Ndióxi̱ chi̱ndeétáʼanra xíʼi̱n ña̱ ku̱ndaa̱-inii̱ xa̱ʼa̱ra

Xa̱ʼnui̱ chí ñuu París (Francia), na̱ yiví na̱ xi̱kitáʼan xíʼi̱n va̱ása níxi̱kandíxavína Ndióxi̱ ta saátu xi̱keʼé yi̱ʼi̱va. Ti̱xin escuela sa̱náʼa̱na yi̱ʼi̱ ña̱ kǒo nda̱a̱ ni iinna ní ixava̱ʼa miíyó ta ka̱ndíxavai̱ ña̱yóʼo, ni va̱ása nínandukú va̱ʼi̱ xa̱ʼa̱ña nda̱a̱ táki̱ʼva kéʼé ku̱a̱ʼá na̱ yiví.

Na̱ yivái̱ va̱ása níxikutóona nda̱a̱ ni iin religión, saáchi xi̱ndakanixi̱nína tá ndixa íyo Ndióxi̱ va̱ása kooví ña̱ʼa ña̱ sáxo̱ʼvi̱ miíyó. Saátu xi̱kiʼii̱n kuenta ña̱ ku̱a̱ʼání religión va̱ása vií níxi̱keʼéna sava ña̱ʼa, xa̱ʼa̱ ña̱kán xi̱ndakanixi̱níi̱ ña̱ kǒoví iin Ndióxi̱ ta̱ kúʼvi̱-ini xíni miíyó íyo ta nda̱a̱ xi̱kusi̱kindai̱ na̱ xi̱kandíxa Ndióxi̱.

Soo tiempo vitin kándíxavai̱ ña̱ ndixa íyo Ndióxi̱, saátu kándíxai̱ ña̱ ndíʼi̱-inira xa̱ʼíi̱ ni íyo ña̱ va̱ása vií kéʼíi̱. ¿Ndáaña chi̱ndeétáʼan xíʼi̱n ña̱ na̱samai̱? Ná ka̱ʼa̱n loʼi̱ xíʼinndó xa̱ʼa̱ ña̱yóʼo.

Tá xi̱kuumiíi̱ 19 ku̱i̱ya̱ i̱xandúxana xíʼi̱n ña̱ ná ku̱ʼi̱n keʼíi̱ servicio militar. Iin ku̱i̱ya̱ chi̱ndaʼána yi̱ʼi̱ chí Guayana Francesa ña̱ kíndo̱o chí Sudamérica ta saátu mií tiempo saá ku̱a̱ʼání ña̱ʼa sa̱kúaʼi̱.

Tá xi̱kuumiíi̱ 20 ku̱i̱ya̱ ndi̱kói̱ chí ñuu París. Ñuu yóʼo xi̱kachíñui̱ lunes nda̱a̱ viernes, ta sábado xíʼin domingo nina vikó xi̱xaʼi̱n xi̱xiʼi̱, mií ña̱ nda̱a̱ va̱ása níxi̱kusi̱í-inii̱ tá xi̱keʼíi̱ ña̱yóʼo. Xi̱ndi̱ʼi̱ní-inii̱ xa̱ʼa̱ ña̱ xi̱ ixakuíʼná na̱ yiví, xi̱kundasína inka na̱ yiví ta saátu ña̱ kǒo xu̱ʼún níxi̱yo ñuu kán. Xi̱xitoi̱ ña̱ xi̱xoʼvi̱ní na̱ yiví va̱ʼa ta xi̱ ixayaku̱a̱nína nu̱ú ñúʼu yóʼo, tasaá nda̱kaʼíi̱n xa̱ʼa̱ ñuu nu̱ú ni̱xi̱yoi̱ chí Sudamérica.

XI̱KUNI̱I̱ VIÍ KOI̱ ÑA̱KÁN NI̱XA̱ʼI̱N CHÍ YUKU̱

Ndi̱kói̱ ñuu Guayana Francesa, ñuu loʼo kán kúú nu̱ú ni̱xa̱ʼi̱n tá ke̱ʼíi̱ servicio militar. Nda̱kanixi̱níi̱ ña̱ si̱íní koi̱ kán xa̱ʼa̱ ña̱ koi̱ iin ñuu loʼo ña̱ xi̱ndikaa̱ chí yuku̱. Xi̱xaʼmii̱ marihuana ta xi̱keʼíi̱ ña̱ xi̱kuni̱ miíi̱, kixáʼa tukui̱ káchíñui̱ lunes nda̱a̱ viernes ta sábado xíʼin domingo xi̱xaʼi̱n vikó.

