Ña̱ ndásakáʼnuyó Jehová ná kundayáʼviña nu̱úyó ta “va̱ása yi̱ʼvíyó”

1. ¿Ndáaña ni̱ka̱ʼa̱n ta̱ Zacarías?

“¿NDÁAÑA keʼé ta̱ loʼo yóʼo tá ná kuchéera?” (Luc. 1:57-66). Ña̱yóʼo kúú ña̱ ni̱nda̱ka̱tu̱ʼún sava na̱ yiví miína tá xi̱nina ña̱ ka̱ku se̱ʼe ñá Elisabet xíʼin ta̱ Zacarías ni xa̱a̱ chéenína. Jehová xi̱niñúʼura ta̱ Zacarías ña̱ va̱ʼa ni̱ka̱ʼa̱nra xa̱ʼa̱ ña̱yóʼo. Ta̱yóʼo ni̱ka̱ʼa̱nra, ta̱ Juan chindeétáʼanra xíʼin na̱ yiví ña̱ va̱ʼa ndikó-inina tasaá koo tu̱ʼvana ña̱ ndakunina ta̱ Mesías, ta xa̱a̱ ku̱nu̱mí kixira ta kundiku̱nnara (Amós 3:7; Luc. 1:67-79). Ta̱ Zacarías va̱ása níka̱ʼa̱n kuitíra ndáaña keʼé se̱ʼera.a Saátu ni̱ka̱ʼa̱nra xa̱ʼa̱ iin profecía ña̱ káʼa̱n xa̱ʼa̱ miíyó. Nu̱ú artículo yóʼo ka̱ʼa̱nyó xa̱ʼa̱ ña̱ ni̱ka̱ʼa̱nra ta saátu kunda̱a̱-iniyó xa̱ʼa̱ u̱ni̱ ña̱ʼa ña̱ xíniñúʼu kundayáʼvi nu̱úyó: 1) ña̱ sa̱káku ta̱ Jesús miíyó, 2) ña̱ ndásakáʼnuyó Jehová 3) xíʼin chiñu ña̱ kúúmiíyó ña̱ natúʼunyó xíʼin na̱ yiví.

ÑA̱ SA̱KÁKU TA̱ JESÚS MIÍYÓ

2. a) Nda̱a̱ táki̱ʼva káʼa̱n Lucas 1:67-73, ¿ndáaña ndáyáʼviní ta̱xi Jehová ndaʼa̱ na̱ ñuura? b) ¿Ndáata kúú “ta̱ kúúmií ndee̱ ña̱ sakǎkura miíyó” ta̱ káʼa̱n Lucas 1:69 xa̱ʼa̱?

² (Kaʼvi Lucas 1:67-73). Ndióxi̱ ni̱ka̱ʼa̱nra xíʼin na̱ ñuura ña̱ taxira ña̱ ndáyáʼviní ndaʼa̱na, ña̱ sakákura miína. ¿Ndáana kuniñúʼura ña̱ va̱ʼa sakákurana? Ta̱ Zacarías ka̱chira: “[Jehová] ta̱xira iin ta̱ kúúmií ndee̱ ña̱ sakǎkura miíyó ta ti̱xin na̱ veʼe ta̱ David ke̱e ta̱yóʼo” (Luc. 1:69). Ta̱ sa̱káku miíyó kúú ta̱ Mesías. Na̱ judío na̱ ni̱xi̱yo tiempo ta̱ Zacarías xa̱a̱ xi̱ndatuvana ña̱ ná kixaa̱ ta̱ Mesías ta xi̱kunda̱a̱-inina ña̱ kixira ti̱xin na̱ veʼe ta̱ Abrahán xíʼin ti̱xin na̱ veʼe ta̱ rey David (Gén. 22:17, 18; Mat. 22:42). Tá saá, ¿nda̱chun ni̱ka̱ʼa̱n Jehová xíʼin ta̱ Zacarías ña̱ ná ka̱ʼa̱nra ña̱yóʼo? Saáchi xa̱a̱ ku̱nu̱mí kixaa̱ ta̱ Mesías. Ta ti̱xin i̱ñu̱ yo̱o̱, iin ñá loʼo kúa̱an ñá naní María sakákuñá ta̱ Jesús, ta ta̱ ángel Gabriel ni̱ka̱ʼa̱nra ña̱ kúúra “se̱ʼe Ndióxi̱” ta xa̱a̱ra nduura Rey nda̱a̱ táki̱ʼva ni̱xi̱yo yivára ta̱ David (Luc. 1:30-35). Ta ta̱ sa̱káku miíyó yóʼo xi̱kuu ta̱ Jesús, ki̱vi̱ tá nda̱kuchira xi̱kuumiíra 30 ku̱i̱ya̱ saáchi mií ki̱vi̱ saá nda̱kiʼinra espíritu santo ta ndu̱ura ta̱ Mesías (Mat. 3:16, 17). Ña̱yóʼo kúú iin ña̱ ndáyáʼviní ku̱u.

