Il-​Ħarsa tal-​Bibbja

“Ilsir tal-​Mulej m’għandux għalfejn jiġġieled, imma għandu jkun ġentili maʼ kulħadd.”​—2 Timotju 2:24.

QABEL ma nitwieldu, il-​ġilda tagħna tibda tiżviluppa l-​abbiltà li tħoss. Mit-​twelid nixxennqu għall-​karezzi teneri t’ommna. Fit-​tfulija, it-​tendenza tagħna li nitbissmu, l-​abbiltà li niżviluppaw emozzjonalment, u saħansitra x-​xewqa tagħna li niksbu l-​abbiltà li nikkomunikaw jiġu influwenzati mill-​ammont t’affezzjoni li nirċievu mill-​ġenituri tagħna.

Madankollu, il-​Bibbja bassret li matul l-​aħħar jiem, in-​nies ikunu “diżubbidjenti lejn il-​ġenituri, ingrati, żleali, mingħajr imħabba naturali.” Kwalitajiet teneri bħall-​qalb tajba u l-​mogħdrija se jkunu neqsin ħafna peress li n-​nies “ikunu jħobbu lilhom infushom” u jkunu “feroċi, mingħajr imħabba għat-​tajjeb.”​—2 Timotju 3:​1-3.

Ħafna llum iħossu li għandhom ikunu ħorox u bla qalb. Isostnu li l-​ġentilezza hija sinjal taʼ dgħjufija. Iżda huwa dan veru?

Ġentili, iżda Setgħana

Alla Ġeħova hu deskritt bħala “gwerrier.” (Eżodu 15:3) Hu s-​Sors aħħari taʼ kull setgħa. (Salm 62:12 [62:​11, NW]; Rumani 1:​20) Iżda, is-​saħħa taʼ Ġeħova ma tellfitux milli juri ‘affezzjoni b’tenerezza kbira u ħniena’ meta ġie biex jippremja lil Ġob, raġel li wera fedeltà. (Ġakbu 5:11) Fil-​mod kif kien jittratta lill-​ġens taʼ Iżrael, Ġeħova ddeskriva l-​iktar relazzjoni tenera billi xebbah is-​sentimenti li kellu lejhom maʼ dawk t’omm li treddaʼ u li tħoss “għal bin ġufha.”​—Isaija 49:15.

Ġesù wkoll wera kemm is-​saħħa u kemm il-​ġentilezza. Hu akkuża bl-​aħrax lill-​mexxejja reliġjużi ipokriti taʼ żmienu. (Mattew 23:​1-33) Ukoll, keċċa b’saħħa lis-​sarrafa tal-​flus rgħiba minn ġot-​tempju. (Mattew 21:​12, 13) Iżda, għamlitu bla qalb lil Ġesù l-​mibegħda li kellu għall-​korruzzjoni u r-​regħba? Xejn affattu! Ġesù kien magħruf għall-​ġentilezza li wera m’oħrajn. Tabilħaqq, hu saħansitra qabbel lilu nnifsu maʼ qroqqa li “tiġbor il-​flieles tagħha taħt ġwinħajha.”​—Luqa 13:34.

Qoxra Iebsa jew Saħħa Ġewwinija?

Il-​Kristjani veri huma inkuraġġiti biex jimitaw lil Kristu billi jilbsu “l-​personalità l-​ġdida li nħolqot skond ir-​rieda t’Alla.” (Efesin 4:​20-24) Jintqalilna biex ninżgħu “l-​personalità l-​qadima bid-​drawwiet tagħha,” bħall-​granċ li jwaqqaʼ l-​qoxra l-​qadima sabiex ikun jistaʼ jikber. (Kolossin 3:9) Iżda, kuntrarju għall-​granċ li malajr jerġaʼ jwebbes il-​qoxra tiegħu wara li jkun waqqaʼ l-​qoxra l-​qadima, aħna niġu kmandati biex nilbsu b’mod permanenti ‘sentimenti profondi taʼ mogħdrija u qalb tajba u sabar fit-​tul.’ (Kolossin 3:12) Għalhekk, waħda mill-​kwalitajiet li jispikkaw fina għandha tkun il-​ġentilezza.

