Aħseb Dwar il-Problemi Tiegħek Kif Jixtieq Ġeħova

1-2. X’hemm bżonn li nagħmlu biex nissaportu meta jkollna l-problemi? (Ara wkoll l-istampa.)

QIEGĦED bħalissa tiffaċċja xi inġustizzja, oppożizzjoni minn tal-familja, jew persekuzzjoni minħabba li qed taqdi lil Alla? Għandek l-uġigħ minħabba saħħa batuta jew l-effetti tax-xjuħija? Qed tkampa maʼ xi traġedja, forsi tlift lil xi ħadd li tħobb fil-mewt? Ġeħova jgħożż ħafna lill-poplu tiegħu, imma bħal ħafna minnhom, int jaf għandek il-ħajja “mimlija problemi u wġigħ.”—Slm. 90:10.

² Meta jkollna l-problemi, hemm bżonn li naħsbu bħalma jkun jixtieq Ġeħova ħalli nkunu nistgħu nibqgħu kalmi u nkunu nafu x’għandna nagħmlu. Għala hu importanti dan? Aħseb dwar dan l-eżempju: Il-problemi li tiffaċċja fil-ħajja nistgħu nqabbluhom maʼ perikli li tistaʼ tiltaqaʼ magħhom waqt li tkun qed issuq. Int taġixxi skont xi jkun il-periklu. Jaf ikollok tiġbed lejn il-lemin jew ix-xellug, tnaqqas, jew forsi anki tieqaf. Imma biex tkun taf xi trid tagħmel, trid tara sew x’hemm quddiemek. Però, jekk ikollok il-ħġieġ maħmuġ ħafna, ma tkunx tistaʼ tagħmel dan. Bl-istess mod, biex nissaportu l-problemi tagħna, hemm bżonn li narawhom kif jarahom Ġeħova. F’dan l-artiklu se nikkunsidraw (1) kif Ġeħova jixtieqna naħsbu dwar il-problemi, (2) kif ħarsa żbaljata tistaʼ tagħmel is-sitwazzjoni agħar, u (3) x’nistgħu nagħmlu meta jinqalgħu l-problemi.

KIF ĠEĦOVA JIXTIEQNA NAĦSBU DWAR IL-PROBLEMI

3. Għala ma nistgħux nevitaw il-problemi f’din is-sistema mill-agħar?

³ F’din is-sistema mill-agħar, ma nistgħux nevitaw li jkollna d-diffikultajiet. Sakemm aħna imperfetti u Satana jmexxi d-dinja, se jkollna l-problemi. Hekk kif din is-sistema dejjem tersaq qrib it-tmiem tagħha, aħna se niffaċċjaw saħansitra iktar problemi, sew jekk ikunu diżastri naturali u sew jekk ikunu minħabba li n-nies jagħmlu affarijiet ħżiena. (Mat. 24:8; 2 Tim. 3:13) Li kieku Ġeħova kellu jirranġa dawn il-problemi issa, ikun bħallikieku qed jgħin lil Satana jmexxi d-dinja. Sakemm idum imexxi Satana, aħna se jkollna l-“inkwiet.”—Ekk. 9:​12, ntt.

4. X’inhi raġuni oħra għala l-Kristjani jbatu?

⁴ Il-Kristjani jbatu wkoll għax jobdu lil Ġesù. Ġesù spiss qal lid-dixxipli tiegħu li kienu se jiġu ppersegwitati għax jimxu warajh. (Mat. 24:9; Ġw. 16:2) Li nkunu nafu dan se jgħinna biex ma tiddgħajfilniex il-fidi minn tbatijiet bħal dawn. (1 Tes. 3:​3, 4) U meta nissaportu l-provi għax ikollna fidi soda, aħna nistgħu nkunu ċerti li qegħdin fit-triq li twassal għall-ħajja taʼ dejjem. Barra minn hekk, inkunu qed nuru li qed inżommu maʼ Ġeħova għax hu l-aqwa mexxej u nkunu qed nuru wkoll li Satana hu giddieb. Waħda mill-gideb taʼ Satana hi li aħna mhux verament inħobbu lil Alla u li naqduh biss minħabba dak li jtina għax aħna egoisti. Biex jipprova juri dan, hu jattakka l-poplu taʼ Ġeħova bl-aħrax. (Ġob 1:​9-11) Meta nissaportu għax inħobbu lil Ġeħova, aħna nferrħuh.—Prov. 27:11.

