Hija l-​Għotja tal-​Ilsna Parti mill-​Kristjanità Vera?

“JIEN ħassejt, hekk kif smajtu jitlob bl-​ilsna, bħal li kieku kien hemm l-​arja kkargata bl-​elettriku,” qal Bill wara li hu u sitta min-​nies oħra nġabru quddiem il-​predikatur ħdejn l-​artal fil-​knisja. Qegħdin dawn l-​esperjenzi jirrepetu l-​ħidma tal-​ewwel seklu tal-​ispirtu qaddis? Jidentifikaw dawn lir-​reliġjon tal-​Bibbja? Nistgħu nsibu tweġibiet sodisfaċenti billi neżaminaw l-​Iskrittura bir-​reqqa.

Il-Bibbja tirrivela li meta xi għotja mirakoluża tal-​ispirtu ġiet trażmessa, tal-​inqas wieħed mit-​12-il appostlu jew l-​appostlu Pawlu kienu preżenti. L-​ewwel minn tliet każi mniżżlin dwar xi ħadd li jitkellem bl-​ilsna seħħ fost il-​120 dixxiplu taʼ Ġesù miġburin f’Ġerusalemm f’Pentekoste tas-​sena 33 E.K. (Atti 2:1-4) Tliet snin u nofs wara, waqt li grupp taʼ Taljani mhux ċirkonċiżi kienu qed jisimgħu lil Pietru jippriedka, huma rċevew l-​ispirtu u bdew “jitkellmu bl-​ilsna u jfaħħru bil-​kbir lil Alla.” (Atti 10:44-48) U 19-il sena wara Pentekoste, madwar is-​sena 52 E.K., Pawlu tkellem maʼ grupp f’Efesu u poġġa jdejh fuq 12-il dixxiplu. Huma wkoll “bdew jitkellmu bl-​ilsna u jipprofetizzaw.”−Atti 19:6.

Għala l-​Għotja tal-​Ilsna?

Eżatt qabel ma telaʼ s-​sema, Ġesù qal lis-​segwaċi tiegħu: “Intom se tirċievu qawwa meta l-​ispirtu qaddis jasal fuqkom, u se tkunu xhieda tiegħi kemm f’Ġerusalemm u . . . sal-​iktar parti ’l bogħod tal-​art.” (Atti 1:8) Innota li hu b’hekk ta ħjiel taʼ kif eżatt kien se jiġi mwettaq dan ix-​xogħol monumentali taʼ xiehda—bil-​għajnuna tal-​ispirtu qaddis.

It-teknoloġija moderna tal-​komunikazzjoni li tagħmilna kapaċi nibagħtu messaġġi mad-​dinja kollha f’ħafna lingwi ma kinetx teżisti dak iż-​żmien. L-​aħbar tajba riedet tiġi mifruxa primarjament bil-​kelma mitkellma, u f’dan il-​għotja mirakoluża taʼ li wieħed jitkellem bl-​ilsna barranin kienet se tkun t’għajnuna kbira. Dan kien il-​każ hekk kif il-​Kristjani tal-​ewwel seklu ppridkaw lil Lhud u lil proseliti f’Ġerusalemm f’Pentekoste tas-​sena 33 E.K. Partjani, Medi, Elamiti, Kretani, Għarab, abitanti tal-​Mesopotamja, tal-​Ġudea, tal-​Kappadoċja, taʼ Pontus, u tad-​distrett tal-​Asja, kif ukoll viżitaturi minn Ruma, semgħu “l-​affarijiet manjifiċi t’Alla” bil-​lingwa tagħhom stess u fehmu dak li ntqal. Tlett elef malajr emmnu.—Atti 2:5-11, 41.

Fatt li taʼ spiss jiġi injorat hu illi li wieħed jitkellem bl-​ilsna kien wieħed mid-​disaʼ ħidmiet tal-​ispirtu qaddis li l-​appostlu Pawlu semmaʼ fl-​ittra tiegħu lill-​Kristjani f’Korintu. Għalkemm li wieħed jitkellem bl-​ilsna kien meqjus minn Pawlu bħala għotja żgħira, kien prezzjuż għall-​kongregazzjoni bikrija biex ixerred l-​aħbar tajba dwar is-​Saltna tas-​sema t’Alla. Kienet waħda mill-​“għotjiet” li kkontribwew għat-​tkabbir numeriku u t-​tisħiħ tal-​kongregazzjoni ġdida taʼ Kristjani.—1 Korintin 12:7-11; 14:24-26.