Tiempo saá ta̱xina iin Biblia ndaʼíi̱ ta ki̱xáʼíi̱ káʼvii̱ña chi nda̱kanixi̱níi̱ ña̱ kivi ndani̱ʼíi̱ consejo ña̱ kivi chindeétáʼan xíʼi̱n ña̱ si̱í koi̱, soo kǒo níxi̱kunda̱a̱-inii̱ xíʼin ña̱ xi̱kaʼvii̱.

Na̱ migoi̱ xi̱kuni̱na kunda̱a̱-inina ndáa xa̱ʼa̱ kúú ña̱ ki̱xaa̱yó íyoyó ñuyǐví yóʼo. Iin tiʼvi loʼo na̱ yiví kán ni̱xi̱yona chí yuku̱ ta ni̱ka̱ʼa̱nna xíʼi̱n ña̱ ná ku̱ʼi̱n koi̱ xíʼinna.

Kǒo ku̱a̱ʼáví ña̱ʼa níxi̱kuumiíndi̱ kán, xi̱keʼéndi̱ ña̱ xi̱kuni̱ miíndi̱ ta kǒo na̱ níxi̱kaʼa̱n xíʼinndi̱ xa̱ʼa̱ ña̱ xi̱keʼéndi̱. Xi̱chiʼindi̱ ña̱ʼa ña̱ va̱ʼa kuxundi̱, xi̱xitandi̱ yaa ta xi̱xaʼmindi̱ marihuana. Xi̱kiʼinníndi̱ kuenta xíʼin ñuʼú kán ta xi̱taxindi̱ ña̱ʼa ña̱ xi̱kuumiíndi̱ ndaʼa̱ táʼanndi̱. Xa̱ʼa̱ ña̱ va̱ása níxi̱kuni̱ndi̱ kaʼníndi̱ kití kǒo níxi̱xixindi̱ ku̱ñu, va̱ása ní ixato̱ʼóndi̱ na̱ chíñu ni ley ña̱ xi̱kuumiína.

Xi̱kuni̱ndi̱ ndasaviíndi̱ nu̱ú ñuʼú yóʼo, ta nu̱ú ni̱xi̱yondi̱ inkáchi ni̱xi̱yo ndiʼindi̱ ta kǒo na̱ níxi̱niʼi yi̱chi̱ nu̱úndi̱. Xi̱ ixato̱ʼó táʼanvandi̱ ni xi̱kuundi̱ na̱ inka ñuu soo ki̱ʼii̱n kuenta iin tá iinndi̱ xa̱ʼa̱ mií kuitívandi̱ xi̱ndi̱ʼi̱-inindi̱ ta xi̱keʼéndi̱ ña̱ va̱ása va̱ʼa. Tá ni̱ya̱ʼa tiempo ki̱xáʼa kúúmiívandi̱ tu̱ndóʼo nda̱a̱ táki̱ʼva ndóʼo ndi̱ʼi̱ na̱ yiví. Sava na̱ yiví loʼova ki̱vi̱ xi̱kindo̱ona ta inkana xi̱kindo̱ona sava semana á yo̱o̱, yi̱ʼi̱ u̱vi̱ ku̱i̱ya̱ ni̱xi̱yoi̱ kán.

Tá ni̱xi̱yoi̱ chí yuku̱, kiʼii̱n kuenta ña̱ ku̱a̱ʼáníva ña̱ʼa kána nu̱ú ñuʼú yóʼo ña̱ táxiña ña̱ xíniñúʼuyó. Iin ki̱vi̱ ka̱ʼvii̱ si̱ʼva̱ tí papaya soo ku̱a̱ʼání kúúña ta̱ va̱ása nísandíʼii̱ kaʼvii̱ña. Iin ki̱vi̱ nda̱kanixi̱níi̱ ña̱yóʼo: “¿Nda̱chun va̱ʼaní kána ña̱ʼa nu̱ú ñuʼú yóʼo? Íyoña nda̱a̱ táki̱ʼva íyo iin veʼe, chi táxiña ña̱ʼa ndaʼa̱yó ña̱ va̱ʼa kutakuyó”. Saá ki̱ʼii̱n kuenta ña̱ va̱ása níkuva̱ʼa mií ña̱yóʼo chi íyo iin na̱ ke̱ʼéña, soo va̱ása níkunda̱a̱-inii̱ xa̱ʼa̱ ta̱ ixava̱ʼa ña̱yóʼo.

