Għożż Il-​Ħajja Vera

HIJA DIN il-​ħajja kulma hemm? Billi tinkuraġġina biex ‘niksbu qabda soda fuq il-​ħajja vera,’ il-​Bibbja tindika li hemm iktar. (1 Timotew 6:17-19) Jekk il-​ħajja preżenti tagħna m’hijiex il-​ħajja vera, liema waħda hija?

Il-kuntest taʼ l-​iskrittura taʼ qabel juri li hija l-​“ħajja taʼ dejjem” li fuqha persuna li tibżaʼ minn Alla għandha tikseb qabda soda. (1 Timotew 6:12) Għall-​maġġoranza minna, dan ifisser ħajja taʼ dejjem fuq l-​art. Adam, l-​ewwel bniedem, kellu l-​prospett li jgħix għal dejjem fuq art magħmula ġenna. (Ġenesi 1:26, 27) Kellu jmut biss jekk jiekol mis-​“siġra taʼ l-​għarfien tat-​tajjeb u tal-​ħażin.” (Ġenesi 2:17) Imma minħabba li Adam u martu, Eva, b’mod diżubbidjenti kielu minn dik is-​siġra, Alla ppronunzja s-​sentenza tal-​mewt. ‘Fil-​jum li kielu minnha,’ mietu f’għajnejn Alla u bdew in-​niżla tagħhom lejn il-​mewt fiżika. Il-​ħajja tagħhom ma kenitx iktar tal-​kwalità li kienu gawdew għall-​ewwel.

Il-​Mogħdija Għall-​“Ħajja Vera”

Sabiex jagħmel “il-​ħajja vera” possibbli, Alla Jehovah għamel arranġament biex isalva lill-​umanità. Biex jgħinna nifhmu dan l-​arranġament, ejjew nimmaġinaw fabbrika żgħira. Il-​magni kollha taʼ ġo fiha huma difettużi u jikkaġunaw l-​inkwiet għal dawk li jħaddmuhom għaliex l-​ewwel ħaddiem snin ilu injora l-​manwal taʼ l-​istruzzjonijiet u ħassar il-​magni kollha. Dawk li llum iħaddmuhom jistgħu biss jagħmlu l-​aħjar tagħhom biex jaħdmu b’dak li għandhom. Il-​propjetarju tal-​fabbrika jrid jibni mill-​ġdid il-​magni biex jgħin lill-​ħaddiema tiegħu, u qiegħed iwarrab il-​fondi neċessarji għal dak l-​iskop.

L-ewwel ‘ħaddiem fuq il-​magna,’ Adam, ma kienx jgħożż il-​ħajja li ngħatatlu. Għalhekk, għadda għal fuq in-​nisel tiegħu ħajja imperfetta, simili għal magna li taħdem ħażin. (Rumani 5:12) Bħall-​ħaddiema tal-​fabbrika li ġew wara, u li ma setgħux jirranġaw is-​sitwazzjoni, in-​nisel t’Adam ma kinux kapaċi jiksbu l-​ħajja vera għalihom infushom. (Salm 49:7) Biex jikkorreġi din is-​sitwazzjoni li kienet tidher bla tama, Jehovah bagħat lill-​Iben uniġenitu tiegħu fuq l-​art biex jixtri lura l-​ħajja taʼ dejjem għall-​umanità. (Luqa 1:35; 1 Pietru 1:18, 19) Billi miet mewta taʼ sagrifiċċju għan-​nom taʼ l-​umanità, l-​Iben uniġenitu t’Alla, Ġesù Kristu, ipprovda l-​fondi​—il-​ħajja li tikkorrispondi maʼ dik li tilef Adam. (Mattew 20:28; 1 Pietru 2:22) B’dan is-​sagrifiċċju prezzjuż, Jehovah issa għandu l-​bażi biex jipprovdi l-​ħajja vera.

Għall-umanità ubbidjenti, is-​sagrifiċċju bħala rahan taʼ Ġesù se jfisser il-​ħajja eterna fuq art magħmula ġenna. (Salm 37:29) Din it-​tama hija estiża lil dawk kollha li jsalvaw mill-​“gwerra tal-​jum il-​kbir t’Alla li Jistaʼ Kollox,” li hija rriferuta bħala Ħar-Magedon. (Rivelazzjoni 16:​14-16) Din se teħles mill-​ħażen kollu taʼ fuq l-​art. (Salm 37:9-11) Dawk fil-​memorja t’Alla li jmutu qabel dak iż-​żmien se jiġu rxoxtati għall-​Ġenna rrestawrata fuq l-​art u se jkollhom il-​prospett li jgawdu l-​ħajja vera li hemm merfugħa għal dawk kollha li jobdu lil Alla.—Ġwann 5:28, 29.