3. ¿Ndáa xa̱ʼa̱ xi̱xiniñúʼu sakákuna na̱ judío?

³ Na̱ judío na̱ ni̱xi̱yo tá siglo nu̱ú xi̱xiniñúʼu sakákuna miína. ¿Nda̱chun xi̱xiniñúʼu sakákuna na̱yóʼo? Ta̱ Zacarías ni̱ka̱ʼa̱nra ña̱ xixiniñúʼu sakákuna na̱yóʼo nu̱ú na̱ sáa̱-ini xíni miína ta saátu na̱ kúndasí xíni miína (Luc. 1:71). ¿Á kúni̱ kachiña ña̱ xi̱xiniñúʼu sakáku ta̱ Jesús miína nu̱ú na̱ chíñu ñuu Roma? Va̱ása, ta̱yóʼo xi̱xiniñúʼu sakákura miína nu̱ú na̱ sáa̱-ini xíni miína, nu̱ú ta̱ Ndi̱va̱ʼa. Ta̱yóʼo kúú ta̱ xi̱saxóʼvi̱ miína ta xa̱ʼa̱ ta̱yóʼo xi̱ñuʼuna ndaʼa̱ ku̱a̱chi ta saátu ña̱ xíʼi̱na, nda̱a̱ táki̱ʼva ndóʼo ndiʼi miíyó vitin (Heb. 2:14, 15). Saátu xi̱xiniñúʼu sakákura na̱ judío yóʼo, saáchi xi̱ ixayo̱ʼvi̱ña xíʼinna ña̱ kundiku̱nna ley ña̱ ta̱xi Ndióxi̱ ndaʼa̱ Moisés (Rom. 3:20; Gál. 3:10, 13). Xa̱ʼa̱ ña̱kán xi̱xiniñúʼuna ña̱ ni̱ka̱ʼa̱n Jehová xíʼin ta̱ Zacarías: “Ña̱ sakǎkurana tá ná koo káʼnu-inira xa̱ʼa̱ ku̱a̱china” (Luc. 1:77).

4. ¿Nda̱chun xi̱xiniñúʼu sakákuna miíyó?

⁴ ¿Nda̱chun xi̱xiniñúʼu sakákuna miíyó? Nda̱a̱ táki̱ʼva ndo̱ʼo na̱ judío, ndíkaa̱yó ndaʼa̱ ku̱a̱chi xíʼin ndaʼa̱ ña̱ xáʼní miíyó (Rom. 5:12). Ta̱ Ndi̱va̱ʼa xíʼin na̱ ta̱chí ndi̱va̱ʼa, táxina ku̱a̱ʼání tu̱ndóʼo ndaʼa̱yó. Kúni̱na sandáʼvina miíyó ña̱ kǒo kachíñukayó nu̱ú Jehová. Ta saátu xíniñúʼura na̱ yiví ña̱ ná sa̱a̱-inina kunina miíyó, tasaá kasina nu̱úyó ña̱ ndasakáʼnuyó Jehová.

5. ¿Ndáa ki̱ʼva sáka̱ku ta̱ Jesús miíyó nu̱ú ku̱a̱chi?

