Futur li Tistaʼ Torbot Fuqu!

Wasalt f’salib it-​toroq. Sinjal wieħed jgħidlek, “Investi l-​futur tiegħek fil-​bnedmin u l-​wegħdi tagħhom.” L-​ieħor jgħidlek, “Afda f’Alla u fis-​Saltna tiegħu.” Liema triq se taqbad?

IT-​TRIQ għaqlija hi li tafda f’Alla. “Min jismaʼ lili,” jgħid hu, “jgħix moħħu mistrieħ, bla ebda tfixkil, bla biżaʼ tal-​ħsara.” (Proverbji 1:33) Aħna nisimgħu mill-​Ħallieq tagħna billi nagħtu kas it-​tagħlim li hemm fil-​Bibbja, għax nafu li dan hu taʼ min joqgħod fuqu. (2 Timotju 3:16) Din il-​fiduċja għandha bażi soda? Dażgur li għandha! Per eżempju, kif rajna fit-​tieni artiklu taʼ din is-​serje, il-​Bibbja biss tispjega eżatt għala l-​bnedmin m’humiex kwalifikati biex jaħkmu lilhom infushom b’suċċess. Ma taqbilx int li dak li tgħid il-​Bibbja jaqbel mal-​fatti?

L-istess eżattezza tistaʼ taraha fil-​profeziji tal-​Bibbja. Per eżempju, il-​Bibbja bassret il-​kundizzjonijiet tal-​biki li jimmarkaw dawn “l-​aħħar jiem.” Dawn nistgħu narawhom b’għajnejna stess. (Mattew 24:3-7; 2 Timotju 3:1-5) Il-​Bibbja bassret ukoll li l-​bnedmin kellhom jheddu l-​kundizzjoni tal-​pjaneta. Alla se ‘jeqred lil dawk li qed jeqirdu l-​art,’ jgħid Rivelazzjoni 11:18.

Meta dan il-​kliem inkiteb xi 2,000 sena ilu, ħadd ma kien jgħaddilu minn moħħu li minħabba l-​bniedem kien se jkun hemm fenomeni bħat-​tinġis taʼ l-​arja, tal-​baħar, u taʼ l-​art; iż-​żjieda fis-​sħana globali; u l-​estinzjoni bil-​massa taʼ l-​ispeċi. Imma mhux illum! Iva, Alla qatt ma jigdeb. Il-​Kelma miktuba tiegħu titwettaq dejjem sa l-​iċken dettall.a (Titu 1:2; Ebrej 6:18) Fil-​fatt, Alla jorbot ismu maʼ kelmtu.

Isem li Tistaʼ Tafdah

Sewwasew bħalma ċekk isir validu bil-​firma li jkollu fuqu, l-​isem persunali t’Alla—Ġeħova—jiggarantixxi li l-​wegħdi kollha li hemm fil-​Bibbja se jseħħu.b “Fl-​isem qaddis tiegħu t-​tama tagħna,” qal wieħed mill-​kittieba tal-​Bibbja li spiss Alla ħa ħsiebu bi mħabba.—Salm 33:21; 34:5, 7 (34:4, 6, NW).

Waqt li jorbot l-​isem t’Alla mal-​mod kif hu jieħu ħsieb ħaddieħor bħala missier, Proverbji 18:10 jgħid: “Isem il-​Mulej hu torri qawwi; fih jistkenn il-​ġust b’moħħu mistrieħ.” Bl-​istess mod, Rumani 10:13 jgħid: “Kulmin isejjaħ isem Ġeħova jiġi salvat.” M’għandniex xi ngħidu, l-​isem persunali t’Alla m’huwiex xi taliżman li jħarsek mill-​ħażen. Minflok, hu Alla stess li jsalva lil dak li jkun, u bħalma jgħid il-​vers, dawk li jsejħulu jagħmlu dan għaliex jafdawh b’għajnejhom magħluqin, għax jafu tajjeb ferm x’reputazzjoni perfetta għandu. Salm 91:14 jgħid: “La tħabbeb miegħi [maʼ Ġeħova], jien neħilsu; la għaraf ismi, jiena nħarsu.”

Staqsi lilek innifsek, ‘F’min nafda jien—f’Alla jew fil-​bniedem?’ Ix-​Xhieda taʼ Ġeħova għamlu l-​għażla tagħhom favur Alla u s-​Saltna tiegħu, mhux għaliex bilfors iridu jemmnu dan jew għaliex jemmnu kulma jisimgħu, imma fuq il-​bażi taʼ konvinzjoni soda bbażata fuq għarfien eżatt dwar il-​Bibbja. (Ebrej 11:1; 1 Ġwanni 4:1) Minħabba f’hekk, ma jibżgħux mill-​futur imma ‘jithennew bit-​tama’ li għandhom quddiemhom. Huma jistidnuk biex ikollok l-​istess ħarsa pożittiva.—Rumani 12:12.

[Noti taʼ taħt]

[Kumment f’paġna 9]

Sewwasew bħalma ċekk isir validu bil-​firma li jkollu fuqu, l-​isem t’Alla jiggarantixxi li l-​wegħdi kollha li hemm fil-​Bibbja se jseħħu

[Kaxxa f’paġna 9]

KEMM ISEM U KEMM GARANZIJA

Ġeħova, l-​isem t’Alla, m’huwiex sempliċi tikketta.c B’liema mod? Dan l-​isem ifisser “Hu Jġiegħel li Jsir.” Fi ftit kliem, Alla għandu l-​imħabba, il-​qawwa, u l-​għerf biex isir kulma jiddeċiedi li hu neċessarju sabiex iwettaq l-​iskop u l-​kelma tiegħu. Per eżempju, jistaʼ jsir Salvatur għan-​nies sewwa, Qerried għall-​ħżiena, Semmiegħ it-​talb, jew Missier li jħobb—kulma jagħżel li jsir.

“Jien hu Alla,” jgħid Ġeħova, “sa mill-​bidu ngħarraf it-​tmiem, . . . u ngħid: ‘Il-​ħsieb tiegħi għad iseħħ, u nagħmel kull ma rrid.’” (Isaija 46:9, 10) Peress li Alla hu dejjem leali lejn l-​iskop tiegħu u peress li ismu, jew ir-​reputazzjoni tiegħu, hu involut, il-​Kelma miktuba tiegħu se sseħħ żgur. “Alla m’hux bniedem biex jigdeb.”—Numri 23:19.

[Nota taʼ taħt]