ra-ini na̱ yiví ña̱ ndakanixi̱nína nda̱a̱ táki̱ʼva ndákanixi̱ní miíra (kaʼvi 1 Juan 2:15, 16). Sava na̱ yiví ndákanixi̱nína ña̱ kǒo ta̱ Ndi̱va̱ʼa íyo soo xa̱ʼa̱ ña̱ ndákanixi̱nína nda̱a̱ táki̱ʼva ndákanixi̱ní na̱ ñuyǐví yóʼo, náʼa̱na ña̱ kéʼéna ña̱ kútóora. Biblia káʼa̱nña “ti̱in tákurana ña̱ keʼéna ña̱ kúni̱ra” (2 Tim. 2:26).

2, 3. a) ¿Nda̱chun síín íyo na̱ ndásakáʼnu Jehová nu̱ú na̱ kǒo kúni̱ xíni miíra? b) ¿Ndáaña xíniñúʼu kiʼinyó kuenta xíʼin?

² Tá ya̱chi̱ ku̱a̱ʼání miíyó xi̱keʼéyó táʼan ña̱ kéʼé na̱ ñuyǐví yóʼo. Soo tá ki̱xáʼayó káʼviyó Biblia, ku̱ndaa̱-iniyó ndáana chíkaa̱-ini na̱ yiví ña̱ keʼéna saá. Xa̱ʼa̱ ña̱kán, ¿ndáaña ke̱ʼéyó? Ki̱xáʼayó kéʼéyó ña̱ káʼa̱n Biblia ta va̱ása níkeʼékayó ña̱ kéʼé na̱ ñuyǐví yóʼo (Tito 2:11, 12). Ku̱a̱ʼání ndee̱ kúúmií ta̱ Ndi̱va̱ʼa ta chíkaa̱ra-ini na̱ yiví ña̱ ndakanixi̱nína nda̱a̱ táki̱ʼva ndákanixi̱ní miíra. Soo miíyó kúni̱yó sakúsi̱íyó-ini Jehová ta miíra chindeétáʼanvara xíʼinyó (Sant. 4:7, 8). Jehová kúsi̱íní-inira xa̱ʼa̱ ña̱ chíkaa̱yó ndee̱ ña̱ kǒo keʼéyó táʼan ña̱ kéʼé na̱ ñuyǐví yóʼo.

³ Íyo iin ña̱ xíniñúʼu kiʼinyó kuenta xíʼin saáchi loʼo tá loʼo kivi kixáʼayó ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo ta keʼéyó táʼan ña̱ kéʼéna. Ña̱yóʼo kúú ña̱ ndo̱ʼo sava na̱ xi̱ndasakáʼnu Jehová. Ni ku̱a̱ʼání ña̱ʼa na̱samana, xa̱ʼa̱ ña̱ ki̱xáʼana kéʼéna táʼan ña̱ kéʼé na̱ ñuyǐví yóʼo, ku̱xíkána nu̱ú Ndióxi̱ (Efes. 6:11; Filip. 3:18). Nu̱ú artículo yóʼo kunda̱a̱-iniyó xa̱ʼa̱ ña̱ kǒo xíniñúʼu keʼéyó ña̱ va̱ʼa kǒo kundoʼoyó táʼan ña̱ ndo̱ʼo na̱yóʼo. Soo siʼna kunda̱a̱-iniyó ndáaña kúú “espíritu ña̱ íyo ñuyǐví yóʼo” (1 Cor. 2:12).

¿NDÁAÑA KÚÚ “ESPÍRITU ÑA̱ ÍYO ÑUYǏVÍ YÓʼO”?

4. ¿Ndáaña kúú “espíritu ña̱ íyo ñuyǐví yóʼo” ta xa̱ʼa̱ ña̱kán ndáaña kéʼé na̱ yiví?

⁴ Tá káʼa̱n Biblia xa̱ʼa̱ “espíritu ña̱ íyo ñuyǐví yóʼo”, káʼa̱nña xa̱ʼa̱ ki̱ʼva ña̱ ndákanixi̱ní na̱ yiví na̱ kǒo kúú migo Ndióxi̱ xíʼin ña̱ kéʼéna. Na̱ yiví na̱ kéʼé ña̱yóʼo ni̱nuní kúnina. Na̱yóʼo kǒo kúni̱na kundiku̱nna ña̱ káʼa̱n Ndióxi̱ ta kéʼéna ña̱ʼa ña̱ kǒo kútóora. Nu̱úka ña̱ keʼéna ña̱ kúni̱ ta̱ i̱xava̱ʼa miína, kéʼéna ña̱ kúni̱ na̱ ñuyǐví (1 Ped. 4:3).

