Kif Tistaʼ Tipproteġi lil Uliedek?

WARA xi snin li kien ilu jattendi l-​iskola fejn kien joqgħod, Wernera beda studji avanzati flimkien maʼ madwar 3,000 żagħżugħ ieħor f’São Paulo, il-​Brażil. Għall-​ewwel darba, hu osserva lil studenti sħabu jbigħu u jużaw id-​drogi. Peress li kien magħmul żgħir, dan malajr sar vittma taʼ riti degradanti u perikolużi li kienu jagħmlu studenti akbar fl-​età meta xi ħadd kien jingħaqad magħhom.

Oħt Werner, Eva, ukoll kellha l-​problemi. Billi riedet tagħmel ħilitha kollha, din tant studjat intensament li spiċċat eżawrita u moħħha konfuż. Bħal adolexxenti oħrajn, Werner u Eva kellhom bżonn protezzjoni kemm fiżika kif ukoll emozzjonali. X’tip t’għajnuna jeħtieġu wliedek? Kif tistaʼ tħejjihom għall-​ħajja adulta? Tabilħaqq, liema futur tixtieq għal uliedek?

Jeħtieġu Iktar minn Susteniment

Aħseb għal mument dwar l-​isfida li jiffaċċjaw il-​ġenituri llum biex jipproteġu lil uliedhom. Peress li l-​kwalità tal-​ħajja tal-​familja qabdet in-​niżla u żdied il-​faqar, f’ħafna pajjiżi l-​għadd taʼ tfal li jgħixu fit-​toroq qiegħed jiżdied. Li tfal żgħar jintbagħtu jaħdmu huwa riżultat tan-​nuqqas li jiġu protetti mill-​esplojtazzjoni. L-​abbuż tad-​drogi wkoll jeqred ħafna żgħażagħ. Per eżempju, meta ċertu żagħżugħ Brażiljan qabad il-​vizzju tad-​drogi, il-​paċi għebet minn ġewwa daru. Minbarra t-​tensjoni emozzjonali li ġarrbu l-​ġenituri tiegħu, dawn kellhom jitħabtu biex iħallsu l-​kontijiet taʼ binhom ħalli jirkupra, fil-​waqt li t-​traffikanti tad-​droga li ma jafux x’inhi ħniena marru wara biebhom jitolbu ħlashom.

Minkejja l-​pressjonijiet tal-​ħajja, madankollu, ħafna ġenituri jkomplu jitħabtu biex jipprovdu għal uliedhom mhux biss ikel, ħwejjeġ, u saqaf fuq rashom imma wkoll protezzjoni mill-​vjolenza, mill-​abbuż tad-​drogi, u minn problemi oħrajn. Din hija xi ħaġa nobbli, imma hija biżżejjed? Xi ngħidu għal protezzjoni emozzjonali u spiritwali? Ħafna jirrealizzaw li biex ix-​xogħol tal-​ġenituri jkun taʼ suċċess, dan jinkludi li jittrattaw sfidi li jinvolvu l-​għażla tal-​ħbieb u r-​rikreazzjoni taʼ wliedhom. Madankollu, kif jistgħu l-​ġenituri jevitaw li jkunu jew protettivi żżejjed jew permissivi żżejjed? Int mistieden tikkunsidra t-​tweġibiet misjubin fl-​artiklu li jmiss.

[Nota taʼ taħt]