Xi̱kaʼvii̱ Biblia soo xi̱kuni̱ kunda̱a̱-inii̱ ndáaña kúni̱ Ndióxi̱ ná keʼíi̱. Ki̱xáʼíi̱ káʼi̱n xíʼin Ndióxi̱ ta ki̱xáʼíi̱ kéʼíi̱ seña xíʼin ña̱ cruz, ni va̱ása níxi̱kunda̱a̱-inii̱ ndáaña kúni̱ kachi ña̱yóʼo. Saátu xi̱ndakanixi̱níi̱ á ki̱vi̱ Ndióxi̱ kúú Jah saáchi va̱xi ki̱vi̱ra nu̱ú yaa ña̱ xi̱xitandi̱.

KU̱NDAA̱-INII̱ XA̱ʼA̱ NDIÓXI̱

Xa̱ʼa̱ ña̱ xi̱kaʼi̱n xíʼin Ndióxi̱ tá ya̱chi̱, sana ki̱ʼinvara kuenta xíʼi̱n ña̱ kúnii̱ kunda̱a̱-inii̱ xa̱ʼa̱ra. Iin ñá migai̱ ñá ni̱xi̱yo nu̱ú ni̱xi̱yoi̱ xi̱nitáʼanñá xíʼin na̱ testigo Jehová, na̱yóʼo ta̱xina iin libro ndaʼa̱ñá ña̱ naní Usted puede vivir para siempre en el paraíso en la Tierra.a Tá ka̱ʼvii̱ña ku̱tóoníi̱ ña̱ káʼa̱nña ña̱ ndulivi nu̱ú ñuʼú yóʼo ta kivi kooyó nu̱úña ndiʼi tiempo. Ña̱yóʼo kúú ña̱ xi̱kuni̱i̱ kunda̱a̱-inii̱ xa̱ʼa̱, xi̱ndakanixi̱níi̱ ña̱ viíní koi̱ xíʼin na̱ yiví na̱ kúnii̱ xínii̱ ta va̱ása kuvikayó. Xi̱kutóoníi̱ kunda̱a̱-inii̱ xa̱ʼa̱ ta̱ ixava̱ʼa miíyó ta kivi keʼéra ndiʼi ña̱ xa̱a̱ ni̱ka̱ʼa̱nyó xa̱ʼa̱.

Xi̱kunda̱a̱va-inii̱ ña̱ xi̱xiniñúʼu nasamai̱ ndiʼi ña̱ xi̱keʼíi̱, soo va̱ása kuchiñu iinlá miíi̱ keʼíi̱ ña̱yóʼo. Ña̱kán ni̱ka̱ʼi̱n xíʼin iin ta̱ migoi̱ ta̱ xi̱kaʼvi xíʼin iin ta̱ misionero ta̱ kúú testigo Jehová ta̱ xi̱naní Michel ña̱ saátu ná sanáʼa̱ra yi̱ʼi̱.

Tá xi̱nii̱ra, ni̱ka̱ʼa̱nra xíʼi̱n ña̱ ná ku̱ʼi̱n iin asamblea ña̱ koo chí Matoury ña̱ kíndo̱o chí Cayena ta ki̱ʼva 240 kilómetro (155 milla) kíndo̱oña. Tiempo saá náni̱ní ni̱xi̱yo yixí xi̱níi̱ xíʼin yixí yuʼíi̱. Kininí xi̱na̱ʼa̱ ti̱ko̱to̱i̱ chi sava táʼví ña̱yóʼo ni̱ta̱ʼnda̱ña. Ni kininí xi̱ndixii̱, na̱ hermano ni̱ka̱ʼa̱nna xíʼi̱n ña̱ kivi ku̱ʼi̱n xíʼinna, ta̱xina ña̱ xi̱xii̱ ta saátu nu̱ú ni̱xi̱yoi̱. Xa̱ʼa̱ ña̱ ni̱na̱ʼa̱ na̱ testigo Jehová yóʼo ña̱ va̱ʼa-inina xíʼi̱n, kiʼi̱n kuenta ña̱ nda̱ni̱ʼíi̱ ña̱ nda̱a̱.