Bżonn Li Ngħożżu L-​Ħajja Preżenti Tagħna

Dan ma jfissirx li nistgħu b’mod xieraq nuru li ma nikkalkulawx il-​qdusija tal-​ħajja preżenti tagħna. Sejjer il-​propjetarju tal-​fabbrika jaħli l-​ħin u l-​flus biex jibni mill-​ġdid magna għal ħaddiem li ma jiħux ħsiebha? Minflok, m’huwiex dak li jħaddem se jafda l-​magna mibnija mill-​ġdid lil persuna li għamlet l-​aħjar tagħha biex tmantni l-​waħda qadima?

Il-ħajja hija għotja prezzjuża mingħand Jehovah. Bħala s-​sors benevolenti taʼ dik l-​għotja, jridna ngħożżuha. (Salm 36:9; Ġakbu 1:17) Billi tkellem dwar it-​tħassib taʼ Jehovah għan-​nies fuq l-​art, Ġesù qal: “Saħansitra x-​xagħar kollu taʼ rjuskom huwa magħdud.” (Luqa 12:7) Jehovah ikkmanda lill-​Iżraeliti biex ma joqtlux, li naturalment kien jinkludi li ma joqtlux lilhom infushom. (Eżodu 20:13) Dan jgħinna nevitaw li nqisu s-​suwiċidju bħala għażla.

Billi jafu l-​interess b’imħabba taʼ Jehovah fil-​ġid tagħna, nies li jibżgħu minn Alla japplikaw prinċipji Bibliċi għall-​prattiċi tal-​lum. Per eżempju, minħabba li l-​Kristjani veri huma mitlubin biex ‘inaddfu lilhom infushom minn kull tniġġis tal-​laħam u taʼ l-​ispirtu, billi jipperfezzjonaw il-​qdusija fil-​biżaʼ t’Alla,’ huma jistmerru t-​tabakk u drogi vizzjużi li jbiddlu l-​moħħ.—2 Korintin 7:1.

L-interess t’Alla fil-​ħajja umana jidher iktar fil-​parir tiegħu biex inżommu “qalb kalma” u biex nevitaw kondotta immorali. (Proverbji 14:30; Galatin 5:19-21) Billi nżommu maʼ dawn il-​livelli għoljin, niġu protetti minn affarijiet bħal korla u mardiet trażmessi sesswalment li huma taʼ detriment.

It-tħassib taʼ Jehovah għall-​ħajjiet tan-​nies tiegħu huwa evidenti fit-​twissija biex iżommu lura milli jieklu żżejjed u jixorbu żżejjed. (Dewteronomju 21:18-21; Proverbji 23:20, 21) Il-​Kristjani huma mwissijin li persuni rgħiba u sakranazzi m’humiex se jirtu s-​Saltna t’Alla, jiġifieri, qatt m’huma se jesperjenzaw il-​ħajja vera. (1 Korintin 6:9, 10; 1 Pietru 4:3) Billi jinkuraġġixxi l-​moderazzjoni, Jehovah jgħallimna biex nibbenefikaw lilna nfusna.—Isaija 48:17.

Meta nżommu mal-​livelli t’Alla, nuru li aħna ngħożżu l-​ħajja preżenti tagħna. M’għandniex xi ngħidu, saħansitra iktar sinjifikanti hija l-​ħajja vera. Ladarba hija għal dejjem, il-​veri Kristjani jagħtu iktar importanza lilha milli lill-​ħajja preżenti tagħhom. Meta Ġesù Kristu ssagrifika ħajtu, hu ssuġġetta lilu nnifsu għar-​rieda taʼ Jehovah. L-​ubbidjenza lejn Missieru kienet tfisser ferm iktar għalih mill-​ħajja tiegħu hawn fuq l-​art. Il-​korsa taʼ Ġesù rriżultat fl-​irxoxt tiegħu u f’li hu jirċievi ħajja immortali fis-​sema. (Rumani 6:9) Il-​mewt tiegħu tfisser ukoll ħajja taʼ dejjem għall-​umanità ubbidjenti li jeżerċitaw fidi fis-​sagrifiċċju bħala rahan tiegħu.—Ebrej 5:8, 9; 12:2.