⁵ ¿Ndáa ki̱ʼva sa̱kǎku ta̱ Jesús miíyó nu̱ú ku̱a̱chi? Tá ni̱xi̱yora nu̱ú ñuʼú yóʼo, sa̱náʼa̱ra na̱ xi̱ndiku̱n miíra ndáa ki̱ʼva ndasakáʼnuna Jehová. Saátu ni̱xi̱ʼi̱ra xa̱ʼa̱yó, “ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16; Mat. 20:28). Miíyó ndásakáʼnuyó Jehová nda̱a̱ táki̱ʼva sa̱náʼa̱ ta̱ Jesús miíyó. Soo, xa̱ʼa̱ ña̱ kúúyó na̱ yiví ku̱a̱chi, xíniñúʼu ka̱ʼa̱nyó xíʼin Ndióxi̱ ná ixakáʼnu-inira xa̱ʼa̱yó tá xa̱a̱ kíʼviyó ku̱a̱chi nu̱úra. Ta xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó íxakáʼnuva-inira xa̱ʼa̱yó ta kíndo̱o-inira xíʼin ña̱ kéʼéyó nu̱úra (1 Juan 2:1, 2). Saá kúú ña̱ sáka̱ku ta̱ Jesús miíyó ndaʼa̱ ku̱a̱chi.

6. ¿Ndáaña xa̱a̱ ku̱nu̱mí keʼé ta̱ Jesús, ta̱ kúú Rey ti̱xin Reino Ndióxi̱? (Koto na̱ʼná).

⁶ ¿Ndáa ki̱ʼva ndatavá ta̱ Jesús miíyó ndaʼa̱ ku̱a̱chi, ndaʼa̱ ña̱ xíʼi̱yó, ndaʼa̱ ta̱ Ndi̱va̱ʼa, ndaʼa̱ na̱ ta̱chí ndi̱va̱ʼa xíʼin ndaʼa̱ na̱ sáa̱-ini xíni miíyó? Nda̱a̱ tá ku̱i̱ya̱ 1914, ta̱ Jesús ki̱xáʼa xáʼndachíñura chí ndiví “nda̱a̱ táki̱ʼva ni̱xi̱yo yivára ta̱ David” (Luc. 1:32, 33). Ta̱ Jesús xíʼin na̱ 144,000 ta saátu na̱ ángel, sandíʼi-xa̱ʼa̱na ndiʼi na̱ sáa̱-ini xíni Ndióxi̱ tá ná kixaa̱ ña̱ Armagedón. Ta ti̱xin ña̱ mil ku̱i̱ya̱ ta̱ Jesús sandátakura na̱ xa̱a̱ ni̱xi̱ʼi̱, ta miíra xíʼin na̱ 144,000 chindeétáʼanna xíʼin na̱ yiví ña̱ va̱ása kuumiíkana ku̱a̱chi (Juan 5:28; Apoc. 22:1, 2). Tá ná ndiʼi ña̱ 1,000 ku̱i̱ya̱, va̱ása kuumiíkayó ku̱a̱chi ta ni va̱ása kuvikayó (1 Cor. 15:26, 55-57). Tasaá, ta̱ Jesús xíʼin na̱ 144,000 sandíʼi-xa̱ʼa̱ va̱ʼana ta̱ Ndi̱va̱ʼa xíʼin na̱ ta̱chí ndi̱va̱ʼa ta saátu ndiʼi na̱ yiví na̱ kúni̱ ndakutáʼan xíʼin ta̱ Ndi̱va̱ʼa (Apoc. 20:7-10). Na̱ ndásakáʼnu Jehová va̱ása kuumiíkana ku̱a̱chi, ni va̱ása kuvikana ta ni va̱ása kooka na̱ sa̱a̱-ini kuni miína. Tasaá ndasakáʼnuyó Ndióxi̱yó ndiʼi tiempo xa̱ʼa̱ ña̱ sa̱káku ta̱ Jesucristo miíyó (2 Cor. 9:15).