Ti̱xin asamblea kán ni̱ka̱ʼa̱nna ña̱ va̱xi nu̱ú 1 Timoteo 5:8, nu̱ú ña̱yóʼo káʼa̱nña ta̱ níʼi yichi̱ nu̱ú na̱ veʼera xíniñúʼu viíní kiʼinra kuenta xíʼin na̱yóʼo. Kiʼi̱n kuenta ña̱ mií Jehová va̱ʼaní kéʼéra ña̱ káʼa̱n ña̱yóʼo, saáchi va̱ʼaní ndáara na̱ ñúʼu ti̱xin ñuura. Nda̱kanixi̱níi̱ tá siʼna chiñu miíra ná kundi̱ʼi̱-inii̱ xa̱ʼa̱, kǒo ña̱ sandíʼi̱-inii̱, saáchi miíra taxi ndiʼi ña̱ xíniñúʼi̱. Tá ni̱ya̱ʼa tiempo, ki̱ʼii̱n kuenta xíʼin ki̱ʼva ña̱ kéʼé ta̱ Michel, ta ña̱yóʼo chi̱ndeétáʼanña xíʼi̱n. Ña̱ xi̱keʼéra chiñu nu̱ú Jehová kúú ña̱ xi̱ndayáʼvika nu̱úra, kǒo nda̱a̱ ni iin ña̱ʼa ní xi̱kuma̱ní nu̱úra ta si̱íní ni̱xi̱yora.

Tá ki̱xáʼíi̱ káʼvii̱ Biblia, ki̱xáʼíi̱ násamai̱ ña̱ kéʼíi̱. Ndákaʼíi̱n tá sa̱ndákoi̱ ña̱ va̱ása níxaʼmikai̱. Tá ni̱ya̱ʼa loʼo tiempo xa̱ʼmii̱ ndiʼi ña̱ ni̱xi̱yo nu̱úi̱ ta saátu ña̱ marihuana ta va̱ása níxiniñúʼukai̱ ña̱yóʼo. Ta ki̱xáʼíi̱ xáʼi̱n reunión. Tasaá ni̱ka̱ʼi̱n xíʼin iin ta̱ hermano ña̱ ná kaʼndara yixí xi̱níi̱ ta mií Salón ña̱ Reino kán xa̱ʼndaraña.

Tá ni̱ya̱ʼa sava semana va̱ása níxi̱yokai̱ chí yuku̱ kán chi ndi̱kói̱ chí Francia. Kán na̱ndukúi̱ Salón ña̱ Reino ta ki̱xáʼa tukui̱ káʼvii̱ xa̱ʼa̱ Biblia. Na̱ veʼi̱ ku̱si̱íní-inina tá sa̱ndákoi̱ ña̱ xi̱xaʼmii̱, ña̱ va̱ása níxi̱xiʼikai̱ ndixi ta saátu ña̱ va̱ása níxi̱kitakai̱, soo va̱ása níkusi̱í-inina xa̱ʼa̱ ña̱ ki̱xáʼíi̱ kándíxai̱ ña̱ nda̱a̱. Ni̱ka̱ʼi̱n xíʼinna xa̱ʼa̱ ña̱ nda̱a̱ soo va̱ása vií níka̱ʼi̱n xíʼinna. Soo tá ni̱ya̱ʼa tiempo, viíva nda̱kanii̱ ña̱yóʼo nu̱úna, ta saátu ki̱ʼii̱n kuenta xíʼin ña̱ xi̱ndakanixi̱nína.

Tá ku̱i̱ya̱ 1996 nda̱kuchii̱. Ni̱ka̱ʼi̱n xíʼin Jehová ña̱ kúnii̱ koi̱ misionero nda̱a̱ táki̱ʼva íyo ta̱ Michel. Chi saá kúú ña̱ kivi na̱ʼi̱ ña̱ táxii̱ tíxa̱ʼvi ndaʼa̱ra.

ÑA̱ VA̱ʼA ÑA̱ TA̱XI JEHOVÁ NDAʼÍI̱

Ti̱xin congregación nu̱ú xi̱ndikai̱ xi̱nitáʼi̱n xíʼin iin ñá hermana ñá naní Claudine ta liviníñá. Ki̱ʼii̱n kuenta ña̱ kútóoníñá natúʼunñá xíʼin na̱ yiví xa̱ʼa̱ Ndióxi̱, ta comentario ña̱ xi̱taxiñá ti̱xin reunión xi̱naʼa̱ña ña̱ kúʼvi̱níva-iniñá xíniñá Jehová. Xi̱kuni̱i̱ kakai̱ xíʼinñá, soo siʼna ni̱ka̱ʼi̱n xíʼinñá á kúni̱ñá kooñá misionera. Ñáyóʼo ni̱ka̱ʼa̱nñá ña̱ kúni̱vañá kooñá misionera, ta yo̱o̱ abril ti̱ndaʼa̱ndi̱ ña̱ ku̱i̱ya̱ 2000.