Li nilbsu kwalitajiet teneri m’huwiex sinjal taʼ dgħjufija. Għall-​kuntrarju, dan jirrikjedi li nsiru “setgħanin bil-​qawwa permezz taʼ l-​ispirtu [taʼ Ġeħova] fil-​bniedem li [aħna] minn ġewwa.” (Efesin 3:16) Per eżempju, raġel jismu Lee jgħid: “Ftit ilu kont bniedem brutali u mill-​agħar. Anki l-​apparenza tiegħi kienet taʼ theddida, għax kelli diversi partijiet taʼ ġismi mtaqqbin bil-​body piercing. Kont determinat li nagħmel ħafna flus u ma kontx naħsibha darbtejn biex nuża kliem baxx u vjolenza biex nieħu dak li rrid. Ma kellix mogħdrija.” Minkejja dan, Lee beda jistudja l-​Bibbja maʼ wieħed minn sħabu tax-​xogħol u sar jaf lil Alla Ġeħova u sar iħobbu. Hu neżaʼ l-​personalità l-​qadima tiegħu u tgħallem jikkontrolla ruħu. Issa jesprimi mħabbtu għan-​nies billi, bħala volontier, juża mill-​ħin tiegħu biex jgħinhom jistudjaw il-​Bibbja.

Kien hemm żmien meta anki l-​appostlu Pawlu kien “raġel insolenti” li kien jirrikorri għall-​vjolenza biex jagħmel dak li kellu f’moħħu. (1 Timotju 1:​13; Atti 9:​1, 2) Iżda, meta Pawlu beda japprezza l-​ħniena u l-​imħabba li ntwera mingħand Alla Ġeħova u Ġesù Kristu, hu rreaġixxa billi stinka biex jimita dawn il-​kwalitajiet. (1 Korintin 11:1) Għalkemm Pawlu żamm sod fejn kienu jidħlu l-​prinċipji Kristjani, hu tgħallem ikun ġentili meta kien jittratta m’oħrajn. Tabilħaqq, Pawlu ma kienx iżomm lura milli jesprimi affezzjoni tenera lejn ħutu.​—Atti 20:​31, 36-38; Filemon 12.

Niksbu s-​Saħħa biex Inkunu Ġentili

Kif juru l-​esperjenzi taʼ Lee u taʼ l-​appostlu Pawlu, mhux il-​każ li wieħed jiddgħajjef fil-​karattru tiegħu biex jitgħallem jittratta bil-​ġentilezza m’oħrajn. Fil-​fatt, hu pjuttost l-​oppost. Wieħed għandu bżonn taʼ saħħa vera biex jibdel il-​ħsibijiet u l-​azzjonijiet tiegħu u biex jiġġieled it-​tendenza umana li ‘jrodd ħsara bi ħsara.’—Rumani 12:​2, 17.

Aħna wkoll nistgħu nitgħallmu nuru sentimenti profondi taʼ mogħdrija billi naqraw il-​Kelma t’Alla regolarment u nimmeditaw fuq l-​imħabba u l-​ħniena li Alla Ġeħova u Ibnu, Ġesù Kristu, diġà wrew magħna. Billi nagħmlu hekk, inħallu l-​qawwa tal-​Kelma t’Alla trattbilna qlubna. (2 Kronaki 34:​26, 27; Ebrej 4:​12) Minkejja l-​ambjent taʼ familja li ġejjin minnu jew minkejja kemm għaddejna minn esperjenzi ħorox fil-​ħajja, nistgħu nitgħallmu nkunu “ġentili maʼ kulħadd.”​—2 Timotju 2:24.

[Stampa f’paġna 26]

Missier tajjeb ikun ġentili maʼ wliedu