Il-​Qima Vera Tgħaqqad lin-​Nies

GĦALKEMM ir-​reliġjon b’mod ġenerali għandha t-​tendenza li tifred lill-​umanità, il-​qima taʼ l-​uniku Alla veru għandha l-​qawwa li tgħaqqad lin-​nies. Meta Iżrael kien il-​ġens magħżul t’Alla, ħafna Ġentili sinċieri nġibdu lejn il-​qima vera. Per eżempju, Rut abbandunat l-​allat taʼ Mowab minfejn kienet ġejja oriġinarjament u qalet lil Nagħomi: “Niesek, niesi; Alla tiegħek, Alla tiegħi.” (Rut 1:16) Sa l-​ewwel seklu E.K., għadd kbir taʼ Ġentili kienu saru adoraturi taʼ dak Alla veru. (Atti 13:48; 17:4) Iktar tard meta l-​appostli taʼ Ġesù bdew jivvjaġġaw bl-​aħbar tajba lejn postijiet fil-​bogħod, nies sinċieri oħrajn ngħaqdu fil-​qima taʼ dak Alla veru. “Dortu lejn Alla u tlaqtu l-​idoli biex taqdu lil Alla ħaj u veru,” kiteb l-​appostlu Pawlu. (1 Tessalonikin 1:9) Illum, għandha l-​qima lil dak Alla veru din il-​qawwa li tgħaqqad?

Ix-xettiċi jinsistu li mhux tajjeb li wieħed jgħid li hemm “adoraturi veri” jew “Alla veru.” Jistaʼ jkun li jħossuhom hekk għax ma jafu bl-​ebda sors minfejn jistgħu jitgħallmu l-​verità. Imma nies minn ambjenti differenti li jfittxu l-​verità indunaw li l-​qima m’hijiex kwistjoni taʼ x’jippreferu huma personalment. L-​uniku wieħed li jistħoqqlu l-​qima tagħna huwa l-​Ħallieq taʼ kollox—Alla Jehovah. (Apokalissi 4:11) Hu dak Alla veru, u hu għandu d-​dritt jiddeċiedi kif għandna nqimuh.

Biex jgħinna nifhmu x’jirrikjedi minna, Jehovah kkomunika magħna permezz tal-​Kelma tiegħu, il-​Bibbja. Kważi kulħadd fid-​dinja llum jistaʼ juża l-​Bibbja, jew sħiħa jew partijiet minnha. Iktar minn hekk, l-​Iben t’Alla qal: “Jekk iżżommu fil-​kelma tiegħi, . . . tagħrfu l-​verità.” (Ġwann 8:​31, 32) Għalhekk, wieħed jistaʼ jsir jaf il-​verità. U miljuni taʼ nies taʼ qalb onesta li qabel kellhom reliġjonijiet differenti, bil-​kuraġġ qed iħaddnu din il-​verità u qed jingħaqdu fil-​qima vera.—Mattew 28:​19, 20; Apokalissi 7:​9, 10.

L-​Unità mad-​Dinja Kollha fi Żmienna!

Profezija taʼ l-​għaġeb fil-​ktieb Bibliku taʼ Sofonija titkellem dwar tipi taʼ nies differenti li jinġabru flimkien. Din tgħid: “Jiena [Alla Jehovah] mbagħad lill-​popli nerġaʼ nagħtihom [“lingwa pura,” NW], biex isem il-​Mulej ilkoll isejjħu, jaqduh qalb waħda.” (Sofonija 3:9) Kemm hija stampa sabiħa din taʼ nies li tbiddlu u li issa qed jaqdu lil Alla f’unità!

Dan meta kellu jiġri? Sofonija 3:8 jgħid: “Stennewni, oraklu tal-​Mulej, għal dakinhar li fih inqum biex nixhed; għaliex hu digriet tiegħi li jien niġbor il-​ġnus, niġmaʼ s-​saltniet, sabiex il-​qilla tiegħi nixħet fuqhom, nixħet ix-​xrar taʼ l-​għadab kollu tiegħi, għax f’nar il-​korla għajjura tiegħi l-​art kollha għad tintemm.” Iva, fiż-​żmien li Jehovah jiġmaʼ l-​ġnus, imma qabel ma jixħet fuqhom ix-​xrar taʼ l-​għadab tiegħu, hu jagħti l-​bidla għal lingwa pura lill-​ġwejdin taʼ l-​art. Dak iż-​żmien huwa issa, għax il-​ġbir tal-​ġnus kollha għall-​gwerra taʼ nhar il-​jum il-​kbir taʼ Alla li Jistaʼ Kollox f’Armageddon diġà beda.—Apokalissi 16:​14, 16.