NDÁYÁʼVINÍ NDASAKÁʼNUYÓ JEHOVÁ

7. Nda̱a̱ táki̱ʼva káʼa̱n Lucas 1:74, 75, ¿ndáa chiñu táxi Jehová ndaʼa̱ na̱ ñuura ña̱ va̱ʼa ndasakáʼnunara?

⁷ (Kaʼvi Lucas 1:74, 75). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó va̱ʼa ndásakáʼnuyó Jehová ta va̱ása yíʼviyó, nda̱a̱ táki̱ʼva ni̱ka̱ʼa̱n ta̱ Zacarías. ¿Ndáa ki̱ʼva ndásakáʼnuyó Ndióxi̱? Tá nátúʼunyó xíʼin na̱ yiví, káʼa̱nyó xíʼin Ndióxi̱, káʼviyó tu̱ʼunra, ta xáʼa̱nyó reunión xíʼin asamblea, káchíñuyó Betel, á íxava̱ʼayó Salón ña̱ Reino ta saátu tá káchíñuyó ti̱xin Salón ña̱ Asamblea. Nda̱a̱ ndáaka chiñu kéʼéyó nu̱ú Ndióxi̱, saá kúú ña̱ ndásakáʼnuyóra.

8. Xa̱ʼa̱ ña̱ ndásakáʼnuyó Jehová, ¿nda̱chun ‘va̱ása yíʼviyó’?

⁸ ¿Nda̱chun ni̱ka̱ʼa̱n ta̱ Zacarías ña̱ ndásakáʼnuyó Jehová ta ‘va̱ása yíʼviyó’? Ña̱ nu̱ú, va̱ása yíʼviyó kuviyó. Xa̱ʼa̱ ña̱ ndátuyó kooyó ndiʼi tiempo chí nu̱únínu, va̱ása kúni̱yó kuumiíyó ndiʼi ña̱ʼa ña̱ íyo ñuyǐví yóʼo, chi ña̱ kúni̱kayó kúú ña̱ sakúsi̱íyó-ini Jehová. Ni na̱ sáa̱-ini xíni miíyó káʼa̱nna xíʼinyó ña̱ kaʼnína miíyó, va̱ása taxiyó ña̱ sayíʼvi ña̱yóʼo miíyó. Nda̱kú íyo iniyó xíʼin Ndióxi̱, saáchi tá ná kuviyó ta̱ Jesús sandátakura miíyó (Juan 6:39, 40). Ña̱ u̱vi̱, va̱ása yíʼviyó ña̱ kǒo kindo̱o-ini Jehová xíʼin ña̱ kéʼéyó xa̱ʼa̱ ña̱ kúúyó na̱ yiví ku̱a̱chi. Kúnda̱a̱-iniyó ña̱ kúʼvi̱va-inira xínira miíyó, kíndo̱o-inira xíʼin ña̱ kéʼéyó ta íxakáʼnu-inira xa̱ʼa̱yó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (1 Juan 4:9, 10).

9. ¿Ndáaña kúú ña̱ íxayo̱ʼvi̱ xíʼin sava na̱ hermano?

⁹ Sava na̱ hermano íxayo̱ʼvi̱ña xíʼinna kandíxana ña̱ kíndo̱ova-ini Jehová xíʼin ña̱ kéʼéna nu̱úra. ¿Nda̱chun ndákanixi̱nína saá? Xa̱ʼa̱ ña̱ va̱ása va̱ʼa ndo̱ʼona tá ya̱chi̱, ta sana túvina ña̱ va̱ása kíndo̱o-ini Jehová xíʼin ña̱ kéʼéna ta ña̱yóʼo sándakavaña-inina. Á sana ndákava-inina xa̱ʼa̱ ku̱a̱chi ña̱ ni̱ki̱ʼvina tá ya̱chi̱, ni xa̱a̱ ndu̱kúvana ña̱ káʼnu-ini nu̱ú Jehová ta xa̱a̱ ni̱ka̱ʼa̱nna xíʼin na̱ anciano ña̱ chi̱ndeétáʼanna xíʼinna. ¿Á saá ndóʼún? Ná kotoyó ndáaña kivi keʼún.