Tá ni̱ya̱ʼa iin ku̱i̱ya̱ ndu̱undi̱ precursor. Ta saátu tá ni̱ya̱ʼa loʼo tiempo ki̱xáʼandi̱ chíndeétáʼanndi̱ xíʼin iin grupo ña̱ káʼa̱nna chino mandarín ta yatin nu̱ú ni̱xi̱yondi̱ xi̱ndikaa̱ congregación kán. I̱xayo̱ʼvi̱ña xíʼi̱n sakúaʼi̱ tu̱ʼun yóʼo. Xi̱xiniñúʼu keʼíi̱ nda̱a̱ táki̱ʼva kéʼéna cultura kán ta saátu xi̱ndukúi̱ ki̱ʼva ña̱ ka̱ʼi̱n xíʼin na̱ yiví xa̱ʼa̱ ña̱ nda̱a̱. Va̱ása ní sakúaʼi̱ ndiʼi tu̱ʼun kán, soo ku̱si̱íní-inindi̱ ña̱ chi̱ndeétáʼanndi̱ xíʼin na̱ hermano kán ta va̱ása nándóso-inii̱ xa̱ʼa̱ ña̱yóʼo. Iin bendición Jehová xi̱kuuña ta chi̱ndeétáʼanña xíʼinndi̱ ña̱ ke̱ʼéndi̱ inkaka chiñu ña̱ ta̱xina ndaʼa̱ndi̱.

SAVA ÑA̱ I̱XAYO̱ʼVI̱ XÍʼINNDI̱

Ku̱a̱ʼá ku̱i̱ya̱ ni̱xi̱yo ña̱ xi̱sandákava-inii̱. Tá kúú, xi̱ndakanixi̱níi̱ ña̱ kǒo ku̱a̱ʼá chiñu kéʼíi̱ nu̱ú Jehová ni xa̱ʼa̱ na̱ hermano. Ku̱a̱ʼání tiempo xi̱tavái̱ discurso ña̱ xi̱taxii̱, ta xi̱ndakanixi̱níi̱ ña̱ va̱ása vií níxi̱taxii̱ ña̱yóʼo ta xi̱ndakava-inii̱ (Ecl. 7:16). Jehová kǒo ndátuvíra ña̱ vií keʼéyó ndiʼi ña̱ʼa, chi kúʼvi̱-inira xínira miíyó ta ndáyáʼvi ndiʼi ña̱ kéʼéyó nu̱úra.

Chí París ni̱ka̱ʼa̱nna xíʼi̱n ña̱ koi̱ sustituto ta̱ superintendente ña̱ circuito. Xi̱ndakanixi̱níi̱ ña̱ va̱ása kuchiñui̱ keʼíi̱ ña̱yóʼo saáchi loʼovai̱. Soo ki̱ʼii̱n kuenta ña̱ espíritu santo Jehová kúú ña̱ chíndeétáʼan xíʼinyó ña̱ keʼéyó ku̱a̱ʼání ña̱ʼa nu̱úka ña̱ keʼé miíyó xíʼin ndee̱yó.

Nda̱a̱ tá loʼi̱ kúúmiíi̱ kue̱ʼe̱ ña̱ naní hiperhidrosis, ta ña̱yóʼo kúú ña̱ kána tati̱ín yi̱ʼi̱. Ta ndaʼíi̱ kúú ña̱ ndóʼoka saá. Xi̱ndoʼokai̱ ña̱yóʼo tá xi̱taxii̱ discurso ti̱xin asamblea. Ta ña̱ kéʼíi̱ kúú ña̱ káʼi̱n xíʼin Jehová ña̱ chindeétáʼanra xíʼi̱n. Kue̱ʼe̱ yóʼo kúúmiíkai̱ña, soo ña̱ káʼi̱n xíʼin Jehová kúú ña̱ chíndeétáʼan xíʼi̱n.