Id-diversi ħidmiet tal-​ispirtu qaddis fl-​ewwel seklu, inkluż li wieħed jitkellem bl-​ilsna, kienu wkoll evidenza viżibbli li Alla ma kienx għadu qiegħed juża l-​kongregazzjoni taʼ Iżrael, li kien ilha 1,600 sena, bħala l-​poplu speċjali tiegħu. Bla dubju, l-​approvazzjoni tiegħu kienet issa fuq il-​kongregazzjoni Kristjana ġdida, stabbilita mill-​Iben uniġenitu tiegħu.—Qabbel Ebrej 2:2-4.

Dawn il-​manifestazzjonijiet tal-​ispirtu kienu blokki prinċipali taʼ bini f’li tiġi stabbilita l-​kongregazzjoni Kristjana żagħżugħa u f’li tiġi mgħejjuna biex issir adulta. Pawlu spjega li wara li jkunu qdew l-​iskop tagħhom, dawn il-​għotjiet mirakolużi kellhom jieqfu: “Kemm jekk hemm għotjiet ta pprofetizzar, dawn se jispiċċaw; kemm jekk hemm ilsna, dawn se jieqfu.”—1 Korintin 13:8.

Iva, il-​Bibbja hija ċara li l-​għotja tal-​ilsna kellha tieqaf. Imma meta? Atti 8:18 jirrivela li l-​għotjiet tal-​ispirtu kienu mogħtijin “bit-​tqegħid tal-​idejn tal-​appostli.” B’mod evidenti, allura, bil-​mewt tal-​aħħar appostlu, il-​għotjiet tal-​ispirtu ma kellhomx jibqgħu jiġu mgħoddijin lil ħaddieħor—inkluż li wieħed jitkellem bl-​ilsna. Għalhekk, meta dawk li kienu rċevew dawn il-​għotjiet mingħand l-​appostli mietu wkoll, il-​għotja mirakoluża kellha tieqaf. Sa dak in-​nhar il-​kongregazzjoni Kristjana kellha ż-​żmien biex issir stabbilita sewwa u kellha tkun infirxet maʼ ħafna artijiet.

“Ilsna Mhux Magħrufin” u l-​Interpretazzjoni Tagħhom

Il-​qawmien mill-​ġdid preżenti taʼ li wieħed jitkellem bl-​ilsna ġiet “meqjusa minn xi wħud bħala l-​imġieba emozzjonali taʼ esibizzjonisti m’humiex stabbli waqt li oħrajn iqisuha bħala identika mal-​fenomenu taʼ li wieħed jitkellem bl-​ilsna taʼ żminijiet Appostoliċi.” F’laqgħat fil-​knisja tal-​lum fejn li wieħed jitkellem b’“ilsna mhux magħrufin” iseħħ, dan ġeneralment jinvolvi tfaqqigħa estatika taʼ ħsejjes li ma tistax tifhimhom. Fi qbil maʼ dan, persuna waħda stqarret: “Jien nuża l-​għotja tal-​ilsna tiegħi fil-​biċċa l-​kbira fil-​privat għall-​meditazzjoni tiegħi stess.... Inħossni naqra mbarazzat quddiem nies oħrajn.” Ieħor irrakkonta: “Jien nismat l-​kliem tiegħi stess, ma nifhmux, imma nibqaʼ nħoss lil ilsieni mbottat biex jitkellem.”

Liema tagħrif taʼ valur veru huwa mogħti minn dawn l-​ilsna mhux magħrufin, u x’ingħidu dwar interpretazzjoni? Dawk li jsostnu li jinterpretaw dan id-​diskors offrew spegazzjonijiet differenti taʼ l-​istess ħaġa mitkellma li ma tistax tifhimha. Għala differenti? Huma jippruvaw jispjegaw differenza bħal din billi jgħidu li “Alla ta lil persuna waħda interpretazzjoni waħda tad-​diskors u lil persuna oħra interpretazzjoni oħra.” Individwu wieħed irrikonoxxa: “Innotajt okkażjonijiet fejn l-​interpretazzjoni ma kinetx tat-​tip eżatt.” D. A. Hayes, fil-​ktieb tiegħu The Gift of Tongues, irrefera għal okkażjoni fejn raġel irrifjuta li jinterpreta d-​diskors taʼ mara li tkellmet b’ilsien mhux magħruf għaliex “il-​lingwa kienet l-​iktar oxxena mill-​oxxenità.” X’kuntrast hu dak mal-​kliem bl-​ilsna li eżista fl-​ewwel seklu u li kien attwalment għall-​bini tal-​kongregazzjoni!—1 Korintin 14:4-6,12, 18.

