सेवाकार्यातील आपली कौशल्ये सुधारण्यासाठी—देवाकडून आनंदाची बातमी! माहितीपत्रकाचा उपयोग करून बायबल अभ्यास सुरू करा

हे का महत्त्वाचं: शिष्य बनवण्यासाठी आपण देवाचं वचन इतरांना शिकवलं पाहिजे. (मत्त. २८:१९, २०) आपल्याला दिलेल्या साधनांचा उपयोग करून आपण इतरांना प्रभावी रीत्या सत्य शिकवू शकतो. त्यांपैकी एक साधन, देवाकडून आनंदाची बातमी! हे माहितीपत्रक आहे. इतरांना सत्य शिकवण्यास मदत करण्यासाठीच हे माहितीपत्रक बनवण्यात आलं आहे. घरमालकाला आपण भेटतो तेव्हा त्या पहिल्या भेटीतच आपण त्याच्याबरोबर बायबलचा अभ्यास सुरू करू शकतो.

हे कसं करावं:

नमुना सादरणीकरणाची उजळणी करा.—आपली राज्य सेवा मार्च २०१३ देखील पाहा.
तुमच्या बॅगमध्ये तुमचं माहितीपत्रक आणि इतरांना देण्यासाठीसुद्धा पुरेशा प्रती घ्या.
घरमालकाबरोबर एक किंवा दोन परिच्छेदांवरच चर्चा करा. त्याचा जास्त वेळ घेऊ नका. दहा मिनिटांत किंवा त्याहूनही कमी वेळात चर्चा संपवा.

या महिन्यादरम्यान हे करून पाहा:

तुम्हाला एक बायबल अभ्यास हवा आहे असं यहोवाला प्रार्थनेत स्पष्ट सांगा. आणि मग, बायबल अभ्यास सुरू करण्यास तसंच सत्य प्रभावी रीत्या सांगता यावं म्हणून तुम्हाला मदत करण्यासाठी त्याला प्रार्थना करा.—फिलिप्पै. २:१३.
कौटुंबिक उपासनेदरम्यान किंवा तुमच्या वैयक्‍तिक अभ्यासादरम्यान, नमुना सादरीकरणाचा सराव करा. असं केल्यास सेवेत गेल्यावर तुम्ही न घाबरता बोलू शकाल आणि अगदी पहिल्या भेटीतच बायबल अभ्यास सुरू करू शकाल.

सावधगिरीचा एक इशारा: तुम्ही दारात उभं राहूनच जर चर्चा करत असाल आणि समजा तुम्हाला जाणवलं की कुणीतरी तुम्हाला सारखं पाहतंय तर, जास्त वेळ चर्चा करण्याचं टाळा.

घरोघर जाता तेव्हा:

“आजची वाईट परिस्थिती पाहून पुष्कळ लोकांना काळजी वाटते. तुम्हाला काय वाटतं यात काही सुधारणा होईल का? [उत्तरासाठी थांबा.] आम्ही लोकांना एक आनंदाची बातमी सांगतो ज्यामुळं लोकांना आशा मिळते. याविषयी मी तुम्हाला शास्त्रातून काही माहिती दाखवू का? [घरमालकानं होकार दिला तर संभाषण पुढं चालू ठेवा.] इथं काही प्रश्‍न दिले आहेत ज्यांची उत्तरं शास्त्रात आहेत.” घरमालकाच्या हातात माहितीपत्रक द्या आणि मागच्या पानावर दिलेल्या विषयांपैकी कोणत्या विषयावर चर्चा करायला आवडेल हे त्याला विचारा. मग तो विषय काढा आणि काही भागावर चर्चा करा. थोडक्यात चर्चा केल्यानंतर पुढील प्रश्‍नावर चर्चा करण्यासाठी पुनर्भेटीची व्यवस्था करा.