5. X’nistgħu nitgħallmu minn Ekkleżjasti 7:​13, 14? (Ara wkoll l-istampi.)

⁵ Ġeħova jippermetti li jiġru affarijiet ħżiena. Ġeħova qatt ma jaġixxi b’mod ħażin jew iħajjarna nagħmlu affarijiet ħżiena. (Ġak. 1:13) Allura r-Re Salamun għala kiteb li “l-Alla l-veru” għamel “ġurnata diffiċli”? (Aqra Ekkleżjasti 7:​13, 14.) Bħalma jiġri spiss, hawn il-Bibbja qed tgħid li Ġeħova għamel xi ħaġa meta fil-fatt hu sempliċement ippermetta li tiġri. Allura x’nistgħu nitgħallmu minn dak li kiteb Salamun f’​Ekkleżjasti 7:​13, 14? L-ewwel nett, hemm bżonn li nkunu realistiċi. Sakemm qed ngħixu fid-dinja taʼ Satana, aħna se jkollna ġranet tajbin u oħrajn ħżiena. Meta jkollna ġurnata tajba, aħna nistgħu nirringrazzjaw lil Alla għaliha u nqisuha bħala rigal mingħandu. It-tieni, Salamun ifakkarna li aħna ma nistgħux ‘inkunu nafu x’se jiġri fil-futur,’ jiġifieri ma nistgħux inkunu nafu jekk f’ġurnata hux se jinqalgħulna l-problemi jew jekk hux se jkollna affarijiet tajbin. Problemi mhux mistennija jiġu kemm fuq nies tajbin u kemm fuq dawk li mhumiex.

6. Ġeħova għala jistaʼ jħallina niffaċċjaw il-provi? (Lhud 12:​7, 11)

⁶ Jekk ikollna ħarsa xierqa lejn il-provi tagħna, se nindunaw li Ġeħova qed jgħallimna biex nistrieħu fuqu u mhux fuqna nfusna. Ġeħova dejjem ikun jaf minn xiex inkunu għaddejjin. Hu jiddispjaċih meta nbatu u dejjem se jgħinna. Anki meta jippermetti li ngħaddu minn “wied li hu mudlam ħafna,” hu jkompli jiggwidana, jaċċertana li jħobbna, u jagħtina s-saħħa li jkollna bżonn biex nissaportu. (Slm. 23:4) Meta ngħaddu minn żminijiet diffiċli, nistgħu wkoll nindunaw x’inhuma d-dgħufijiet tagħna. B’hekk, bl-għajnuna t’Alla nkunu nistgħu ntejbu l-kwalitajiet li jkollna bżonn nirranġaw. (Aqra Lhud 12:​7, 11.) Pereżempju, Ġob kellu jaħdem fuq l-umiltà. Ma kienx Ġeħova li ġab il-provi fuq Ġob, imma ppermettiehom u użahom biex jgħin lil Ġob jitgħallem lezzjonijiet importanti. (Ġob 42:​1-6) Imma jiġri x’jiġri, aħna nistgħu nkunu ċerti li jekk Ġeħova jippermetti sitwazzjoni li fiha nbatu, hu se jgħinna biex nibqgħu leali lejh u żgur se jippremjana.—Rum. 8:​35-39.