10, 11. ¿Ndáaña kivi keʼéyó tá ndákaniníxi̱níyó xa̱ʼa̱ ña̱ va̱ása va̱ʼa ke̱ʼéyó tá ya̱chi̱? Ka̱ʼa̱n xa̱ʼa̱ iin ejemplo.

¹⁰ Ná ndakanixi̱níyó iinna ni̱ta̱ʼnu̱ xa̱ʼa̱na ta̱ ku̱a̱ʼa̱nna hospital. Ta doctor sándaʼara xa̱ʼa̱na, soo káʼa̱nra xíʼinna ña̱ ná keʼéna sava ejercicio ña̱ va̱ʼa ndaʼana ta kivi kakana. Soo tá na̱ ni̱ta̱ʼnu̱ leke yóʼo ndákanixi̱nína ña̱ va̱ása kívika kakana, ¿ndáaña xíniñúʼu keʼéna? Xíniñúʼu kandíxana ña̱ ni̱ka̱ʼa̱n na̱ doctor xíʼinna ta keʼéna ña̱ ni̱ka̱ʼa̱nra xíʼinna. Tá ná keʼéna saá ndaʼavana ta nda̱a̱ kivi kunutukuna.

¹¹ Ki̱ʼva saá kivi kundoʼún xíʼin ku̱a̱chi ña̱ ni̱ki̱ʼviún tá ya̱chi̱, soo kandíxa ña̱ chindeétáʼanva Jehová xíʼún. Ndakaʼán chi kúʼvi̱níva-inira xínira miíún, ta xa̱ʼa̱ ña̱ ni̱xi̱ʼi̱ ta̱ Jesús xa̱ʼún kiviva chindeétáʼanra xíʼún (Juan 1:16, 17; Rom. 3:23, 24; 1 Juan 3:19, 20). Keʼé ña̱yóʼo ña̱ va̱ʼa chindeétáʼanña xíʼún, ka̱ʼa̱n xíʼin Ndióxi̱, kaʼvi tu̱ʼunra ta saátu keʼé inkaka chiñu nu̱úra (Sal. 1:2; 1 Tes. 5:17; Heb. 10:25). Tá túkue̱ʼe̱yó, kúáchi̱va ndáʼayó, ta ki̱ʼva saá kivi kundoʼoyó chi ku̱a̱ʼá tiempo xíniñúʼu ya̱ʼa ña̱ va̱ʼa xa̱a̱yó vií kutáʼanyó xíʼin Ndióxi̱, saáchi sana siʼna ña̱ va̱ása va̱ʼa kéʼéyó kíʼinyó kuenta xíʼin. Soo va̱ása sandákoún ña̱ kandíxaún Jehová ta kǒo ndakava-iniún. Tá ná keʼún ndiʼi ña̱ʼa ña̱ sakúyatin miíún nu̱ú Ndióxi̱ ña̱yóʼo chindeétáʼanña xíʼún (Filip. 3:16). Ta saátu ndáyáʼviní taxiún tíxa̱ʼvi ndaʼa̱ Jehová ndiʼi ki̱vi̱ xa̱ʼa̱ ña̱ táxira ndee̱ ndaʼún ña̱ nda̱kú íyo iniún xíʼinra ña̱ káchíñún nu̱úra. Táxiníyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ táxina ña̱ ndásakáʼnuyóna ta va̱ása yíʼviyó.

ÑA̱ NATÚʼUNYÓ XÍʼIN NA̱ YIVÍ

12. ¿Ndáa ki̱ʼva ni̱xi̱nu ña̱ ni̱ka̱ʼa̱n ta̱ Zacarías xa̱ʼa̱ ta̱ Juan? (Lucas 1:76-79).