5. ¿Ndáa ki̱ʼva kítáʼan espíritu ña̱ íyo ñuyǐví yóʼo xíʼin ta̱chí? (Efesios 2:1, 2; koto na̱ʼná).

⁵ Ta̱ Ndi̱va̱ʼa sándaʼvira na̱ yiví ta iin ki̱ʼva ña̱ kéʼéra ña̱yóʼo kúú ña̱ chíkaa̱ra-inina ña̱ ndakanixi̱nína nda̱a̱ táki̱ʼva ndákanixi̱ní miíra (Apoc. 12:9). Ta̱ apóstol Pablo chi̱táʼanra espíritu ña̱ íyo ñuyǐví yóʼo xíʼin ta̱chí (kaʼvi Efesios 2:1, 2). Nda̱a̱ táki̱ʼva kéʼé ta̱chí yóʼo saá kéʼé espíritu ña̱ íyo ñuyǐví yóʼo saáchi iníí íyoña. Ña̱yóʼo íyoña nda̱a̱ táki̱ʼva íyo ta̱chí ña̱ yaku̱a̱ chi ku̱a̱ʼá ña̱ kivi kundoʼoyó xíʼin ña̱yóʼo. Ná kotoyó sava ña̱ kivi kundoʼoyó xíʼin espíritu ña̱ íyo ñuyǐví yóʼo ta ndáaña kivi keʼéyó ña̱ va̱ʼa kundaayó miíyó nu̱ú ña̱yóʼo.

NÁ KǑO KA̱ʼA̱NYÓ NDA̱A̱ TÁKI̱ʼVA KÁʼA̱N NA̱ ÑUYǏVÍ YÓʼO

6. ¿Ndáa ki̱ʼva ndíku̱n na̱ yiví espíritu ña̱ íyo ñuyǐví yóʼo xíʼin ki̱ʼva ña̱ káʼa̱nna?

⁶ Biblia xa̱a̱ ni̱ka̱ʼa̱nña ndáa ki̱ʼva koo na̱ yiví tiempo nu̱ú ndíʼi vitin, ku̱a̱ʼánína “kuta̱a-inina, ni iinna kǒo kundayáʼvi nu̱úna” ta “va̱ása kindo̱o-inina xíʼin ni iin ña̱ʼa” (2 Tim. 3:1-3). Ta náʼa̱na ña̱yóʼo xíʼin ki̱ʼva ña̱ káʼa̱nna. Tá kúú, ku̱a̱ʼá yichi̱ xítoyó nu̱ú noticia ña̱ kíxáʼa káʼa̱n kúáchi na̱ yiví ta nda̱a̱ kíxáʼana kánitáʼanna. Ku̱a̱ʼání na̱ yiví káʼa̱nna tu̱ʼun ña̱ va̱ása va̱ʼa xíʼin na̱ veʼena. Ta ku̱a̱ʼání na̱ va̱lí xíʼin na̱ chée káʼa̱nna tu̱ʼun kini (Efes. 5:3, 4). Ta xíʼin ña̱ kéʼé na̱yóʼo náʼa̱na ña̱ ndíku̱nna espíritu ña̱ íyo ñuyǐví yóʼo.

7. ¿Ndáa pregunta kivi ndakanixi̱níyó xa̱ʼa̱?

⁷ Miíyó na̱ ndásakáʼnu Ndióxi̱ ndáyáʼviní ña̱ vií ka̱ʼa̱nyó xíʼin inkana, tá kúú tá chíndaʼáyó mensaje nu̱úna (Sant. 1:26, 27). Ña̱ va̱ʼa kunda̱a̱-iniyó á vií íyo ña̱ káʼa̱nyó xíʼin inkana ná ndakanixi̱níyó xa̱ʼa̱ ña̱yóʼo: “Tá kíxáʼíi̱ sái̱ xíʼin na̱ yiví na̱ kǒo kúú testigo Jehová, ¿á káʼi̱n tu̱ʼun ña̱ va̱ása va̱ʼa xíʼinna? Tá ndákutáʼi̱n xíʼin na̱ hermano, ¿á káʼi̱n tu̱ʼun ña̱ kivi sandákava-inina? ¿Á káʼi̱n tu̱ʼun ña̱ va̱ása va̱ʼa xíʼin na̱ veʼi̱? ¿Ndáaña ka̱ʼa̱n na̱kán xa̱ʼíi̱?”.

