Kemm Hija Prezzjuża L-​Ħajja Għalik?

ŻAGĦŻUGĦ taʼ taħt l-​għoxrin sena tilef ħajtu meta qabeż mit-​tminn sular taʼ blokk t’appartamenti. Hu kien qara ktieb li ddeskriva qabża fatali bħala li hija “ħielsa minn uġigħ jew nuqqas taʼ stabbilità jew biżaʼ; minflok, tinħass tajba.” L-​awtur taʼ dan il-​ktieb, ippubblikat fil-​Ġappun, sostna li kien qiegħed biss joffri s-​“suwiċidju bħala wieħed mill-​għażliet tal-​ħajja.”

Nies li jikkommettu suwiċidju m’humiex l-​uniċi wħud li juru li ma jikkalkulawx il-​ħajja llum. Sewwieqa traskurati wkoll juru ftit li xejn rispett għall-​ħajja. Xi wħud saħansitra jixorbu u jsuqu, b’ħafna għaddejjin sparati mit-​triq għal ġo ħalq il-​mewt.

Oħrajn juru kemm ma jqisux lil ħajjithom taʼ valur mill-​enfasi li jpoġġu fuq il-​pjaċiri. Nies li jpejpu jirrifjutaw li jeħilsu lilhom infushom mis-​sigaretti, għalkemm it-​tipjip jistaʼ jikkaġuna l-​mewt u ġie msejjaħ bħala suwiċidju bil-​lajma. Minflok ma jżommu l-​kastità f’din id-​dinja miġnuna għas-​sess, ħafna jsegwu korsa laxka li taʼ spiss twassal għall-​mewt.

Mingħajr saħansitra ma jindunaw biha, xi wħud iċaħħdu lilhom infushom minn snin taʼ ħajja minħabba li jieklu żżejjed, jixorbu żżejjed, ma jagħmlux eżerċizzju suffiċjenti, u jfittxu l-​pjaċiri. L-​awtur Ġappuniż Shinya Nishimaru wissa: “Drawwiet taʼ ikel bla limitu jfixklu l-​funzjonijiet fiżjoloġiċi, u l-​ġiri wara xejn ħlief konvenjenza u pjaċiri jherri l-​vitalità tan-​nies.” Xi wħud huma taʼ l-​istess opinjoni bħal dawk taʼ żmien l-​antik li qalu: “Ħa jkun hemm l-​ikel u x-​xorb, għax għada se mmutu.”—Isaija 22:13; 1 Korintin 15:32.