लोक का मरतात?
बायबलचं उत्तर
आपल्या जवळच्या व्यक्तीचा मृत्यू होतो, तेव्हा खासकरून आपल्या मनात प्रश्न येऊ शकतो की आपण का मरतो. बायबल म्हणतं: “मरण आणणारी नांगी म्हणजे पाप.”—१ करिंथकर १५:५६.
सगळे लोक पापी का आहेत आणि ते का मरतात?
पहिल्या मानवी जोडप्याने, आदाम आणि हव्वा यांनी देवाविरुद्ध पाप केल्यामुळे आपला जीव गमावला. (उत्पत्ती ३:१७-१९) देवच “जीवनाचा उगम” असल्यामुळे, त्याच्याविरुद्ध पाप करण्याचा परिणाम मृत्यू होता.—स्तोत्र ३६:९; उत्पत्ती २:१७.
आदामने पापाचा दोष आपल्या सर्व वंशजांना दिला. बायबल म्हणतं: “एका माणसाद्वारे पाप जगात आलं आणि पापाद्वारे मरण आलं आणि अशा रितीने सर्व माणसांमध्ये मरण पसरलं, कारण त्या सगळ्यांनी पाप केलं होतं.” (रोमकर ५:१२) याचा अर्थ, सगळ्यांनी पाप केल्यामुळे सगळे मरतात.—रोमकर ३:२३.
मृत्यू कसा नाहीसा केला जाईल?
देव अभिवचन देतो, की तो लवकरच “मृत्यू कायमचा काढून टाकेल.” (यशया २५:८) पण मृत्यू काढून टाकण्यासाठी त्याला त्याचं मूळ कारण, म्हणजे पाप काढून टाकावं लागेल. देव हे येशू ख्रिस्ताद्वारे करेल. कारण येशू हा ‘जगाचा पाप दूर करणारा’ आहे.—योहान १:२९; १ योहान १:७.