Liġi Vitali Fuq Id-​Demm

Wieħed jistaʼ jifhem li s-​segwaċi taʼ Ġesù jirriflettu l-​mod taʼ ħsieb tiegħu. Huma jfittxu li jogħġbu lil Alla fl-​affarijiet kollha, saħansitra bħalma għamel Kristu. Minn banda, dan jispjega għala jirrifjutaw it-​trasfużjonijiet tad-​demm, li xi tobba jsejħulhom bħala li jsalvaw il-​ħajja. Ejjew naraw kif persuna turi li tgħożż il-​ħajja vera billi tirrifjuta t-​trasfużjonijiet tad-​demm.

Bħal Ġesù Kristu, il-​Kristjani veri jixtiequ li jkunu ħajjin f’għajnejn Alla, u dak jirrikjedi ubbidjenza kompleta Lejh. Il-​Kelma t’Alla tikkmanda lis-​segwaċi taʼ Kristu: ‘Ibqgħu astjenu minn affarijiet issagrifikati lil idoli u minn demm u minn affarijiet imgħallqin u minn fornikazzjoni.’ (Atti 15:28, 29) Din il-​liġi dwar id-​demm għala kienet inkluża fost il-​kmandi li jorbtu lill-​Kristjani?

Il-Liġi mogħtija lill-​Iżraeliti rrikjediet astinenza mid-​demm. (Levitiku 17:13, 14) Il-​Kristjani m’humiex taħt il-​Liġi Mosajka. Imma jirrealizzaw li l-​kmand biex ma jittikilx demm ġie qabel il-​Liġi; kien ingħata iktar kmieni lil Noè wara d-​Dilluvju. (Ġenesi 9:3, 4; Kolossin 2:13, 14) Dan il-​kmand applika għan-​nisel kollu taʼ Noè, li tiegħu l-​ġnus kollha taʼ l-​art huma dixxendenti. (Ġenesi 10:32) Iktar minn hekk, il-​Liġi Mosajka tgħinna naraw ir-​raġuni għall-​insistenza t’Alla fuq il-​qdusija tad-​demm. Wara li pprojbixxa lill-​Iżraeliti li jikkonsmaw id-​demm taʼ kwalunkwe xorta, Alla qal: “Ir-​ruħ tal-​laħam hija fid-​demm, u jien stess poġġejtu fuq l-​artal għalikom biex tagħmlu tpattija għal erwieħkom, għaliex huwa d-​demm li jagħmel tpattija permezz tar-​ruħ fih.” (Levitiku 17:11) Id-​demm kien irriservat minn Alla għall-​użu taʼ sagrifiċċju fuq l-​artal. Il-​Liġi tiegħu dwar il-​qdusija tad-​demm tirrivela l-​awtorità tiegħu fuq il-​ħajja kollha fuq l-​art. (Eżekjel 18:4; Rivelazzjoni 4:11) Billi naraw ħajjitna kif jaraha Jehovah, nirrealizzaw li ma tappartjenix lilna imma hija biss fdata lilna minn Alla.

Bħalma dak li jħaddem il-​magna fit-​tixbieha tagħna kien responsabbli għall-​magna, aħna fdati bil-​ħajja preżenti tagħna. X’kont tagħmel li kieku l-​magna tiegħek kien jinħtiġilha t-​tiswija u mekkanik issuġġerixxa li jsewwiha billi juża partijiet li kienu speċifikament ipprojbiti fil-​manwal taʼ min iħaddimha? Ma kontx int tikkonsulta mekkaniks oħrajn biex tara jekk il-​magna tistax tiġi msewwija fi qbil maʼ l-​istruzzjonijiet tal-​manwal? Il-​ħajja umana hija bil-​wisq iktar importanti u komplessa minn magna. Fil-​Kelma mnebbħa tiegħu, il-​manwal li jżomm il-​bnedmin ħajjin, Dak li Għamilna jipprojbixxi l-​użu tad-​demm biex isostni l-​ħajja. (Dewteronomju 32:46, 47; Filippin 2:16) M’huwiex raġonevoli li wieħed iżomm mal-​ħtiġijiet taʼ dak il-​manwal?