8. ¿Ndáaña kivi keʼéyó ña̱ va̱ʼa kǒo ka̱ʼa̱nyó táki̱ʼva káʼa̱n na̱ ñuyǐví? (Colosenses 3:8-10).

⁸ Tá kíʼinyó kuenta ña̱ ki̱xáʼayó káʼa̱nyó táki̱ʼva káʼa̱n na̱ ñuyǐví yóʼo, ¿ndáaña kivi keʼéyó? Su̱ví nda̱saa tu̱ʼun ña̱ káʼa̱nyó xíniñúʼu nasamayó. Ta̱ Jesús ni̱ka̱ʼa̱nra ña̱yóʼo: “Ndiʼi ña̱ kée yuʼú iin na̱ yiví chí níma̱na va̱xiña, ta ña̱kán kúú ña̱ íxayaku̱a̱ miína” (Mat. 15:18). Ña̱ káʼa̱nyó ndánaʼa̱ña ndáa na̱ yiví kúúyó xíʼin ña̱ ndákanixi̱níyó. Biblia chítáʼanña tu̱ʼun ña̱ “sáxo̱ʼvi̱-ini inkana” xíʼin ña̱ sáa̱yó ta saátu ña̱ kǒo nándóso-iniyó xa̱ʼa̱ ña̱ ke̱ʼéna xíʼinyó (Efes. 4:31). Tá túviyó ña̱ íxayo̱ʼvi̱ña xíʼinyó sandákooyó keʼéyó ña̱yóʼo, ná ka̱ʼa̱nyó xíʼin Jehová ná chindeétáʼanra xíʼinyó ña̱ nasamayó ña̱ va̱ása va̱ʼa kéʼéyó (kaʼvi Colosenses 3:8-10). Saátu kivi nandukúyó ña̱ káʼa̱n xa̱ʼa̱ ña̱yóʼo nu̱ú tutu ña̱ tává na̱ ñuu Ndióxi̱. Ná kǒo keʼéyó táʼan ña̱ kéʼé na̱ ñuyǐví yóʼo ta kixáʼayó ka̱ʼa̱nyó táki̱ʼva káʼa̱nna (Efes. 4:29).

NÁ KǑO KEʼÉYÓ ÑA̱ KÚNDASÍ JEHOVÁ

9. ¿Ndáaña ndákanixi̱ní na̱ ñuyǐví yóʼo xa̱ʼa̱ ña̱ káʼa̱n Jehová?

⁹ Inka ña̱ xítoyó tiempo vitin kúú ña̱ ku̱a̱ʼání na̱ yiví va̱ása chíndayáʼvina ña̱ ndákanixi̱ní Jehová, ndáaña kúú ña̱ va̱ʼa xíʼin ña̱ va̱ása va̱ʼa. Tá kúú káʼa̱nna ña̱ kivi sanúuna se̱ʼena, ta̱a xíʼin ta̱a á ñaʼá xíʼin ñaʼá kiviva ku̱su̱n xíʼin táʼanna, ta na̱ ta̱ʼán tindaʼa̱ kiviva ku̱su̱n xíʼin táʼanna (Is. 5:20). Tá va̱ása kíʼinyó kuenta xíʼin ki̱ʼva ña̱ ndákanixi̱ní na̱ ñuyǐví yóʼo, sana loʼo tá loʼo kixáʼayó keʼéyó ña̱ va̱ása va̱ʼa (2 Cor. 11:3). Ta nda̱a̱ kivi kixáʼayó ndakanixi̱níyó ña̱ va̱ʼava íyo ña̱ kéʼé na̱ ñuyǐví yóʼo nu̱úka ña̱ káʼa̱n Biblia. Va̱ása va̱ʼa keʼéyó saá. Jehová ndíchikara nu̱ú na̱ yiví saáchi ña̱ sánáʼa̱ra miíyó ña̱ va̱xi nu̱ú Biblia va̱ʼaní chíndeétáʼanña xíʼinyó, ni xa̱a̱ ku̱a̱ʼá tiempo ka̱naña (Is. 48:17, 18; 55:9).

