Иеремиа
47 Фараон Газыг эзэлж авахаас өмнө Ехова филистчүүдийн талаар Иеремиа зөнчид айлджээ. 2 Еховагийн айлдсан үг нь дараах юм.
«Хойд зүгээс их ус ирж байна.
Хүчтэй ширүүн урссаар ирнэ.
Энэ нутгийг байгаа бүхэнтэй нь,
Энэ хотыг оршин суугчидтай нь хаман одно.
Хүмүүс орилж чарлан,
Энд амьдран суугч бүхэн уйлж гашуудна.
3 Азарганых нь туурайн төвөргөөнөөр,
Дайны тэрэгнийх нь тарчигнах дуунаар,
Дугуйных нь нүжигнэх чимээнээр
Зүрх зориг нь мохсоноос* болж
Аавууд нь хүүхдүүд рүүгээ эргэж ч харалгүй зугтана.
4 Учир нь филистчүүдийг хүйс тэмтрэх өдөр ирж байна.
Тэр үед Тир, Сидоны холбоотнуудын үлдэгсэд устгагдана.
Кафтор* арлаас нүүж ирсэн хүмүүсийн үлдэгсэд буюу филистчүүдийг
Ехова устгана.
5 Газ халзан болно*.
Ашкелон дуугүй болно.
Тал хөндийн үлдэгсэд ээ,
Та нар хэдий болтол биеэ зүсэх юм бэ?
6 Еховагийн илд ээ!
Чи хэзээ тайвшрах юм бэ?
Хуйндаа орооч.
Амарч, дуугүй болооч.
7 Ехова тушаал өгчхөөд байхад
Яаж дуугүй байх вэ?
Тэнгисийн эрэг болон Ашкелонтой байлдуулахаар
Тэрбээр түүнийг явуулсан юм».