7. Għala tistaʼ tkun ferħan anki meta tiġi ppersegwitat għax taqdi lil Alla?

⁷ Aħna nistgħu nkunu ferħanin matul il-persekuzzjoni. Jekk qed tiġi ppersegwitat, taħsibx li Ġeħova mhux qed ibierkek. Għall-kuntrarju, il-fatt li qed tiġi ppersegwitat juri li Ġeħova huwa ferħan bik u se jippremjak. (Mat. 5:​10-12) Meta taħseb dwar il-persekuzzjoni b’dan il-mod, bħall-appostli, int tistaʼ tibqaʼ tħossok tajjeb miegħek innifsek u tkun ferħan għax qed tiġi ppersegwitat minħabba li int Kristjan. (Atti 5:​40-42) Barra minn hekk, int tistaʼ tgħin lil oħrajn jitgħallmu l-verità u “jigglorifikaw lil Alla.” (1 Pt. 2:12) Aħseb dwar Ġużeppi. Ġeħova għenu u ppremjah anki waqt li kien għadu l-ħabs u mhux biss wara li nħeles. U Ġeħova jistaʼ jagħmel l-istess miegħek.—Ġen. 39:​3, 23.

8. X’jistaʼ jgħinna wkoll biex nibqgħu leali anki meta nkunu qed inbatu?

⁸ It-tbatijiet tagħna se jispiċċaw. L-esperjenza taʼ Ġob tfakkarna li t-tbatijiet tagħna se jispiċċaw. Infatti, “Ġeħova bierek lil Ġob iktar minn qabel.” (Ġob 42:12) B’mod simili, Ġeħova se jberikna b’mod tal-għaġeb fid-dinja l-ġdida. Il-ħajja li għandna issa, li hi mimlija inkwiet, hija qasira mqabbla mal-ħajja taʼ dejjem li se ngawdu fil-futur. Ejja nibqgħu naqdu lil Ġeħova lealment u naraw kif hu se jżomm il-wegħdi tiegħu u jippremjana fid-dinja l-ġdida!—Mat. 24:13.

ĦARSA ŻBALJATA TISTAʼ TAGĦMEL IS-SITWAZZJONI AGĦAR

9. Ħarsa żbaljata dwar il-problemi, kif tistaʼ tagħmel is-sitwazzjoni agħar?

⁹ Hi x’inhi l-problema li nkunu qed niffaċċjaw, hemm bżonn li jkollna ħarsa tajba lejn is-sitwazzjoni ħalli nevitaw li noħolqu iktar problemi. Pereżempju, nistgħu naħsbu li Ġeħova hu l-wieħed li ġab din it-tbatija. Għal xi żmien, Ġob ħass li kien Ġeħova li qed jaqlagħlu l-problemi, u din il-ħarsa żbaljata wasslitu biex ‘jipprova juri kemm kien ġust hu u mhux Alla.’ (Ġob 32:2) B’mod simili, Nagħomi waħħlet f’Ġeħova għad-diffikultajiet li kellha. (Rut 1:​13, 20, 21) Li kieku Ġob u Nagħomi baqgħu jaħsbuha b’dan il-mod, huma kienu se jirrabjaw għal Ġeħova u jagħmlu ħsara lill-ħbiberija tagħhom miegħu. (Prov. 19:3) Imma Ġeħova għenhom jifhmu li ma kienx qed jikkastigahom, anzi li kien jimpurtah minnhom, u għax kienu leali lejh, hu ppremjahom.

10. Meta nkunu qed inbatu, x’nistgħu nibdew naħsbu?

¹⁰ Anki meta nkunu ċerti li mhux Ġeħova qed iġegħelna nbatu, jaf nibdew naħsbu jekk għadux jimpurtah minna. Din il-ħarsa negattiva tistaʼ tiħdilna saħħitna u tagħmilhielna iktar diffiċli biex nibqgħu naqduh. (Prov. 24:10) Ir-Re David u l-profeta Ħabakkuk għaddew minn żminijiet diffiċli u kultant ma kinux ċerti jekk Ġeħova kienx verament qed jismaʼ t-talb tagħhom għall-għajnuna. (Slm. 10:1; Ħab. 1:2) Però, huma xorta baqgħu jitolbuh u Ġeħova aċċerta lil dawn l-irġiel leali li hu kien qed jismagħhom u li se jgħinhom. Hu se jagħmel l-istess għalik.—Slm. 10:17.

