Hemm Xi Ħaġa li Tistaʼ Verament Tgħaqqad lin-​Nies?

HU X’INHU t-​twemmin tiegħek, int probabbilment taqbel li żgur hemm uħud li jħobbu l-​verità fi kważi r-​reliġjonijiet kollha. Tistaʼ ssib nies fost il-​Ħindu, il-​Kattoliċi, il-​Lhud, u oħrajn li minn qiegħ qalbhom japprezzaw dak li hu veru u huma lesti li jfittxuh. Madankollu, ir-​reliġjon tidher li tifred lill-​umanità. Xi wħud saħansitra jużaw ir-​reliġjon biex jilħqu skopijiet mill-​agħar. Jistaʼ jkun li xi darba nies sinċieri mir-​reliġjonijiet kollha li għandhom imħabba għat-​tajjeb u l-​verità jkunu magħqudin? Jistgħu qatt jingħaqdu biex jilħqu l-​istess skop?

Kemm hu inkwetanti meta naraw li r-​reliġjon qed issir iktar u iktar il-​kaġun taʼ frid! Ikkunsidra xi ftit minn dan l-​inkwiet. Il-​Ħindu jiġġieldu kontra l-​Buddisti fi Sri Lanka. Il-​Protestanti, il-​Kattoliċi, u l-​Lhud xerrdu d-​demm f’ħafna ġlied differenti. “Il-​Kristjani” jiġġieldu mal-​Musulmani fil-​Bosnia, fiċ-​Ċeċnija, fl-​Indoneżja, u fil-​Kosovo. U f’Marzu taʼ l-​2000, jumejn taʼ ġlied konness mar-​reliġjon ħallew 300 Niġerjan mejjet. Tabilħaqq, il-​mibegħda reliġjuża kebbset il-​qilla taʼ dan il-​ġlied.

Taʼ spiss nies sinċieri jitkexkxu bl-​affarijiet mill-​agħar li jsiru f’isem ir-​reliġjon. Per eżempju, ħafna li jmorru l-​knisja jitwaħħxu bil-​fatt li xi qassisin li abbużaw sesswalment mit-​tfal ġew tollerati uffiċjalment minn ċerti knejjes. Oħrajn iħossuhom jistħu ħafna bil-​frid li hemm fost ħafna setet hekk imsejħin Kristjani fuq ċerti kwistjonijiet bħalma huma l-​omosesswalità u l-​abort. Jidher ċar li r-​reliġjon m’għaqqditx lill-​bnedmin. Madankollu, hemm uħud minn ħafna reliġjonijiet li ġenwinament iħobbu l-​verità, bħalma juru l-​esperjenzi li ġejjin.

Kienu Jixxennqu għall-​Verità

Fidelia, mara sinċiera u devota, kienet tattendi l-​Knisja Kattolika taʼ San Franġisk f’La Paz, il-​Bolivja. Hi kienet tinżel għarkobbtejha quddiem ix-​xbieha tal-​Madonna, tixtri l-​aqwa xemaʼ li setgħet, u tixgħelha quddiem il-​kurċifiss. Kull ġimgħa, kienet tagħti ħafna ikel lill-​qassis biex jitqassam lill-​foqra. Madankollu, ħamsa mit-​trabi taʼ Fidelia mietu qabel ma setgħu jiġu mgħammdin. Meta l-​qassis qalilha li kollha kienu qed ibatu fid-​dlam tal-​Limbu, Fidelia staqsiet bejnha u bejn ruħha, ‘Kif jistaʼ jkun dan, jekk Alla mimli ħniena?’

Tabiba fil-​mediċina jisimha Tara trabbiet bħala Ħindu f’Katmandu, in-​Nepal. Billi kienet tosserva d-​drawwiet antiki ferm taʼ l-​antenati tagħha, hi kienet tqim lill-​allat tagħha fit-​tempji Ħindu u kellha l-​istatwi d-​dar. Imma Tara kienet tħossha mħawda b’ċerti mistoqsijiet bħal: Għala hawn daqstant tbatija? In-​nies għala jmutu? Ftit li xejn sabet tweġibiet sodisfaċenti fir-​reliġjon tagħha.