10. ¿Ndáa pregunta kivi ndakanixi̱níyó xa̱ʼa̱ ña̱ʼa ña̱ kúndasí Jehová xínira?

¹⁰ Miíyó na̱ kúni̱ sakúsi̱í-ini Jehová xíniñúʼu kundasíyó kuniyó ña̱ kúndasíra xínira (Sal. 97:10). Ná ndakanixi̱níyó xa̱ʼa̱ pregunta yóʼo: “¿Á túvii̱ ley ña̱ táxi Ndióxi̱ sásiña nu̱úi̱ keʼíi̱ ña̱ kúni̱ miíi̱? ¿Á kútói̱ kotoi̱ á kusíkíi̱ ña̱ʼa ña̱ kúndasí Jehová xínira? ¿Á kúnii̱ ña̱ ná nasamara ña̱ káʼa̱nra ña̱ va̱ʼa kitáʼanña xíʼin ña̱ kúnii̱ keʼíi̱?”.

11. ¿Ndáa ki̱ʼva kundasíyó kuniyó ña̱ kúndasí Jehová xínira?

¹¹ Tá kíʼinyó kuenta ña̱ kútóoyó keʼéyó ña̱ʼa ña̱ kúndasí Jehová xínira, ¿ndáaña xíniñúʼu keʼéyó? Ná kǒo ndakanixi̱níyó ña̱ nda̱a̱ ni iin yichi̱ va̱ása kivi keʼéyó ña̱ kúni̱ra. Ndiʼiyó kúúyó na̱ yiví ku̱a̱chi ta sana kúni̱yó keʼéyó ña̱ va̱ása va̱ʼa (Sal. 51:5; 103:14). Soo kiviva kuchiñuyó nu̱ú ña̱ va̱ása va̱ʼa ña̱ kúni̱yó keʼéyó. Ná kǒo keʼéyó ña̱ kúni̱ ku̱ñuyó (Efes. 2:3). Ta saátu ná va̱ása ndakaniníxi̱níyó xa̱ʼa̱ ña̱ va̱ása va̱ʼa. Tá sava yichi̱ ndákanixi̱níyó xa̱ʼa̱ ña̱ kúndasí Jehová xínira, kama ná nasamayó ña̱ ndákanixi̱níyó (Gén. 39:9, 12). Ná kiʼinyó kuenta chi tá ná xa̱a̱yó keʼéyó ña̱ va̱ása va̱ʼa, va̱ása viíka xa̱a̱yó kitáʼanyó xíʼin Ndióxi̱ ni xíʼin inkakana. Va̱ása kúni̱yó kundoʼoyó saá (Efes. 5:5). Mií Jehová chindeétáʼan xíʼinyó ña̱ kundasíyó kuniyó táʼan ña̱ kúndasíra xínira.

NÁ KIʼINYÓ KUENTA XÍʼIN ÑA̱ VA̱XI NU̱Ú INTERNET

12. Ña̱ va̱xi nu̱ú internet, ¿ndáa ki̱ʼva kítáʼanña xíʼin ki̱ʼva ña̱ ndákanixi̱ní na̱ ñuyǐví?

¹² Ku̱a̱ʼáníyó xíniñúʼuyó internet ña̱ va̱ʼa keʼéyó ku̱a̱ʼá ña̱ʼa, nda̱a̱ ña̱ kéʼéyó chiñu nu̱ú Jehová. Soo ná kiʼinyó kuenta xíʼin ña̱yóʼo, saáchi ku̱a̱ʼání ña̱ va̱xi nu̱ú ña̱yóʼo kítáʼanña xíʼin ña̱ ndákanixi̱ní na̱ ñuyǐví. Tá kúú, nu̱ú internet va̱xi ku̱a̱ʼání pornografía, ta na̱ va̱lí xíʼin na̱ chée va̱ása íxayo̱ʼvi̱ña xíʼinna ki̱ʼvina nu̱ú ña̱yóʼo. Ta saátu ña̱ káʼa̱nna xíʼin sexteo, ta na̱ va̱lí kúa̱an kúú na̱ kéʼéka ña̱yóʼo, ña̱yóʼo kúú nu̱ú chíndaʼána na̱ʼná, video á mensaje nu̱ú kána na̱ yiví chala. Ta nu̱ú internet va̱xi ku̱a̱ʼáníka ña̱ va̱ása va̱ʼa ta sándaʼviña na̱ yiví. Ta ña̱ káʼa̱nna xíʼin redes sociales, na̱ yiví xíniñúʼunína ña̱yóʼo ña̱ va̱ʼa sándana na̱ʼná xíʼin video tá xáʼa̱nna iin lugar á tá kéʼéna inkaka ña̱ʼa ña̱ sákusi̱í kuití inina. Ña̱yóʼo kivi kindaaña tiempo ndaʼa̱yó, tasaá loʼoka tiempo keʼéyó chiñu nu̱ú Jehová (Heb. 10:24, 25).

