Serqa Sfrattata fl-​Afrika tal-​Punent

Kif irrakkontat minn Eunice Ebuh

“Ħallelin armati ppjanaw l-​attakk tagħhom għal dik il-​ġurnata meta aħna normalment ikollna l-​Istudju tal-​Ktieb tal-​Kongregazzjoni fid-​dar tagħna. Aħna niftħu l-​kanċelli tagħna beraħ għall-​aħwa rġiel u nisa u għal uħud interessati. Il-​ħallelin x’aktarx li kienu jafu d-​drawwiet tagħna u l-​ħin tal-​laqgħa. Aħna nafu fiċ-​ċert li huma kienu serqu karozza minn xi mkien ieħor u ġew jistennew ħdejn il-​kanċell tagħna fil-​ġurnata u fil-​ħin taʼ l-​istudju tal-​ktieb.

“Kumbinazzjoni, dik il-​ġimgħa li ġew kienet il-​ġimgħa taż-​żjara taʼ l-​indokratur tas-​circuit. Minflok ma ltqajna fid-​dar tagħna, iltqajna fis-​Sala tas-​Saltna. Wara li spiċċat il-​laqgħa, kien hemm laqgħa taʼ l-​anzjani. Normalment jien u t-​tfal konna mmorru d-​dar, imma żewġi, li hu anzjan, talabna nistennewh. Qalilna li ma kienx se jdum. Għalhekk qgħadna nistennewh.

“Imbagħad sibna li l-​karozza ma riditx tistartja. L-​indokratur tas-​circuit u żewġi ma setgħux jirranġawha. U lanqas il-​mekkanik li konna ċempilnielu ma setaʼ jirranġaha.

“It-​tfal kellhom jimxuha sad-​dar. Wara ftit, jien mort id-​dar ukoll. Wasalt madwar l-​għaxra. La jien u lanqas it-​tfal ma dħalna fid-​drive-in bil-​karozza, għax kieku kien ikollna niftħu l-​kanċell il-​kbir.

“Meta dħalt fil-​kamra tas-​sodda tiegħi, smajt sparatura, qawwija ħafna. Bdejt inberren dwar x’kien qed jiġri. Ipprovajt inċempel lill-​pulizija, imma ma kienx hemm linja. Ġrejt isfel u għalaqt il-​bieb taʼ barra taʼ l-​azzar, imbagħad għaġġilt biex nagħlaq il-​bieb tan-​nofs. Tfejt id-​dawl. Uliedi bdew jippanikkjaw, u għalhekk għedtilhom biex jibqgħu kalmi. Tlabna flimkien għall-​protezzjoni taʼ Jehovah. Sadanittant, żewġi kien għadu ħdejn is-​Sala tas-​Saltna jitħabat biex jistartja l-​karozza.

“Ħarist barra mit-​tieqa u rajt raġel mixħut fit-​triq barra l-​kanċell. Mid-​dehra l-​ħallelin kienu telqu, u għalhekk daħħalt lir-​raġel ferut fil-​karozza tiegħi u ħadtu niġri l-​isptar. Kien riskju, imma kelli nagħmel xi ħaġa. Iżda sfortunatament, l-​għada miet.

“Minkejja dik it-​traġedja, l-​affarijiet setgħu kienu ħafna iktar agħar. Iż-​żjara taʼ l-​indokratur tas-​circuit swiet biex ma jkollniex l-​istudju tal-​ktieb fid-​dar tagħna. Il-​ħsara fil-​karozza swiet biex ma mmorrux id-​dar bħala familja. Żewġi, li bla dubju kien jisfaʼ maħtuf mill-​ħallelin, ma wasalx id-​dar qabel ma kien tard ħafna. Dawn u fatturi oħrajn kienu taʼ vantaġġ għalina dak il-​lejl.

“Jehovah hu l-​post b’saħħtu tagħna u l-​kenn tagħna. Hu bħalma tgħid l-​iskrittura: ‘Jekk il-​Mulej ma jħarisx il-​belt, għalxejn jishar l-​għassies.’”—Salm 127:1.