Biex jgħaqqad lin-​nies tiegħu, Jehovah jagħtihom lingwa pura. Din il-​lingwa ġdida tinkludi fehma eżatta tal-​verità tal-​Bibbja dwar Alla u l-​iskopijiet tiegħu. Biex wieħed jitkellem il-​lingwa pura jrid jemmen il-​verità, jgħallimha lil ħaddieħor, u jgħix fi qbil mal-​liġijiet u l-​prinċipji t’Alla. Irid iwarrab il-​politika li tifred u jqaċċat minn qalbu l-​attitudnijiet egoisti li huma karatteristiċi taʼ din id-​dinja, bħan-​nazzjonaliżmu li tant jifred lin-​nies u r-​razziżmu. (Ġwann 17:14; Atti 10:​34, 35) Kulmin għandu qalbu sinċiera u jħobb il-​verità jistaʼ jitgħallem din il-​lingwa. Aħseb ftit kif il-​ħames persuni li ssemmew fl-​artiklu taʼ qabel—li xi darba tant kellhom reliġjon differenti minn taʼ xulxin—issa jinsabu magħqudin fil-​qima taʼ l-​uniku Alla veru, Jehovah.

Magħqudin fil-​Qima Vera

Meta Fidelia, dik li darba kienet Kattolika Rumana ferventi, xtrat Bibbja għat-​tifla biex tużaha l-​iskola, hi talbet lill-​qassis tagħha jispjegalha minnha x’kien ġralhom il-​ħamest itfal tagħha li kienu mitulha. “Kemm ħassejtni diżappuntata!” tgħid hi. Allura meta żaruha x-​Xhieda taʼ Jehovah, hi staqsiethom l-​istess mistoqsija. Wara li dawn qrawlha mill-​Bibbja tagħha stess il-​verità dwar xi jsir mill-​mejtin, hi ntebħet li l-​knisja kienet qarrqet biha. Tgħallmet li l-​mejtin ma jafu xejn, u għalhekk m’humiex qed ibatu fil-​Limbu jew xi mkien ieħor. (Salm 146:4; Koħèlet 9:5) Fidelia rmiet l-​istatwi reliġjużi kollha li kellha, telqet il-​knisja, u bdiet tistudja l-​Bibbja. (1 Ġwann 5:21) Għal dawn l-​aħħar għaxar snin, hi kellha l-​pjaċir li tgħallem il-​verità Skritturali lil ħaddieħor.

Tara, minn Katmandu, marret toqgħod f’pajjiż fejn hemm ftit tempji tal-​Ħindu. Għalhekk, hi żaret il-​knisja Metodista bit-​tama li tissodisfa l-​bżonnijiet spiritwali tagħha. Imma ma sabet l-​ebda tweġiba għall-​mistoqsija tagħha dwar is-​sofferenzi tal-​bniedem. Imbagħad marru jżuruha x-​Xhieda taʼ Jehovah u offrewlha studju tal-​Bibbja. Tara tgħid: “Bdejt ninduna li Alla kollu mħabba ma jistax ikun li jaħti għas-​sofferenzi kollha fid-​dinja . . . Tassew kont ferħana bit-​tama taʼ dinja ġdida mimlija paċi u qbil.” (Apokalissi 21:​3, 4) Tara neħħiet l-​istatwi kollha tal-​Ħindu, waqfet issegwi d-​drawwiet reliġjużi taʼ pajjiżha, u sabet ferħ veru f’li tgħin biex tissodisfa l-​bżonnijiet spiritwali t’oħrajn bħala Xhud taʼ Jehovah.