13. ¿Ndáa pregunta kivi ndakanixi̱níyó xa̱ʼa̱ ndáa ki̱ʼva xíniñúʼuyó internet?

¹³ Tá xíniñúʼuyó internet, ná kiʼinyó kuenta ña̱ va̱ása ku̱a̱ʼá tiempo kuniñúʼuyó ña̱yóʼo ta xa̱ʼa̱ ña̱yóʼo kivi keʼéyó ña̱ va̱ása va̱ʼa. Kivi nda̱ka̱tu̱ʼunyó ña̱yóʼo miíyó: “¿Nda̱saa tiempo xítoi̱ video ña̱ kána nu̱ú internet? ¿Ndáa video kúú ña̱ xítoi̱? Tá kána iin ña̱ va̱ása va̱ʼa ¿á ndi̱ku̱n kama násamai̱ña? ¿Á kándíxai̱ ndiʼi ña̱ kána nu̱ú internet, á siʼna nándukúi̱ xa̱ʼa̱ ña̱ káʼa̱nña á ña̱ nda̱a̱ kúúña?” (Sal. 119:37; Prov. 14:15; Efes. 5:15, 16).

14. ¿Ndáa ki̱ʼva vií kuniñúʼuyó internet?

¹⁴ Ña̱ va̱ʼa kǒo keʼéyó táʼan ña̱ kéʼé na̱ ñuyǐví yóʼo, loʼo tiempo ná kuniñúʼuyó internet ta ná va̱ása kotoyó ña̱ va̱ása va̱ʼa. Na̱ íyo se̱ʼe xíniñúʼu kiʼinna kuenta ndáaña kúú ña̱ xíto se̱ʼena tá xíniñúʼuna redes sociales (Efes. 6:4). Sava tutu káʼa̱nña, na̱ va̱lí kúa̱an kúú na̱ ku̱a̱ʼáníka tiempo xíniñúʼu ña̱ redes sociales, ta xa̱ʼa̱ ña̱yóʼo kúni mitúʼunna, ndákava-inina ta kíxáʼa ndíʼi̱-inina. Ña̱ kundiku̱nyó ña̱ káʼa̱n tu̱ʼun Ndióxi̱ chindeétáʼanña xíʼinyó ña̱ kǒo ndoʼoyó táʼan ña̱yóʼo.

KIVI NDAKA̱XIÚN KEʼÚN ÑA̱ VA̱ʼA

15. ¿Ndáaña sákuaʼayó xíʼin ña̱ ndo̱ʼo ñá Gloria? (Koto na̱ʼná).

¹⁵ Tá túviyó ña̱ ki̱xáʼayó kéʼéyó táʼan ña̱ kéʼé na̱ ñuyǐví yóʼo ndi̱ku̱n ná nasamayó ña̱ kéʼéyó. Ná kotoyó ña̱ ndo̱ʼo ñá Gloria.a Ñáyóʼo tá loʼovíñá kixáʼañá kúnda̱a̱-iniñá xa̱ʼa̱ ña̱ nda̱a̱, soo loʼo tá loʼo ki̱xáʼañá kéʼéñá táʼan ña̱ kéʼé na̱ ñuyǐví yóʼo. Ñáyóʼo káchiñá: “Xi̱kuni̱i̱ ndukúikai̱ ta ku̱a̱ʼá na̱ yiví ná xa̱a̱ kuxini̱ miíi̱, xa̱ʼa̱ ña̱kán va̱ása níxixaʼi̱n sava reunión. Ta ki̱xaa̱ iin tiempo ña̱ nda̱kanixi̱níi̱ ña̱ va̱ása kúni̱kai̱ koi̱ Testigo”. Ñáyóʼo ki̱ʼinñá kuenta ña̱ ki̱xáʼañá ndákanixi̱níñá nda̱a̱ táki̱ʼva kéʼé na̱ ñuyǐví. ¿Ndáaña ke̱ʼéñá? Ñáyóʼo káʼa̱nñá: “Ki̱xáʼíi̱ káʼvii̱ Biblia ku̱a̱ʼáka tiempo ta xi̱kaʼi̱n xíʼin Ndióxi̱, ta va̱ása níxi̱kitáʼankai̱ xíʼin na̱ yiví na̱ va̱ása níxi̱ndasakáʼnu miíra. Vitin ku̱a̱ʼáka ña̱ va̱ʼa táxi Jehová ndaʼíi̱ xa̱ʼa̱ ña̱ va̱ʼa kítáʼi̱n xíʼinra. Kúsi̱íní-inii̱ ña̱ níʼira yichi̱ nu̱úi̱ ta su̱ví ña̱ ñuyǐví yóʼo”.