Tassew, pazjenti Kristjani li jitolbu li l-​każ tagħhom jiġi ttrattat bla demm m’humiex qegħdin jirrifjutaw il-​kura medika kollha. Huma sempliċement qegħdin jitolbu għal kura li se turi rispett għall-​ħajja tagħhom​—kemm preżenti kif ukoll futura. Tobba li b’kuraġġ jirrispettaw il-​waqfa meħuda minn Kristjani jixhdu favur il-​benefiċċji talli jikkurawhom f’armonija mar-​rikjesta tagħhom. “Il-​laqgħa tiegħi max-​Xhieda taʼ Jehovah wasslitni għal sett ġdid taʼ valuri,” jgħid wieħed kirurgu li kien jamministra d-​demm b’mod estensiv. Issa jipprova jikkura saħansitra lil dawk li m’humiex Xhieda mingħajr demm.

Ngħożżu L-​Ħajja Vera

X’kien is-​sett ġdid taʼ valuri li dan il-​kirurgu sab waqt li kkura lix-​Xhieda taʼ Jehovah? Issa hu jirrealizza illi li tikkura pazjent jinvolvi mhux sempliċement il-​parti tal-​ġisem li hija effettwata mill-​marda imma l-​persuna kollha. M’għandux pazjent, jew pazjenta, jitħalla jitlob l-​aqwa kura għall-​ġid fiżiku, spiritwali, u emozzjonali tiegħu?

Għal Kumiko li għandha 15-il sena, trasfużjoni tad-​demm biex tikkura l-​lewkemja qattiela tagħha kienet l-​agħar għażla li setgħet issir. Li tipprova ttawwal ħajjitha b’dan il-​mezz għal ftit ġimgħat, xhur, jew saħansitra snin ma kienx valla pena għal dak li kellu jiswielha għall-​futur. Billi ddedikat ħajjitha tal-​preżent lil Alla Jehovah bħala waħda mix-​Xhieda tiegħu, irrispettat il-​qdusija tal-​ħajja u tad-​demm. Għalkemm missierha u qraba oħrajn opponew bil-​qawwa l-​waqfa tagħha, Kumiko baqgħet soda. It-​tabib tagħha darba staqsieha: “Jekk Alla tiegħek jaħfer in-​nuqqasijiet, m’huwiex hu se jaħfirlek saħansitra jekk taċċetta trasfużjoni tad-​demm?” Kumiko rrifjutat li tagħmel kompromess u b’hekk tirrifjuta t-​twemmin tagħha bbażat fuq il-​Bibbja. ‘Billi żammet qabda soda mal-​kelma tal-​ħajja,’ hi żammet il-​waqfa tagħha. (Filippin 2:16) Bħalma qalet nannitha li ma kenitx taʼ l-​istess twemmin, “Kumiko ma kenitx se tabbanduna l-​fidi tagħha.” F’qasir żmien l-​attitudni taʼ missierha u nannitha kif ukoll dik tat-​tobba li kienet taħthom inbidlet.

Il-fidi soda taʼ Kumiko f’Alla Jehovah, li jistaʼ jirxoxtaha mill-​mewt, qanqlet lil ħafna qlub. Waqt li kienet għadha ħajja, talbet bil-​ħniena lil missierha: “Saħansitra jekk immut, se niġi rxoxtata fil-​Ġenna. Imma jekk int tinqered f’Ħar–Magedon, m’inix se narak. Mela jekk jogħġbok studja l-​Bibbja.” Missierha sempliċement baqaʼ jgħid: “Meta tfiq, hekk nagħmel.” Imma meta Kumiko mietet minħabba l-​marda kiefra tagħha, missierha poġġa fit-​tebut tagħha nota li qalet: “Narak fil-​Ġenna, Kumiko.” Wara l-​funeral, kellem lil dawk li attendew għall-​funeral u qal: “Jien wegħidt lil Kumiko li kont se naraha fil-​Ġenna. Għalkemm għadni ma nistax nemmen dan minħabba li ma studjajtx biżżejjed, jien iddeterminat li neżaminah. Jekk jogħġobkom għinuni.” Oħrajn fil-​familja tagħha wkoll bdew jistudjaw il-​Bibbja.

Kumiko kellha rispett veru għall-​ħajja u riedet tgħix. Hi apprezzat dak kollu li t-​tobba għamlu biex isalvaw il-​ħajja preżenti tagħha. Billi qablet maʼ l-​istruzzjonijiet fil-​manwal tal-​Ħallieq, madankollu, tat prova li hi kienet tgħożż il-​ħajja vera. Għal miljuni, dik se tkun ħajja bla tmiem fuq art magħmula ġenna. Se tkun int fosthom? (w95 1/15)

[Stampa f’paġna 6]

[Stampa f’paġna 7]