रोमकर १०:१३—‘प्रभूचे नाव घेऊन त्याचा धावा करा’

“जो कोणी यहोवाचं नाव घेऊन त्याला हाक मारेल, त्याला वाचवलं जाईल.”—रोमकर १०:१३, नवे जग भाषांतर.

“जो कोणी प्रभूचे नाव घेऊन त्याचा धावा करील त्याचे तारण होईल.”—रोमकर १०:१३, द होली बायबल मराठी—आर.व्ही.

रोमकर १०:१३ याचा अर्थ

देव भेदभाव करत नाही. तो सगळ्या लोकांना त्यांचा जीव वाचवायची आणि सर्वकाळाचं जीवन मिळवायची संधी देतो; मग ते कोणत्याही राष्ट्राचे किंवा वंशाचे असोत, गरीब किंवा श्रीमंत असोत. पण त्या संधीचा फायदा करून घेण्यासाठी आपण यहोवाचं नाव घेऊन त्याला हाक मारली पाहिजे. यहोवा हे सर्वशक्‍तिमान देवाचं नाव आहे.a—स्तोत्र ८३:१८.

बायबलमध्ये ‘यहोवाचं नाव घेऊन त्याला हाक मारणं’ याचा अर्थ, फक्‍त देवाचं नाव माहीत असणं किंवा उपासनेत ते वापरणं इतकाच होत नाही. (स्तोत्र ११६:१२-१४) तर देवावर भरवसा ठेवणं आणि मदतीसाठी त्याच्यावर विसंबून राहणं असाही त्याचा अर्थ होतो.—स्तोत्र २०:७; ९९:६.

देवाचं नाव येशूसाठी खूप महत्त्वाचं होतं. त्याने शिकवलेल्या प्रार्थनेच्या सुरुवातीलाच म्हटलं: “हे आमच्या स्वर्गातल्या पित्या, तुझं नाव पवित्र मानलं जावो.” (मत्तय ६:९) येशूने असंही सांगितलं की आपल्याला सर्वकाळाचं जीवन मिळवायचं असेल, तर आपण यहोवाला ओळखलं पाहिजे, त्याचं ऐकलं पाहिजे आणि त्याच्यावर प्रेम केलं पाहिजे.—योहान १७:३, ६, २६.

द होली बायबल मराठी—आर.व्ही. यात रोमकर १०:१३ मध्ये “प्रभू” असं जे म्हटलंय ते खरंतर यहोवाला सूचित करतं असं आपण का म्हणू शकतो? कारण हे वचन योएल २:३२ मधून घेण्यात आलंय आणि तिथे मूळ हिब्रू भाषेत “प्रभू” ही पदवी नाही, तर देवाचं नाव वापरण्यात आलंय.b

रोमकर १०:१३ याचा मागचा-पुढचा संदर्भ

रोमकर १० व्या अध्यायात सांगितलंय, की जर एका व्यक्‍तीचा येशू ख्रिस्तावर विश्‍वास असेल तरच त्याचं देवासोबत चांगलं नातं असेल. (रोमकर १०:९) या गोष्टीला जुन्या करारातली बरीच वचनं दुजोरा देतात. लोकांना तारणाबद्दलचा आनंदाचा संदेश सांगून एक व्यक्‍ती तिचा विश्‍वास “जाहीर” करते. यामुळे इतरांनाही आपला विश्‍वास वाढवायची आणि सर्वकाळाचं जीवन मिळवायची संधी मिळते.—रोमकर १०:१०, १४, १५, १७.