¹² (Kaʼvi Lucas 1:76-79). Ta̱ Zacarías ni̱ka̱ʼa̱nra xíʼin se̱ʼe loʼora: “Ku̱ʼún chí nu̱ú Jehová ña̱ ndasaviún yichi̱ra”. ¿Ndáa ki̱ʼva ni̱xi̱nu tu̱ʼun yóʼo? Tá xa̱ʼnu ta̱ Juan ta̱ xi̱sandákuchi na̱ yiví, xi̱kusi̱íní-inira xi̱natúʼunra xíʼin na̱ yiví xa̱ʼa̱ Ndióxi̱. Ni̱ka̱ʼa̱nra xíʼin na̱ judío ña̱ ná ndikó-inina ta ná ndakuchina tasaá koo tu̱ʼvana ña̱ kixaa̱ ta̱ Mesías. Tá sa̱ndákuchira ta̱ Jesús, ni̱ka̱ʼa̱nra ta̱yóʼo kúú ta̱ chi̱ndaʼá Jehová. Ta saátu ka̱chira: “Kotondó, ndikachi sa̱na̱ Ndióxi̱, ta̱ sándiʼi-xa̱ʼa̱ ku̱a̱chi ñuyǐví yóʼo”. Tasaá ni̱ka̱ʼa̱nra xíʼin na̱ xi̱ndiku̱n miíra, ña̱ ná kundiku̱nkana ta̱ Jesús, ta̱ kúú Mesías (Juan 1:29, 34-36, 40, 41).

13. ¿Ndáaña xi̱kuni̱ kachi ta̱ Zacarías tá chi̱táʼanra ña̱ ki̱xi ta̱ Mesías xíʼin “ñuʼu̱ ña̱ ndáye̱ʼe̱ tá túvi”?

¹³ Ta̱ Zacarías ni̱ka̱ʼa̱nra tá ná kixaa̱ ta̱ Mesías koora nda̱a̱ táki̱ʼva íyo “ñuʼu̱ ña̱ ndáye̱ʼe̱ tá túvi”. Ña̱yóʼo kúni̱ kachiña xa̱ʼa̱ ña̱ ki̱xi ta̱ Jesús, na̱samaña ña̱ táku na̱ yiví. Ta xa̱ʼa̱ ña̱yóʼo xi̱xiniñúʼu natúʼunna xíʼin ndiʼi na̱ yiví. Ni xa̱a̱ ku̱ndaa̱-ini ta̱ Juan, ta̱ Jesús kúú ta̱ Mesías, va̱ása kuchiñu iinlá miíra natúʼunra xa̱ʼa̱ ña̱yóʼo xíʼin ndiʼi na̱ yiví. ¿Ndáana kúú na̱ kéʼéka chiñu yóʼo?

14. ¿Ndáa chiñu ña̱ ndáyáʼviní ke̱ʼé ta̱ Jesús xíʼin na̱ discípulora? (Isaías 61:1, 2).

¹⁴ Ta̱ Jesús ndiʼi tiempo xi̱natúʼunra xíʼin na̱ yiví. Ke̱ʼéra nda̱a̱ táki̱ʼva ni̱ka̱ʼa̱n ta̱ Zacarías xa̱ʼa̱ra: “Ña̱ va̱ʼa ndaye̱ʼe̱ña nu̱ú na̱ ndóo nu̱ú naá ta saátu nu̱ú na̱ ndóo nu̱ú ku̱nda̱tí ña̱ xáʼni”. Ta̱yóʼo xi̱kundáʼviní-inira xi̱xinira na̱ yiví na̱ xi̱ndakava-ini xíʼin na̱ xi̱ ixandi̱va̱ʼana xíʼin, ta xa̱ʼa̱ ña̱yóʼo na̱túʼunra xíʼinna “xa̱ʼa̱ tiempo ña̱ na̱ʼa̱ Jehová ña̱ kúndáʼvi-inira xínirana” ta sa̱ndáye̱ʼe̱ra nu̱úna ta sa̱ndíkoora-inina (kaʼvi Isaías 61:1, 2; Luc. 4:16-21). Ta ni̱ka̱ʼa̱nra xíʼinna: “Reino Ndióxi̱ ña̱ íyo chí ndiví xa̱a̱ ku̱yatinña”. Ta saátu xi̱kunda̱a̱-inira ña̱ ku̱a̱ʼákana xíniñúʼu natúʼun xa̱ʼa̱ ña̱yóʼo. Ta sa̱náʼa̱ra na̱ discípulora ndáa ki̱ʼva keʼénaña (Mat. 4:16, 17; 10:7; 28:19, 20).