Xi wħud illum tassew isostnu li semgħu interpretazzjonijiet tal-​għaġeb, u huma jistgħu jemmnu sinċerament li Alla juża din il-​għotja meta “jixtieq jagħti messaġġ dirett lin-​nies.” Imma liema messaġġ mingħand Alla għandna bżonn illum li Ġesù Kristu u l-​appostli ma fornewx għalina? Pawlu, li hu nnifsu kellu l-​għotja tal-​ispirtu qaddis, qal: “L-​Iskrittura kollha hija mnebbħa minn Alla u taʼ benefiċċju għat-​tagħlim, għat-​twiddib, biex tiddritta l-​affarijiet, biex tiddixxiplina fit-​tjieba, biex il-​bniedem t’Alla jistaʼ jkun kompetenti għalkollox, imgħammar bis-​sħiħ għal kull xogħol tajjeb.”−2 Timotew 3:16, 17.

Il-fatt hu li l-​kongregazzjoni Kristjana m’għadhiex fl-​infanzja tagħha, u b’hekk rivelazzjonijiet divini jew għotjiet mirakolużi tal-​ispirtu m’għadhomx iktar meħtieġa biex jikkonfermaw l-​irwol tagħha. Il-​Bibbja twissi: “Saħansitra jekk aħna jew xi anglu mis-​sema kellna niddikjarawlkom bħala aħbar tajba xi ħaġa iktar lil hinn [ “mhux fi qbil ma’, ” The New English Bible] minn dak li ddikjarajnielkom bħala aħbar tajba, ħa jkun misħut.”−Galatin 1:8.

Li wieħed jitkellem b’mod mirakoluż bl-​ilsna m’għadux iktar bżonnjuż, u m’hemm ebda bażi Biblika biex wieħed jemmen li dan huwa parti mill-​vera Kristjanità llum. Issa li l-​Bibbja hija sħiħa u disponibbli kullimkien, għandna dak li neħtieġu fil-​Kelma t’Alla. Din tħallina niksbu għarfien eżatt dwar Jehovah u dwar Ibnu li jwassal għall-​ħajja taʼ dejjem.—Ġwann 17:3; Rivelazzjoni 22:18, 19.

Saħansitra fl-​ewwel seklu, l-​appostlu Pawlu kien imġiegħel jikteb lill-​kongregazzjoni f’Korintu biex jirranġaw il-​ħarsa tagħhom dwar il-​għala l-​għotja tal-​ilsna kienet mogħtija lil Kristjani bikrin. Milli jidher, xi wħud kienu msaħħrin bil-​għotja tal-​ilsna, u kienu qed iġibu rwieħhom bħal tfal ċkejknin, immaturi spiritwalment. Importanza żejda ġiet mogħtija lill-​“ilsna.” (1 Korintin 14:1-39) Pawlu enfasizza li mhux il-​Kristjani kollha fl-​ewwel seklu kienu jitkellmu b’ilsna mirakolużi. Ma kienx neċessarju għas-​salvazzjoni tagħhom. Saħansitra lura f’dak iż-​żmien meta kienet teżisti, il-​għotja tal-​ilena kienet sekondarja għall-​ipprofetizzar mirakoluż. Li wieħed jitkellem bl-​ilsna ma kienx, u ma hux, xi ħtieġa għal Kristjani biex jaqilgħu l-​ħajja taʼ dejjem.—1 Korintin 12:29, 30; 14:4, 5.

Il-​Forza wara Ilsna Mhux Magħrufin Illum

Xi wħud jemmnu li l-​forza li timbotta lil dawk li jitkellmu bl-​ilsna llum hija l-​mexxejja reliġjużi kariżmatiċi li jħeġġu lill-​membri tal-​merħla tagħhom biex jiksbu din l-​abbiltà. F’xi każi tiġi minħabba l-​emozzjonaliżmu u l-​iżbilanċ. Cyril G. Williams, f’Tongues of the Spirit, igħid li saret “f’ħafna każi tikketta taʼ l-​ipprivileġġjati ġewwa l-​grupp” u tagħti lil dak li jkun “statura u awtorità f’għajnejn il-​grupp kif ukoll f’għajnejhom stess.” Il-​motivazzjoni, għalhekk, tistaʼ tkun xewqa li tappartjeni lill-​grupp superjuri tal-​ilsna mhux magħrufin.