Panya, il-​Buddist, kien wieħed li jaqra x-​xorti meta x-​Xhieda taʼ Jehovah kellmuh għall-​ewwel darba f’Bangkok, għalhekk il-​profeziji tal-​Bibbja tassew kienu jinteressawh. Panya rrakkonta: “Meta tgħallimt għala s-​sitwazzjoni bħalissa hija differenti minn kif kellu l-​iskop il-​Ħallieq fil-​bidu u kif għamel arranġamenti biex ineħħi l-​ħsara li saret minn dawk li jirrifjutaw lilu u s-​sovranità tiegħu, kien bħallikieku tneħħa velu minn quddiem għajnejja. L-​affarijiet kollha li kellhom x’jaqsmu mal-​messaġġ tal-​Bibbja kienu jaqblu flimkien. Sirt inħobb lil Jehovah bħala persuna; dan qanqalni biex nipprattika dak li kont naf li huwa tajjeb. Kont ħerqan biex ngħin lil oħrajn jaraw id-​differenza bejn l-​għerf tal-​bniedem u l-​għerf divin. L-​għerf veru tassew biddilli ħajti.”

Maż-​żmien, lil Virgil bdew jiġuh dubji kbar fuq it-​twemmin reliġjuż tiegħu. Minflok ma beda jitlob lil Alla għal xi mezz biex jgħin lin-​nies suwed li hu kien iqishom bħala organizzazzjoni razzista li kienet tnissel mibegħda għall-​bojod, hu talab għall-​verità, kienet x’kienet, kienet fejn kienet. “Meta qomt l-​għada fil-​għodu wara li kont tlabt bil-​ħrara lil Alla,” jiftakar Virgil, “sibt rivista tat-​Torri taʼ l-​Għassa fid-​dar. . . . Probabbli xi ħadd għaddihieli minn taħt il-​bieb.” Ma damx ma beda jistudja l-​Bibbja fil-​fond max-​Xhieda taʼ Jehovah. Jgħid ukoll: “Għall-​ewwel darba f’ħajti, ħassejtni sodisfatt. . . . Bdejt inħoss raġġ taʼ tama ġewwa fija.” Virgil malajr ngħaqad maʼ dawk li joffru lin-​nies l-​unika tama vera kif inhi mniżżla fil-​Kelma t’Alla, il-​Bibbja.

Charo mill-​Amerika Latina kienet impressjonata meta Xhud jisimha Gladys ratha mħabbta wisq bit-​tfal żgħar tagħha u bdiet tgħinha billi tiħodha sas-​suq. Maż-​żmien, Charo aċċettat l-​offerta li għamlitilha Gladys, jiġifieri għal studju tal-​Bibbja fid-​dar bla ħlas. Meta Charo tgħallmet mill-​Bibbja tagħha stess li n-​nies tajbin mhux sejrin kollha fis-​sema imma li Jehovah se jbierek ukoll lin-​nies fuq l-​art b’ħajja taʼ dejjem, baqgħet mistagħġba. (Salm 37:​11, 29) Charo stess ilha għal dawn l-​aħħar 15-il sena taqsam din it-​tama m’oħrajn.

Immaġina l-​art kollha miżgħuda b’nies sinċieri magħqudin fil-​qima taʼ Jehovah, l-​uniku Alla veru! Din m’hijiex xi fantasija. Hija wegħda minn Jehovah. Permezz tal-​profeta tiegħu Sofonija, Alla ddikjara: “U nħalli f’nofsok poplu umli u mċekken. U f’isem il-​Mulej ifittxu l-​kenn. . . . Ma jagħmlux ħażen, ma jgħidux kliem b’ieħor, u lsien qarrieq ma jibqax iżjed f’fommhom, . . . [u] ma jbeżżagħhom ħadd.” (Sofonija 3:​12, 13) Jekk din il-​wegħda togħġbok, niżżel f’qalbek dak li tħeġġeġ il-​Bibbja: “Fittxu l-​Mulej ilkoll, intom, l-​umli taʼ l-​art, li tagħmlu ordnijietu; fittxu l-​ġustizzja, fittxu l-​umiltà: biex forsi f’jum il-​korla tal-​Mulej ikollkom fejn tistkennu.”—Sofonija 2:3.