11. Jekk ma jkollniex il-ħarsa taʼ Ġeħova dwar il-provi tagħna, kif nistgħu nibdew inħossuna?

¹¹ Jekk ma jkollniex il-ħarsa taʼ Ġeħova dwar il-provi tagħna, jaf meta jiġu fuqna ninħasdu, għax forsi naħsbu li Ġeħova ma kellux iħallihom. (1 Pt. 4:12) Id-dixxipli taʼ Ġesù sabuha diffiċli ħafna biex jifhmu li hu kien se jiffaċċja l-persekuzzjoni u jinqatel. (Luqa 18:​33, 34) Għalkemm Ġesù qalilhom ċar u tond minn xiex kellu jgħaddi, l-appostlu Pietru ħaseb li Alla ma kienx se jħalli lil Ġesù jgħaddi minn din it-tbatija. Ġesù kien jaf li ħsieb bħal dan setaʼ jfixklu milli jagħmel dak li jrid Ġeħova, allura kkoreġa lil Pietru. (Mrk. 8:​31-33) Anki wara li miet, id-dixxipli tiegħu xorta ma fehmux mill-ewwel għala kellu jmut. Però, Ġesù ma qatax qalbu minnhom. Wara li ġie rxoxtat, hu kellimhom u għenhom jifhmu għala kellu jbati billi ‘spjegalhom sew l-Iskrittura.’ (Luqa 24:​25-27, 32, 44-48) Billi mmeditaw fuq dak li Ġesù kien għallimhom, huma kienu se jkunu preparati għall-oppożizzjoni li kienu se jiffaċċjaw għax kienu dixxipli tiegħu. Aħna wkoll nistgħu nippreparaw għal meta jiġu l-provi billi nimmeditaw fuq dak li tgħid il-Bibbja dwar il-persekuzzjoni.

12. Kif nistgħu nħossuna jekk ikollna ħarsa żbaljata tas-sitwazzjoni tagħna?

¹² Jekk ikollna ħarsa żbaljata, nistgħu nħossu li s-sitwazzjoni tagħna hi agħar milli hi. Ġesù wera kif jistaʼ jiġri dan fl-eżempju li ta tal-ħaddiema fl-għalqa tad-dwieli. Xi ħaddiema bdew igergru għax ħasbu li ma ġewx imħallsin kemm kien ħaqqhom. Imma s-sid qal lil wieħed minnhom: “Sieħbi, m’għamiltlek xejn ħażin.” (Mat. 20:​10-13) Il-ħaddiema gergru għax huma kienu qed jistennew xi ħaġa li ma messhomx stennew u mhux għax kien hemm xi inġustizzja. Illum xi aħwa jistgħu jħossuhom l-istess. Pereżempju, jistgħu jħossu li mhux sewwa jekk mhux qed jaqdu lil Ġeħova f’xi inkarigu partikulari. X’jistaʼ jgħinna naħsbu kif jixtieq Ġeħova f’sitwazzjoni diffiċli?

DAK LI NISTGĦU NAGĦMLU META JINQALGĦU L-PROBLEMI

13. X’għandu mnejn jiġri meta jinqalgħu l-problemi?

¹³ Bħala qaddej taʼ Ġeħova, int taf x’tgħid il-Bibbja dwar it-tbatija. U x’aktarx qsamt versi mill-Bibbja m’oħrajn biex tgħinhom ikampaw mal-problemi tagħhom. Imma meta aħna stess ngħaddu minn xi ħaġa kerha, jaf insibuha diffiċli biex naħsbu bħalma jrid Ġeħova. Pereżempju, forsi tħoss li Ġeħova qed jikkastigak jew mhux qed jismaʼ t-talb tiegħek. X’tistaʼ tagħmel jekk tibda taħseb hekk?

14. Għal xiex tistaʼ titlob meta tkun qed tbati? (Filippin 4:13)

¹⁴ Itlob lil Ġeħova biex jgħinek. Lil Ġeħova għidlu dwar it-tbatija li għaddej minnha u kif qed teffettwak. Int tistaʼ titlob lil Ġeħova biex jgħinek b’mod speċifiku. Tistaʼ titolbu biex itik l-ispirtu qaddis tiegħu ħalli jkollok is-saħħa u l-għerf li għandek bżonn biex tissaporti. Imma ftakar li Ġeħova jaf iwiġiblek it-talb b’mod li ma tkunx qed tistenna. (Efes. 3:20) Hu jaf anki juża lill-anġli jew aħwa biex jgħinuk. (Slm. 34:7) Allura oqgħod attent għal kif jgħinek Ġeħova u rringrazzjah għal dan. Tistaʼ tkun ċert li Ġeħova jrid jagħtik l-ispirtu qaddis li għandek bżonn f’kull sitwazzjoni li tiffaċċja.—Aqra Filippin 4:13.

