सेवा कार्यातील आपली कौशल्ये सुधारण्यासाठी—चिडलेल्या घरमालकाबरोबर शांतीनं वागा

हे का महत्त्वाचं: आपल्याला सेवेत भेटणारे बहुतेक लोक आपल्याशी आदरानंच बोलतात. पण काही लोक आपल्यावर चिडतील असं येशूनं आधीच सांगितलं होतं. (योहा. १७:१४) घरमालक आपल्यावर चिडला तर आपण आश्‍चर्य वाटून घेऊ नये. अशा परिस्थितीत यहोवाला आवडेल अशा प्रकारे आपण वागलं पाहिजे. (रोम. १२:१७-२१; १ पेत्र ३:१५) यामुळं परिस्थिती हाताबाहेर जाणार नाही. शिवाय, त्या घरमालकाला आणि आपल्याकडं पाहणाऱ्‍या इतर लोकांना आपल्याबद्दल साक्ष मिळेल. पुढच्या वेळी त्यांच्याकडे जर कोणी यहोवाचे साक्षीदार गेलेच तर ते त्यांचं बोलणं कदाचित ऐकून घेतील.—२ करिंथ. ६:३.

हे कसं करावं:

घाबरून जाऊ नका, तर शांत राहा आणि तुम्ही चिडू नका. यामुळं तणावपूर्ण परिस्थिती शांत होईल. घरमालक तुम्हाला जर काही उलट-सुलट बोलत असेल तर ते मनाला लावून घेऊ नका. (उप. ७:९) तो कदाचित त्याच्या समस्येमुळं वैतागला असेल किंवा तुम्ही त्याच्या घरी चुकीच्या वेळी गेल्यामुळं तुमच्यावर भडकला असेल. आणि त्याला आपला संदेश ऐकून राग आला असला तरी, वाईट वाटून घेऊ नका. त्याला कदाचित आपल्या संदेशाबद्दल चुकीची माहिती मिळाली असेल.—२ करिंथ. ४:४.
त्याच्याशी सौम्यतेनं व आदरानं बोला. (नीति. १५:१) तुमच्यामुळं कदाचित त्याची झोपमोड झाली असेल. किंवा तुम्ही त्याच्या कामात व्यत्यय आणला असेल. आपण चुकीच्या वेळी गेलो म्हणून त्याची क्षमा मागतो; जे काम आपण करतो त्याबद्दल त्याची क्षमा मागत नाही. त्यानं कदाचित आपल्याविषयी काहीतरी चुकीचं ऐकलं असेल. असं असेल तर आपण म्हणू शकतो: “तुम्हाला राग येणं साहजिक आहे. पण, तुमचा गैरसमज झाला आहे. मी त्याबद्दल थोडं बोललं तर चालेल का?” कदाचित काही लोक असा आक्षेप घेतील की तुम्ही धर्मांतर करता. अशा वेळी आपण त्यांना म्हणू शकतो: “तुम्हाला असं का वाटतं ते मी समजू शकतो. पण आम्ही प्रचार का करतो त्याचं कारण तुम्हाला माहीत करून घ्यायला आवडेल का?” किंवा चर्चला जाणारे म्हणतील तुम्ही येशूला मानत नाही. त्यांना आपण म्हणू शकतो: “पुष्कळ लोकांना असं वाटतं. पण आम्ही येशूला मानतो किंवा नाही, याबद्दल एखादं वचन बायबलमधूनच दाखवलं तर चालेल का?”
घरमालक खूपच चिडला असेल तर त्याच्याशी काहीही न बोलता तिथून निघालेलंच बरं. तो जर म्हणत असेल की इथं पुन्हा कोणी यहोवाचा साक्षीदार आला नाही पाहिजे, तर आपण त्याला ही खातरी देऊ शकतो, की त्याच्या इच्छेचा आम्ही मान राखू.

या महिन्यादरम्यान हे करून पाहा:

तुमच्या कौटुंबिक उपासनेच्या वेळी या विषयाचा सराव करा.
चिडलेल्या घरमालकाच्या घरून निघाल्यावर, तुमच्या सोबत असलेल्या बांधवाबरोबर किंवा बहिणीबरोबर, तुम्ही ही परिस्थिती आणखी चांगल्या प्रकारे कशी हाताळू शकला असता याची चर्चा करा.