Donald P. Merrifield, dak li darba kien president tal-​Universita taʼ Loyola, innota li “l-​ilsna jistgħu jkunu esperjenza isterika, jew, skond xi wħud, waħda dijabolika.” Il-​membru tal-​kleru Todd H. Fast qal: “Din tal-​ilsna hi ħaġa kontroversjali. Ix-​xitan għandu ħafna modi kif jaħdem fuqna.” Il-​Bibbja nfisha twissina li Satana u d-​demonji tiegħu kapaċi jinfluwenzaw lin-​nies u jikkontrallawlhom kliemhom. (Atti 16:17, 18) Ġesù aġixxa kontra spirtu demoniku li kien qanqal lil wieħed raġel biex igħajjat u jaqaʼ minn tulu fl-​art. (Luqa 4:33-35) Pawlu wissa li ‘Satana kellu jittrasforma lilu nnifsu f’anġlu tad-​dawl.’ (2 Korintin 11:14) Dawk illum li jfittxu l-​għotja tal-​ilsna li Alla m’għadux isawwab fuq il-​poplu tiegħu huma tabilħaqq qegħdin jinfetħu għall-​qerq taʼ Satana, li, aħna mwissijin, kellu juża “kull xogħol taʼ qawwa u sinjali giddibin u għeliem.”−2 Tessalonkin 2:9, 10.

L-​Ilsna—U l-​Kristjanità Vera

Il-​Kristjani tal-​ewwel seklu li rċevew l-​għotja taʼ li jitkellmu bl-​ilsna wżawha biex jispjegaw l-​affarijiet manjifiċi t’Alla. Pressjoni ġiet magħmula fuq il-​ħtieġa li jinterpretaw ċar u tond il-​messaġġ imwassal bl-​ilsna sabiex jistaʼ jiġi mifhum minn kulħadd u jirriżulta f’istruzzjoni għal ħafna. (1 Korintin 14:26-33) Pawlu wissa: “Jekk permezz tal-​ilsien ma tlissnux diskors mifhum faċilment, kif se jkun magħruf x’inhu jintqal? Se tkunu, fil-​fatt, qegħdin titkellmu fl-​arja.”−1 Korintin 14:9.

Waqt li l-​ispirtu t’Alla ta lill-​Kristjani bikrin il-​għotja tal-​ilsna, ma ġagħlhomx jitkellmu geġwiġija taʼ kliem li ma jiftihemx jew li ma tistax tittraduċih. Fi qbil mal-​parir taʼ Pawlu, l-​ispirtu qaddis ipprovda kliem li rriżulta f’li l-​aħbar tajba tiġi b’iktar ħeffa “ppridkata fil-​ħolqien kollu li hu taħt is-​sema.”−Kolossin 1:23.

Dwar dawn l-​aħħar jiem tas-​sistema preżenti, Ġesù Kristu kkmanda: “Fil-​ġnus kollha l-​aħbar tajba [tas-Saltna stabbilita] trid tiġi ppridkata l-​ewwel.” (Mark 13:10) Bħal fl-​ewwel seklu, il-​ħolqien kollu jrid jismaʼ l-​messaġġ tas-​Saltna. Dan huwa possibbli għaliex il-​Bibbja issa ġiet tradotta, sħiħa jew parti minnha, fi kważi 2,000 lingwa. L-​istess spirtu li mela lill Kristjani bikrin biex jitkellmu bi qlubija u bil-​kuraġġ huwa issa qed jappoġġja x-​xogħol kbir u tal-​għaġeb tal-​ippridkar fil-​kongregazzjoni tal-​ġurnata tal-​lum tax-​Xhieda taʼ Jehovah. Bil-​fomm u billi jużaw it-​teknoloġija moderna tal-​istampar biex iwasslu verità Skritturali permezz tal-​paġni stampati, huma jitkellmu l-​“lingwa pura.” Il-​messaġġ qiegħed jasal għand ’il fuq minn 200 pajjiż u gżira tal-​baħar. Ix-​Xhieda taʼ Jehovah jispikkaw bħala poplu li huwa mqanqal mill-​ispirtu t’Alla biex jagħmel magħruf maʼ kulħadd l-​affarijiet manjifiċi t’Alla.—Sofonija 3:9; 2 Timotew 1:13.