Tá ku̱i̱ya̱ 2011, Jehová ta̱xira iin bendición ndaʼa̱ndi̱ ña̱ koondi̱ misionero ta xi̱kutóoníndi̱ keʼéndi̱ chiñu yóʼo. Chi̱ndaʼána miíndi̱ ñuu Nueva Caledonia, iin ñuu loʼo ña̱ ndíkaa̱ chí suroeste ña̱ océano Pacífico, ta ki̱ʼva 16,000 kilómetro (10,000 milla) káni̱ ndíkaa̱ña nu̱ú ndíkaa̱ ñuu París. Ni̱xi̱yotu ña̱ xi̱ ixayo̱ʼvi̱ xíʼinndi̱ ñuu kán. Tá kúú, xi̱xiniñúʼu ka̱a̱nndi̱ kuxundi̱ táʼan ña̱ xi̱xixina kán, tá kúú ña̱ nani yuca, taro xíʼin ñame, ta tí chele xíʼin tí ti̱na ya̱chi̱ní xi̱sandákoorí miíndi̱. Xi̱xiniñúʼu keʼéndi̱ nda̱a̱ táki̱ʼva xi̱keʼé na̱ yiví kán, saáchi tá kúni̱yó ka̱ʼa̱nyó xíʼinna va̱ása ndákuiinna yuʼúyó chi nu̱ú kuitívana kánda̱.

Mií Jehová xa̱a̱ chíndeétáʼan xíʼinndi̱ ña̱ kéʼéndi̱ chiñu yóʼo. Ta tá ni̱ya̱ʼa loʼo tiempo xi̱ñuʼundi̱ Betel. Ta saátu ni̱xa̱ʼa̱nndi̱ Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱, ta vitin kúúndi̱ na̱ circuito. Ndiʼi chiñu ña̱ táxina ndaʼa̱ndi̱ ña̱ espíritu santo kúú ña̱ chíndeétáʼan xíʼinndi̱ ña̱ va̱ʼa kéʼéndi̱ ña̱yóʼo. Ta kíʼii̱n kuenta, Jehová xíniñúʼura miíi̱ ni íyo sava ña̱ va̱ása vií kéʼíi̱. Xa̱ʼa̱ ña̱kán, káʼa̱n ndáʼvii̱ xíʼinra ña̱ va̱ʼa saxínui̱ chiñu ña̱ táxira ndaʼíi̱. Ni íxayo̱ʼvi̱ña xíʼi̱n ña̱ ka̱ʼi̱n nu̱ú ku̱a̱ʼá na̱ yiví, Jehová kúú ta̱ xa̱a̱ chíndeétáʼan xíʼi̱n ta saátu va̱ʼaní chíndeétáʼan na̱ congregación xíʼi̱nndi̱.

Ñá síʼi̱ ñá Claudine va̱ʼaní chíndeétáʼanñá xíʼi̱n. Kúee íyo iniñá xíʼi̱n ni íyo ña̱ va̱ása va̱ʼa kéʼíi̱. Ni nda̱a̱ ndáaka nu̱ú xáʼa̱nndi̱, kúsi̱íní-iniñá káchíñuñá nu̱ú Jehová ta saátu chíkaa̱ñá ndee̱ ña̱ nátúʼunñá xa̱ʼa̱ra. Va̱ása káʼa̱n kúáchiñá xa̱ʼa̱ ña̱ niʼní sava ñuu, ni xa̱ʼa̱ ña̱ íxayo̱ʼvi̱ xíʼinndi̱ xa̱ʼa̱ ña̱ kúúndi̱ na̱ circuito.

Asamblea ña̱ nu̱ú ña̱ ni̱xa̱ʼi̱n, ku̱ndaa̱-inii̱ ña̱ ndiʼi tiempo ndáa Jehová na̱ káchíñu nu̱úra. Xa̱ʼa̱ ña̱ siʼna chiñura ndíʼi̱-inii̱ xa̱ʼa̱, ku̱a̱ʼání ña̱ va̱ʼa táxira ndaʼíi̱. Jehová sa̱náʼa̱ra miíi̱ ña̱ xíniñúʼu ixato̱ʼíi̱ na̱ chíñu ta vitá koo inii̱. Ña̱ va̱ʼa keʼíi̱ ña̱ káʼa̱nra, kǒo níxi̱kitáʼankai̱ xíʼin na̱ xi̱kitáʼi̱n xíʼin tá ya̱chi̱, soo ta̱yóʼo ta̱xira ku̱a̱ʼáníka na̱ ndixa kúú migoi̱. Ta saátu ta̱xira iin ñá síʼi̱ ñá va̱ʼaní kítáʼan xíʼi̱n. Ta íyo ña̱ ndátui̱ taxi Jehová ndaʼíi̱ chí nu̱únínu ta ndiʼi tiempo koo ña̱yóʼo (Mar. 10:29, 30).