16. ¿Ndáaña sákuaʼayó xíʼin ña̱ ndo̱ʼo ta̱ Robert?

¹⁶ Vitin kotoyó ña̱ ndo̱ʼo ta̱ Robert. Xa̱ʼa̱ ña̱ ki̱xáʼara kítáʼanra xíʼin na̱ xi̱kaʼvi xíʼinra, ta̱yóʼo ki̱xáʼara xáʼmira, xíʼira ndixi ta nda̱a̱ xi̱kisi̱ra xíʼin ta̱a. Ta̱yóʼo káchira: “Nda̱kanixi̱níi̱ ña̱ kiviva keʼíi̱ ña̱ kúni̱ miíi̱”. Soo tá ni̱ya̱ʼa tiempo ki̱ʼinra kuenta ña̱ xi̱keʼéra nda̱a̱ táki̱ʼva kéʼé na̱ ñuyǐví yóʼo (2 Ped. 2:19). ¿Ndáaña chi̱ndeétáʼan xíʼinra ña̱ kǒo keʼékara saá? Ta̱yóʼo káchira: “Kixáʼi̱ kítáʼi̱n xíʼin na̱ yiví na̱ kúʼvi̱-ini xíni Jehová. Na̱samai̱ ki̱ʼva ña̱ xi̱keʼíi̱, ki̱ʼva ña̱ xi̱ndixíi̱, ki̱ʼva ña̱ xi̱ndasavíi̱ miíi̱ xíʼin ki̱ʼva ña̱ xi̱kaʼi̱n”. ¿Ndáa ki̱ʼva kúni ta̱yóʼo vitin? Ta̱yóʼo káchira: “Vitin va̱ása kéʼékai̱ ña̱ yaku̱a̱ táʼan ña̱ xi̱keʼíi̱ tá ya̱chi̱ ta iin bendición kúú ña̱yóʼo nu̱úi̱. Ña̱yóʼo sákusi̱íníña-inii̱”.

17. ¿Nda̱chun kivi kuchiñuyó ña̱ kǒo keʼéyó táʼan ña̱ kéʼé na̱ ñuyǐví? (1 Juan 4:4).

¹⁷ ¿Ndáaña sa̱kúaʼayó xíʼin artículo yóʼo? Ná kǒo keʼéyó táʼan ña̱ kéʼé na̱ ñuyǐví yóʼo. Ná kǒo ka̱ʼa̱nyó nda̱a̱ táki̱ʼva káʼa̱n na̱yóʼo, ná kǒo keʼéyó ña̱ kúndasí Jehová xínira ta saátu ná kǒo kotoyó ña̱ va̱ása va̱ʼa ña̱ kána nu̱ú internet. Ñuyǐví yóʼo kiviva nasamaña ña̱ kéʼéyó, soo kiviva chikaa̱yó ndee̱ ña̱ kǒo keʼéyóña. Íyoka ndee̱ Jehová nu̱ú ta̱ Ndi̱va̱ʼa xíʼin nu̱ú ñuyǐví ña̱ xáʼndachíñura (kaʼvi 1 Juan 4:4). Saátu kivi chindeétáʼan ña̱ espíritu santora xíʼinyó, ta ña̱yóʼo ku̱a̱ʼání ndee̱ kúúmiíña (Luc. 11:13). Ná chikaa̱yó ndee̱ ña̱ kǒo keʼéyó táʼan ña̱ kéʼé na̱ ñuyǐví yóʼo ta ná keʼéyó ña̱ kúni̱ Ndióxi̱ (Gál. 5:16).