Ná taxiyó kuniʼi ta̱ Cristo yichi̱ nu̱úyó ta sandíkora-iniyó

¿Ndáaña kúni̱ kachi ña̱ sandíko ta̱ Cristo iniyó ña̱ káʼa̱n Colosenses 3:15 xa̱ʼa̱? Ña̱yóʼo kúni̱ kachiña ña̱ va̱ʼa kúniyó xa̱ʼa̱ ña̱ kúúyó discípulo ta̱ Cristo. Ndóʼoyó saá chi kúnda̱a̱-iniyó ña̱ kúʼvi̱-ini Jehová xíʼin ta̱ Jesús xínina miíyó (Juan 14:23, 27).

Ta̱ apóstol Pablo ni̱ka̱ʼa̱nra xíʼin na̱ cristiano na̱ xi̱ñuʼu ti̱xin congregación ñuu Colosas ña̱ ná taxina kuniʼi ta̱ Cristo yichi̱ nu̱úna. ¿Ndáa ki̱ʼva keʼéraña? Nda̱a̱ táki̱ʼva íyo iin ta̱ juez ta̱yóʼo káʼa̱nra ndáaña keʼéna, ki̱ʼva saá níʼi ta̱ Cristo yichi̱ nu̱úyó chi chíndeétáʼanra xíʼinyó ña̱ ndaka̱xinyó ña̱ keʼéyó. Ná ka̱ʼa̱nyó xa̱ʼa̱ iin ejemplo.

Tá kúúmiíyó iin ku̱a̱chi xíʼin iin na̱ hermano, ná taxiyó kuniʼi ta̱ Cristo yichi̱ nu̱úyó ta ná chindeétáʼanra xíʼinyó ña̱ kunda̱a̱-iniyó ndáaña xíniñúʼu keʼéyó ña̱ va̱ʼa vií kutáʼanyó xíʼinna. Ña̱yóʼo kúni̱ kachiña ña̱ sava yichi̱ kǒo keʼéyó ña̱ kúni̱ miíyó ta nandóso-iniyó xa̱ʼa̱ ña̱ ke̱ʼéna xíʼinyó. Saá kúú ña̱ na̱ʼa̱yó ña̱ táxiyó ña̱ ná sandíko ta̱ Cristo iniyó ta kuniʼira yichi̱ nu̱úyó (Col. 3:12-14).