Panya, mill-​banda l-​oħra, trabba bħala Buddist f’dar ħdejn kanal f’Bangkok, it-​Tajlandja. Hu ġie mgħallem li t-​tbatija tiġi minħabba l-​affarijiet ħżiena li wieħed ikun għamel fil-​ħajjiet li għex qabel u li biex jeħles minnha jkun irid jeħles mix-​xewqat kollha tiegħu. Bħal Buddisti sinċieri oħrajn, hu ġie mgħallem li jrid jirrispetta ferm l-​għerf tal-​patrijiet tal-​libsa safra li kienu jiġu d-​dar tiegħu kull fil-​għodu maʼ sbiħ ix-​xemx għall-​karità. Hu kien jagħmel il-​meditazzjoni u jġemmaʼ statwi taʼ Budda għax kien jemmen li dawn kienu se jipproteġuh. Wara li kellu inċident serju li ħallieh paralizzat minn qaddu ’l isfel, Panya żar il-​monasterji Buddisti, għax bis-​sinċerità kollha kien jittama li jitfejjaq b’mod mirakoluż. Imma hu la fieq u lanqas ma sab tidwil spiritwali. Minflok, introduċewh għall-​ispiritiżmu u beda jinvolvi ruħu fih.

Virgil twieled fl-​Istati Uniti u ngħaqad mal-​Musulmani Suwed meta kien il-​kulleġġ. Hu b’mod żeluż qassam il-​letteratura tagħhom, li kienet tgħallem li l-​bniedem abjad huwa x-​Xitan. Huma ħasbu, li kien għalhekk li l-​bojod għamlu tant kattiveriji kontra s-​suwed. Għalkemm, Virgil kien jemmen dan b’mod sinċier, kien imħawwad b’diversi mistoqsijiet: Kif jistaʼ jkun li l-​bojod kollha huma ħżiena? U għala tant mill-​ippridkar madwar id-​dinja għandu x’jaqsam mal-​flus?

Għalkemm Charo trabbiet fl-​Amerika t’Isfel, li fil-​biċċa l-​kbira hija Kattolika, din kienet Protestanta sinċiera. Kienet ferħana li ma kinitx tieħu sehem fl-​idolatrija taʼ madwarha. Charo kienet tieħu pjaċir tmur il-​knisja kull nhar taʼ Ħadd għas-​servizz kollu emozzjoni, fejn kienet tgħajjat “Hallelujah!” u kienet tieħu sehem fil-​kant u ż-​żfin reliġjuż li kienu jsiru wara. Charo kienet temmen bis-​sinċerità kollha li kienet ġiet salvata u li kienet twieldet mill-​ġdid. Kienet tħallas l-​għexur mill-​paga tagħha lill-​knisja, u meta l-​evanġelista favorit tagħha fuq it-​televixin kien jitlob il-​kontribuzzjonijiet, kienet tibgħatlu l-​flus għat-​tfal fl-​Afrika. Madankollu, meta staqsiet lill-​kappillan tagħha għala Alla taʼ mħabba jitturmenta l-​erwieħ fl-​infern, hi indunat li ma kellu l-​ebda tweġiba sodisfaċenti. Iktar tard, hi skopriet ukoll li l-​kontribuzzjonijiet tagħha ma ntużawx biex jgħinu lit-​tfal taʼ l-​Afrika.

Għalkemm dawn il-​ħames individwi trabbew f’ambjenti differenti, kellhom xi ħaġa komuni bejniethom. Huma ħabbew il-​verità u fittxew b’mod sinċier tweġibiet veri għall-​mistoqsijiet tagħhom. Imma setgħu huma verament jingħaqdu f’qima vera? L-​artiklu li jmiss se jwieġeb din il-​mistoqsija.

[Sors tal-​Istampa f’paġna 3]

G.P.O., Jerusalem

[Stampa f’paġna 4]

Jistaʼ jkun li nies li jiġu minn ambjenti differenti verament jingħaqdu flimkien?