15. X’għandek bżonn tibqaʼ tagħmel fi żminijiet diffiċli? (Ara wkoll l-istampa.)

¹⁵ Żomm rutina spiritwali. Agħmel dak li tistaʼ anki jekk ma jirnexxilekx iżżomm mar-rutina li kellek qabel. Fi żminijiet taʼ “tbatija u diffikultà,” għandek bżonn iktar minn qatt qabel taħseb bħalma jaħseb Alla. (Slm. 119:143) Kompli aqra l-Bibbja kuljum, studjaha, u mmedita fuqha. Ħu kemm jistaʼ jkun sehem fil-ministeru, attendi u pparteċipa fil-laqgħat, u ibqaʼ qrib tal-aħwa. Tinqatax għalik waħdek, anki jekk ikollok aptit tagħmel hekk.—Prov. 18:1.

16. Meta tkun qed tbati liema dubji jistaʼ jkollok, u kif tistaʼ tneħħihom? (2 Korintin 10:​4, 5)

¹⁶ Neħħi d-dubji. Meta tkun qed tbati, jaf jibdew jgħaddu minn moħħok ċertu ħsibijiet li jkollok bżonn tegħlibhom, inkluż dubji dwarek innifsek jew dwar Ġeħova. (Aqra 2 Korintin 10:​4, 5.) Tistaʼ tneħħi dawn id-dubji billi ‘ssir taf dwar Alla’ mill-Bibbja u mill-pubblikazzjonijiet tal-organizzazzjoni tiegħu, biex b’hekk tkun tistaʼ taħseb bħalma jaħseb Ġeħova. Pereżempju, ġieli tiddubita jekk Ġeħova għadux ferħan bik? Jekk iva, studja l-esperjenza tal-appostlu Pawlu. Matul il-ministeru tiegħu, hu bata ħafna. Però, dan kompla jikkonvinċih li Ġeħova u Ġesù kienu ferħanin bih. (2 Kor. 11:​23-27) Ġieli taħseb jekk Ġeħova ħafirlekx verament għall-iżbalji li għamilt fil-passat? Fil-każ, agħmel lista taʼ skritturi li juru li Ġeħova jaħfer id-dnubiet. (Isa. 43:25) Imbagħad, aqra dawn il-versi u mmedita fuqhom. (Slm. 119:97) Għaddejt minn xi ħaġa kerha f’ħajtek li minħabba f’hekk ma kontx ċert jekk Alla jipproteġix lill-qaddejja leali tiegħu? Mela agħmel riċerka dwar għala Alla jippermetti t-tbatija u kif jipproteġina spiritwalment, jiġri x’jiġri. (Slm. 91:​9-12) Barra minn hekk, tistaʼ taqra dwar aħwa li għaddew minn xi ħaġa kerha u x’għamlu biex baqgħu jaqdu lil Ġeħova bil-ferħ.a

17. X’għandna nagħmlu meta tiġrilna xi ħaġa kerha?

¹⁷ Forsi bħalissa għaddej minn żmien tajjeb għax m’għandekx problemi serji. Mela rringrazzja u faħħar lil Ġeħova għall-affarijiet tajbin li qed tgawdi. (Ekk. 7:14) Imma meta tgħaddi minn xi ħaġa kerha, kompli ftakar dak li jgħid Ġeħova fil-Kelma tiegħu u afda fih kompletament. Meta tagħmel hekk, Ġeħova se ‘jsiblek mod kif tissaporti.’ (1 Kor. 10:13) Imma xi ngħidu dwar l-għeżież ħutna? Kif nistgħu ngħinuhom meta huma jgħaddu minn xi ħaġa kerha? Se niddiskutu dan fl-artiklu li jmiss.