15. ¿Nda̱chun ndáyáʼviní natúʼunyó xíʼin na̱ yiví xa̱ʼa̱ Ndióxi̱ tiempo vitin?

¹⁵ Miíyó na̱ ndíku̱n ta̱ Cristo ndáyáʼviní chiñu ña̱ kúúmiíyó, ña̱ natúʼunyó xíʼin na̱ yiví ña̱ va̱ʼa ka̱kuna. Vitin kúú ña̱ ndáyáʼviní ka̱ʼa̱nyó xíʼinna xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó xíʼin xa̱ʼa̱ Reino Ndióxi̱. ¿Nda̱chun? Saáchi ti̱xin loʼo tiempo kixaa̱ ña̱ gran tribulación (Mat. 24:21). Sana tiempo saá sava na̱ yiví ndakaʼánna xa̱ʼa̱ ña̱ na̱túʼunyó xíʼinna, xa̱a̱na sakúaʼana xa̱ʼa̱ tu̱ʼun va̱ʼa ta kandíxana Jehová. Ta̱ Jesús xíʼin na̱ 144,000 ta saátu na̱ ángel kanitáʼanna xíʼin na̱ yiví na̱ íyo contra xíʼin Ndióxi̱. Ta̱ Rey yóʼo sakákura na̱ ndásakáʼnu Ndióxi̱ ña̱ va̱ʼa koona nu̱ú ñuyǐví xa̱á (Mat. 25:34; Apoc. 16:16; 19:19). Ña̱kán xíniñúʼu natúʼunkayó xíʼin na̱ yiví xa̱ʼa̱ tu̱ʼun va̱ʼa (Mat. 24:14; Mar. 13:10).

16. ¿Ndáaña xíniñúʼu keʼéyó? (Koto na̱ʼná).

¹⁶ Ña̱ ni̱ka̱ʼa̱nyó xa̱ʼa̱ ña̱ va̱xi nu̱ú Lucas 1:68-79 sa̱ndákaʼánña u̱ni̱ ña̱ʼa ña̱ ndáyáʼviní miíyó, ña̱ sa̱káku ta̱ Jesús miíyó, ña̱ ndásakáʼnuyó Ndióxi̱ ta va̱ása yíʼviyó ta saátu ña̱ nátúʼunyó xa̱ʼa̱ tu̱ʼun va̱ʼa. Tá kándíxayó ña̱ ni̱xi̱ʼi̱ ta̱ Jesús xa̱ʼa̱yó, nda̱taxiyó miíyó ndaʼa̱ Jehová ta ña̱ ndásakáʼnuyóra ndáyáʼviníña nu̱úyó, ná chikaa̱yó ndee̱ ña̱ natúʼunyó xíʼin na̱ yiví “tiempo ña̱ na̱ʼa̱ Jehová ña̱ kúndáʼvi-inira xínirana”. Saátu ná ka̱ʼa̱nyó ña̱ ndatiinra ku̱a̱chi xíʼin na̱ yiví tá ná sandíʼi-xa̱ʼa̱ra ndiʼi ña̱ va̱ása va̱ʼa íyo ñuyǐví yóʼo, ta ñuʼú yóʼo xa̱a̱ña nduuña iin ñuʼú livi. Ná ka̱ʼa̱nyó xíʼin na̱ yiví ña̱ ná kuʼvi̱-inina kunina Jehová ta ná kusi̱í-inina ña̱ “taxira iin chiñu káʼnu ndaʼa̱yó ña̱ ndasakáʼnuyóra ta va̱ása yi̱ʼvíyó, ta saátu ña̱ va̱ʼa nda̱kú koo iniyó ta kooyó na̱ va̱ʼa nu̱úra ndiʼi ki̱vi̱ ña̱ tákuyó” (Luc. 1:74, 75).