Futur fis-​Sigurtà Taħt il-​Ħakma t’Alla

L-​ANSJETAJIET tagħna dwar il-​futur dalwaqt jispiċċaw, għax Alla se jieħu ħsieb il-​pjaneta Art billi jistabbilixxi l-​gvern tiegħu stess, imsejjaħ is-​Saltna t’Alla. Ġesù Kristu kellu f’moħħu dan il-​futur mill-​isbaħ meta għallem lis-​segwaċi tiegħu biex jitolbu: “Ħa tiġi saltnatek. Ħa jkun li trid int, kif fis-​sema, ukoll fuq l-​art.”—Mattew 6:9, 10.

Is-Saltna t’Alla la se tikkoopera mal-​mexxejja politiċi umani u lanqas ma se taħdem permezz tagħhom. Minflok, se telimina kull traċċa taʼ tmexxija umana indipendenti minn Alla, bħalma turi l-​profezija li ġejja taʼ Danjel dwar “l-​aħħar jiem,” iż-​żmien li qed ngħixu fih. (2 Timotju 3:1) “Fi żmien dawn is-​slaten, Alla tas-​sema jqajjem saltna li ma tinqered qatt. . . . Hija tfarrak u ttemm is-​saltniet l-​oħra kollha [magħmulin mill-​bniedem], waqt li hi tibqaʼ wieqfa għal dejjem.” (Danjel 2:44) Dan il-​kliem ma jagħti ebda faraġ jew tama lil dawk li jippreferu t-​tmexxija tal-​bniedem, imma għal dawk li jixtiequ li Alla jeżerċita s-​sovranità tiegħu permezz taʼ Saltnatu, dan il-​kliem fih wegħda meraviljuża.

Futur mill-​Isbaħ!

Meta s-​Saltna t’Alla taħkem fuq l-​art kollha, is-​sudditi tagħha mhux se jkunu mifrudin minħabba l-​politika, ir-​razza, ir-​reliġjon, jew il-​fruntieri tal-​pajjiżi. Minflok, se jifformaw fratellanza globali f’unità permezz tal-​verità spiritwali u l-​imħabba ġenwina. (Ġwanni 13:34, 35; 17:3, 17) Iva, taħt il-​ħakma tas-​Saltna se ‘tħaddar il-​ġustizzja’ u se jkun hemm “sliem kotran sa ma jintemm il-​qamar.”—Salm 72:7.

Minbarra dawn l-​affarijiet, is-​Saltna t’Alla se tgħin lill-​bnedmin sottomessi biex isiru perfetti mentalment u fiżikament, billi se tneħħi kull mard, tbatija, u mewt. (Rivelazzjoni 21:3, 4) X’se jkun ir-​riżultat? Il-​pjaneta tagħna se ssir ġenna taʼ l-​art f’kull aspett, u b’hekk se twettaq l-​iskop oriġinali t’Alla bħalma tlissen fl-​Għeden.a—Ġenesi 1:28.

L-​Unika Aħbar Tajba taʼ Veru

Meta kien qed jagħti s-​sinjal kompost tiegħu “taʼ tmiem is-​sistema,” Ġesù inkluda aspett taʼ min jinnotah b’mod partikulari. (Mattew 24:3-7) Hu qal: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.”—Mattew 24:14.

Fi qbil mar-​rieda t’Alla, fl-​2007, kważi 7 miljun Xhud taʼ Ġeħova ppridkaw il-​messaġġ tas-​Saltna lill-​ġirien tagħhom f’236 pajjiż, u bil-​ferħ taw iktar minn 1.4 biljun siegħa mill-​ħin persunali tagħhom għal dan ix-​xogħol. Ix-​Xhieda għala huma daqshekk konvinti dwar il-​wegħdi li jinsabu fil-​Bibbja? It-​tweġiba hi tassew sempliċi. Bħalma jispjega l-​artiklu li jmiss, Alla dejjem iżomm kelmtu.—Rumani 3:4.

[Nota taʼ taħt]

[Kumment f’paġna 7]

Il-​Bibbja tgħid li se jkun hemm “sliem kotran”